2 Reyes 2 - Chayahuita (Shahui)

Iniasë inápaquë pantarinsoꞌ

¹ Panca ihuanquë Siniorori Iniasë quëpacasoꞌ yonquirin. Yaquëpahuachina, Iniasëso Irisiorë chachin Quiricaro quëran pipirapi.

² Naporoꞌ Iniasëri itapon: —Sinioro Pitiriꞌpaꞌ aꞌparinco. Quëmasoꞌ isëranchin quëparitëquë topirahuë, itërin. —¡Yoscoarëꞌ co quëparitarahuëꞌ! itërin Irisiori. Napotohuachina, cato chachin Pitiriꞌpaꞌ paꞌpi.

³ Canconpachinara, pënëntonaꞌpiroꞌsa inaquë yaꞌhuëpisopitari nacapipi. Nacapirahuatonaꞌ, Irisio itaponaꞌ: —Siniorori maistronën ipora tahuëri quëpararin. ¿Nani ina nitotëran to? itopi. —Nani mini nitotërahuë. Ama napoaponahuë canpitasoꞌ, ina shaꞌhuicosohuëꞌ, itërin Irisiori.

⁴ Ina piquëran Iniasëri Irisio itaantapon: —Sinioro Quiricoquë aꞌpaantarinco. Quëmasoꞌ isëranchin quëparitëquë topirahuë, itaantarin. —¡Yoscoarëꞌ co quëparitarahuëꞌ! itaantarin Irisiori. Napotohuachina, cato chachin inatohua paantapi.

⁵ Canconpachinara, pënëntonaꞌpiroꞌsa inaquë yaꞌhuëpisopitari yaꞌhuërëꞌ, nacapipi. Nacapirahuatonaꞌ, Irisio itaponaꞌ: —Siniorori maistronën ipora tahuëri quëpararin. ¿Nani ina nitotëran to? itopi. —Nani mini nitotërahuë. Ama napoaponahuë canpitasoꞌ, ina shaꞌhuicosohuëꞌ, itërin Irisiori.

⁶ Ina piquëran Iniasëri Irisio itaantapon: —Sinioro Cortaniiꞌpaꞌ aꞌpaantarinco. Quëmasoꞌ isëranchin quëparitëquë topirahuëꞌ, itaantarin. —¡Yoscoarëꞌ co quëparitarahuëꞌ! itaantarin Irisiori. Napotohuachina, cato chachin inatohua paantapi.

⁷ Inatohua camatona niꞌpirinahuëꞌ, aꞌnatërápo shonca pënëntonaꞌpiroꞌsanta naporo chachin canquimapi. Canquimarahuatonaꞌ, aquëranchin huanitona notëtápi. Iniasësoꞌ, Irisiorë chachin Cortaniiꞌ yonsanꞌpaꞌ paꞌsahuatonaꞌ, chiniconpi.

⁸ Naporoꞌ Iniasësoꞌ, aipi aꞌmorinso soꞌnanahuaton huihuiirin. Inapotohuachina, iiso nipatomairin. Napohuachina, cato chachin inataquëchin pëntonpi.

⁹ Aquëtëran nipachinara, Iniasëri itapon: —Ipora tahuëri pataranquën. Coꞌhuara pachátëraponquënhuëꞌ, shaꞌhuitoco maꞌsona nohuantëransoꞌ acochinquën, itërin. Napotohuachina, inariso itapon: —Quëmaso maistro, Sinioro ispiritonën yaꞌcoancantërinquën niꞌton, nani maꞌsha nanitaparan. Caso nipirinhuëꞌ, quëmá quëran naꞌcon naꞌcon yaꞌcoancanchinco topirahuë, itërin.

¹⁰ —Sacai nininsochi natananco paya. Patasënquën chachin quënanpatanco, natanancoso chachin yaꞌhuëtarinquën. Coꞌsoꞌ napohuatanhuëꞌ, co ina pochin nitarinquënhuëꞌ, itërin Iniasëri.

¹¹ Ninapotatona cato chachin paꞌsapi. Papona pochin ninontërapi. Naporoꞌ aꞌnanaya pën pochin toronan yaꞌnorin. Cahuarionënpitantaꞌ, inapochachin yaꞌnorin. Inari yaꞌcon yaꞌcontahuaton Iniasë chiꞌhuincarin. Inapoaton, inaso panca ihuanquë inápaquë quëpantarin.

¹² Ina nicaton Irisiosoꞌ, chiníquën nonin: “¡Maistro, maistro! ¡Quëmasoꞌ panca sontaroꞌsa huënton pochin nicaton, yaꞌipi israiroꞌsacoi paꞌpoyarancoi!” tënin. Ina piquëransoꞌ, co huachi maistronën quënaninhuëꞌ. Ina tosahuaton sëtonënquë aꞌmorinso osharin. Catotë huarëꞌ acorin.

