2 Samuel 14 - Chayahuita (Shahui)

Tapi Apësaronë nanan anoyatopisoꞌ

²¹ Napotohuachina aꞌna tahuëri Tapisoꞌ Coapo itapon: —Niꞌquëꞌ. Natanancosoꞌ, nani nohuantërahuë. Apësaron isëquë huënantacaso marëꞌ paapaquëꞌ. Paaparahuaton nontoonquë huënantaꞌin, itërin.

²² Napotohuachina, inaso Tapi mosharin. Isonin quëran noꞌpaquë huarëꞌ monshorahuaton mosharin. Ina quëran copirno noya yaꞌhuëcaso marëꞌ shaꞌhuitaton itapon: —Sinioro noya catahuainquën. Tëhuënchachin noya niꞌnancosoꞌ, ipora tahuëri anitotëranco. Quëmasoꞌ copirnonquën nipiranhuëꞌ, shaꞌhuitëranquënsoꞌ nicaton anitotëranco, itërin.

^23-24 Napotahuaton, Coaposo pacacaso marëꞌ huanirin. Naporoꞌ Tapiri itaantapon: —Apësaron quëpatan, ama niꞌincosohuëꞌ. Pëinënquë noꞌtëin, itërin. Coaposo Quisoroquë paꞌsahuaton, Apësaron quënanconin. Inaquë nontahuaton Quirosarinquë quënantarin. Nani canquintahuachina, Apësaronso yaꞌhuërinquë noꞌtëërin. Co paꞌpin niꞌninhuëꞌ.

²⁵ Apësaronso yaꞌipi israiroꞌsa quëran, noya noyapin niꞌtërin. Ina marëꞌ naní quëran paꞌyatopi. Co máquën tëranta tëhuërinhuëꞌ.

²⁶ Nani piꞌiquë aꞌnaroíchin niyaꞌitërin. Quëquën niꞌton, pëꞌhuaton niyaꞌitërin. Napotohuachina ainënsoꞌ, cato quiro naꞌcon quëꞌnin. Pëꞌtënan Copirno nohuantërinsoanpiquë pëꞌtënpachinara, inanapo quëꞌnin.

²⁷ Naporahuaton cara huiꞌninpita quëmapiꞌsa yaꞌhuëtërin. Aꞌnara sanapinta noyápiroyanchin yaꞌhuëtërin. Inasoꞌ, Tamara itërin.

²⁸ Cato piꞌipi pochin Quirosarinquë yaꞌhuërin. Napoaponahuëꞌ, co paꞌpin niꞌshátërarinhuëꞌ.

²⁹ Napoin quëran Coapo nontacaso marëꞌ piyapinën aꞌparin: “Copirno shaꞌhuitëquëꞌ, inarëꞌco nanan anoyachi,” tënin huaꞌanëhuë. Taꞌcaso nanan aꞌpatërin. Napotopirinhuëꞌ, inaso co nohuantërinhuëꞌ pacacasoꞌ. Napohuachina naquëranchin nanan aꞌpataantarin. Naporonta co nohuantaantarinhuëꞌ.

³⁰ Napohuachina Apësaronsoꞌ, piyapinënpita camairin: —Niꞌquëꞌ. Coapo iminën caquën pirayan yaꞌhuërin. Sipataráchin shaꞌninsoꞌ nani cayarin. Paatoma ina iꞌchinpitocoꞌ, itërin. Natanahuatonaꞌ, inahuaso iꞌchinpitonpi.

³¹ Inapotohuachinara Apësaron pëinënquë aꞌnaroáchin Coapo paꞌnin: —¿Onpoatonta piyapinënpita iminëhuë iꞌchinpitërinaco? itërin.

³² —Poꞌpin yonquiato naporahuë: “¿Maꞌmarëcha Quisoro quëran huëꞌnahuë nicaya? inaquë nisarahuë naporini, noya noya niitohuëꞌ,” tënahuë. Ina Coapori copirno shaꞌhuichin taꞌto, piyapinëhuë catoro aꞌpatopiranquënhuëꞌ, co huëꞌnanhuëꞌ. Iporaso huachi shaꞌhuitonquë copirno niꞌchinaꞌi. Tëhuërahuëso marëꞌ yatëpahuachinco tëpachinaꞌinco, itërin.

³³ Napotohuachina, inaso, copirno shaꞌhuitoonin. Ina natanaton, inaso Apësaron amatërin. Paꞌpinquë canquihuachina, isonin quëran noꞌpaquë huarëꞌ monshorahuaton mosharin. Inarinta apinorahuaton nontërin.