2 Corintios 8 - Chayahuita (Shahui)

Pahuantërinsopita catahuacasoꞌ yaꞌhuërinsoꞌ

¹ Isontaꞌ iyaroꞌsaꞌ yashaꞌhuitëranquëmaꞌ. Masitonia parti naꞌa piyapiꞌsaꞌ Quisocristo imasapi. Nisha nisha ninanoquë niyontonatonaꞌ, Yosë chinotapi. “Yosë naꞌcon nosororinpoaꞌ,” taꞌtonaꞌ, aꞌnapita noya nosoroapi. Yosëri chachin catahuarin ina pochin cancantacaiso marëꞌ.

² Maꞌsha onpotohuachinara, chiníquën parisitaponaraihuëꞌ, noya cancantopi. Naporahuaton, piꞌpisha yaꞌhuëtopirinahuëꞌ, aꞌnapita imapisopita pahuantohuachinara, naꞌcon coriqui quëtopi.

³ Co apiratonahuëꞌ, naꞌcon quëtopi. Pahuantaiquëhuarëꞌ quëtopi, cari niꞌnahuë. Co shaꞌhuitopiraihuëꞌ, inahuara nohuantatonaꞌ, quëtërinacoi pahuantërinsopita quëtacaꞌhuaiso marëꞌ.

⁴ “Quiyarintaꞌ aꞌnapita imapisopita catahuaꞌii, topiraihuëꞌ. Cotia parti naꞌcon pahuantopi niꞌton, iso coriqui quëtonquëꞌ,” itërinacoi. Naꞌcon ina pochin nontërinacoi.

⁵ Co coriqui quëtacasoachin yonquipihuëꞌ. Yaꞌipi cancanëna quëran Yosë imapi. Inaꞌton yonquipi. Ina pochin cancantacasoꞌ noya noya, tënahuë. Ina quëran coriqui, maꞌsha, inapita quëtopi. Quiyantaꞌ yanatërinacoi. “Maꞌsona Yosë nohuantohuachin, shaꞌhuitocoi natëꞌi,” itërinacoi.

⁶ Iꞌhua chachin Tito shaꞌhuitërinquëmaꞌ niꞌton, canpitantaꞌ yonquiramaꞌ coriqui yontonacamasoꞌ. “Imapisopita pahuantopi niꞌton, aꞌpatahuaꞌ,” tënamaꞌ. Napoaton iꞌhuamiachin Tito itërai: “Naquëranchin paantaton, pënëantaquëꞌ yaꞌipi coriqui yaaꞌpapisoꞌ ananiinaꞌ,” itërai.

⁷ Canpitasoꞌ nóya imaramaꞌ niꞌton, Quisocristo natëramaꞌ. Naꞌcon nitotatomaꞌ, aꞌchinamaꞌ. Aꞌnapita yacatahuaramaꞌ. Aꞌchintëranquëmaso pochachin aꞌnapita nosoroaramaꞌ. Napoaton iporasoꞌ pahuantopisopita nosoroatomaꞌ, catahuacoꞌ, tënahuë.

⁸ Co camairanquëmahuëꞌ. Aꞌnapita naꞌcon Yosë marëꞌ acopisoꞌ shaꞌhuitëranquëmaꞌ yonquicamaso marëꞌ. Tëhuënchachin aꞌnapita nosorohuatamaꞌ, ama topinan quëran nontocosohuëꞌ. Catahuacoꞌ ama pahuanchinasohuëꞌ.

⁹ Sinioro Quisocristo nosoroatonpoaꞌ, catahuarinpoasoꞌ nani nitotëramaꞌ. Iráca noya noya inápaquë yaꞌhuëpirinhuëꞌ, isoroꞌpaquë oꞌmarin nichaꞌëinquëmaso marëꞌ. Co mantaꞌ isëquë yaꞌhuëtërinhuëꞌ. Parisitërin quëran nichaꞌërinquemaꞌ noya noya cancantacaso marëꞌ. Parisitaton, naꞌcon catahuarinquëmaꞌ.

¹⁰ Iꞌhua piꞌiquë yonquiramaꞌ aꞌnapita catahuacamasoꞌ. Naporoꞌ caniaritëramaꞌ coriqui yontonacasoꞌ. Iporasoꞌ naquëranchin yontoantacoꞌ, tënahuë. Inapohuatamaꞌ, noya nisaramaꞌ.

¹¹ Naporoꞌ paꞌpi nohuantopiramahuëꞌ, iporasoꞌ coriqui yaꞌhuëtohuachinquëmaꞌ, noya cancantatomaꞌ, yontoncoꞌ ananicaso marëꞌ.

