2 Reyes 6 - Chayahuita (Shahui)

Imotoꞌ ayanpointarinsoꞌ

¹ Aꞌna tahuëri pënëntonaꞌpiroꞌsari Irisio itaponaꞌ: —Canpoasoꞌ, naꞌaquënpoa yaꞌhuërëhuaꞌ. Napoaton pëi yaꞌhuëtërëhuasoꞌ, co nanirëhuahuëꞌ.

² Cortaniiꞌ yonsanꞌpaꞌ paꞌsahuatoi, inaquë huachi pëicaꞌhuaiso marëꞌ nara mai, topiraihuëꞌ, itopi. —Noyapaꞌ. Paco nipachin, itërin Irisiori.

³ Napoaponahuëꞌ, aꞌnari itapon: —Paꞌa quëmanta caꞌtancoi topirahuë, itërin. —Noyapaꞌ. Paꞌi nipachin, tënin inantaꞌ.

⁴ Napoatona Cortaniiꞌpaꞌ paꞌmapi. Camahuachinara, nararoꞌsa aꞌnërantapi.

⁵ Sacatapirinahuëꞌ, aꞌnaso yonsaisha pëꞌshitëarin. Inapoasoꞌ, imotonën nocoitahuaton anpoquë paꞌnin. Naporo chachin: “Yai,” taꞌton: —¡Maistro! ¡Imotoꞌ aꞌpaitërahuë taꞌa! ¡Topinan aꞌnancharahuëso nipirinhuëꞌ, napotërahuë! itërin.

⁶ —¿Insëchinta paꞌnin? itërin Irisiori. Napotohuachina aꞌnotërin. Naporoꞌ Irisioso nara pëꞌshitërahuaton, inaquë chachin tëꞌyaitërin. Inapotohuachina yanpointarin.

⁷ Yanpointahuachina: —Maquë huachi, itërin. Napotohuachina manin.

Siria sontaroꞌsa atapaninsoꞌ

⁸ Siriaroꞌsasoꞌ, israiroꞌsarëꞌ niahuëantapi. Napoaton Siria copirnosoꞌ, sontaro huaꞌanoꞌsa yáayontonin. Napohuachina insëquësona israiroꞌsa toꞌshitatona ahuëcaiso marëꞌ nishaꞌhuitopi.

⁹ Siniororiso napoaponahuëꞌ, insëquësona yaninatopisoꞌ, Irisio anitotërachinin. Inaso anitotohuachina, Israiro copirno shaꞌhuitacaiso marëꞌ comision aꞌparachinin. Ama inaëchin pacacaiso marëhuëꞌ shaꞌhuitërachinin.

¹⁰ Inapohuachina Israiro copirnosoꞌ, sontaronënpitarë chachin co inatohua paꞌpihuëꞌ. Irisio camaitërinquë paꞌpachinara naꞌaro chaꞌërachinpi.

¹¹ Naporápachinara, Siria copirnoso paꞌpi noꞌhuitërin. Napoaton sontaro huaꞌanoꞌsa përasahuaton: —¿Incháchinta yonquirëhuasopita Israiro copirno shaꞌhuitërachinin? ¡Shaꞌhuirapico nitochi! itërin.

¹² Napotohuachina aꞌnari itapon: —Co insonta naporinhuëꞌ. Irisio inaquë yaꞌhuëaton, yaꞌipi quëma naporansoꞌ, Israiro copirno shaꞌhuitërachinin. Huëꞌëranquë tëranta napohuatan, inaso nitotapon, itërin.

¹³ Ina natanaton, copirnoso piyapinënpita camairin: —Paatoma natantoco insëquësona Irisio yaꞌhuëarin. Ina nitotohuato, macacaiso marëꞌ sontaroꞌsa aꞌpaarahuë, itërin. Napotohuachina, natantoonpi: “Totanquë yaꞌhuëarin,” itohuachinara, inachachin copirno shaꞌhuitopi.

¹⁴ Naporoꞌ notohuaroꞌ sontaroꞌsa inatohua aꞌparin. Aꞌnaquën cahuarioroꞌsaquë, aꞌnaquëonta toronanoꞌsaquë. Aꞌnaquënso ira paꞌtopi. Tashi cantoonahuatonaꞌ, tancapitopi huachi.

¹⁵ Tahuërihuachina, Irisio piyapinënsoꞌ capayatërin. Aipiran paꞌsahuaton niꞌpirinhuëꞌ, paꞌpi notohuaroꞌ sontaroꞌsari ninano tancapitopi niꞌnin. Ina quëran yaꞌcoontarahuaton, huaꞌanën shaꞌhuitërin: —Paꞌpi notohuaroꞌ sontaroꞌsa tancapitërinënpoaꞌ. ¿Onpoaꞌahuata iporaso huachi? itërin.

¹⁶ Napotopirinhuëꞌ, inariso itapon: —Ama tëꞌhuatëquësohuëꞌ. Canpoa catahuarinpoasopitasoꞌ, naꞌcon naꞌcon yaꞌhuëapi, itërin.

¹⁷ Napotahuaton Yosë nontërin: “Sinioro. Quëma nohuanton piyapinëhuë ca niꞌnahuësoꞌ niꞌin,” itërin. Napotohuachina Siniorori catahuarin niꞌton, quënanin huachi. Huaꞌhuayátërahuë sontaroꞌsa quënanin. Cahuarioquë paꞌpisopita, toronanquë paꞌpisopita, inapita motopiquë yaꞌsorápi. Yaꞌipi inapitasoꞌ, pën pochin yaꞌnotona Irisio tahuirapitopi.

