2 Pedro 3 - Chayahuita (Shahui)

Oꞌmantacasoꞌ tahuëri

¹ Nosororanquëmaꞌ iyaroꞌsaꞌ. Iꞌhua quirica aꞌpatëranquëmaꞌ nontacamaso marëꞌ. Iporasoꞌ naquëranchin ninshitantatënquëmaꞌ, pënëantaranquëmaꞌ noꞌtëquën yonquicamaso marëꞌ.

² Iráca noya pënëntonaꞌpiroꞌsaꞌ yaꞌhuëpi. Ninotonaꞌ, Yosë quiricanënquë ninshitopi, nani nontëramaꞌ. Naporahuaton, quiyantaꞌ Quisocristo pënënincoisoꞌ aꞌchintërainquëmaꞌ. Inasoꞌ nichaꞌësarinpoaꞌ. Caꞌtanoꞌsanënpitacoi chachin aꞌparincoi. Ama naniantacamaso marëhuëꞌ ninshitaranquëmaꞌ.

³ Isoꞌ naꞌcon yonquicoꞌ. Oꞌmantacasoꞌ tahuëri yaꞌcaritohuachin, co noyahuëꞌ piyapiꞌsaꞌ yaꞌhuaponaꞌ. Co Yosë natëtonaraihuëꞌ, maꞌsona yonquipisoꞌ nisapi. Co noyahuëꞌ cancantapi. Quisocristo shaꞌhuitërinpoasoꞌ tëhuaapi.

⁴ “¡Maꞌpítacha nonama paya! ‘Oꞌmantararahuë,’ ¿itërinquëmaꞌ ti? Intohuasoꞌ Quisocristosoꞌ nimara, capa. Co oꞌmaarinhuëꞌ, tënai. Tatanënpoarinta ninarápirinahuëꞌ, nani chiminpi. Isoroꞌpaꞌ ninin quëra huarëꞌ inachachin inachachin nisárin. Co onporontaꞌ nisha tahuëri nisarinhuëꞌ,” tosapi.

⁵ Co yanatëtonaraihuëꞌ, co yonquiapihuëꞌ. Iráca co mantaꞌ yaꞌhuëpirinhuëꞌ. Ina quëran Yosë nonaton, isoroꞌpaꞌ acorin. Inápaquë yaꞌhuërinsopitantaꞌ acorin. Isoroꞌpasoꞌ iisáchin nipirinhuëꞌ, ina nohuanton, yaniroꞌ yaꞌnorin.

⁶ Ina quëran piyapiꞌsaꞌ co noyahuëꞌ nipachinara, iiꞌ quëran chachin ataꞌhuantërin.

⁷ Inapochachin ipora isoroꞌpaꞌ, piꞌiroꞌtëꞌ, inapita yaꞌhuëpirinahuëꞌ, nani Yosëri chinotërin anaꞌintacasoꞌ: “Aꞌna tahuëri pën quëran ataꞌhuantarahuë,” tënin niꞌton, tahuëri nanihuachin, pën quëran chachin ataꞌhuantarin. Naporoꞌ tahuëri yaꞌipi oshahuanoꞌsaꞌ chiníquën anaꞌintarin. Parisitopiquë aꞌpararin.

⁸ Isontaꞌ iyaroꞌsaꞌ yonquicoꞌ. “Aꞌna tahuërisoꞌ aꞌnaroáchin naꞌhuërin. Huaranca piꞌipisoꞌ huaꞌquiꞌ,” tënëhuaꞌ. Yosëso nipirinhuëꞌ co canpoa pochin yonquirinhuëꞌ. Huaranca piꞌintaꞌ nipirinhuëꞌ, Yosërisoꞌ aꞌna tahuëriáchin pochin niꞌnin. Huaranca piꞌipi, aꞌna tahuërirëꞌ napopianachin pochin niꞌnin.

⁹ Aꞌnaquën napopi: “Yosë huaꞌquiarin. Naniantërinpoaꞌ,” topirinahuëꞌ, co huaꞌquirinhuëꞌ. Co topinan quëran shaꞌhuitërinpoahuëꞌ. Nosoroatonpoaꞌ, ninarárin. Co nohuantërinhuëꞌ aꞌna piyapi tërantaꞌ parisitopiquë pacacasoꞌ. Naꞌcon naꞌcon piyapiꞌsaꞌ co noyahuëꞌ yonquipisopita naniantacaiso marëꞌ ninarárin.

