2 Samuel 15 - Chayahuita (Shahui)

Apësaroni paꞌpin yaꞌhuërëtërinsoꞌ

¹ Huaꞌquimiachin quëran Apësaronsoꞌ, aꞌnara ahuëtacaso toronan cahuarionënpitarë chachin paꞌanin. Naporahuaton aꞌnatërápo shonca sontaroꞌsantaꞌ, aꞌpairápaiso marëꞌ acorin.

^2-3 Naporahuaton nani tahuëri tashíramiachin ira yonsanquë ninatárin. Ninano yaꞌcoana pirayan naporin. Aꞌnaquënsoꞌ, nanan yaꞌhuëtopi niꞌton, copirno nontapona paꞌsapi. Inari maꞌsona onpotacasoꞌ noꞌtëquën shaꞌhuitarin. Inapopisopita Apësaronso përasahuaton, intohuaransona huëꞌsapisoꞌ, natanin. Natanpachina: “Ina Israiro huënton quëran caso taꞌa,” itopi. Napotohuachina, inariso itapon: “Quëmarisoꞌ inimiconën noꞌtëquën yashaꞌhuirapiran. Ina pochin mini nicacaso yaꞌhuërin. Copirnoso napoaponahuëꞌ, co nanitarinhuëꞌ natanainquënsoꞌ,” itërin.

⁴ Ina tosahuaton taantarin: “¡Maꞌcha ca iso noꞌpaquë coisë huaꞌan, yaꞌconahuë paya! Inaporahuë naporini, yaꞌipi nanan yaꞌhuëtopisopita caquë huëꞌitonahuëꞌ. ¡Cari tëhuënchinso maꞌsona onpotacasoꞌ, noꞌtëquën shaꞌhuichitohuëꞌ!” itëraꞌpiarin.

⁵ Nontacaiso marëꞌ yaꞌcarihuachinaranta noya sëꞌquërin, iporin, apinorin, napotërin.

⁶ Yaꞌipi copirno paapapisopita inapotëraꞌpiarin. Inapotohuachina, israiroꞌsaso co huachi copirno paꞌyatatonaraihuëꞌ, inaraꞌ paꞌyatapi huachi.

^7-8 Inapochinachin catapini piꞌi naꞌhuërin. Aꞌna tahuëri inasoꞌ, paꞌpin paaparahuaton itapon: —Siria parti Quisoro ninanoquë yacapatapo, chinotaꞌhuaso marëꞌ Yosë shaꞌhuitërahuë: “Quëma nohuanton Quirosarinquë panantarahuë naporini, maꞌsharoꞌsa tëpato, chinochitënquënhuëꞌ,” itërahuë. Napotërahuëso chachin ina catahuarinco. Napoaton quëtoco canta Ipron ninanoquë paato, Yosë shaꞌhuitërahuësoꞌ nii, itërin.

⁹ —Noya paquë conpa, itërin paꞌpini. Napotohuachina, inaso inaquë paꞌnin.

¹⁰ Coꞌhuara inatohua paꞌshátëraponhuëꞌ, comisionoꞌsa aꞌparin. Yaꞌipi Israiro huëntonoꞌsa iso pochin anitotacaiso marëꞌ aꞌparin: “Tronpita pihuipisoꞌ natanaramaꞌ. Ina natanpatamaꞌ: ‘Ipronquë Apësaron israiroꞌsanpoa huaꞌanëntiinpoaso marëꞌ copirno nani acopi,’ tosaramaꞌ,” itërin.

¹¹ Naporahuaton cato pasa quëmapiꞌsa pochin Quirosarin quëran inatohua quëparin. Inapitasoꞌ, co piꞌpisha tëranta yonquirinso nitotaponaraihuëꞌ imapi: “Yosë imaton noya nisarin,” taꞌtonaꞌ, imapi.

¹² Naporahuaton Aitohuiro itopisonta amatërin. Inasoꞌ, copirno ayonquinaꞌpi. Quiro ninano itopiquë yaꞌhuërin. Maꞌsha Yosë marëꞌ tëparinso aꞌnosoꞌ, caꞌtanacaso marëꞌ amatërin. Napotohuachina inarinta imarin. Inapoatona naꞌcon naꞌcon israiroꞌsa Apësaron imasapi. Ina naꞌcon naꞌcon imatona chini chiníquën nanantapi huachi.

