2 Reyes 23 - Chayahuita (Shahui)

¹ Ina natanahuaton, copirnoso Quirosarinquë yaꞌipi ansianoroꞌsa yaꞌhuëpiso amatërin. Yaꞌipi Cota huëntonquë yaꞌhuëpisopitantaꞌ, amatërin.

² Amatohuachina, yaꞌipi huëꞌpi. Yaꞌipi Quirosarinquë yaꞌhuëpisopitantaꞌ, niyontonpi. Pënëntonaꞌpiroꞌsaꞌ, corto huaꞌanoꞌsaꞌ, inapitanta Yosë chinotacaso pëiquë niyontonpi. Inaquë Cosiasë copirnosoꞌ, Siniororë anoyatopiso quirica ninshitopisoꞌ chiníquën nontërin. Inasoꞌ quirica Sinioro chinotacaso pëiquë nasha quënanpisoꞌ.

³ Nani nontohuachina, Yosë pëinën yaꞌcoanaquë panca onë pochin nininsoꞌ pirayan huanirin. Inaquë huanirahuaton, Sinioro natëcaiso marëꞌ shaꞌhuitërin. Yaꞌipi cancanëna quëran huarëꞌ pënëntërinsoꞌ, camaitërinsoꞌ, inapita natëcaisoꞌ shaꞌhuitërin. Siniororë anoyatopiso natëcaisontaꞌ, shaꞌhuitërin. Yaꞌipi inapitasoꞌ, pënëntërinso quiricaquë ninshitopinan nani yaꞌhuërin. Ina pochin shaꞌhuihuachina, yaꞌipi niyontonpisopitantaꞌ, ina pochachin natëcaisoꞌ Sinioro shaꞌhuitopi.

Cota huëntonquë Cosiasë noya noya Yosë imacaiso camaitërinsoꞌ

⁴ Sinioro natëcaisoꞌ shaꞌhuitopiso piquëran, Cosiasësoꞌ Iriquiasë corto huaꞌan përarin. Aꞌnapita corto huaꞌanoꞌsaꞌ, yaꞌcoana aꞌpairoꞌsaꞌ, inapitanta përasahuaton camairin: “Sinioro chinotopiso pëiquë, Paaro mamanshi chinotacaiso marëꞌ nisha nisha maꞌsha yaꞌhuërin, Asira mamanshi payanta moshacaiso marëꞌ yaꞌhuërin. Nisha nisha tayora moshacaiso marënta yaꞌhuërin. Yaꞌipi inapita ocoirahuatomaꞌ, ninano aipiran ahuiquitocoꞌ. Sitron iꞌsha yonsanquë iminoꞌsaquëntaꞌ, napopinchin ahuiquitocoꞌ. Ina ahuiquitëramaso yanonëntaꞌ, Pitiriꞌpaꞌ quëpacoꞌ,” itërin.

⁵ Amon copirno, Manasisi copirno, inapitaso iráca mamanshiráchin paꞌyatopi. Napoatona inapita moshacaiso marëꞌ corto huaꞌanoꞌsa acoraꞌpiapi. Quirosarin pairapipisoꞌ tahuirinquë, inahuara nohuanton artaroroꞌsa acopiso yaꞌhuërin. Cota huënton ninanoroꞌsaquënta yaꞌhuërin. Inaquëpita ina corto huaꞌanoꞌsasoꞌ, Paaro marëꞌ, piꞌi marëꞌ, nisha nisha tayoraroꞌsa marëntaꞌ, yonarin pochin nininsoꞌ aꞌpëpi. Yaꞌipi ina corto huaꞌanoꞌsa Cosiasëri camaiton: “Canpitasoꞌ co huachi corto huaꞌanoꞌsa nisaramahuëꞌ. Co huachi yonarin pochin nininsoꞌ aꞌpëaramahuëꞌ,” itërin.

⁶ Nara moshacaiso marënta patëtopisoꞌ, Yosë chinotacaso pëiquë yaꞌhuëpirinhuëꞌ. Inasoꞌ, Asotariti itopi. Inantaꞌ, Cosiasë camaitërin quëran corto huaꞌanoꞌsari ocoipi. Ocoirahuatonaꞌ, Sitron iꞌsha yonsanquë aꞌpëpi. Ina quëran yanonën masahuatonaꞌ, saꞌahuaroꞌsa chiminpachinara paꞌpitopisoanaquë paꞌsapi.

