2 Pedro 2 - Chayahuita (Shahui)

Nisha aꞌchinaꞌpiroꞌsaꞌ

¹ Iráca Yosëri acorinsopita noꞌtëquën pënëntopi. Aꞌnaquënso nipirinhuëꞌ nonpin nanan pënëntatonaꞌ, israiroꞌsaꞌ nonpintopi. Inapochachin iporantaꞌ aꞌnaquën nonpin nanan yaaꞌchintarinënquëmaꞌ. Noyasha nontapirinënquëmahuëꞌ, nonpintarinënquëmaꞌ. “Quiyantaꞌ imarai,” taponaraihuëꞌ, nonpin nanan aꞌchinapi anishacancantacaiso marëꞌ. Quisocristo nichaꞌëinpoaso marëꞌ chiminin. Inaíchin natëcaso nipirinhuëꞌ, nisha aꞌchinaꞌpiroꞌsasoꞌ co yanatëpihuëꞌ. Ina marëꞌ aꞌna tahuëri Yosëri anaꞌintarin. Aꞌnanaya anaꞌintarin.

² Co noꞌtëquën aꞌchintatonaraihuëꞌ, naꞌa piyapiꞌsaꞌ nonpintapi. “Noya noꞌpicasoꞌ, noya monshihuanacasoꞌ,” taꞌtonaꞌ, co noyahuëꞌ nisapi. Naꞌa piyapi natanahuatonaꞌ, inapita pochin cancantapi. “Imarai quiyantaꞌ,” taponaraihuëꞌ, co noyahuëꞌ nisapi. Ina marëꞌ aꞌnapitari nicatonaꞌ, Quisocristo pinosapi. “Quisocristo nanamën co imacasoꞌ yaꞌhuërinhuëꞌ. Ina imapisopitasoꞌ co noyahuëꞌ nipi,” taꞌtonaꞌ, co noꞌtën nanan yaimasapihuëꞌ.

³ Nisha aꞌchinaꞌpiroꞌsasoꞌ co nosororinënquëmahuëꞌ. Canacaiso marëꞌ nonpin nananoꞌsaꞌ aꞌchintarinënquëmaꞌ. Inaso nipirinhuëꞌ, iráca quëra huarëꞌ Yosëri yonquirin anaꞌintacasoꞌ. Aꞌna tahuëri noꞌtëquën anaꞌintarin. Co naniantarinhuëꞌ anaꞌintacasoꞌ.

⁴ Niꞌcoꞌ. Iráca aꞌnaquën anquëniroꞌsaꞌ co Yosë yanatëpihuëꞌ. Co noyahuëꞌ nipi niꞌton, Yosëri anaꞌintërin. Co inapita tërantaꞌ nichaꞌërinhuëꞌ. Parisitacaiso marëꞌ aꞌparin. Tashinanquë oncorapipinan yaꞌhuërápi. Inaquë ayaroꞌ ninarapi.

⁵ Iráca yaꞌhuëpisopitantaꞌ co nichaꞌërinhuëꞌ. Co noyahuëꞌ nipachinara, Yosë nohuanton, panca pacon paꞌnin. Iiꞌ quëran taꞌhuantopi. Noisoꞌ Yosë imaton, noꞌtëquën pënëntopirinhuëꞌ, co yanatëpihuëꞌ niꞌton, yaꞌipiya taꞌhuantopi. Noisáchin nichaꞌërin. Yaꞌipi quëran posayaꞌpíchin chaꞌëpi.

⁶ Ina quëran Sotomaquë yaꞌhuëpisopitantaꞌ anaꞌintërin. Co noyahuëꞌ cancantohuachinara, Sotoma, Comora, catoꞌ ninano chachin noyá ahuiquitërin. Yaꞌipiya chiminpi. Ayonquiinpoaso marëꞌ inapita aninshitërin. “Co noyahuëꞌ nipatëhuaꞌ, chiníquën anaꞌintarinpoaꞌ,” tënëhuaꞌ.