Tapi Quirosarin quëran taꞌarinsoꞌ

¹³ Naporoꞌ aꞌnari paꞌsahuaton Tapi shaꞌhuitoonin: “Naꞌcon naꞌcon israiroꞌsa inimicotatënën Apësaron imasapi,” itërin.

¹⁴ Napotohuachina, inaso sontaro huaꞌanoꞌsa Quirosarinquë yaꞌhuëapiso camairin: —Aꞌnaroáchin paꞌahuaꞌ. Coꞌsoꞌ inapohuatëhuahuëꞌ, Apësaron minsëarinpoaꞌ. Manóton paꞌahuaꞌ. Icantatonpoa yaꞌipi iso ninanoquë yaꞌhuërëhuaso sahuëniquë tëpahuachinpoaꞌ, itërin.

¹⁵ Napotopirinhuëꞌ, inapitariso copirno itaponaꞌ: —Quiyasoꞌ sinioro copirno maꞌsona quëma camaitëranso nisarai, itopi.

¹⁶ Copirnosoꞌ, shonca cosonanënpita pëinën tapatacaiso marëꞌ acorin. Aꞌnapitaso nipirinhuëꞌ, yaꞌipi quiquirin.

¹⁷ Tapisoꞌ, caꞌtaninsopitarë chachin Quirosarin quëran pipirin. Paꞌsapirinhuëꞌ, yaꞌnatooninso pëi nininquë chiniconin.

¹⁸ Sontaro huaꞌanoꞌsanënpitantaꞌ, ina pirayan chiniconpi. Quiritoroꞌsaꞌ, piritoroꞌsaꞌ, inapitaso copirno aꞌpainaꞌpiroꞌsaꞌ. Inapitasoꞌ saota pasa sontaroꞌsa Cato ninano quëran huëꞌpisopitarëꞌ naꞌhuëatonaꞌ, quëchitapi.

¹⁹ Naporoꞌ Copirnosoꞌ, aꞌnara ina ninanoquë yaꞌhuërinso quëmapi përarin. Inasoꞌ, Itai itopi. Përasahuaton itapon: —¡Co quëmasoꞌ quiyarëꞌquën huëcamaso yaꞌhuërinhuëꞌ! Paquë paantaton nasha copirnorëꞌquën quëparitëquëꞌ. Quëmasoꞌ nisha piyapinquën. Noꞌpanën quëran ocoirinën niꞌton, yacaparancoi.

²⁰ Quëmasoꞌ, co huaꞌqui yacapayátërarancoihuëꞌ. Naporahuaton co ca tëranta nitochatërarahuëꞌ insëquësona pacaꞌhuaisoꞌ. Napoaton co nanitërahuëꞌ quëpaꞌhuanquënsoꞌ. Paquë paantaton quëmopiparinpita Quirosarinquë quëpanantaquëꞌ. Sinioro caꞌtanatënquën catahuainquën. Ama nanianchinquësohuëꞌ tënahuë, itërin.

²¹ Napotohuachina, inariso itapon: —Sinioro yaꞌhuërin niꞌton, noꞌtëquën shaꞌhuitaranquën. Insëquësona quëma nipatan, inaquë canta nisarahuë. Nanpihuatan inaquë cantaꞌ, quëmarëꞌco nanpiarahuë. Chiminpatan inaquë cantaꞌ, quëmarëꞌco chiminarahuë, itërin.

²² Napotohuachina Tapiri itapon: —Napoahuarëꞌ huëquë nipachin, itërin. Inapoaton Itaisoꞌ, piyapinënpitarë chachin Tapi imarin. Aꞌnapitarë chachin imapi.

²³ Tapisoꞌ caꞌtaninsopitarë chachin co napion ancantopi. Papona pochin naꞌnë́raapi. Inapochinachin Sitron iꞌsha pëntontopi. Aꞌnapitaꞌton quëchitopi. Piquëran copirnosoꞌ, pëntonin. Inapoatona piyapinënpitasoꞌ quëchitopi. Quëchitatona inotëro parti ira paꞌninsoꞌ paꞌtopi.

²⁴ Corto huaꞌan Satoco itopisontaꞌ, Tapi imasarin. Yosërëꞌ anoyatopiso caposonën quëpanaꞌpiroꞌsarë chachin yaꞌipi paꞌsapi. Inahuaso nihuiroꞌsaꞌ. Yosë caposonënso quësáponaraihuëꞌ, Apiataro corto huaꞌani aꞌpaicaso marëꞌ iraquë acopi. Quirosarinquë yaꞌhuëpisopita yaꞌipi noquitai huarëꞌ, inari niꞌsarin.

