2 Samuel 1 - Chayahuita (Shahui)

Saono tëpapisoꞌ Tapi natantërinsoꞌ

¹ Tapisoꞌ sontaronënpitarë chachin amaricoroꞌsa ahuërin. Ahuërahuatona canapi. Inapoasoꞌ, Saono cara huiꞌninpitarë chachin nani tëpapirinahuëꞌ, co nitochátërarinhuëꞌ. Inasoꞌ, sontaronënpitarë chachin Sicaraco ninano itopiquë yaꞌhuëpi. Ahuëtopi quëran canquitonaꞌ, nani cato tahuëri inaquë yaꞌhuërapi.

² Tahuëririnquë aꞌnara huiꞌnapi canquirin. Saono sontaronënpitarë chachin yaꞌhuëpi quëran canquirin. Aꞌmorinso nioshatërin. Naporahuaton, motëonta moꞌshiquë nisëꞌmomotorin. Sëtërinsoꞌ nitotai marëꞌ naporin. Canquirahuaton Tapi notënanquë noya nicaton isonin. Isonin quëran noꞌpaquë huarëꞌ monshomarin.

³ Naporoꞌ Tapiri natanin: —¿Intohuaranta huëꞌsaran? itërin. —Huiristinoꞌsari israiroꞌsa yaꞌhuëapiquë yaꞌhuëasoi ahuëquipi. Caso nipirinhuëꞌ, chaꞌërahuë, itërin.

⁴ —¿Maꞌta onpopi? ¡Shaꞌhuitoco canta nitochi! itërin Tapiri. —Huiristinoꞌsari ahuërahuachinara, israiroꞌsaso taꞌapi. Napoaponahuëꞌ, notohuaroꞌ Israiro sontaroꞌsa chiminpi. ¡Saononta Conatanë chachin tëpapi antaꞌ! itërin huiꞌnapiri.

⁵ —Saono, huiꞌninë chachin chiminpisoꞌ: ¿Onpo nitotërantaꞌ? itërin Tapiri.

⁶ —Quiripoa motopiquë topinan paꞌsáporahuëꞌ, Saono quënanahuë. Nansanën paquëaton yachiminárin. Huiristino sontaroꞌsari ohuanpi niꞌton, naporin. Huiristino sontaroꞌsanta ahuëtacaiso toronanoꞌsaquë yaꞌcaritërapi. Cahuarioroꞌsaquë paꞌpisopitantaꞌ, naporapi.

⁷ Naporo chachin tahuërërahuaton quënaninco. Përápachincora: “¿Maꞌta nohuantëran nicaꞌhuasoꞌ?” itërahuë.

⁸ Napotohuatora, inaso nataninco: “¿Ma piyapinquënta quëmasoꞌ?” itërinco. “Caso amaricoco,” itërahuë.

⁹ Naporoꞌ inasoꞌ, manóton tëpaꞌhuasoꞌ camairinco. Nani yachimiánpaton napotërinco.

¹⁰ Napotohuachincora, tëparahuë. Co onpo nanpichináchinhuëꞌ nitopisoꞌ nicato, napotërahuë. Inapotato yancorinsoꞌ, aꞌsontanparinsoꞌ, inapita matërahuë. Quëmasoꞌ huaꞌanëhuënquën niꞌton, quëshintaꞌhuanquënso marëꞌ matërahuë, itaantarin huiꞌnapiri.

¹¹ Ina natanaton, Tapiso sontaronënpitarë chachin aꞌmopiso oshapi. Sëtopisoꞌ nitotai marëꞌ napopi.

¹² Saono, huiꞌninë chachin chiminpiso marëꞌ oshaapona pochin naꞌnërápi. Israiro sontaroꞌsanta canapisoꞌ yonquiatona napopi: “Israiro sontaroꞌsasoꞌ, Sinioro sontaronënpita nipirinahuëꞌ, canapi,” taꞌtonaꞌ, naꞌnëpi. Inapoatona iꞌhuaraya huarëꞌ coshatopi.

¹³ Ina quëran Tapirisoꞌ nanan quënaꞌpi natanapon: —¿Intoparanta quëmasoꞌ? itërin. Itohuachina: —Caso nishaco. Amaricoco taꞌa, itërin.

¹⁴ —Siniorori chachin copirno nicacaso marëꞌ huayoninso tëparan. ¡Ina tëpaton paꞌpi co noyahuëꞌ ninan! itaantarin Tapiri chiníquën nontaton.

¹⁵ Napotahuaton aꞌnara piyapinën përarin. Huëꞌpachina: —¡Tëpaquëꞌ! itërin. Napotohuachina, inariso tëparin.