Iniasë yaꞌhuërënamën Irisio pënëntërinsoꞌ

¹³ Naporahuaton Iniasë aipi aꞌmorinso anotërinso manin. Tahuërëantarahuaton Cortaniiꞌ yonsanquë huaniintarin.

¹⁴ Ina aꞌmorinsoquë chachin huihuiitahuaton, tapon: “¡Sinioro, quëmasoꞌ huaꞌanëhuë Iniasë chinotërinquën! ¡Ina catahuaranso pochachin cantaꞌ, catahuaco!” itërin. Naporo chachin Cortaniiꞌ nipatomairin. Napohuachina aquëtëran pëntoantarin.

^15-16 Naporinso nicatona pënëntonaꞌpiroꞌsa Quiricoquë yaꞌhuëpisopitasoꞌ: “Iniasë yaꞌcoancantërinso chachin, iporaso Irisionta yaꞌcoancantërin,” topi. Naporoꞌ paaparahuatona nontopi. Mónsho tahuatonaꞌ: —Niꞌquë maistro. Quiyasoꞌ, aꞌnatërápo shonca yaꞌpi chiníquën cancantonaꞌpicoi huëꞌnai. Paatoi maistronën yoniꞌi. Tapona Sinioro ispiritonëni otërahuaton, onpopinquë tëꞌyatërin. Motopiroꞌsaquëhuë nipon, motopianaroꞌsaquëhuë nipon tëꞌyatërinso yoniriꞌi, topiraihuëꞌ, itopi. Inariso napoaponahuëꞌ, itapon: —Ama pacosohuëꞌ, itërin.

¹⁷ Napotopirinhuëꞌ, inapitariso apisápi. Napotápachinara tapanaton itapon: —Paco nipachin, itërin. Paꞌsahuatona inapitasoꞌ, cara tahuëri yonípi. Yonisápirinahuëꞌ, co quënanpihuëꞌ.

¹⁸ Irisioso Quiricoquëranchin quëparitërin niꞌton, co manta quënanpachinarahuëꞌ huënantapi. Huëntahuachinara inari itapon: —Coꞌta nani shaꞌhuitopiranquëmahuëꞌ, itërin.

Huinan anoyaitërinsoꞌ

¹⁹ Quirico yaꞌhuëhuanoꞌsari Irisio paaparahuatona itaponaꞌ: —Niꞌquë maistro. Ninano yaꞌhuëtëraiso noyaroꞌtëquë nipirinhuëꞌ, huinan oꞌoraisosoꞌ, co noyahuëꞌ. Naporahuaton noꞌpantaꞌ, co maꞌsha noyatërinhuëꞌ, itopi.

²⁰ —Aꞌnara nasha tasonquë yamora quëshico, itërin inari. Quëpatohuachinara,

²¹ huinanquë paꞌsahuaton inaquë taꞌsaitërin. Inapoapon pochin: —Naporin Sinioro: “Cari iso huinan anoyaitërahuë. Iporasoꞌ co huachi ina oꞌorama quëran caniotoma chiminapomahuëꞌ. Co noꞌpaꞌ tëranta tapiarinhuëꞌ. Iporasoꞌ maꞌsha shaꞌpatamaꞌ, noyatapon huachi,” tënin, itërin.

²² Naporinso chachin huinan noyaitërin.

Ama huachi noya yaꞌhuëcaiso marëhuëꞌ, huaꞌhuaroꞌsa shaꞌhuitërinsoꞌ

²³ Ina piquëran Irisiosoꞌ, Pitiriꞌpaꞌ paꞌsarin. Inaso ninanoꞌ, panënquë yaꞌhuërin. Nanpëasoꞌ, naꞌa huaꞌhuaroꞌsari nacapirin. Nacapirahuatona tëhuarapi: “Chiniaton nanpëquë soquimoto,” itatona tëhuapi.

²⁴ Napotohuachinara, Irisiori tahuërëtahuaton co noyahuëꞌ niꞌnin: “Napotëramacoso marëꞌ Sinioro co noyahuëꞌ niꞌninquëmaꞌ. Napoaton ama huachi noya yaꞌhuëcamaso marëhuëꞌ, shaꞌhuichinquëmaꞌ,” itërin. Itahuaton pataso chachin, cato tocaniꞌ yaꞌnorin, catapini shonca cato huaꞌhuaroꞌsa oqui oquitahuatonaꞌ, tëpapi.

²⁵ Ina quëran Irisiosoꞌ, Carmiro motopiꞌpaꞌ paantarin. Ina piquëran Samariaquë huënantarin.