²⁵ Nani yaꞌipi paꞌpachinara, Copirnori Satoco itapon: —Yosë caposonën ninanoquë quëpaantaquëꞌ. Sinioro nosoroatonco catahuahuachincosoꞌ, huënantahuato niantapo. Acorëhuaquë chachin niantapo.

²⁶ Napoaponahuëꞌ, co huachi yacatahuahuachincohuëꞌ, noyatapon. Maꞌsona ina nohuantërinsoꞌ nichinco, itërin.

²⁷ Napotahuaton itaantarin: —Apiatarorëꞌquën ninanoquë paantacoꞌ. Huiꞌnaonta Aimasë itëransoꞌ, paantaꞌin. Apiataro huiꞌnin Conatan itërinsontaꞌ, paꞌin. Inaquë maꞌsona onporapiso nëhuëcontacoꞌ.

²⁸ Napoasëmaꞌ, Cortaniiꞌ yaꞌcariꞌ inotëro nininquë ninaranquëmaꞌ. Ninanoquë maꞌsona onporapisoꞌ anitotamacoso marëꞌ, inaquë ninaranquëmaꞌ. Ina piquëran Cortaniiꞌ pëntontarahuë, itërin.

²⁹ Napotohuachina, inahuaso Yosë caposonën Quirosarinquë quëpaantapi. Naporahuatonaꞌ, inaquë quëparitopi.

³⁰ Tapisoꞌ Oriposë motopiaꞌhua nanpëtacaso marëꞌ sapatën ocoirin. Ocoirahuaton iꞌnanpirantë nanpëontarin. Motëonta moꞌshiquë nipashimototahuaton, naꞌnërëꞌnachin nanpërin. Yaꞌipi imapisopitanta inapochachin nicatona paꞌsapi. Sëtopisoꞌ nitotacaiso marëꞌ napopi.

³¹ Aꞌnari Tapi shaꞌhuitërin: “Aitohuironta Apësaron catahuarin,” itërin. Ina natanaton, inaso Sinioro nontërin: “Aitohuirori maꞌsona nicacasoꞌ, Apësaron ayonquiarin. Ayonquihuachin, quëma nohuanton ama natëinsohuëꞌ,” itërin.

³² Oriposë motopiaꞌhua huiꞌnimotënquë israiroꞌsa Yosë chinotopiquë yaꞌhuërin. Tapi inaquë pomosontahuachina, aꞌnara Arqui piyapi Osai itopisoari nacapirin. Inasoꞌ aꞌmorinso osharahuaton, motëonta moꞌshiquë nipashimototërin.

³³ Tapiri itapon: —Quëmaso imapatanco, saca sacaiꞌ taꞌacaꞌhuaso nisarin.

³⁴ Quirosarinquë tëhuëchinsoꞌ paantaquëꞌ. Inaquë paꞌsahuaton Apësaron iso pochin nontëquëꞌ: “Caso quëma piyapinënco nisarahuë. Tata catahuarahuëso pochachin quëmanta catahuainquën,” itëquëꞌ. Napotohuatan, ina piyapinën nicacaso marëꞌ nohuantarinquën. Inapoaton Aitohuirori maꞌsona nicacaso marëꞌ ayonquihuachin, quëmarisoꞌ nisha ayonquiquëꞌ.

³⁵ Satoco, Apiataro, inapitaso inaquë nisapi. Nani inapita shaꞌhuitërahuë maꞌsona onpocaisoꞌ yonquihuachinaꞌ, shaꞌhuitiinacoso marëꞌ. Napoaton quëmari inapita shaꞌhuitaran, maꞌsona Apësaron onpotiincoso yonquirinsoꞌ.

³⁶ Satoco, Apiataro, inapita huiꞌninpitanta inaquë nisapi. Aimasë, Conatan, inapita. Inapita quëran yaꞌipi yashaꞌhuitëramacoso anitotoco, itërin.

³⁷ Napotohuachina Osaisoꞌ, Quirosarinquë panantarin. Apësaron piyapinënpitarë chachin yaꞌconasoiꞌ, inanta yaꞌcoontarin.