2 Reyes 18 - Chayahuita (Shahui)

^1-8 (-) (Israiro copirno Coasë itopiso piquëran, canchisë copirnoroꞌsa yaꞌhuëantarin. Inapitanta napoaponahuëꞌ, co Yosë natëtonaraihuëꞌ, co noyahuëꞌ nininsoráchin nipi. Piquëran pochin yaꞌconinsosoꞌ, Osiasë itopi. Ina paꞌpinsoꞌ, Ira itopi.)

Samaria ninano canapisoꞌ

⁹ Ina saota piꞌipi huaꞌanëntasoꞌ, Cota huënton copirnontaꞌ, nani cara piꞌipi copirno yaꞌconinso nisarin. Inasoꞌ, Acaso huiꞌnin Isiquiasë itopi. Naporo tahuëriꞌsa Asiria copirno Saromanasaro itopisoꞌ huëꞌnin. Sontaronënpitarë chachin huëꞌsahuatonaꞌ, Samaria tancapitopi. Inapotahuatona ahuëpi.

¹⁰ Tancapitopiso cara piꞌipi nanihuachina, canapi huachi. Naporoꞌ Isiquiasësoꞌ, nani saota piꞌipitarin copirno yaꞌconinsoꞌ. Osiasëntaꞌ, nani iscon piꞌipitarin.

¹¹ Asiria copirnori israiroꞌsa canarahuaton, yaꞌhuërinso roꞌtëquë quëparin. Ara parti, Aporo parti, inapita parti acorin. Inapitasoꞌ, Cosaniiquë yaꞌhuërin. Naporahuaton Mitia piyapiroꞌsa ninanonënaquëntaꞌ, acorin.

¹² Sinioroso Yosënëna nipirinhuëꞌ, co natëpiso marëhuëꞌ inapotopi. Inapitarë anoyatërinsoꞌ, co natëpihuëꞌ. Moisësënta camaitërinsopita co natëpihuëꞌ. Inasoꞌ, Sinioro natëton noꞌtëquën camaitopirinhuëꞌ, co natëpihuëꞌ.

Sinaquiripo Cota huënton ahuëcaso marëꞌ huëꞌninsoꞌ

¹³ Isiquiasë copirno shonca catapini piꞌipi huaꞌanëntasoꞌ, Asiria copirno Sinaquiripo itopisori ahuëcaso marëꞌ huëcapairin. Yaꞌipi pairahuan ninanoroꞌsa Cota huëntonquë yaꞌhuërinsoꞌ, ahuërahuaton canaraꞌpiarin.

¹⁴ Asiria copirno Naquisëquë yaꞌhuëasoꞌ, Isiquiasëri nontacaso marëꞌ comision aꞌpatërin. Iso pochin taꞌcasoꞌ aꞌpatërin: “Tëhuërahuë. Napopirahuëꞌ, ama yaꞌcontatoncoi ahuëcoisohuëꞌ. Ina marëꞌ onposoꞌ pahuërëtaꞌhuaso camaihuatanco, pahuërëaranquën,” tënin copirnonëhuë, itërin. Napotohuachina inasoꞌ: “Iscon huaranca iscon pasa iscon shonca quiro prata. Nisahuaton iscon pasa iscon shonca quiro oro. Inanapo Isiquiasë pahuërëꞌinco nipachin,” tënin.

^15-16 Napohuachina Isiquiasësoꞌ, Yosë chinotacaso pëiquë prata yaꞌhuërinsoꞌ, yaꞌipi manin. Huaꞌanëntërinso pëiquënta paꞌton nininsopita taparin. Inaquënta prata yaꞌhuërinsoꞌ, yaꞌipi manin. Naporo chachin Yosë chinotacaso pëi yaꞌcoanaroꞌsa oro quëran apashitërinsoꞌ, mataantarin. Yaꞌipi inapita masahuaton, Asiria copirno quëtërin.

