2 Corintios 7 - Chayahuita (Shahui)

¹ Iyaroꞌsa naꞌcon nosororanquëmaꞌ. Ina pochin Yosë yonquirinpoa niꞌton, yaꞌipi co noyahuëꞌ yonquirëhuasopita naniantahuaꞌ. Yaꞌipi co noyahuëꞌ ninëhuasopitantaꞌ aꞌpoaꞌahuaꞌ. Yosë tëꞌhuatatëhuaꞌ, noyasáchin niahuaꞌ.

Noya cancantantapisoꞌ

² Cancanëma quëran huarëꞌ nosorocoi. Co aꞌnayanquëma tërantaꞌ maꞌsha onpotërainquëmahuëꞌ. Co anishacancantërainquëmahuëꞌ. Co nonpintërainquëmahuëꞌ.

³ Co nocanatënquëmaꞌ pënënanquëmahuëꞌ. Naꞌcon nosororainquëmasoꞌ nani shaꞌhuitërainquëmaꞌ. Chiminaꞌhuaiquë huarëꞌ nosoromiatarainquëmaꞌ.

⁴ Tëhuënchachin nóya niꞌnanquëmaꞌ. “Corintoquë yaꞌhuëpisopita noya imapi,” itërahuë yaꞌipi piyapiꞌsaꞌ. Parisitaporahuëꞌ, canpita yonquiatënquëmaꞌ, nóya cancantërahuë.

⁵ Masitoniaquë canconpatoira, naꞌcon maꞌsha onpoatoi napion cancantërai. Naꞌa piyapiꞌsaꞌ noꞌhuirinacoi niꞌton, parisitërai. Naporahuaton, cancanëhuëi quëran naꞌcon yonquirápatëinquëmaꞌ, sëtërai.

⁶ Sëtohuatëhuaꞌ, Yosë achinicancaninpoaꞌ niꞌton, quiyantaꞌ achinicancanincoi. Ina nohuanton, Tito huëꞌnin.

⁷ Napoaton noya cancantërai. Noya nanan shaꞌhuitiirincoi. Noya yonquiantaramaꞌ niꞌton, inantaꞌ noya cancantërin. Iꞌhua niꞌconpachinquëmara, napotëramaꞌ: “Huaꞌquiꞌ co Paono niꞌnincoihuëꞌ. Shaꞌhuitëquëꞌ manóton huëꞌin. Co noyahuëꞌ ninaiso marëꞌ sëtërai. Paono pënënpachincoi, noya natanai,” tënamaꞌ, itërincoi. Ina natanato, nóya cancantërahuë.

^8-9 Iꞌhua quirica ninshitatënquëmaꞌ, chiníquën pënënanquëmaꞌ. Ina quirica nontohuatamara, paꞌpi sëtëramaꞌ. Ina natanato, cantaꞌ sëtopirahuëꞌ. Co nohuantërahuëꞌ chiníquën asëtaꞌhuanquëmasoꞌ. Iporaso nipirinhuëꞌ noya cancantërahuë. Co huaꞌquiꞌ sëtëramahuëꞌ. Oshanëma marëꞌ sëtatomaꞌ, naꞌcon naꞌcon Yosë yonquiramaꞌ. Co noyahuëꞌ ninamasopita aꞌporamaꞌ. Pënënanquëmaꞌ niꞌton, co anaꞌintinquëmasoꞌ yaꞌhuërinhuëꞌ.

¹⁰ Oshanënpoa marëꞌ sëtatëhuaꞌ, Yosë nontohuatëhuaꞌ, catahuarinpoaꞌ co noyahuëꞌ yonquirëhuasopita naniantacaso marëꞌ. Ina pochin sëtacasoꞌ noya, tënahuë. Ina quëran anoyacancantarinpoaꞌ. Co imapisopitasohuëꞌ nipirinhuëꞌ topinan quëran sëtopi. Co oshanënaꞌ naniantohuachinahuëꞌ, chiminpachinaꞌ, Yosëri anaꞌintarin.

¹¹ Canpitasoꞌ sëtatomaꞌ, naꞌcon naꞌcon Yosë yonquiramaꞌ. Ina quëran “Tëhuënchachin co noyahuëꞌ nicatëhuaꞌ, oshahuanëhuaꞌ. Co noyahuëꞌ ninëhuasopita naniantahuaꞌ, Yosë anaꞌintohuachinpoaꞌ,” tënamaꞌ. Cantaꞌ noya yonquiramaco. “Manóton Paono huëꞌin catahuainpoaso marëꞌ. Chiníquën cancantatëhuaꞌ, noꞌtëquën natëahuaꞌ,” tënamaꞌ. Oshahuanaꞌpi co noyahuëꞌ nininso marëꞌ anaꞌintëramaꞌ noya nicacaso marëꞌ. Yaꞌipi co noyahuëꞌ yonquiramasopita naniantatomaꞌ, noya cancantaantaramaꞌ.

¹² Iꞌhua ninshitaponquëmaꞌ, co tëhuënaꞌpi yonquiato, ninshitëranquëmahuëꞌ. Co inari aparisitërinso tërantaꞌ yonquirahuëꞌ. Yaꞌipinquëmaꞌ noya yonquiantamacoisoꞌ nohuantërahuë. “Paonoso catahuarinsopitarë chachin, noꞌtëquën pënëninpoaꞌ. Yosë niꞌsarinpoaꞌ niꞌquëhuarëꞌ, natëahuaꞌ,” taꞌcamaso marëꞌ ninshitëranquëmaꞌ.

¹³ Naporamaꞌ niꞌton, co huachi sëtëraihuëꞌ. Tito cantonpachinquëmara, co piꞌpian tërantaꞌ noꞌhuiramahuëꞌ. Noya nontëramaꞌ niꞌton, noya cancantërin. Quiyantaꞌ ina natanatoi, nóya cancantërai.

¹⁴ Coꞌhuara Tito paꞌshátërasohuëꞌ, shaꞌhuitërahuë: “Corintoquë yaꞌhuëpisopita noya imatonaꞌ, natëarinënquën,” itërahuë. Canpita noꞌtëquën nontërainquëmaso pochachin Titontaꞌ noꞌtëquën nontërahuë. Paꞌpachina, tëhuënchachin noya natëramaꞌ niꞌton, co tapanahuëꞌ.

¹⁵ Pënënpachinquëmara, itëramaꞌ: “Noꞌtëquën pënënancoi. Tëhuënchachin co noyahuëꞌ ninai. Yosë tëꞌhuataꞌhuaisoꞌ yaꞌhuërin,” taꞌtomaꞌ, natëramaꞌ. Ina natanahuaton, Titontaꞌ naꞌcon nosororinquëmaꞌ.

¹⁶ Carinquëmantaꞌ yonquiatënquëmaꞌ, nóya cancantërahuë. Noya noya imasarama huachi, tënahuë.