2 Pedro 1 - Chayahuita (Shahui)

Imapisopita yonquiaton, nanan aꞌpatërinsoꞌ

¹ Ca Simon Pitroco ninshitaranquëmaꞌ, niꞌcoꞌ. ¿Noya yaꞌhuaramaꞌ? Noya cantaꞌ yaꞌhuarahuë. Quisocristoíchin huaꞌanëntërinco niꞌton, inasáchin natërahuë. Ina acorinco nanamën aꞌchinaꞌhuaso marëꞌ. Yosë nohuanton, canpitantaꞌ Quisocristo natëramaꞌ. Quiya pochin imaramaꞌ niꞌton, canpitantaꞌ nichaꞌësarinquëmaꞌ. Ma noyacha Quisocristo anoyacancantërinpoa paya, tënëhuaꞌ. Inasoꞌ Yosë niꞌton, chinotërëhuaꞌ. Oshanënpoaꞌ inquitatonpoaꞌ, nóya niꞌninpoaꞌ. Napopianachin nosororinpoaꞌ niꞌton, catahuarinquëmaꞌ canpitantaꞌ cancanëma quëran huarëꞌ natëcamasoꞌ.

² Yosë inaora nohuanton noya catahuainquëmaꞌ. Asanocancainquëmaꞌ. Noya noya nohuitohuatamaꞌ, noya noya cancantaramaꞌ. Sinioro Quisocristo nohuitohuatamaꞌ, naꞌcon catahuarinquëmaꞌ sano cancantacamaso marëꞌ.

Noya noya imacasoꞌ yaꞌhuërin

³ Quisocristosoꞌ chiníquën nanantaton, yaꞌipiya nanitaparin. Ina imapatëhuaꞌ, catahuarinpoaꞌ Yosë pochin cancantacaso marëꞌ. Ina Yosë anohuitërinpoaꞌ. Huëntonënquë nani ayaꞌconinpoaꞌ. Inasoꞌ nóya niꞌton, nohuantërin canpoantaꞌ inapochachin cancantacasoꞌ. Ina nohuitohuatëhuaꞌ, catahuarinpoaꞌ onporahuatësona noya noya chinotacasoꞌ.

⁴ “Caora nohuanto, catahuaranquëmaꞌ noyápiachin cancantacamaso marëꞌ,” itatonpoaꞌ, naꞌcon catahuarinpoaꞌ. Oshanënpoaꞌ inquitatonpoaꞌ, anoyacancantërinpoaꞌ. Sopai yacamairinpoaꞌ co noyahuëꞌ nicacaso marëꞌ. Sopai natëhuatëra, monshihuanëꞌ, canacasoáchin yonquirëꞌ, co noyahuëꞌ cancantërëꞌ. Inapohuatëra, oshaquëran nitapicancanëꞌ. Quisocristoso nipirinhuëꞌ nichaꞌërinpoaꞌ. Apira apira ina yonquihuatëhuaꞌ, oshaquëran Yosë pochin cancantarihuaꞌ.

⁵ Napoaton Quisocristo imapatamaꞌ, naꞌcon yonquicoꞌ noya nicacamaso marëꞌ. Noya nicatomaꞌ, Yosë yonquirinso chachin nitotocoꞌ.

⁶ Ina nitotatomaꞌ, co noyahuëꞌ yonquihuatamaꞌ, aꞌnaroáchin naniantocoꞌ. Naporahuatomaꞌ, maꞌsha onpoapomarahuëꞌ, chiníquën cancantocoꞌ. Chiníquën cancantohuatamaꞌ, yaꞌipi cancanëma quëran ina chinotocoꞌ.

⁷ Noyasha chinotatomaꞌ, imaramasopita capini noya ninosorocoꞌ. Naporahuatomaꞌ, yaꞌipi piyapi nosorocoꞌ.

⁸ Ina pochin Yosë pënëninpoaꞌ noya noya imacaso marëꞌ. Ina pochin cancantohuatamaꞌ, co topinan quëran imasaramahuëꞌ. Oshaquëran noya noya cancantohuatamaꞌ, noya noya Quisocristo nohuitaramaꞌ.

⁹ Aꞌnaquënso nipirinhuëꞌ co yaꞌipi cancanëna quëran Yosë imapihuëꞌ. Co noyahuëꞌ nipi. Co aꞌnapita nosoropihuëꞌ. Ina pochin cancantohuachinara, pëtorayatërëso pochin cancantopi. Pëtorayatohuatëra, co aquë quënantërëhuëꞌ. Inapochachin inapitanta co yaꞌipi cancanëna quëran imatonahuëꞌ, isoroꞌpaquë yaꞌhuërinsopitaráchin yonquipi. Nóya cancantacaso marëꞌ oshanënpoaꞌ inquitopirinpoahuëꞌ, ina naniantopi. Oshaquëran somaraya pochin cancantatonaꞌ co huachi nanitapihuëꞌ Yosë nanamën natanacaisoꞌ.