^17-18 Ina piquëran inasoꞌ, cara huaꞌanoꞌsa chiníquën nanantopisopita Naquisi quëran Quirosarinquë aꞌparin. Panca sontaroꞌsa huëntontaꞌ, inapitarë aꞌparin. Isiquiasë, sontaronënpita, inapitarë niahuëcaiso marëꞌ naporin. Inapita huaꞌanoꞌsasoꞌ, aꞌnara yaꞌipi sontaronënpita huaꞌanën yaꞌconin. Aꞌnantaꞌ, sontaroꞌsa quëpanaꞌpi huaꞌan yaꞌconin. Aꞌnaso nipirinhuëꞌ, catahuarinsoꞌ huaꞌan. Yaꞌipi inapita paꞌsahuatonaꞌ, Quion huinan quëran cashatonaꞌ, iꞌsha quëpapiso yaꞌcariꞌ yaꞌhuëconpi. Ina cashapisosoꞌ, panca tapainanquë mëtaiconin. Inaquë piyapiꞌsa pëꞌsainacaiso marëꞌ paꞌpi. Ina quëran Isiquiasë përapi nontacaiso marëꞌ. Përapirinahuëꞌ, inaso co paꞌninhuëꞌ, cara huaꞌanoꞌsa inapita nontacaiso marëꞌ aꞌparin. Aꞌnasoꞌ, huaꞌanëntërinso pëiquë camaitonaꞌpi. Inasoꞌ, Iriaquin itopi. Aꞌnanta copirnoroꞌsa onpo huaꞌanëntopisona ninshitonaꞌpi. Inasoꞌ, Sipina itopi. Asapo huiꞌnin Coa itopisontaꞌ, ninshitonaꞌpi. Inanta paꞌnin.

Asiria huaꞌanoꞌsa nocantopisoꞌ

¹⁹ Canconpachinara, Asiria huaꞌanoꞌsari itaponaꞌ: “Naporin Asiria copirno: ‘Noya ipora yaꞌhuëarihuaꞌ,’ ama chinsohuëꞌ Isiquiasë.

²⁰ ‘Noyasha anoyatohuato, co ahuëaponacohuëꞌ,’ topachin ninonpintarin. Panca sontaroꞌsa huënton yaꞌhuëtahuatonpoꞌ, míso ahuëtohuatëra tëhuëchinsoꞌ, noꞌtëquën ina pochin nonsarëhuaꞌ. ¡Chinitamacoso marëꞌ co insonta nanitërinhuëꞌ catahuainënquëmasoꞌ!

²¹ ‘Iquipitoroꞌsa catahuaponacoi,’ tënama ipora. Napopiramahuëꞌ, iquipitoroꞌsaso piquiranan nopantë pochin niconpi. Piquiranan nopantëquë piquëëtohuatëra, pápi papitarinpoꞌ. Inapochin Iquipito copirnori yaꞌipi catahuacaiso marëꞌ chinotopisopita nitapon.

²² Naporahuaton: ‘Sinioroso Yosënëhuëi niꞌton, ina catahuaponcoi,’ tënamaꞌ. Iráca canpitasoꞌ, itohua itohua ina Yosë chinotamaso marëꞌ artaroroꞌsa yaꞌhuëtërinquëmaꞌ. Isiquiasëso nipirinhuëꞌ, ina artaroroꞌsa ayatëraꞌpiarin. Naporahuaton yaꞌipi Quirosarinquë yaꞌhuëramasopita, ‘iso ninanoquë artaro yaꞌhuërin. Isëquëáchin Sinioro chinotocoꞌ,’ itërinquëmaꞌ. Yaꞌipi Cota huëntonquë yaꞌhuëpisopitantaꞌ, ina chachin camairin.

²³ Paꞌa huaꞌanëhuërëꞌ Isiquiasë anoyachin. Sontaroꞌsa cahuarioquë paꞌpisoꞌ yoniton ananiin. Napohuachin, carima cato huaranca cahuario quëtaranquëmaꞌ.

²⁴ Ina natanaton, Isiquiasëso tosarin: ‘Iquipitoquë cahuarioroꞌsa maꞌpatarahuë. Sontaroꞌsanta cahuarioquë paꞌpisopita inaquë maꞌpatarahuë,’ topachin, topinan quëran napoarin. Napoaton maꞌpatopirinhuë tërantaꞌ, co nanitarinhuëꞌ Asiria sontaroꞌsa nitaꞌatacasoꞌ. ¡Apinapicha nininsoꞌ huaꞌan tëranta co nitaꞌatarinhuëꞌ!

²⁵ Naporahuaton: ‘Inahuara nohuanton ahuëinacoiso marëꞌ huëꞌpi,’ topachin, co noꞌtëquën yonquirinhuëꞌ. Sinioro catahuarincoi niꞌton, minsëarainquëmaꞌ. Ina catahuarincoi niꞌtoi, noꞌpanëma ataꞌhuantarai. Ina camairincoi niꞌtoi, poꞌsarai, itonco huaꞌanëmaꞌ,” itopi.

