2 Reyes 25 - Chayahuita (Shahui)

Quirosarin ninano ataꞌhuantopisoꞌ

¹ Sitiquiasë copirno yaꞌconinsoꞌ, nani posa piꞌi shonca yoqui shonca tahuëri nisarin. Naporo tahuëri Napocotonosoꞌ, sontaronënpitarë chachin canquirin. Quirosarin tancapitahuatonaꞌ, ahuëcaiso marëꞌ itohuaran itohuaran noꞌpaꞌ nanpënanoꞌsa nipi.

² Tancapitochinaichin Sitiquiasë copirnosoꞌ, shonca piꞌipi nanianatërin.

^3-4 Pascoa yoqui quëran cara yoqui iscon tahuëri imasahuasoꞌ, Quirosarin ninanoquë cosharo taꞌhuantërin. Naporoꞌ Papironia sontaroꞌsasoꞌ, Quirosarin ninano pairanën pacoantopi. Napoaton Sitiquiasësoꞌ, sontaronënpitarë chachin naporo tashi taꞌapi. Cato paira yaꞌhuërinso parti yaꞌcoana yaꞌhuërintaquëchin pipipi. Copirno yancoronëntaquëchin ira yaꞌhuërinso masahuatonaꞌ, paꞌpi. Papironia sontaroꞌsa aꞌpaitapirinahuëꞌ, Cortaniiꞌ motopiana parti taꞌapi.

⁵ Taꞌarapirinahuëꞌ, Papironia sontaroꞌsari imapi. Quirico canonamatë parti icantopi. Inaquë Sitiquiasësoꞌ, sontaronënpitari taꞌananpitona yanquëënanpipi.

⁶ Napotohuachinara, Sitiquiasësoꞌ huiꞌninpitarë chachin mapi. Naporoꞌ Napocotonosoꞌ, Amato parti yaꞌhuëarin. Nipra ninanoquë yaꞌhuëarin. Aꞌnaquën Papironia sontaroꞌsari Sitiquiasësoꞌ, huiꞌninpitarë chachin inatohua quëpapi. Inaquë nipachinara, Napocotonori anaꞌintacaisoꞌ camaitërin.

⁷ Niꞌtonënquë chachin huiꞌninpita tëparaꞌpiapi. Yaꞌhuërëꞌ inaso ocoshorayarahuatonaꞌ, Papironiaꞌpaꞌ catinaquëtopinan quëpapi. Copirno camaitërinso chachin nipi.

Yosë chinotacaso pëi ohuatopisoꞌ

⁸ Napocotono copirno yaꞌconinsoꞌ, shonca posa piꞌipi, aꞌnatërápo yoqui, canchisë tahuëri nisarin. Naporo tahuëri aꞌpairinsopita sontaroꞌsa huaꞌanën aꞌparinsoꞌ, Quirosarinquë canconin. Inaso huaꞌan, Naposaratan itopi.

⁹ Inasoꞌ, sontaronënpitarë chachin Yosë chinotacaso pëi iꞌchinpitërin. Copirno huaꞌanëntërinso pëiꞌ, yaꞌipi noya noya pëi nipisopita, inapitanta inapotërin.

¹⁰ Sontaronënpitarintaꞌ, ninano pairanën ohuatopi.

¹¹ Ina piquëran Quirosarinquë quënanquipisopita Papironiaꞌpaꞌ quëpantapi. Aꞌnaquën inahuara nohuanton copirno yanatëpisoꞌ, aꞌnaquëontaꞌ, ninanoquë quënanpisoꞌ. Caraya maꞌsha ninaꞌpiroꞌsa nipisopitantaꞌ, quëpapi.

¹² Inapotahuatonaꞌ, caraíchin pochin patopi huachi. Saꞌahua nipisopita, nosorotapisopita, inapitaíchin pataantapi. Oparoroꞌsaꞌ, iminoꞌsaꞌ, inaquëpita sacatacaiso marëꞌ patopi.

¹³ Yosë chinotacaso pëiquë nisha nisha maꞌsha shaꞌpi huaꞌna quëran nipiso yaꞌhuërin: Onëroꞌsa pochin nininsoꞌ. Ina onëroꞌsa atoꞌquëtopiquë nininsoꞌ. Panca pantica pochin iꞌsha acocaiso marëꞌ nininsoꞌ, yaꞌipi inapita paꞌqui paꞌquitahuatonaꞌ, Papironiaꞌpaꞌ quëpapi.

¹⁴ Huariano acocaso marëꞌ nipisopita, para pochin nininsopita, nanparin iꞌyaritinanoꞌsaꞌ, oꞌhuintinanoꞌsaꞌ, inapita quëpapi. Naporahuaton, nisha nisha Sinioro chinotacaiso marëꞌ ohuarapisopita shaꞌpi huaꞌna quëran nipisoꞌ, yaꞌipi quiquipi.

¹⁵ Oro quëran, prata quëran, nisha nisha nipisopitantaꞌ, tasonoꞌsaꞌ, pënaya quëpainanoꞌsaꞌ, inapitanta yaꞌipi quiquipi.

¹⁶ Cato onëroꞌsa pochin nipisopita, panca pantica pochin iꞌsha acocaiso marëꞌ nininsoꞌ, inapita iráca Saromon copirnori Yosë chinotacaso pëiquë acorin. Inapita quëꞌninsoꞌ, co tantianahuanhuëꞌ quëꞌnin.