¹⁰ Napoaponahuëꞌ, tahuërinën nanihuachin, Sinioro oꞌmantararin. Niꞌcoꞌ. Tashiꞌ co yonquiasëhuëꞌ, ihuatëꞌ huëꞌnin. Inapochachin aꞌnanaya ayaroꞌ tahuëri naniarin huachi. Naporoꞌ tahuëri piꞌiroꞌtëꞌ huëntoncaarin. Chiníquën huëntoncahuachin, taꞌhuantarin. Piꞌi, tayora, inapita huë́ya niꞌton, soquiarin huachi. Isoroꞌpaꞌ, yaꞌipi yaꞌhuërinsopita, inapita huiquitapi.

Noya yonquicasoꞌ yaꞌhuërinsoꞌ

¹¹ Co mantaꞌ yaꞌhuëmiatarinhuëꞌ. Yaꞌipi taꞌhuantarin niꞌton, ¡Yosë pochin cancantatëhuaꞌ, noyasáchin niahuaꞌ!

¹² Oꞌmantacasoꞌ tahuëri noya ninahuaꞌ. “Manoton oꞌmantaꞌin,” taꞌtëhuaꞌ, noyápiachin cancantahuaꞌ. Ina tahuëri nanihuachin, yaꞌipi inápaquë yaꞌhuërinsopita pën quëran taꞌhuantarin. Piꞌi, yoqui, tayora, inapita soquiarin.

¹³ Napoaponahuëꞌ, nasha yaꞌhuaantapon. Nani Yosë shaꞌhuitërinpoaꞌ. “Aꞌna tahuëri nasharoꞌpaꞌ, nasha piꞌiroꞌtëꞌ inapita acoantapo,” itërinpoaꞌ. Ina ninarëhuaꞌ. Inaquë noyasáchin nisarëhuaꞌ.

¹⁴ Napoaton iyaroꞌsaꞌ, ina ninatomaꞌ naꞌcon yonquicoꞌ noyasáchin nicacamaso marëꞌ. “Quisocristo nanan anoyatërinpoaꞌ,” taꞌtomaꞌ, noya niniꞌtomaꞌ, yaꞌhuëcoꞌ. Yaꞌipi co noyahuëꞌ yonquiramasopita naniantatomaꞌ, noyápiachin cancantocoꞌ. Ina quëran oꞌmantahuachin, noya niꞌsarinquëmaꞌ.

¹⁵ Nosoroatonpoaꞌ, huaꞌquiꞌ Sinioro ninararin naꞌcon naꞌcon piyapiꞌsari natëcaiso marëꞌ. Ina quëran inapitantaꞌ nichaꞌësarin. Ama ina naniantocosohuëꞌ. Inachachin iya Paonontaꞌ ninshitërinquëmaꞌ. Inasoꞌ iyanpoa pochin niꞌnëhuaꞌ. Yosë nohuanton, noꞌtëquën nitotaton, ninshitërin.

¹⁶ Naꞌa quirica ninshitaton, nisha nisha ninanoquë yaꞌhuëpisopita aꞌpatërin. Noya pënënpirinpoahuëꞌ, piꞌpian sacaiꞌ yonquicasoꞌ. Aꞌnaquën piyapi co Yosë nanamën nitotatonahuëꞌ, nisha nisha yonquipi. Paono ninshitërinsoꞌ nontopirinahuëꞌ, co noya yonquiatonaraihuëꞌ, maꞌsona tapon naporinsoꞌ anishatopi. Yosë quiricanën iráca ninshitopisontaꞌ anishatopi. Ina marëꞌ Yosëri chiníquën anaꞌintarin huachi.

¹⁷ Napoaton iyaroꞌsaꞌ nani pënënanquëmaꞌ niꞌton, niꞌcona nonpintochinënquëmaꞌ. Iporasoꞌ noya yonquipiramahuëꞌ. Co noyahuëꞌ nipisopita yanonpintarinënquëmaꞌ inapita pochin nisha nisha cancantacamaso marëꞌ.

¹⁸ Canpitaso nipirinhuëꞌ, Sinioro Quisocristoíchin yonquicoꞌ. Inaora nohuanton, nosororinquëmaꞌ niꞌton, nani tahuëri yacatahuarinquëmaꞌ. Inasáchin yonquihuatamaꞌ, oshaquëran noya noya nohuitaramaꞌ. Inasoꞌ nichaꞌësarinpoaꞌ. Yaꞌipi piyapiꞌsari chinochinaꞌ. Ayaroꞌ tahuëriquë huarëꞌ inasáchin yonquiaꞌahuaꞌ. Amen. Nani ninshitëranquëma huachi. Pitro