2 Reyes 22 - Chayahuita (Shahui)

Cota huëntonquë Cosiasë huaꞌanëntërinsoꞌ

¹ Cosiasë Cota huënton copirno nicacaso marëꞌ caniaritohuachina, posa piꞌipiíchin yaꞌhuëtërin. Cara shonca aꞌna piꞌipi Quirosarinquë copirno yaꞌconin. Aꞌshinsoꞌ, Ataia huiꞌnin Itita itopi. Posocato ninanoquë yaꞌhuërin.

² Cosiasë huaꞌanëntapon noyasáchin ninin. Noꞌtëquën Sinioro natërin. Iráca shimashonën Tapi naporinso pochin inanta ninin.

Iráca pënëntërinsoꞌ quirica quënanpisoꞌ

^3-4 Copirnoroꞌsa huaꞌanëntërinso ninshitonaꞌpisoꞌ, Sahuin itopi. Inaso paꞌpin, Asariasë itopi. Inanta paꞌpin, Misoramo itopi. Cosiasë copirno shonca canchisë piꞌi copirno yaꞌconinso nisahuasoꞌ, Sahuin përasahuaton, Sinioro chinotopiso pëiquë aꞌparin. Inaquë Iriquiasë corto huaꞌan nontaton, iso pochin shaꞌhuitacaso marëꞌ camairin: —Nihuiroꞌsasoꞌ, Sinioro chinotacaso pëi yaꞌcoanaquë aꞌpaitopi. Naporahuaton israiroꞌsa Sinioro marëꞌ coriqui quëpachinara, yontonpi. Ina yontonpiso maꞌpaquëꞌ.

^5-6 Nani maꞌpahuatan Yosë chinotacaso pëi anoyatonaꞌpiroꞌsa huaꞌanënpita quëtëquëꞌ. Inapitari sacatoroꞌsa pahuërërapi. Nontë camayo nipisopita, sacato huaꞌanoꞌsaꞌ, pëinaꞌpiroꞌsaꞌ, inapita. Naporahuaton, ina coriqui quëran chachin nontëroꞌsaꞌ, naꞌpiroꞌsa pëicai marëꞌ nininsoꞌ, inapita paꞌanapi. Inapitasoꞌ nohuantapi Yosë chinotacaso pëi anoyatacaiso marëꞌ.

⁷ Inapitaso co ihuatatonaraihuëꞌ, noꞌtëquën sacatapi. Napoaton onpo castarapisoꞌ, co shaꞌhuitiinënso yaꞌhuërinhuëꞌ, itëquëꞌ, itërin.

⁸ Napotohuachina, paꞌsahuaton shaꞌhuitoonin. Nani natanahuaton, Iriquiasësoꞌ aꞌna shaꞌhuitërin: “Sinioro chinotacaso pëi acoana, iráca pënëntërinsoꞌ quirica quënanai. Maꞌtana isoꞌ,” itahuaton quëtërin. Quëtohuachina, Sahuinsoꞌ ina maꞌparahuaton nontërin.

^9-10 Ina piquëran copirno shaꞌhuitoonin: —Yosë chinotacaso pëiquë coriqui yaꞌhuërinsoꞌ, piyapinënpitari nani yontonpi. Inapotahuatonaꞌ, pëi anoyatonaꞌpiroꞌsa quëtopi. Naporahuaton Iriquiasë corto huaꞌan, iso quirica quëtërinco, itërin. Napotahuaton Cosiasë copirno natanacaso marëꞌ nontërin.

¹¹ Iráca pënëntërinso quirica natanahuaton, copirnoso aꞌmorinso osharin. Sëtërinso nitotacaiso marëꞌ naporin.

¹² Ina quëran corto huaꞌan Iriquiasë amatahuaton, Sahuin huiꞌnin Aican itopisonta amatërin. Micaiasë huiꞌnin Acaporoꞌ, Sahuin ninshitonaꞌpi, piyapinën Asaiasë itërinsoꞌ, inapitanta amatërin. Huëꞌpachinara, itapon:

¹³ —Paatomaꞌ, onpopinsona niꞌnincosoꞌ, Sinioro natancoꞌ. Yaꞌipi iso ninanoquë yaꞌhuëpisopita, yaꞌipi Cota huëntonquë yaꞌhuëpisopita, inapitanta onpopinsona Yosëri niꞌninsoꞌ, natancoꞌ. Iso quirica quëran inaso pënënpirinpoahuëꞌ, co natërëhuahuëꞌ. Shimashonënpoapitantaꞌ, pënëntërinsoꞌ co natëpihuëꞌ. Napoaton ipora Siniorosoꞌ, paꞌpi noꞌhuitomara, itërin.

^14-16 Napotohuachina, inapitaso Saron saꞌin Orata itopisoꞌ, nicapona paꞌpi. Inaso sanapi, Yosë yonquirinso shaꞌhuinaꞌpi. Soꞌinsoꞌ, Tiquipa huiꞌnin. Yaꞌhuërëꞌ inantaꞌ, Arasi huiꞌnin. Arasisoꞌ, corto huaꞌanoꞌsa aꞌmorinso tapanaꞌpi. Orataso soꞌinëꞌ, Quirosarin quëran yaꞌnatiirinso barrio pirayan yaꞌhuërin. Cantonahuatona natanpachinara: —Sinioro chinotërëhuaso naporin: “Natanamacoso marëꞌ aꞌparinquëmasoꞌ, iso pochin shaꞌhuitoncoꞌ: ‘Caso Sinioroco napotaranquën. Tëhuënchachin Quirosarinquë yaꞌhuëpisopita anaꞌintarahuë. Moisësë ninshitërinso chachin iso ninano ataꞌhuantarahuë. Pënëntërahuësoꞌ quiricaquë Cota huënton copirno nataninso chachin nitarahuë.

¹⁷ Yaꞌipi Cota huënton israiroꞌsa aꞌporinaco. Inapoatona nisha nisha mamanshiroꞌsa moshacaiso marëꞌ yonarin pochin nininsoꞌ, aꞌpëpi. Naꞌcon co noyahuëꞌ nipiso marëꞌ anoꞌhuitërinaco. Napoaton isëquë yaꞌhuëpisopita anaꞌintaꞌhuaso yaꞌhuërin huachi,’ itocoꞌ,” tënahuë.

^18-19 Napoaponahuë aꞌpairinquëmasontaꞌ, iso pochin shaꞌhuitocoꞌ: “Pënëntërahuësoꞌ quirica nontohuachina, quëmaso natëran: ‘Iso roꞌtëquë yaꞌhuëpisopita ataꞌhuantarahuë,’ tënahuësoꞌ natanaton, co napion cancantëran. Oshanën marëꞌ sëtëran. Piyapinënpita oshanën marëntaꞌ, sëtëran. Shimashonënpitantaꞌ, co natëpiso marëhuëꞌ naporan. Inapoaton aꞌmoranso osharan. Inaporanso marëꞌ carintaꞌ, nontërancoso natananquën. Ca Sinioroco napotaranquën.

²⁰ Carinquën quëtaranquën noya chimintamasoꞌ. Inapoaton shimashonënpita paꞌpitopiquë paꞌpitaponën. Iso ninanoꞌ, piyapinënpita, inapita ataꞌhuantërahuëquë parisitopisoꞌ, co niꞌsaranhuëꞌ, tënin, itonco huaꞌanëmaꞌ,” itërin. Copirno aꞌparinsopitasoꞌ, huaꞌanënaquë huënantarahuatona ina inachachin shaꞌhuitopi.