2 Samuel 12 - Chayahuita (Shahui)

Natani Tapi pënëninsoꞌ

¹ Siniorori Natan camairin Tapi nontacaso marëꞌ. Cantoonahuaton itapon: —Aꞌna ninanoquë cato quëmapiꞌsa yaꞌhuëpi. Aꞌnasoꞌ, maꞌhuan. Aꞌnaso nipirinhuëꞌ, co maꞌhuanhuëꞌ.

² Maꞌhuansoꞌ, notohuaroꞌ ohuicaroꞌsaꞌ, ohuacaroꞌsaꞌ, inapita yaꞌhuëtërin.

³ Aꞌnaso nipirinhuëꞌ, aꞌnaíchin ohuicaꞌhua paꞌaninsoꞌ yaꞌhuëtërin. Inaora chachin nocomarin niꞌton, aꞌshinin. Huiꞌninpitarë napopináchin ohuicaꞌhuanta soꞌsorin. Inaora cosharonën chachin aꞌcarin. Oꞌorinsoꞌ oꞌshitërin. Ina pirayan huëꞌërin. Naporin. ¡Huiꞌnin sanapiaꞌhua nosororinso pochachin nosororin!

⁴ Aꞌna tahuëri maꞌhuansoꞌ, aꞌna quëmapiri nicapon aquëran huëcapairin. Ina aꞌcacaso marëꞌ inasoꞌ, co nohuantërinhuëꞌ pëꞌtahuanënpita tëpacasoꞌ. Co ohuicanën co ohuacanën yatëparinhuëꞌ. Co inapita yatëpatonhuëꞌ, co maꞌhuanhuëꞌ nininso ohuicanën matërin. Ina atëpatahuaton, cantiirinso quëmapi aꞌcacaso marëꞌ apoꞌmotërin, itërin.

^5-6 Ina natanaton, Tapiso paꞌpi noꞌhuitërin. Maꞌhuan naporinso marëꞌ noꞌhuitaton, Natan itapon: —¡Co nosoroatonhuëꞌ napotërin niꞌquëhuarëꞌ, pahuërëchin. Catapini ohuica ina marëꞌ pahuërëtacaso yaꞌhuërin. Naporahuaton, Yoscoarëꞌ noya chiminacasoꞌ! itërin.

^7-8 Naporoꞌ Natani itapon: —Quëma mini, ina maꞌhuan pochin ninan. Naporin Sinioro chinotërëhuasoꞌ: “Israiroꞌsa copirnonëna nicamaso marëꞌ carinquën huayonanquën. Saono quëran nichaꞌëranquën. Ina pëinën, saꞌinpita, inapita quëtëranquën. Yaꞌipi israiroꞌsanta huaꞌanëntamaso marëꞌ quëtëranquën: ‘Co inaíchin nanitërincohuëꞌ,’ tënanta nicaipoꞌ, aquë aquëtë quëchitënquënhuëꞌ.

⁹ Nani carima pënënanquëmaꞌ: Nimapatamaꞌ ama nitëhuananpitocosohuëꞌ, itëranquëmaꞌ. Naporahuaton ama tëpatocosohuëꞌ itëranquëmaꞌ. Napo pënëntërahuësoꞌ co nocanacaso yaꞌhuëpirinhuëꞌ, nocanan. ¡Inapoaton co costarahuësohuëꞌ ninan! Quëma camaitëran quëran Oriasë amonoꞌsari tëparin. Inapotahuaton saꞌin matëran.

¹⁰ Ina macaton nocananco niꞌquëhuarëꞌ, co huachi huiꞌnanpita noyasha yaꞌhuëapihuëꞌ. Itohuara capini maꞌsha nionpotáponaꞌ.

¹¹ Caso Sinioroco niꞌton, shaꞌhuitaranquën: Ca nohuanton aꞌna tahuëri quëmopinënpita chachin maꞌsha onpotatënënquën aparisitarinënquën. Ca nohuanton aꞌnara quëmopinën, cosonanënpita osërëtarinquën. Osërëtahuatënquën yaꞌipi niꞌtërantapaiquë ichiquëhuënapon.

^12-13 Quëmasoꞌ poꞌoana quëran naporan. Caso nipirinhuëꞌ, yaꞌipi israiroꞌsa niꞌtonënquë tahuëri anaꞌintaranquën,” tënin Sinioro, itërin. Napotohuachina: “Tëhuënchachin naporahuë,” taꞌton, Natan itapon: —Tëhuënchachin co Sinioro natëtohuëꞌ oshahuanahuë, itërin. Napotohuachina inari itapon: —Inaporanso marëꞌ chiminamaso yaꞌhuëpirinhuëꞌ, Sinioro co ina pochin anaꞌintarinquënhuëꞌ.