¹⁷ Aꞌnaya aꞌnaya onë pochin nininsoꞌ, posa mitro naꞌcon yaꞌhuëtërin. Inapita naniontarinquë motën pochin acotopi cato mitro tanoninsoꞌ. Inapita aipi Yosë chinotacaso pëi ishpanamën pochin nininsoꞌ aꞌmitopi. Ina motën pochin nininquë huaꞌna camayoroꞌsasoꞌ, catina atahuitopi. Ina catinaroꞌsaquëntaꞌ, cranata nitërinso nonanpi. Yaꞌipi inapitasoꞌ, shaꞌpi huaꞌna quëransáchin nipi.

Cota huënton israiroꞌsa quëpaantapisoꞌ

¹⁸ Naporoꞌ Naposaratansoꞌ, Siraiasë corto huaꞌan manin. Ina quëran niantarinsonta manin. Inaso Sooniasë itopi. Naporahuaton cara huaꞌanoꞌsantaꞌ, Yosë pëinën aꞌpainaꞌpiroꞌsa manin.

¹⁹ Aꞌnara sontaro huaꞌan, copirno ayonquinaꞌpiroꞌsanta aꞌnatërápo, aꞌnara sontaro huayonaꞌpi huaꞌan, nisahuaton saota shonca maꞌhuanoꞌsa Quirosarinquë yaꞌhuëpisoꞌ, inapitanta manin.

²⁰ Inapita masahuatonaꞌ, Napocotono yaꞌhuëarinquë quëpapi. Naporo inasoꞌ, Nipra ninanoquë yaꞌhuëarin.

²¹ Niprasoꞌ Amato roꞌtëquë yaꞌhuërin. Inaquë quëꞌcanpachinara, Napocotonori yaꞌipi inapita tëpacaisoꞌ camaitërin. Ina pochin Cota huënton israiroꞌsantaꞌ, yaꞌhuëpiso noꞌpa quëran, ocoipi.

Napocotonori patërinsopita Iquipitoquë taꞌapisoꞌ

²² Napocotonosoꞌ caraya israiroꞌsa Cota huëntonquë yaꞌhuëcaiso marëꞌ acorin. Inapita camaicaso marëꞌ aꞌnara chirinchi acotërin. Inasoꞌ, Quitariasë itopi. Mispaquë yaꞌhuërinsoꞌ. Paꞌpinsoꞌ Aican itopi. Ina paꞌpiontaꞌ, Sahuin itopi.

²³ Cota huënton sontaro huaꞌanoꞌsasoꞌ, ina natantopi. Ina natantatonaꞌ, sontaroꞌsarë chachin Mispaquë Quitariasë paapapi. Aꞌnaso huaꞌan, Ismairo itopi. Inasoꞌ, Nitaniasë huiꞌnin. Aꞌnantaꞌ, Coanan itopi. Inasoꞌ, Cario huiꞌnin. Aꞌnantaꞌ, Siraiasë itopi. Inasoꞌ, Tanomito huiꞌnin. Tanomitosoꞌ, Nitopa ninanoquë yaꞌhuërin. Aꞌnantaꞌ, Caasaniasë itopi. Inasoꞌ, Maaca huiꞌnin.

²⁴ Cantonpachinara Quitariasëri shaꞌhuitërin: “Ama Papironia huaꞌanoꞌsa tëꞌhuatocosohuëꞌ. Noya isëranchin yaꞌhuëatëhuaꞌ, Papironia copirno camaitërinso natëahuaꞌ. Inapohuatëhuaꞌ, noya yaꞌhuëarihuaꞌ. Yoscoarëꞌ noꞌtëquën shaꞌhuitaranquëmaꞌ,” itërin.

²⁵ Napotopirinhuëꞌ, pascoa yoqui quëran canchisë yoquitapasoꞌ, Ismairori huëcapairin. (Inasoꞌ, Cota huënton copirnoroꞌsa quëmopinën. Nisahuaton Nitaniasë huiꞌnin, Irisama shiin.) Ismairosoꞌ, shonca sontaroꞌsarë chachin huëꞌsahuatonaꞌ, Quitariasë tëpaipi. Aꞌnapita cotioroꞌsaꞌ, Papironia sontaroꞌsaꞌ, inapitanta Mispaquë yaꞌhuëpisoꞌ, inapotopi.

²⁶ Napohuachina cotioroꞌsasoꞌ, papironiaroꞌsa tëꞌhuatopi. Napoaton sontaro huaꞌanoꞌsaꞌ, topinan piyapiroꞌsa nipisopita, inapitaso Iquipitoꞌpaꞌ taꞌapi.

Papironia copirnori Coaquin noya acoantarinsoꞌ

²⁷ Coaquinsoꞌ, iráca Papironiaꞌpaꞌ quëpapi. Quëpapisoꞌ, nani cara shonca saota piꞌipi, shonca cato yoqui nisahuaton, cato shonca canchisë tahuëri nisarin. Naporosoꞌ, aꞌna copirno Papironiaquë huaꞌanëntarin huachi. Inasoꞌ, Ipiro-mirataco itopi. Inari Coaquinsoꞌ, noya nicaton tashinan pëi quëran ocoirin.

²⁸ Noya nontahuaton aꞌnapita copirnoroꞌsa quëpapi quëran noya noya niꞌnin.

²⁹ Inapotohuachina Coaquinsoꞌ, tashinan pëiquë aꞌmorinso ocoirahuaton tëꞌyatërin. Ina quëran noya aꞌmosahuaton, nani tahuëri copirno caꞌparin. Chiminaquë huarëꞌ naporin.

³⁰ Naporahuaton copirnori pahuantërinsopita paꞌanacaso marëꞌ nani tahuëri coriqui quëtárin. Chiminaquë huarëꞌ inapotërin.