⁷ Sinioro chinotacaso pëi iꞌiratëquëntaꞌ, naꞌa patoanaroꞌsa acopi. Inaquë nimonshitapona pochin mamanshi moshacaiso marëꞌ acopi. Aꞌnaquën sanapiꞌsanta inaquë chachin Asira marëꞌ aꞌmopiso nipi. Cosiasëri ina patoanaroꞌsa aohuatërin. Quëmapiꞌsaꞌ, sanapiꞌsaꞌ, inapitanta inaquë sacatopisoꞌ, aꞌpapi.

^8-9 Naporo tahuëriꞌsa naꞌa Nihui huënton corto huaꞌanoꞌsa yaꞌhuëpi. Inapitasoꞌ Cota huënton ninanoroꞌsaquë yaꞌhuëatonaꞌ, Sinioro marëꞌ yonarin pochin nininsoꞌ aꞌpëpi. Inahuara nohuanton artaroroꞌsa acopiquë napopiso marëꞌ, Cosiasëri Quirosarinquë huëcacaiso camairin. Huëꞌpachinara ayontonahuaton itapon: “Canpitasoꞌ, inahuara nohuanton artaroroꞌsa acopiquë yonarin pochin nininsoꞌ aꞌpëramaꞌ. Pëtëtë parti Quipa ninano quëran, pëꞌnatë parti Piirsipa ninanoquë huarëꞌ inaporamaꞌ. Inaquëpita artaroroꞌsa yaꞌhuërinsoꞌ, co Yosë marëꞌ acopihuëꞌ. Co inaquë Sinioro chinotacaiso yaꞌhuërinhuëꞌ,” itërin. Napotahuaton camairin: “Aꞌnapita corto huaꞌanoꞌsarëꞌquëmaꞌ, pan co ahuëpocatopinanhuëꞌ noya caꞌcoꞌ. Napoaponahuëꞌ, Sinioro pëinën artaroquë maꞌsha ina marëꞌ quëpisoꞌ, co aꞌpëamaso yaꞌhuërinhuëꞌ,” itërin. Quirosarin chirinchintaꞌ, Cosoi itopi. Inantaꞌ, ninano yaꞌcoana ahuënan quëran artaroroꞌsa acorin. Sopairoꞌsa chinotacaso marëꞌ acorin. Inapitanta copirno camaitërin quëran corto huaꞌanoꞌsaꞌ, Yosë pëinën yaꞌcoana aꞌpairoꞌsaꞌ, inapitari ohuatopi.

¹⁰ Pini-inon motopianaquëntaꞌ, Moroco mamanshi moshacaiso marëꞌ artaro yaꞌhuërin. Inaquë aꞌnaquën huiꞌnina ahuiquitahuatonaꞌ, ina mamanshi moshapi. Inapopirinahuëꞌ, Cosiasëri camairin ina artaro tapicaisoꞌ. Ama insonta huachi, inaquë huiꞌnina aꞌpëcaiso marëhuëꞌ inapotopi.

¹¹ Iráca copirnoroꞌsari piꞌi moshacaiso marëꞌ toronan cahuarionënpitarë chachin acotopi. Inapitasoꞌ Sinioro chinotacaso pëi yaꞌcoanaquë acopi. Ina pirayan Natan-mirico huaꞌan yaꞌhuërin. Ina huaꞌani cahuarioroꞌsa ina marëꞌ acopisoꞌ aꞌpairin. Napopirinahuëꞌ Cosiasëri ina cahuarioroꞌsa aosërëtërin. Toronanta aꞌpërahuaton ahuiquitërin.

¹² Manasisi copirno yaꞌhuëapon, mamanshiroꞌsa moshacaiso marëꞌ artaroroꞌsa anitërin. Sinioro chinotacaso pëi iꞌiratënquë, anitërin. Aꞌnapita copirnoroꞌsantaꞌ, ina pochachin anitopi. Acaso copirno patoananën aꞌcaontarinso aipi artaroroꞌsa anitopi. Inapita artaroroꞌsantaꞌ, Cosiasë copirnori aohuatërin. Inapita paꞌqui paꞌquitopi. Inapotahuatona noꞌmorainpitasoꞌ, Sitron iꞌshaꞌpaꞌ inquiitopi.