^7-8 Sotomaquë yaꞌhuëpisopita paꞌpi co noyahuëꞌ cancantopi. Monshihuanacaisoáchin yonquipi. Aꞌnaratipita co noyahuëꞌ nipi. Inaquë aꞌna quëmapiíchin noya ninin, Loto itopisoꞌ. Nani tahuëri, nani tahuëri co noyahuëꞌ nipiso nicaton, sëtërin. Taparoꞌ nonpachinara, co noya nataninhuëꞌ. Sëtacasoáchin cancantërin. Sacaiꞌ niponahuëꞌ, inaora Yosë yonquirin. Ina marëꞌ Yosëri nichaꞌërin.

⁹ Inapochachin ipora Quisocristo imapatëhuaꞌ, Yosë nanitërin catahuainpoasoꞌ. Sopai yaminsëpirinpoahuëntaꞌ, Yosë catahuarinpoaꞌ chaꞌëcaso marëꞌ. Oshahuanoꞌsaso nipirinhuëꞌ anaꞌintarin. Nani yonquirin chiníquën anaꞌintacasoꞌ. Ayaroꞌ tahuëri nanihuachin, noꞌtëquën anaꞌintaton, parisitopiquë aꞌpararin.

¹⁰ Aꞌnaquën co piꞌpisha tërantaꞌ Yosë yanatëpihuëꞌ. Inapitasoꞌ chini chiníquën anaꞌintarin. Co Yosë natëtonahuëꞌ, co noyahuëꞌ nicacaisoráchin yonquipi. Aꞌnaratipita taparoꞌ nisáponaraihuëꞌ, co ina marëꞌ tapanpihuëꞌ. “Caora noya nitotërahuë,” taꞌtonaꞌ, co inso tërantaꞌ yanatëpihuëꞌ. Chiníquën nanantopisopita Yosëri acorinsoꞌ co quënanpirinahuëꞌ, pinopi.

¹¹ Anquëniroꞌsaso nipirinhuëꞌ inapita quëran chini chiníquën nanantaponaraihuëꞌ, co nohuantopihuëꞌ pinotacaisoꞌ. “Yosëri anaꞌinchin,” taꞌtonaꞌ, tananpitopi.

¹² Nisha aꞌchinaꞌpiroꞌsasoꞌ maꞌsharoꞌsa pochin cancantopi. Co mantaꞌ yonquipihuëꞌ. Maꞌsona tërantaꞌ yanipachinara, nipi. Yosë yonquirinsoꞌ co nitotatonaraihuëꞌ pinopi. Niꞌcoꞌ. Maꞌsharoꞌsaꞌ tananquë quënanpatëra, tëparëꞌ, co nosororëhuëꞌ. Ina marëꞌ Yosëri acorin. Inapochachin nisha aꞌchinaꞌpiroꞌsasoꞌ taꞌhuantapi. Oshanëna marëꞌ Yosëri anaꞌintarin.

¹³ Piyapiꞌsaꞌ anishacancantopi niꞌton, aꞌna tahuëri inahuantaꞌ parisitapi. Isoroꞌparáchin yonquiatonaꞌ, capa cancantacaisoáchin yonquipi. Aꞌmorëso mancharinso pochin nicatonaꞌ, nitapicancanpi. Imaramasopita niyontonpatamara, “Quiyantaꞌ imarai,” taꞌtonaꞌ, yaꞌconpi. Nonpintatënënquëmaꞌ, ichicoshatapirinënquëmahuëꞌ, inahuasoꞌ co noyahuëꞌ nicatona taparoꞌ nipi.

¹⁴ Sanapi quënanpachinara, monshitacaisoráchin yonquipi. Co nanitopihuëꞌ naniantacaisoꞌ. Co chiníquën cancantopisopitahuëꞌ nonpintatonaꞌ, anishacancantapi. Huënsonquë maꞌsha manëso pochin nonpintapi. Maꞌsharáchin yonquiatonaꞌ, noyapatopi. Napoaton Yosëri anaꞌintarin.

¹⁵ Noꞌtën nanan aꞌporahuatonaꞌ, Yosë iranën quëran pëshonpi. Paramo pochin cancantopi. Pioro huiꞌnin inasoꞌ. Iráca pënëntopirinhuëꞌ, coriqui naꞌcon naꞌcon nohuantërin. “Nonpinacasoꞌ co noyahuëꞌ nipirinhuëꞌ, inapoato, naꞌcon canarahuë,” taꞌton, co noyahuëꞌ ninin.