¹² Yaꞌipi cancanëma quëran quëtohuatamaꞌ, Yosë noya niꞌsarinquëmaꞌ. Co naꞌa coriquihuanpatamahuëꞌ, Yosë nitotërin. Co nanitëramahuëꞌ naꞌa quëtacasoꞌ. Co apiratomahuëꞌ, piꞌpian tërantaꞌ quëtohuatamaꞌ, noya niꞌsarinquëmaꞌ.

¹³ Nanitinpichin acocasoꞌ yaꞌhuërin. Co nohuantërahuëꞌ pahuantinquëmasoꞌ.

¹⁴ Noya nicatahuacasoꞌ nohuantahuaꞌ. Iporasoꞌ yaꞌhuëtarinquëmaꞌ niꞌton, pahuantërinsopita quëtocoꞌ. Aꞌna tahuërisoꞌ canpita yaꞌhuërëꞌ maꞌsha pahuantohuachinquëmaꞌ, inahuantaꞌ iꞌhuërëtarinënquëmaꞌ. Ninapotohuatëhuaꞌ, yaꞌipi imarëhuasopita noya yaꞌhuarihuaꞌ. Co pahuantarinpoahuëꞌ.

¹⁵ Iráca Yosë quiricanënquë naporin: “Mana mapachinara, aꞌnaquënsoꞌ naꞌa maponaraihuëꞌ, co yaꞌsotopihuëꞌ. Aꞌnaquënso nipirinhuëꞌ piꞌpian maponaraihuëꞌ, co pahuantopihuëꞌ,” tënin.

Tito Corintoquë aꞌparinsoꞌ

¹⁶ Titontaꞌ naꞌcon yonquirinquëmaꞌ. Ina marëꞌ noya cancantato, “Yosparinquën, Sinioro,” itërahuë.

¹⁷ “Naquëranchin paantaquëꞌ,” itohuatëra, “Noyahuaꞌ. Nani cantaꞌ yonquirahuë paantaꞌhuasoꞌ. Naꞌcon nohuantërahuë,” itërinco.

¹⁸ Aꞌna iyayantaꞌ aꞌpaarai. Titorëꞌ paꞌsarin. “Inantaꞌ nóya imaton, Quisocristo nanamën noya aꞌchinin,” topi yaꞌipi imapisopita.

¹⁹ Nisha nisha ninano quëran imapisopita niyontonahuatonaꞌ, ina quëmapi chachin huayonahuatonaꞌ, acopi caꞌtanaincoiso marëꞌ. Coriqui yocaꞌhuaiso marëꞌ paꞌpatoi, inantaꞌ paꞌsarin. Coriqui quëtonpatoi, noya cancantapona huachi. “Ma noyacha Tata Yosë nosororinpoa paya. Ina nohuanton, iyaroꞌsaꞌ noya cancantatonaꞌ, catahuarinënpoaꞌ,” taponaꞌ.

²⁰ Naꞌa coriqui quëparai niꞌton, co nohuantëraihuëꞌ aꞌnapita pinoinacoisoꞌ. Napoaton ina napocoi paꞌsarai.

²¹ Noyasáchin nisarai Yosë noya nicaincoiso marëꞌ. Piyapiꞌsantaꞌ noya nicainacoisoꞌ nohuantërai.

²² Aꞌna iyayantaꞌ aꞌparai nicainquëmaso marëꞌ. Inantaꞌ naꞌcon catahuarincoi aꞌchinaꞌhuaiso marëꞌ. Piyapiꞌsaꞌ nosoroaton, catahuarin, aꞌchintërin, naporin. Noya quëmapi, tënai. Ipora canpitataquë paꞌsarin. “Corintoquë imapisopita naꞌcon nohuantopi pahuantërinsopita catahuacaisoꞌ,” taꞌton, paꞌsarin catahuainquëmaso marëꞌ.

²³ “¿Intaꞌ Titosoꞌ?” itohuachinënquëmaꞌ, shaꞌhuitocoꞌ. “Coꞌta Paonorëꞌ aꞌchininsoꞌ. Inantaꞌ piyapiꞌsaꞌ catahuarin noya imacaiso marëꞌ,” itocoꞌ. “¿Maꞌmarëtaꞌ aꞌnapitantaꞌ huëꞌpi?” itohuachinënquëmaꞌ, “Nisha nisha ninano quëran aꞌpaipisoꞌ. Quisocristo noya imapi inapitantaꞌ,” itocoꞌ.

²⁴ Inapita cantonpachinquëmaꞌ, noya nontocoꞌ. Ina quëran coriqui pahuantërinsopita marëꞌ yontonamasoꞌ quëtohuatamaꞌ, noya niꞌsarinënquëmaꞌ. “Paono noꞌtëquën nontërinpoaꞌ. Corintoquë imapisopitasoꞌ pahuantopisopita nosoropi mini,” tosapi. Ina quëran yaꞌhuëpiquë chachin paantahuachinaꞌ, shaꞌhuirapi antaꞌ. Yaꞌipi imapisopita nitotapi huachi.