2 Samuel 11 - Chayahuita (Shahui)

Tapi oshahuaninsoꞌ

¹ Piꞌipi tahuëriꞌsa yananiriapasoꞌ, copirnoroꞌsa ahuëtapona yápaꞌpi. Ina tahuëriꞌsa Tapinta sontaronënpita ahuëtacaiso marëꞌ aꞌparin. Yaꞌipi sontaronënpita huaꞌanënsoꞌ, Coapo itopi. Aꞌnapita huaꞌanoꞌsarë chachin paꞌsahuatonaꞌ, amonoꞌsa canaconpi. Naporahuaton, Napa ninano itopisoꞌ ahuëcaiso marëꞌ tancapitoonpi. Tapiso napoaponahuëꞌ, Quirosarinquëranchin quëparitërin.

² Aꞌna tahuëri iꞌhuararahuasoꞌ, inaso chinotërin quëran huënsërin. Pëinën aipi nanpëontarahuaton, costatarin. Costatapon pochin nocotopirinhuëꞌ, aꞌnara sanapi quënanin. Inasoꞌ sanapi noyápiroyanchin. Iꞌiratënënquë amararin.

³ Ina niꞌsahuaton, nohuitacaso marëꞌ piyapinënpita aꞌparin. Inapitaso huëantarahuatonaꞌ, itaponaꞌ: “Inasoꞌ sanapi Iriamo huiꞌnin Pitisapi itopi. Soꞌionta Oriasë itopi. Inasoꞌ, Iti piyapi,” itiipi.

⁴ Napotopirinahuëꞌ, quëshicaisoꞌ camaitërin. Quëpatohuachinara ichiquëhuënin. Inahua sanapiꞌsasoꞌ inachintopiso quënanpachinara, amirotochináchin Yosëri niꞌnin. Pitisapiso inaporinsoꞌ, nasha inquiarin. Nasha inquiaso niꞌton, inapotërin. Nani inapotohuachina, naporo tashi chachin sanapisoꞌ pëinënquë panantarin.

⁵ Inaso napoaponahuëꞌ, cayorin. Inapoaton naporinso nitotacaso marëꞌ Tapi nanan aꞌpatërin.

⁶ Ina nitotaton aꞌnara piyapinën aꞌparin. Coapo huaꞌan shaꞌhuitacaso marëꞌ aꞌparin: “Iti quëmapi Oriasë itopisoꞌ aꞌpatiico,” taꞌcaso nanan aꞌpatërin. Ina natanaton, Coaposo aꞌpatiirin.

⁷ Canquihuachina, onpopinsona amonoꞌsarëꞌ niahuëpiso natanin. Coapo huaꞌan, sontaroꞌsaꞌ, inapitanta onpopinsona yaꞌhuëapiso natanin. Napotohuachina, Oriasëri inapita shaꞌhuitërin.

⁸ Shaꞌhuitohuachina, Tapiri itapon: “Noyapaꞌ. Iporaso huachi pëinënquë paaton nipaꞌmorantëquëꞌ,” itërin. Napotohuachina, Oriasësoꞌ Tapi pëinën quëran pipirin. Nani paꞌpachina, piyapinënpita quëran noya noya cosharo nininsoꞌ aꞌpatërin.

⁹ Napoaponahuëꞌ, Oriasëso co pëinënquë paꞌninhuëꞌ. Copirno pëinën aꞌpaipisopita sontaroꞌsarëꞌ tahuërianpitërin. Copirno pëinën yaꞌcoanaquë tahuërianpitërin.

¹⁰ Oriasë naporinso Tapi shaꞌhuitopi. Shaꞌhuitohuachinara, amataantahuaton natanin: —Iꞌhuara quëmasoꞌ aquëran canquiran. Napoaponahuëꞌ: ¿Onpoatonta co pëinënquë paaton chinotëranhuëꞌ? itërin.

¹¹ Copirnori napotohuachina, inariso itapon: —Yosë chinotërëhuaso caposonën, yaꞌipi Israiro sontaroꞌsaꞌ, Cota huënton sontaroꞌsaꞌ, inapitaso co pëianaquë yaꞌhuëapihuëꞌ. Topinan imënamëaꞌhuaroꞌsaquë yaꞌhuëapi. Huaꞌanëhuë Coapo itopisoꞌ, aꞌnapita huaꞌanoꞌsa acoransopita, inapitanta aipiran huëꞌësapi. Napoaton caso co nanitërahuëꞌ pëinëhuëquë yaꞌconato, yashi yashin chinotaꞌhuasoꞌ. ¿Coshatato, oꞌoto, saꞌahuëroꞌco nicato, capa cancanchi ti? ¡Co onporonta caso sinioro copirno inapochin nisarahuë! itërin.

¹² Napotopirinhuëꞌ, inarisoꞌ itaantapon: —Iporaíchin iꞌhuatëquëꞌ. Tashiraya aꞌpaꞌinquën huachi, itërin. Napotohuachina, Oriasësoꞌ Quirosarinquë chachin niiꞌhuarin.

¹³ Naporo tahuëri copirnori aꞌcarin, oꞌshitërin, napotërin. Naporahuaton naꞌcon naꞌcon oꞌshitaton anoꞌpirin. Nani tashi nipachina, Oriasësoꞌ copirno pëinën quëran pipirin. Pipirahuaton, aꞌpaito sontaroꞌsa pëiquë chinotaantarin. Co pëinënquë paantarinhuëꞌ.