¹⁶ Co yanatërinhuëꞌ niꞌton, Yosëri chiníquën noꞌhuirin. Moranën co nitononaponahuëꞌ, Yosë nohuanton, piyapi pochin nonin. Ina nonin quëran Yosëri pënënin co noyahuëꞌ yonquirinsopita naniantacaso marëꞌ.

¹⁷ Nisha aꞌchinaꞌpiroꞌsaꞌ co Quisocristo nanamën aꞌchinpihuëꞌ. Poso yanirinso pochin nipi. Yanihuachina, co huachi oꞌocasoꞌ yaꞌhuërinhuëꞌ. Inapochachin nisha aꞌchinaꞌpiroꞌsaꞌ nonpintarinënquëmaꞌ. Isontaꞌ yonquicoꞌ. Huaꞌquiꞌ co oꞌnanpachinahuëꞌ, chitoroꞌ yaráton quënanpatëra, paꞌyatopirëhuëꞌ. Panca ihuani quëpahuachina, co huachi oꞌnaninhuëꞌ. Inapochachin nisha aꞌchinaꞌpiroꞌsaꞌ nisapi. “Noya noya aꞌchintarainquëmaꞌ,” itopirinënquëmahuëꞌ, co tëhuënchachin catahuarinënquëmahuëꞌ. Nani iráca Yosëri yonquirin anaꞌintacasoꞌ. Tashinanquë aꞌpararin. Inaquë parisitáponaꞌ. Co onporontaꞌ pipiponahuëꞌ.

¹⁸ Inahuara nipaꞌyatatonaꞌ, topinan quëran nontarinënquëmaꞌ. Nisha nisha yonquipi. Nasha yaꞌconpisopita aꞌnaroáchin nonpintopi. Ipora huarëꞌ co noyahuëꞌ yonquipisopita naniantapirinahuëꞌ. “Huëcoꞌ noꞌpiahuaꞌ. Noya noꞌpicasoꞌ. Noya monshihuanacasoꞌ,” itopi nonpintatonaꞌ.

¹⁹ “Co insontaꞌ natëcasoꞌ yaꞌhuërinhuëꞌ. Canpitaora nohuanton yaꞌhuëcoꞌ. Maꞌsona tërantaꞌ yanipatamaꞌ, nicoꞌ. Inapohuatamaꞌ, capa cancantaramaꞌ,” itopirinënquëmahuëꞌ, co inapita tërantaꞌ inahuara nohuanton yaꞌhuëpihuëꞌ. Sopai nohuanton, noꞌpipi, monshihuanpi, co noyahuëꞌ nipi. Insosona minsëhuachinpoaꞌ, huaꞌanëntërinpoaꞌ.

²⁰ Quisocristo nanamën natanpachinara, natëpirinahuëꞌ. “Chaꞌësarahuë huachi,” taꞌtonaꞌ, co noyahuëꞌ yonquirinsopita piꞌpian naniantopi. Ina quëran nisha cancantatonaꞌ, Yosë aꞌpoantapi. Co noyahuëꞌ niantahuachinara, sopairi minsërin. Ina marëꞌ naꞌcon naꞌcon Yosëri anaꞌintarin huachi.

²¹ Noꞌtën nanan nitotaponaraihuëꞌ, co imamiatopihuëꞌ. Nóya nicacasoꞌ aꞌchintopirinahuëꞌ, ina naniantopi. Co onporontaꞌ natanpihuëꞌ naporini, noya noya niitonahuëꞌ. Nani Yosë aꞌpopi.

²² Maꞌpitacha nipi paya. Imaponaraihuëꞌ aꞌpohuachinara, iráca ninshitatona napopiso chachin nipi: “Niꞌnira imohuachina, co yonquirinhuëꞌ. Imorinso chachin caantarin. Coshintaꞌ iꞌquë paꞌmopirinahuëꞌ, naquëranchin shipiroquë quëhuëantaton, nëꞌhuëtantarin,” topi. Inapochachin inahuanta niconpi.