¹³ Iráca Saromon copirnontaꞌ, Oriposë motopiquë sor parti quëran artaroroꞌsa anitërin. Asotariti mamanshi moshacaiso marëꞌ, anitërin. Inasoꞌ mamanshi, sitonoꞌsari mosharinsoꞌ. Quimosi mamanshi marëntaꞌ, anitërin. Inanta moaporoꞌsari mosharin. Mirico mamanshi marëntaꞌ, anitërin. Inasoꞌ, amonoꞌsari mosharin. Yaꞌipi ina mamanshiroꞌsa Siniorori co quëꞌyarinhuëꞌ. Napoaton Cosiasëri: “Ina artaroroꞌsasoꞌ, co Sinioro marëꞌ acopisohuëꞌ,” taꞌton, yaꞌipi ataꞌhuantërin.

¹⁴ Naꞌpiroꞌsaꞌ, nararoꞌsaꞌ, inapita moshacaiso marëꞌ acopisoꞌ, apaꞌquitëraꞌpiarin. Inapotahuaton atëꞌyatëraꞌpiarin. Inapita acopiquësoꞌ, piyapi nansëroꞌsa acotëraꞌpiapi.

¹⁵ Napato huiꞌnin Quiropoamo copirnonta iráca, inaora nohuanton artaro acopisoanpi Pitiriquë acorin. Toroaꞌhua nonanpisoꞌ moshacaiso marëꞌ naporin. Inaquë moshatatonaꞌ, israiroꞌsa oshahuanpi. Cosiasë, corto huaꞌanoꞌsaꞌ, yaꞌcoana aꞌpairoꞌsaꞌ, inapitari paꞌsahuatonaꞌ, ohuatoonpi. Inapotahuatona paꞌqui paꞌquitopi. Noꞌmoraináchin acorahuatonaꞌ, ahuiquitopi. Inaquë chachin Asira mamanshi nonanpisonta yaꞌhuëpirinhuëꞌ, inanta inapotopi.

¹⁶ Coꞌhuara ina artaro ohuachátërasoihuëꞌ, poꞌnin. Ina pirayan motopiaꞌhuaquë nipaꞌpitopiso yaꞌhuërin. Ina nicaton Cosiasëri catahuarinsopita itapon: “Nansëroꞌsa inaquë yaꞌhuërinsoꞌ, ocoirahuatoma quëcoꞌ,” itërin. Quëpatohuachinara, ina artaro aipi ahuiquitërin. Ama huachi inso tëranta inaquë maꞌsha ahuiquitacaso marëhuëꞌ, inapotërin. Quiropoamo nanpiso chachin, aꞌna pënëntonaꞌpiri inapotacaso shaꞌhuitërin. Shaꞌhuitërinso chachin Cosiasëri nitërin.

¹⁷ Ina quëran Cosiasësoꞌ, natantërin: —¿Isopo naꞌpi ahuanipisoꞌ? tënin. Napohuachina yaꞌhuëhuanoꞌsari: —Inaquë mini Cota huënton pënëntonaꞌpi paꞌpitopi. Inaso iráca huëꞌnin. Naporoꞌ iso artaro quëmari isopotamasoꞌ, ninorin, itopi.

¹⁸ Naporoꞌ Cosiasë camaitërin: —Tananpitoco inasoꞌ. Co incari tëranta nansëquën sëꞌhuacaso yaꞌhuërinhuëꞌ, tënin. Inapoatonaꞌ, co inaso nansëquën sëꞌhuapihuëꞌ. Pënëntonaꞌpi Samaria quëran huëꞌninsonta chiminpachina, inaquë chachin paꞌpitopi niꞌton, co inanta nansëquën sëꞌhuapihuëꞌ.

¹⁹ Samariaquënta inahuara nohuanton artaroroꞌsa acopiso yaꞌhuërin. Aꞌnaquën artoroꞌsa yaꞌhuërinquësoꞌ, Israiro copirnoroꞌsa camaitohuachinara pëi acotëraꞌpiapi. Inapoatona Sinioro paꞌpi anoꞌhuitopi. Napoaton Cosiasëri yaꞌipi inapitantaꞌ, aohuatëraꞌpiarin. Pitiriquë yaꞌhuërinsopita nitërinso pochin inapitanta nitërin.

²⁰ Coꞌhuara ina artaroroꞌsa ataꞌhuanchátërasohuëꞌ, corto huaꞌanoꞌsa inaquë mamanshi moshapisopita atëpatërin. Ina artaroroꞌsa aipi inapotërin. Inaquë chachin piyapi nansëroꞌsanta ahuiquitopi. Inaporahuaton Quirosarinquë paantarin.