²⁶ Napotohuachina Iriaquin, Sipina, Coa, inapitari itaponaꞌ: —Ama onpopionta quiya nonaiquë nontocoisohuëꞌ. Paira aipi nisapisopitanta natanpachinaꞌ. Quiyasoꞌ nitotërai niꞌton, Aran nananquë nontocoi topiraihuëꞌ, itopi.

²⁷ Napotopirinahuëꞌ, Asiria huaꞌansoꞌ, tapon: —Co Isiquiasëráchin nontaꞌhuaiso marëꞌ, Asiria copirno aꞌparincoihuëꞌ. Paira aipi nisapisopitantaꞌ, nitotacaisoꞌ nohuantërin. Inapitanta canpita pochachin chiꞌchiꞌ caꞌchináchin, iyai oꞌochináchin nisapi, itërin.

^28-29 Napotahuaton Israiro nananquë chiníquën nonin: —Asiria copirno naporinso natancoꞌ: “Isiquiasë nonpintárinquëma niꞌton, ama natëcosohuëꞌ. Inaso co onporonta nanitarinhuëꞌ sontaronëhuëpita quëran nichaꞌëinquëmasoꞌ.

³⁰ Inasoꞌ: ‘Sinioro ninahua nichaꞌëinpoaꞌ. Ina nohuanton isëquësoꞌ, co Asiria sontaroꞌsa yaꞌconatona minsëarinënpoahuëꞌ,’ itërinquëmaꞌ.

³¹ Napotopirinquëmahuëꞌ, ama inaso natëcosohuëꞌ. Asiria copirno tëhuënchinso napotërinquëmaꞌ: Ama huachi chinitácoisohuëꞌ. Nanan anoyatahua huaꞌanënchinquëmaꞌ. Napohuatamaꞌ, oparonëma nitërinso caꞌsaramaꞌ. Iquiranëmanta nitërinsoꞌ, caꞌsaramaꞌ. Iꞌshanëmanta taparamaquëranchin oꞌosaramaꞌ.

³² Ina piquëran aꞌna roꞌtëꞌpaꞌ quëpaponquëmaꞌ. Iso noꞌpanëma pochin nininꞌpaꞌ quëpaponquëmaꞌ. Inaquë pan nicacaso marëꞌ trico noya noyatërin. Huinonta nicacaso marëꞌ opa noya noyatërin. Oripontaꞌ noyatërin niꞌton, notohuaroꞌ toma ocoipi. Ninointa co pahuaninhuëꞌ. Inaquë paꞌpatamaꞌ noya yaꞌhuëaramaꞌ. Co chiminaramahuëꞌ. Isiquiasëso pënënatënquëmaꞌ: ‘Sinioro nichaꞌësarinpoaꞌ,’ itárinquëmaꞌ. Napotatënquëma inasoꞌ, nonpintárinquëmaꞌ. Napoaton co ina natëamaso yaꞌhuërinhuëꞌ.

³³ Asiria copirno sontaronënpitacoisoꞌ, nisha nisha nacionquë yaꞌhuëpisopita minsëraꞌpiarai. Co inso nacion tërantaꞌ, yosënënari nichaꞌërinhuëꞌ.

³⁴ Amatoquë, Arohuatoquë, Sihuaropaimoquë, Inanquë, Ipaquë, inaquëpita nisha nisha mamanshi moshapi. ¡Moshapirinahuëꞌ, ahuëhuatoira co mamanshinënari nichaꞌërinhuëꞌ! Samariaquë yaꞌhuëpisopita tëranta co yosënënari nichaꞌërinhuëꞌ.

³⁵ Co inso yosënëna tërantaꞌ, inapita ninanoroꞌsa quiya quëran nichaꞌërinhuëꞌ. ‘¡Quiyasoꞌ Quirosarinquë yaꞌhuërai niꞌton, Sinioro nichaꞌësarincoi!’ co taꞌcamaso yaꞌhuërinhuëꞌ,” itërin.

³⁶ Napotopirinhuëꞌ, inapitaso co manta aꞌpanitopihuëꞌ. Isiquiasëri ina pochin camairin niꞌton, co aꞌpanipihuëꞌ.

³⁷ Ina natanatonaꞌ, Isiquiasë aꞌparinsopitaso co napion cancantopi. Napoatona aꞌmopiso oshapi. Ina quëran Asiria huaꞌani napotërinsoꞌ, Isiquiasë shaꞌhuitacaiso marëꞌ paantapi.