2 Corintios 9 - Chayahuita (Shahui)

Imapisopita catahuacaso marëꞌ coriqui yontonpisoꞌ

¹ Tëhuënchachin aꞌnapita imapisopita pahuantohuachinaꞌ, maꞌsha quëtacasoꞌ yaꞌhuërin. Nani nitotëramaꞌ niꞌton, co naꞌcon ninshitaranquëmahuëꞌ.

² Piyapiꞌsaꞌ yacatahuaramasoꞌ nitotërahuë. Yaꞌipi Masitonia parti paꞌpato, shaꞌhuitëraꞌpiarahuë. “Iꞌhua piꞌiquë chachin Acaya parti imapisopita naꞌcon yonquipi pahuantërinsopita catahuacaisoꞌ,” itërahuë. Masitoniaroꞌsaꞌ natantahuatonaꞌ, inahuantaꞌ nohuantopi. “Inapita pochin quiyantaꞌ catahuachi, topiraihuëꞌ,” itërinaco naꞌayaꞌpi.

³ Nipirinhuëꞌ, “Co yaꞌipi coriqui yontonchátërapihuëꞌ,” taꞌto, isopita iyaroꞌsaꞌ aꞌpataranquëmaꞌ nontinquëmaso marëꞌ. “Nani yontonapi huëshirahuë,” itopirahuëꞌ, ipora huantaꞌ pahuanamara. Co topinan quëran napotaꞌhuasoꞌ yaꞌhuërinhuëꞌ, tënahuë.

⁴ Co huaꞌquiya quëranhuëꞌ canpitataquë paꞌsarahuë. Aꞌnaquën Masitoniaquë yaꞌhuëpisopita imasarinaco nimara. Canpitataquë canconpatoi, nani coriqui yontontopinan quënanconarai, topirahuëꞌ. Co yaꞌhuëhuachinhuëꞌ, tapanarahuë. “Corintoquë imapisopitasoꞌ noyaroꞌsaꞌ,” itërahuëso marëꞌ, co coriqui yaꞌhuëhuachinhuëꞌ, tapanaramaꞌ canpitantaꞌ.

⁵ Napoaton iyaroꞌsaꞌ aquëchitërahuë. Iꞌhua yonquiramaꞌ aꞌnapita catahuacasoꞌ. Inapitasoꞌ catahuarinënquëmaꞌ coriqui yontonacamaso marëꞌ. Nani yontonpatamaꞌ, noya quënanconarai. Canpitaora nohuanton, quëtocoꞌ. Co quiyaora nohuanton, yamaꞌparainquëmahuëꞌ.

⁶ Isontaꞌ yonquicoꞌ: “Piꞌpian shaꞌtohuatëra, piꞌpian manëꞌ. Pancana shaꞌtohuatëra, naꞌcon manëꞌ,” topi.

⁷ Yaꞌipinpoaꞌ canpoara nohuanton, quëtahuaꞌ. Onposona yaquëtohuachin, quëchin. Ama nisha nisha yonquiaꞌhuasohuëꞌ. Co apiquëran quëtacasoꞌ yaꞌhuërinhuëꞌ. Noya cancantatëhuaꞌ, quëtahuaꞌ. Ina pochin quëtohuatëhuaꞌ, Yosë noya niꞌsarinpoaꞌ.

⁸ Yosë yaꞌipi nanitaparin. Nosoroatënquëmaꞌ, naꞌcon catahuarinquëmaꞌ noya nicacamasoꞌ. Nani tahuëri catahuarinquëmaꞌ. Ina catahuahuachinquëmaꞌ, noya cancantaramaꞌ. Ina nohuanton, yaꞌhuëtarinquëmaꞌ aꞌnapitantaꞌ quëtacaso marëꞌ.

⁹ Iráca Yosë quiricanënquë naporin: “Noya cancantopisopita co apirapihuëꞌ. Saꞌahuaroꞌsaꞌ pahuantohuachinaꞌ, quëtapi. Noya nipisoꞌ, yaꞌhuëmiatarin,” tënin.

¹⁰ Niꞌcoꞌ. Yosë nohuanton, yaꞌpirin yaꞌhuërin shacacaso marëꞌ. Shaꞌpatëra, ina nohuanton, naꞌa papotërin capacaso marëꞌ. Inapochachin ina nohuanton, maꞌsha yaꞌhuëtarinquëmaꞌ. Aꞌnapita topinan quëtohuatamaꞌ, Yosë catahuarinquëmaꞌ noya noya cancantacamaso marëꞌ.

¹¹ Noya catahuahuachinquëmaꞌ, aꞌnapitantaꞌ catahuaramaꞌ. Co apiratatomahuëꞌ, quëtaramaꞌ. Pahuantërinsopita quëtonpatoi, “Yosparinquën, Sinioro,” tosapi.

¹² Imapisopita catahuahuatamaꞌ, co huachi pahuantapihuëꞌ. Naporahuaton, naꞌcon naꞌcon Yosë yonquiapi. “Yosparinquën, Sinioro,” itapi.

¹³ Catahuaramaꞌ niꞌton, noya cancantapi. “Ma noya Quisocristo nanamën natëtonaꞌ, catahuarinënpoaꞌ. Ma noyacha Yosësoꞌ niꞌton, ina nohuanton, naꞌa piyapiꞌsaꞌ catahuapi paya,” tosapi.

¹⁴ Yosë nohuanton, naꞌcon nosororamaꞌ niꞌton, inapitantaꞌ nosoroatënquëmaꞌ, canpita marëꞌ Yosë nontapi huachi.

¹⁵ Yosëso nipirinhuëꞌ naꞌcon naꞌcon quëtërinpoaꞌ. Huiꞌnin chachin aꞌpaimarin nichaꞌëinpoaso marëꞌ. Inasoꞌ noya nóya niꞌton, “Yosparinquën, Sinioro,” itahuaꞌ.