Cosiasë pascoa naꞌhuërinsoꞌ

²¹ Aꞌna tahuëri copirnosoꞌ, yaꞌipi Cota huëntonquë yaꞌhuëpisopita camairin: “Sinioro marëꞌ pascoa pita naꞌhuëaꞌahuaꞌ. Iráca Moisësë pënëntërinsoꞌ quiricaquë ninshitërinso pochachin niahuaꞌ,” tënin.

²² Napohuachina, naꞌhuëpi. Iráca huaꞌanoꞌsa naꞌhuëpi quëran huarëꞌ co ina pita naꞌhuëchinpihuëꞌ. Israiro copirnoroꞌsaꞌ, Cota huënton copirnoroꞌsaꞌ, inapita huaꞌanëntaponantaꞌ, co naꞌhuëpihuëꞌ.

²³ Cosiasë copirno, shonca posa piꞌipi copirno yaꞌconinso naniquë huarëꞌ, Quirosarinquë naꞌhuëantapi.

Cosiasë Yosëíchin cancantërinsoꞌ

²⁴ Cosiasësoꞌ, Yosëíchin cancantaton, pënotonoꞌsaꞌ, ninotonaꞌpiroꞌsaꞌ, inapitanta yaꞌipi ayatërin. Quëmopinënapitarëꞌ mamanshi moshapisonta napotërin. Nisha nisha mamanshiroꞌsaꞌ, nisha nisha moshacaiso marëꞌ Quirosarinquë yaꞌhuëtopisoꞌ, Cota huëntonquënta yaꞌhuëtopisoꞌ, ayatërin. Inapitaso Yosëri co quëꞌyarinhuë niꞌton, napotërin. Iriquiasë corto huaꞌan, Sinioro chinotacaso pëiquë pënëntërinso quirica quënaninso natëton, naporin.

²⁵ Cosiasëráchin ina pochin Sinioro imaton, yaꞌipi cancanën quëran, yaꞌipi huaꞌyanën quëran, yaꞌipi chinirin quëran Sinioroíchin natërin. Moisësë pënëntërinso chachin natërin. Co inso copirno tërantaꞌ, inapochin iráca quëran huarëꞌ natërinhuëꞌ. Ina piquërantaꞌ, co huachi aꞌna ina pochin yaꞌhuëantarinhuëꞌ.

²⁶ Ina nipirinhuë tëranta Siniorori Cota huënton israiroꞌsa noꞌhuirinsoꞌ, co sanorinhuëꞌ. Iráca Manasisi copirnori co noyahuëꞌ nicaton anoꞌhuitomiatërinso marëꞌ naporin.

²⁷ Napoaton Sinioro tapon: “Pëtëtë yaꞌhuëpiso israiroꞌsa aꞌpoato, aꞌparahuë paꞌpi. Inapochachin Cota huënton israiroꞌsantaꞌ, nitarahuë. Quirosarin ninanonta huayonato, inaquë chinotiinacoso marëꞌ pëi acorahuë. Inapopirahuë co huachi nohuantarahuëꞌ,” tënin.

Cosiasë chimininsoꞌ

²⁸ Iso quiricaquë, co yaꞌipi Cosiasë naporinso ninshitërahuëꞌ. Aꞌna quëmapinta ninshitaton: “Cota huënton copirnoroꞌsa huaꞌanëntapona napopisoꞌ,” taꞌton ninshitërin.

²⁹ Cosiasë huaꞌanëntaso chachin Iquipito copirno Nicao itopisoꞌ huëꞌnin. Sontaronënpitarë chachin huëꞌsahuatonaꞌ, Iopiratisiiꞌpaꞌ chinotona paꞌsapi. Asiria copirno catahuacaso marëꞌ paꞌsapirinhuëꞌ, Cosiasëri sontaronënpitarë chachin Miquitoquë nacapirin. Nacapipirinhuëꞌ, Nicaori ipora quënanaso chachin tëparin.

³⁰ Inapotohuachina huaꞌanoꞌsari aꞌna toronanquë nonën acorahuatonaꞌ, Quirosarinquë quëpapi. Inaquë paꞌpitacaiso marëꞌ anitërinquë poꞌmopi. Ina piquëran huiꞌnin Coacasë itopiso masahuatonaꞌ, paꞌpin yaꞌhuërënamën copirno nicacaso marëꞌ Yosë nontahuatona acopi.

^31-37 (-)