^18-19 Siria sontaroꞌsari yaahuërahuachinara, Irisioso Yosë nontërin. Nontaton: “Sinioro, quëma nohuanton isopita somarayainaꞌ,” itërin. Napotohuachina, nataninso chachin Siniorori asomarayarin. Ina quëran pipirahuaton itapon: —Isëquë huëcatomaꞌ, canpitaso chihuëramaꞌ. Quëmapi yonisaramaso yaꞌhuërinquë, carima quëpaꞌinquëmaꞌ, itërin. Napotahuaton Samariaꞌpaꞌ quëparin.

²⁰ Inaquë canconpachinara, Irisiosoꞌ naquëranchin Yosë nontaantarin: “Iporasoꞌ Sinioro quëma nohuanton, somarayapisoꞌ inquiantaꞌinaꞌ,” itërin. Napotohuachina Sinioro nohuanton inquiantapi. Israiro copirno yaꞌhuërinquë chachin naporin.

²¹ Inari niꞌsahuaton Irisio natanin: —Quëmasoꞌ tatahuë pochin ninan. Shaꞌhuitoco: ¿Atëpachi isopita ti? itërin.

²² —Co tëpacaso yaꞌhuërinhuëꞌ. Quëmaora chachin ahuëtahuaton, aꞌnaquën nanpi mapatana, co tëpachinanhuëꞌ. Aquëtë isopitasoꞌ. Aꞌcarahuatoma oꞌshitocoꞌ. Inapotahuatoma yaꞌhuëpiꞌpaꞌ aꞌpaantacoꞌ, itërin.

²³ Napotërinso chachin copirnosoꞌ, inapita marëꞌ panca pita nitërin. Coshatopi, oꞌopi, napopi. Ina quëran noya nontahuaton, huaꞌanënaquë chachin aꞌpaantarin. Naporo quëran huarëꞌ Siria sontaroꞌsasoꞌ, huaꞌquimiachin co huachi israiroꞌsarëꞌ niahuëpihuëꞌ.

Samaria tancapitohuachinara, Irisio naporinsoꞌ

²⁴ Aꞌna tahuëri Siria copirno Pin-ata itopisosoꞌ, sontaronënpita ayontoantarin. Ina quëran paaparahuatona Samaria ninano ahuëcaiso marëꞌ tancapitoonpi.

²⁵ Inapotopi niꞌton, co huachi cosharo macacaiso nanitopihuëꞌ. Napoaton inanaquësoꞌ, co manta capacaiso yaꞌhuërinhuëꞌ. Inapopi niꞌton, mora motoꞌ tëranta paꞌpi paꞌton. Posa shonca coriqui prata quëran nininsoꞌ paꞌtërin. Nëpë chiꞌchirinso tërantaꞌ, patoma quiro patomaíchin nipirinhuëꞌ, aꞌnatërápo coriqui prata quëran nininsoꞌ paꞌtërin.

²⁶ Aꞌna tahuëri Israiro copirnosoꞌ, paira aipi paꞌsarin. Paasoꞌ, aꞌna sanapiri chiníquën nontaton: ¡Catahuaco sinioro copirno! itërin.

^27-30 Napotohuachina, inariso itapon: —¡Co Sinioro tëranta catahuahuachinquënhuëꞌ, aquëtë huarëꞌ caso! Trico, huino, inapita co manta yaꞌhuëtërincohuëꞌ. ¿Onpoatonta napopiranhuëꞌ? itërin. —Iso cai nonpintërinco niꞌton, naporahuë. Iꞌhua inasoꞌ: “Huaꞌhuan quëquë ipora tahuëri tëpatëꞌ caꞌa. Tashiraya caquën yaꞌhuërëꞌ inapotaantaꞌa,” itërinco. Napotohuachincora, huaꞌhuahuë poꞌmorahuatoi caꞌnai. Inaso napoaponahuëꞌ, co huachi nohuantërinhuëꞌ huaꞌhuin aꞌnocasoꞌ, itërin. Ina natanaton, copirnoso aꞌmorinso nioshatërin. Naporin niꞌton, nëꞌpëpisopitari acopo aꞌmorinso niꞌpi: “Sëtaton, saꞌcatën aꞌmorin,” topi.

³¹ Naporoꞌ copirnosoꞌ: “¡Ipora tahuëri Irisio anishitëconotarahuë! ¡Coꞌsoꞌ inapotohuatohuëꞌ, Sinioro chiníquën anaꞌinchinco!” tënin chiníquën nonaton.

³² Irisiosoꞌ, pëinënquë yaꞌhuëarin. Israiro ansianoꞌsarë chachin huënsëatonaꞌ, ninontapi. Napoasoi copirnori tëpacaso marëꞌ aꞌpairinso quëmapi, nani yaꞌcaritëriarin. Coꞌhuara canquiyátërasohuëꞌ, inaso ansianoꞌsa itapon: —Copirnosoꞌ tëpatonaꞌpi huiꞌnin nichinapon chachin nani aꞌpairin comision nishitëconotiincoso marëꞌ. Napoaton ina canquihuachin, yaꞌcoana oncotahuatoma patëëtocoꞌ. Ina piquëran copirno chachinta canquiarin, itërin.

³³ Itaso chachin comisionꞌton, canquirin. Ina piquëran copirno chachinta canquirahuaton Irisio itapon: —Sinioro nohuanton poꞌsarëhua niꞌquëhuarëꞌ, co huachi catahuainpoaso ninacaso yaꞌhuërinhuëꞌ, itiirin.