2 Reyes 4 - Chayahuita (Shahui)

^1-7 (-)

Sonin sanapi Irisiori catahuarinsoꞌ

⁸ Aꞌna tahuëri Irisiosoꞌ, Sonin ninanotaëchin naꞌhuërarin. Naꞌhuësoꞌ, aꞌna yaꞌhuëhuan sanapiri cosharo caꞌpacaso marëꞌ apisárin quëran, pëinënquë poꞌmorin. Inaso sanapi chiníquën nanantërin. Ina piquërantaꞌ, nani paꞌninquë inaquë coshatapatërin.

^9-10 Napoápachina sanapisoꞌ soꞌin itapon: —Niꞌquëꞌ. Quëmapi yániꞌninposoꞌ, pënëntonaꞌpi. Inasoꞌ, Yosë marëáchin pënëntërin tënahuë. Paꞌa aꞌnara patoana, pëi aipi nitaꞌa. Inapotahuatëꞌ, pëꞌsara, misa, shira, nanparin, inapita acotaꞌa. Napohuatë nicaponpo huëꞌpachin, inaquë huëꞌëpaponpoꞌ, itërin. Napoatona nitopi.

^11-12 Aꞌna tahuëri inaso piyapinënë chachin huëcaton, ina patoanaquë huëꞌëpatërin. Naporoꞌ piyapinën Quiasi itërinso camairin: —Pëi huaꞌanën përaquëꞌ, itërin. Përapachina yaꞌcaritiintarin. Ina quëran Irisiosoꞌ, piyapinën camaiantarin:

¹³ —Iso sanapi yánosororinpo niꞌton, natanquë maquëta catahuaꞌa: Copirnohuë nipon, sontaroꞌsa huaꞌanhuë nipon nontaꞌa catahuacaiso marëꞌ topirahuë, itërin. Napotohuachina, sanapisoꞌ natanpirinhuëꞌ co aꞌpanitërinhuëꞌ. Topinan tapon: —Caso aꞌnapita yaꞌhuëhuanoꞌsaroꞌco noya yaꞌhuërahuë, tënin.

¹⁴ —¿Maquëta nipachin catahuaꞌa? tënin Irisio piyapinën nontaton. —Isoso sanapi co huaꞌhuahuanhuëꞌ. Soꞌintaꞌ, nani mashoya, itaantarin piyapinëni.

^15-16 Huaꞌanëni camaiantahuachina, amasha yaꞌcaritacaso marëꞌ përaantarin. Yaꞌcoanaquë huarëꞌ huëꞌpachina, Irisiori itapon: —Aꞌna piꞌiquë ipora pochin huaꞌhuanaran. Quëmapiaꞌhua yaꞌhuëtarinquën huachi, itërin. —Quëmaso sinioro, Yosë marëꞌ pënëntëran. Napoaton co ina pochin narintaancoso yaꞌhuërinhuëꞌ, itërin sanapiri.

¹⁷ Sanapiriso co natëpirinhuëꞌ, shaꞌhuitërinso chachin cayorin. Cayorahuaton tahuërinën nanihuachina, quëmapiaꞌhua huairin.

^18-19 Quëmapiaꞌhuasoꞌ noya soꞌsorarin. Aꞌna tahuëri paꞌpinsoꞌ piyapinënpitarëꞌ, trico macatona yaquirapi. Huiꞌniniso nicapon paꞌpirinhuëꞌ, motoꞌ iquitaton: —¡Ayao! ¡Motoꞌ tëpararinco taꞌa! tënin. Naporoꞌ paꞌpinsoꞌ, piyapinën camairin aꞌshinquë quëpacaso marëꞌ.

²⁰ Masahuaton inarisoꞌ, aꞌshinquë quëparin. Inarinta maꞌparahuaton camotëchin huarëꞌ tonainquë ahuënsërin. Naporoꞌ piꞌi huaꞌhuasha chiminarin huachi.

²¹ Huaꞌhuin nani chiminpirinhuëꞌ, Irisio patoananënquë acoontarin. Huëꞌërinso pëꞌsaraquë acorahuaton oncorapirin.

²² Inapotahuaton soꞌin përarin: —Aꞌnara piyapinën morarë chachin huëꞌin. Inaquë yaꞌmitëato pënëntonaꞌpi niꞌconiꞌi. Ina quëran huënantarahuë, itërin.