¹⁰ Napoaton iyaroꞌsaꞌ, naꞌcon yonquicoꞌ yaꞌipi cancanëma quëran huarëꞌ imacamaso marëꞌ. Yosë huayonatënquëmaꞌ, nontërinquëmaꞌ niꞌton, noyá matërëso pochin imamiatocoꞌ. Inapohuatamaꞌ, co nisha cancantatomaꞌ, aꞌpoaramahuëꞌ.

¹¹ Cancanëma quëran huarëꞌ imapatamaꞌ, aꞌna tahuëri huaꞌanëntërinquë quëpantarinquëmaꞌ noya yaꞌhuëmiatacamaso marëꞌ. Sinioro Quisocristo nóya cancantaton, nichaꞌësarinpoaꞌ. Inápaquë paꞌpatëhuaꞌ, co onporontaꞌ pipiarëhuahuëꞌ.

¹² Ina yonquiato, co amirahuëꞌ pënëntaꞌhuasoꞌ. Noꞌtën nanan nani nitotëramaꞌ. Noya nitotopiramahuëꞌ, naquëranchin shaꞌhuitantaranquëmaꞌ noya noya yonquicamaso marëꞌ.

¹³ Coꞌhuara ca chimiyantërapohuëꞌ, ina nanan chachin shaꞌhuichinquëmaꞌ ama naniantacamaso marëhuëꞌ, tënahuë.

¹⁴ Co huaꞌquiya quëranhuëꞌ chiminarahuë. Sinioro Quisocristo nani anitotërinco.

¹⁵ Napoaton ninshitaranquëmaꞌ. Naquëranchin aꞌchintantaranquëmaꞌ. Ina quëran chiminpirahuëntaꞌ, iso quirica nontohuatamaꞌ, yonquiantaramaꞌ.

Quisocristo yaꞌnorinsoꞌ

¹⁶ “Chiníquën nanantaton, Quisocristo oꞌmantararin,” itërainquëmaꞌ. Sinioro oꞌmantacasoꞌ tahuëri noꞌtëquën aꞌchintërainquëmaꞌ. Co quiyaora yonquinëhuëi quëran aꞌchintërainquëmahuëꞌ. Co piꞌpisha tërantaꞌ nonpintërainquëmahuëꞌ. Iráca isoroꞌpaquë nipon, nisha pochin yaꞌnotërincoi. Yaꞌpirahuëi quëran chachin niꞌnai.

^17-18 Quisocristoroꞌcoi aꞌna motopiꞌpaꞌ paꞌnai. Inaquë Yosë nohuanton, huënaráchin huënaráchin yaꞌnorin, niꞌnai. Naporo chachin inápa quëran Tata Yosë noninso natanai: “Isosoꞌ huiꞌnahuë, nosororahuësoꞌ. Nóya niꞌnahuë,” tënin. Yosë nohuanton, inaquë quënanatoi, natanai. Inapotatoncoi, Quisocristo chiníquën nanantërinsoꞌ anitotërincoi.

¹⁹ Ina yonquiatoi: “Ma noꞌtëquëncha Yosëri ninorin paya,” tënai. Iráca quëra huarëꞌ pënëntonaꞌpiroꞌsaꞌ ninshitërinënpoaꞌ. Yosë nohuanton, coꞌhuara nasichátëraponhuëꞌ, Quisocristo napocasoꞌ ninopi. “Noꞌtëquën ninshitopi,” taꞌtoi, quiricanën naꞌcon natërai. Canpitantaꞌ ina nontatomaꞌ, yonquicoꞌ. Noꞌtëquën anitotërinpoaꞌ. Tashiꞌ nipachina, nanparin noya aꞌpintërinpoaꞌ. Inapochachin Yosë quiricanën quëran aꞌpintërinpoaꞌ noꞌtëquën yonquicaso marëꞌ. Tahuërianpitaquë huarëꞌ nanparin noya orotërin. Inapochachin ipora Quisocristo oꞌmantaquë huarëꞌ quiricanën yaꞌhuëtërinpoaꞌ ina nohuitacaso marëꞌ. Oꞌmantahuachin, noyá nohuitarihuaꞌ. Huënio tayora huënaráchin aꞌpininso pochin aꞌpintarinpoaꞌ.

²⁰ Iporasoꞌ quiricanën quëran nontërinpoaꞌ. Co canpoara yonquinënpoa quëran maꞌsona tapon naporinsoꞌ nitotërëhuahuëꞌ.

²¹ Iráca co inahuara nohuanton, ninshitopihuëꞌ. Yosëri acorin nanamën anitotinpoaso marëꞌ. Ispirito Santo nohuanton, Yosë yonquirinso chachin ninshitopi.