¹⁴ Tahuëririnquë Tapisoꞌ Coapo aꞌpatacaso marëꞌ quirica ninshitërin. Oriasëri chachin quëpatacaso marëꞌ ninshitërin.

¹⁵ Iso pochin taꞌcasoꞌ ninshitërin: “Chini chiníquën niahuërapaiquë Oriasënta quëchichin. Inaquë ahuëtasoꞌ, inimicoroꞌsari tëpacaiso marëꞌ aꞌnapitari taꞌananpiinaꞌ,” itërin.

¹⁶ Copirnori napotohuachina Coaposoꞌ, sontaronënpitarë chachin ninano tancapitërin. Ahuëcaiso marëꞌ inapotahuaton, sontaroꞌsa chini chiníquën ahuëtopisopitarëꞌ, Oriasënta aꞌparin.

¹⁷ Naporoꞌ inimicoroꞌsasoꞌ, ninano quëran pipirahuatona ahuëtopi. Inapohuachinara, aꞌnaquën Israiro sontaro huaꞌanoꞌsa tëpapi. Oriasënta tëpapi.

¹⁸ Ina quëran Coaposoꞌ, Tapi shaꞌhuitacaso marëꞌ aꞌnara sontaro aꞌpatërin. Niahuëpisoꞌ shaꞌhuitacaso marëꞌ naporin.

¹⁹ Coꞌhuara paꞌshátërasohuëꞌ onpopinsona shaꞌhuitacasoꞌ anitotërin: “Ahuëtërëhuasoꞌ, yaꞌipi copirno shaꞌhuitëquëꞌ.

²⁰ Ina natanaton, noꞌhuitapon aꞌna nimara. Noꞌhuitaton: ‘¿Onpoatonta inimicoroꞌsa ninano naꞌcon naꞌcon yaꞌcariramaꞌ? ¡Nani canpita nitotërama paira aipi quëran inimicoroꞌsa maꞌsha tëꞌyanantopisoꞌ!

²¹ Inapoaton mini iráca Tipisi ninano itopiquë Quiropaaro huiꞌnin Apimirico itopisoꞌ tëpapi. Inasoꞌ copirno nipirinhuëꞌ, aꞌna sanapiri paira aipi quëran pëꞌsantoraꞌpi tëꞌyanantaton tëparin. Ina canpitaso nani nitotërama niꞌton, ¡co naꞌcon naꞌcon yaꞌcarichitomahuëꞌ!’ itaponquën. Naporoꞌ quëmarinta napotëquëꞌ: ‘Sontaro huaꞌan Oriasë itopisonta chiminin,’ itëquëꞌ,” itërin.

²² Napotohuachina, inaso paꞌnin. Tapi yaꞌhuërinquë canconahuaton, Coasëri anitotërinso chachin shaꞌhuitoonin. Ina natanaton noꞌhuitërin. Noꞌhuitaton nanan quënaꞌpi itapon: —¿Onpoatonta inimicoroꞌsa ninano naꞌcon naꞌcon yaꞌcariramaꞌ? ¡Nani canpita nitotërama paira aipi quëran inimicoroꞌsa maꞌsha tëꞌyanantopisoꞌ! Inapoaton mini iráca Tipisi ninano itopiquë Quiropaaro huiꞌnin Apimirico itopisoꞌ tëpapi. Inasoꞌ copirno nipirinhuëꞌ, aꞌna sanapiri paira aipi quëran pëꞌsantoraꞌpi tëꞌyanantaton tëparin. Ina canpitaso nani nitotërama niꞌton, ¡co naꞌcon naꞌcon yaꞌcarichitomahuëꞌ! itërin.

²³ Naporoꞌ nanan quënaꞌpiriso itaanpon: —Inimicoroꞌsa ahuëtai marëꞌ pipipisopitasoꞌ, quiya quëran naꞌcon naꞌcon pipipi. Inaso nipirinhuëꞌ, quiyari ninano yaꞌcoanaquë huarëꞌ, paꞌtë paꞌtëtocoanai.

²⁴ Naporoꞌ mini pëꞌchinan camayoroꞌsa inaninacoi. Paira aipi quëran inapotatonacoi aꞌnaquën sontaro huaꞌanoꞌsanënpita tëpapi. Inapitarëꞌ, Oriasënta tëpapi, itërin.

²⁵ Ina natanaton, Tapirisoꞌ itapon: —Shaꞌhuitëquë Coapo ama ina marëꞌ aquëtë sëchinsohuëꞌ. Inachin quiraquësoꞌ. Aꞌnaquën sontaronënpoapitantaꞌ, chiminacaiso yaꞌhuërin. Napoaponahuëꞌ, chini chiníquën cancantaton ina ninanoquë inimicoroꞌsa yaꞌhuërinsoꞌ, ahuëꞌin. Inapita ataꞌhuantaquë huarëꞌ inapochin. Quëmarinta achinicancancontaquëꞌ, itërin.

²⁶ Oriasë saꞌinsoꞌ, soꞌin chimininso natantërin. Ina natantaton, canchisë tahuëri sëtërinsoꞌ imarin.

²⁷ Sëtërinso tahuëriꞌsa naꞌhuërin. Naporoꞌ Tapisoꞌ, pëinënquë quëntacaiso marëꞌ piyapinënpita camairin. Inapotaton manin. Huaꞌhuin noya nasitaponahuëꞌ, Siniororiso Tapi naporinso co noyahuëꞌ niꞌnin.