²³ —¿Maꞌmarëta iporasoꞌ yaniꞌnan? Co yoquiaꞌhuaraihuëꞌ. Co sahuatohuëꞌ, itërin soꞌini. —Ama paꞌyanquësohuëꞌ. Noya paꞌsarahuë, itaantarin saꞌinintaꞌ.

²⁴ Ina quëran piyapinën camairin mora tapacaso marëꞌ. Nani tapahuachina yaꞌmitëahuaton: —Mora huëntëntëraton manóton quëpaco. Shaꞌhuitaꞌhuanquë huarëꞌ achiniquëꞌ, itërin.

²⁵ Irisiosoꞌ, Carmiro motopiquë yaꞌhuëarin niꞌton, inaquë paꞌnin. Yaꞌcaritahuachina, nohuitahuaton piyapinën itapon: —Sonin sanapi, yáyacaparëso huëꞌsarin, niꞌquëꞌ.

²⁶ Taꞌarahuaton nacapiquëꞌ. Quënamarahuaton, soꞌin, huaꞌhuin, inapita onpohuinsona yaꞌhuëapiso natamaquëꞌ, itërin. Inasoꞌ paꞌsahuaton natamapirinhuëꞌ: “Noya yaꞌhuëapi,” itërin topinan.

²⁷ Cancontahuachina, Irisio quënancontarahuaton, iporantërin. Ina nicaton piyapinënisoꞌ yachiꞌhuincapirinhuëꞌ: —Tananpitëquëꞌ. Co napion cancantaton napoarin. Napoaponahuëꞌ, maꞌsona onporinso co Sinioro anitochátërarincohuëꞌ.

²⁸ Naporoꞌ sanapiri nontaton itapon: —¡Huaꞌhuahuë yaꞌhuëtiincosoꞌ, co carinquën natananquënhuëꞌ! ¡Ama narintocosohuëꞌ, itëranquën tëhuënchinsoꞌ! itërin.

²⁹ Ina natanaton, piyapinën camairin: —Tapatahuaton pitananëhuë maquëꞌ. Ina quëran iso sanapi pëinënquë paquëꞌ. Inso tëranta nacapihuatan ama nontëquësohuëꞌ. Nontopirinënhuë tërantaꞌ, ama aꞌpaniquësohuëꞌ. Canconpatan, huaꞌhuasha yaꞌpirin aipi pitananëhuë acoquëꞌ, itërin.

³⁰ Sanapiso napoaponahuëꞌ, Irisio itapon: —Yoscoarëꞌ sinioro, quëma paꞌpatan naporo huarëꞌ canta paꞌsarahuë, itërin. Napotohuachina, inanta paꞌnin.

³¹ Piyapinënsoꞌ, quëchitahuaton huaꞌanëni shaꞌhuitërinso chachin pitananën quëran nitopirinhuëꞌ, huaꞌhuashaso co pacaritërinhuëꞌ. Napohuachina huaꞌanën nacapiapon paantarin: —Camairancoso chachin nitopirahuëꞌ, huaꞌhuashaso co pacaritërinhuëꞌ, itërin.

³² Naporoꞌ Irisionta canquirahuaton, chimipiaꞌhua pëꞌsaranënquë acopisoꞌ quënancontarin.

³³ Inaoraíchin nioncorapiton, Yosë nontarin.

³⁴ Nani orahuachina chimipiaꞌhua aipi yaꞌmitëontarin. Nanamën, yaꞌpirin, imirin, inapita huaꞌhuashataquë acorin. Yaꞌquëëtohuachina, chimipiaꞌhuaso huënocatarin.

³⁵ Huaniantarahuaton patoanaquë itohua itohua paꞌsarin. Ina quëran naquëranchin inapotaantarin. Aꞌnanaya huaꞌhuashasoꞌ, nanpiintarahuaton canchisëro aꞌchiconin. Ina quëran niꞌtërin huachi.

³⁶ Napohuachina, piyapinën përasahuaton aꞌshin përacasoꞌ camairin. Huëꞌpachina itapon: —Maꞌtana imoya huaꞌhuan huachi, itërin.

³⁷ Napohuachina sanapisoꞌ, “Yosparinquën,” taꞌcaso marëꞌ, Irisio nantën pirayan isonin. Isonin quëran noꞌpaquë huarëꞌ, monshomarin. Ina quëran huaꞌhuin masahuaton, pipirin.

^38-44 (-)