¹⁴ Napoaponahuëꞌ, co noyahuëꞌ ninanso marëꞌ inimiconënpitari Yosë nocanpi. Inapotopi niꞌton, huiꞌnan nasha huaꞌhuatërinsoꞌ, chiminacaso yaꞌhuërin, itërin.

¹⁵ Napotahuaton, Natanso yaꞌhuërinquë paantarin. Ina paꞌpachina, Sinioro nohuanton Oriasëcoꞌ saꞌinquëya huiꞌnahuaninsoꞌ, chiníquën caniorin.

¹⁶ Naporoꞌ Tapi ina marëꞌ Yosë nontërin. Ina marëꞌ nontaton co coshatërinhuëꞌ. Tashinta nipachina, co huachi huëꞌërinquë huëꞌërinhuëꞌ. Noꞌpaquë quëhuënaton tahuërianpitárin.

¹⁷ Inaporápachina, ansianoroꞌsa pëinënquë yaꞌhuëpisopitari huanicaso shaꞌhuitopi. Shaꞌhuitápirinahuëꞌ, co nohuantërinhuëꞌ. Co yahuanirinhuëꞌ. Co inapitarëꞌ yacoshatërinhuëꞌ. Naporárin.

¹⁸ Canchisë tahuëri quëran huaꞌhuasha chiminin huachi. Piyapinënpitariso nipirinhuëꞌ, tëꞌhuatopi shaꞌhuitacaisoꞌ: “Huaꞌhuasha nanpipon chachin nontopirëhuahuëꞌ, sëtaton co yanataninpoahuëꞌ. ‘Nani chiminin,’ itohuatëhuaꞌ, naꞌcon naꞌcon sëtapon. ¡Niꞌquëna maꞌsha nionpotohuachin!” nitopi.

¹⁹ Inaso napoaponahuëꞌ, ina pochin ninontopisoꞌ niꞌnin. Ina nicaton: “Nani chimimara,” tënin yonquinënquë. Napoaton piyapinënpita natanin: —¿Nani huaꞌhuishin chiminin? itërin. —Nani chiminin taꞌa, itopi.

²⁰ Ina natanahuaton, huanirin. Amarahuaton nitaparin. Pimóton nininsoꞌ pashirin. Naporin. Inapo nitaparahuaton, Yosë caposonën acocaso marëꞌ nëꞌmëtë pëi nipiquë yaꞌconin. Inaquë Yosë chinotahuaton, pëinënquë paantarin. Capacaso natantohuachina, acotiipi caꞌnin.

²¹ Naporoꞌ piyapinënpitari itaponaꞌ: —Canpoaso nichimiyantohuatëhuara, co coshatërëhuahuëꞌ. ¿Onpoatonta ipora quëmasoꞌ, coshatëran, oꞌoran, naporan? Huaꞌhuasha nanpiápon, ina marëꞌ sëtaton co coshatëranhuëꞌ. ¡Napoaponahuë ina chiminpachina, quëhuënan quëran huanirahuaton coshatëran! itopi.

²² Napotohuachinara Tapiri itapon: —Huaꞌhuasha nanpipon co coshatatorahuëꞌ Yosë nontërahuë, naꞌnërahuë, naporahuë: “Tapona Sinioro nosoroatonco huiꞌnahuë anoyatërin,” taꞌto naporahuë.

²³ Iporasoꞌ nani chiminin niꞌquëhuarëꞌ: ¡Maꞌmarëta aquëtë huarëꞌ inapoisoꞌ! Co caso nanitërahuëꞌ ananpitaꞌhuasoꞌ. Aꞌna tahuëri chiminpato, quënancontarahuë. ¡Inasoꞌ, co huachi isoroꞌpaquë yaꞌnoaponhuëꞌ! itërin.

Saromon huaꞌhuatërinsoꞌ

²⁴ Pitisapintaꞌ, huaꞌhuin marëꞌ paꞌpi sëtërin niꞌton, Tapiri noyasha nontahuaton achinicancanin. Ina quëran oshaquëran huaꞌhuaantarin. Huaihuachina Saromon itërin. Inasoꞌ huaꞌhuasha nasitohuachina Siniorori noya nicaton nosororin.

²⁵ Ina nosororinsoꞌ, Natan quëran Tapi anitotërin. Ina natanaton huiꞌnin iso pochin nohuitërin: Quititiasë itërin.

^26-31 (-)