2 Reyes 13 - Chayahuita (Shahui)

^1-13 (-) (Aꞌna tahuëri Irisiori aꞌnara pënëntonaꞌpi aꞌparin: “Quio itopisoꞌ israiroꞌsa copirnonën nicacaso marëꞌ acoonquëꞌ,” itërin. Ina piquëran inaso copirno yaꞌconahuaton, Israiro copirno Coramo itopisoꞌ tëparin. Cota huënton copirno Ocosiasë itopisonta tëparin. Acapoco saꞌin Quisapira itopisontaꞌ, Iniasë shaꞌhuirinso chachin Quio camaitërin quëran inapa paꞌcotë quëran tëꞌyatohuachinara chiminin. Acapoco huiꞌninpitanta tiquirin. Ina piquëran inasoꞌ chiminin. Ina chiminpachina, huiꞌnin Coacasë itopiso yaꞌhuërëꞌ, israiroꞌsa huaꞌanëntërin. Inanta chiminpachina, huiꞌnin Coasë itopiso yaꞌhuërëꞌ, huaꞌanëntërin.)

Israiroꞌsa Yosëri catahuacaso marëꞌ shaꞌhuirahuaton, Irisio chimininsoꞌ

¹⁴ Naporo tahuëriꞌsa Irisiosoꞌ, chiminchináchin caniorin. Ina natanaton, Coasë copirnori paaparin. Quënanconahuaton iporin quëran naꞌnëtërin. Naꞌnëtapon pochin: —¡Quëmasoꞌ tatahuë pochin ninan! ¡Panca sontaroꞌsa huënton pochin nicaton yaꞌipi israiroꞌsacoi paꞌpoyarancoi! itërin.

¹⁵ —Aꞌnara pëꞌchinan, shinërënënpita, inapita maquëꞌ, itërin Irisiori. Napotohuachina, copirnoso inapita manin.

^16-17 Naporoꞌ Irisiori itaantapon: —Pëꞌchinanquë shinërë acorahuaton aꞌpacaso marëꞌ ótoroquëꞌ, itërin. Coasëri inapotasoꞌ, piquëimirarin. Inapotapon pochin: —Piꞌi pipirinso parti quëran huintana yaꞌhuërinsoꞌ, iꞌsoatëquëꞌ, itërin. Napotohuachina iꞌsoatërin. Naporoꞌ camaiantarin: —Iporasoꞌ: ¡Aꞌpaquë huachi! itërin. Ina natanaton, Coasëso aꞌparin. Shinërë paasoꞌ, Irisioso tapon: “¡Sinioro pëchinanën quëran chachin nichaꞌësarinquëmaꞌ! ¡Siriaroꞌsa minsërahuaton nichaꞌësarinquëmaꞌ! Ina nohuanton quëmari Siria sontaroꞌsa Ahuico ninanoquë minsëaran. ¡Tiquiaquë huarëꞌ nitaran!” itërin.

¹⁸ Ina quëran camaiantarin: —Aꞌnapita shinërëroꞌsa maquëꞌ, itërin. Napotohuachina copirnoso inapita manin. Nani mapachina: —Shinërëroꞌsaquë noꞌpaꞌ huihuiquëꞌ, itaantarin Irisiori. Ina natanaton, Coasëso cararo noꞌpaꞌ huihuiton tananpitërin.

¹⁹ Naporinso marëꞌ Irisiori noꞌhuirin: —Aꞌnatëráporohuë nipon, saotarohuë nipon huihuiran naporini, noya noya niitonhuëꞌ. Siria sontaroꞌsa minsërahuaton tiquimiachitonhuëꞌ. Iporaso napoaponahuëꞌ, cararora inapita minsëaran, itërin.

²⁰ Ina quëran Irisioso chiminin. Chiminpachina, quëmopinënpitari paꞌpitopi. Ina piquëransoꞌ Moapo ihuatë huëntonoꞌsari israiroꞌsa ihuacaiso marëꞌ yáhuëcapaipi. Nani piꞌipiquë napopi.

²¹ Aꞌna tahuëri inapita huëcasoiꞌ, israiroꞌsanta chimipi paꞌpitapi. Co huëꞌsapiso nicatonaraihuëꞌ naporapirinahuëꞌ, aꞌnanaya yaꞌnohuachinara paꞌyanpi. Paꞌyanënaquë chimipisoꞌ, Irisioco poꞌmopi pirayan tëꞌyatopi. Napotatona taꞌananpipi. Chimipiso napoaponahuëꞌ, Irisio nansëquën cari cariaso chachin nanpiantarahuaton, huanirin.

^22-25 (-)