¹⁶ Ina chiminasoꞌ, Tapiri itapon: —Quëmaora tëhuënënquë chiminaran: “Siniorori copirno huayoninsoꞌ tëparahuë,” tënanso marëꞌ ninaꞌintëran, itërin.

Saonocoꞌ, Conatancoꞌ, inapita yonquiaton Tapi naꞌnëton oshaarinsoꞌ

^17-18 Naporo tahuëri Tapisoꞌ, Saonocoꞌ, Conatancoꞌ, inapita yonquiaton oshaarárin. Naporahuaton Cota huënton israiroꞌsa nitotacaiso marëꞌ aꞌchintacaiso camaitërin. Ina chachin noya ninaꞌpi itopisonta quiricaquë ninshitërinso yaꞌhuëárin. Iso pochin acorin:

¹⁹ “¡Maꞌhuántacha israiroꞌsanpoa ninëhua paya! ¡Huaꞌanënpoapita chachin nipirinahuëꞌ, nani tëpapi! Motopinënpoapitaquë napotopi taꞌa. ¡Chiníquën cancantopirinahuëꞌ, nani tëpapi!

²⁰ Amana Cato ninanoquë ina nanan shaꞌhuicosohuëꞌ. Asocaron cachiroꞌsaquëntaꞌ, ama ina nitochinasohuëꞌ. Huiristino sanapiꞌsa nitotatona capa cancantohuachinaꞌ. Inpio sanapiroꞌsa niponaraihuëꞌ, capa cancantohuachinaꞌ.

²¹ Quiripoa motopiroꞌsanquëmaꞌ, carima ama huachi noya yaꞌhuëcamaso marëhuëꞌ shaꞌhuichinquëmaꞌ: Ama huachi canpitataquë oꞌnanaton shipichinquëmasohuëꞌ. Ama poroncayo tëranta inapochinquëmasohuëꞌ. Inaquë naꞌa israiroꞌsa tëpapi. Chiníquën cancantopisopita huaꞌanoꞌsa nisapirinahuëꞌ, napotopi. Iscotonëna toꞌpi toꞌpitërëso pochin nitopi. Inaquë chachin Saono iscotonën huënarachantërinsoꞌ, sacorin huachi.

²² Saono, Conatan, inapitaso ahuëtapona paꞌpachinara, co topinan ayaimapihuëꞌ. Sahuëninëna quëran inimicoroꞌsa tëpai huarëꞌ huënantapi. Shinërënënaquënta tëpai huarëꞌ huënantapi. Chiníquën cancantopisopita nipirinahuëntaꞌ, co oshatopihuëꞌ tëpaponaꞌ.

²³ Saono, Conatan, canpitaso nosororainquëmaꞌ. Noyanquëma niꞌton, yaꞌipicoi nosororainquëmaꞌ. ¿Nanpipoma co niaꞌporamahuëꞌ pora? ¿Chiminamaquënta co niaꞌporamahuëꞌ paꞌ? ¡Panca onianoꞌsasoꞌ yanponpachinara, chiníquën paꞌpi! ¡Canpitaso napoaponahuë taꞌahuatamara, inapita quëran chini chiníquën paꞌnamaꞌ! ¡Paꞌpiniroꞌsantaꞌ, chiníquënoꞌsaꞌ. Canpitaso napoaponahuëꞌ, chini chiníquënoꞌsa ninamaꞌ!

²⁴ Israiro sanapiꞌsanquëmantaꞌ, Saono yonquiatoma naꞌnëcoꞌ. Ina copirno nicapon maꞌhuanamaꞌ. Maꞌmaro nëꞌmëtë paꞌton nininquë aꞌmopitëraramaꞌ. Noya noya rino piꞌshi quëran nipisoꞌ, aꞌmoramaꞌ. Oro quëran nipisopitantaꞌ, nitapamaso marëꞌ paꞌanamaꞌ. ¡Inapitaso paꞌton nipirinhuëꞌ, naporamaꞌ!

²⁵ ¡Chiníquën cancantopirinahuëꞌ, nani tëpapi! Niahuëpiquë chachin nani tëpapi taꞌa. Conatanochi motopiroꞌsaquë tëpapi.

²⁶ ¡Quëma marëꞌ paꞌpi sëtërahuë taꞌa! Quëmasoꞌ iyahuëmiáchin pochin ninan. Nanpisënquën noya noya nipayarëꞌ. Sanapisoꞌ quëmapi chinpitohuachina, paꞌpi nosororin. Quëmasoꞌ inapita quëran naꞌcon naꞌcon nosororanco.

²⁷ ¡Chiníquën cancantopirinahuëꞌ, nani tëpapi! Huaꞌanënpoapita ahuëtai marëꞌ nisha nisha ohuarapi. Napopirinahuëꞌ, inimiconënpoapitari nani acopitopi huachi,” tënin oshaaton.