2 Corintios 2 - Chayahuita (Shahui)

¹ Iꞌhua nicaponquëmaꞌ yapantapirahuëꞌ, co paꞌnahuëꞌ. Paꞌnahuë naporini, asëchitënquëmahuëꞌ.

² Chiníquën pënënpatënquëmaꞌ, sëtaramaꞌ. Co nohuantërahuëꞌ asëtaꞌhuanquëmasoꞌ. Canpita sëtohuatamaꞌ, co huachi nanitaramahuëꞌ acapacancanamacosoꞌ, tënahuë yonquiato.

³ Napoaton iꞌhua ninshitëranquëmaꞌ pënënaꞌhuanquëmaso marëꞌ. Ina quëran canpitataquë paꞌpato, co sëtarahuëꞌ. Noya imaantahuatamaꞌ, noya cancantarahuë. Noya cancantohuato, canpitantaꞌ noya cancantaramaꞌ, tënahuë.

⁴ Chiníquën sëtato, iꞌhua ninshitëranquëmaꞌ. “Co yanatërinacohuëꞌ,” taꞌto, sëtërahuë. Naꞌnëchináchin cancantërahuë. Co nohuantërahuëꞌ chiníquën asëtaꞌhuanquëmasoꞌ. Co noꞌhuiranquëmahuëꞌ. Naꞌcon nosororanquëmaꞌ. Ina nitotacamaso marëꞌ ninshitëranquëmaꞌ.

Nanan anoyatacasoꞌ yaꞌhuërinsoꞌ

⁵ Iꞌhua aꞌnaraꞌ co noyahuëꞌ nininso marëꞌ sëtërahuë. Co casáchin sëtërahuëꞌ. Canpitantaꞌ pancamiachin sëtëramaꞌ. Nipirinhuëꞌ, co nohuantërahuëꞌ nanan apancatacasoꞌ niꞌton, napotëranquëmaꞌ.

⁶ Tëhuënaꞌpi nani anaꞌintëramaꞌ. Naꞌanquëmaꞌ anaꞌintëramaꞌ niꞌton, co noyahuëꞌ nininso marëꞌ inantaꞌ sëtárin. Co huachi aquëtëꞌ anaꞌintacasoꞌ yaꞌhuërinhuëꞌ.

⁷ Iporasoꞌ nanan anoyatocoꞌ. Noya nontaantacoꞌ chiníquën cancanchin. Iporahuantaꞌ sëtárin. Napoaton catahuacoꞌ ama aquëtëꞌ sëchinsohuëꞌ, sëtori yaꞌcoancantohuachin.

⁸ Niyontonahuatomaꞌ, noya nontocoꞌ. “Nosoroatënquën iyasha nanan anoyatarainquën,” itocoꞌ. Ina quëran tëhuënchachin nosoroatomaꞌ, noya nontaantacoꞌ.

⁹ Napoaton iꞌhua ninshitëranquëmaꞌ. “Yaꞌipi natëarinaco,” taꞌto, pënënanquëmaꞌ. Tëniaꞌhuanquëmaso marëꞌ ninshitëranquëmaꞌ.

¹⁰ Nanan anoyatohuatamaꞌ, cantaꞌ nanan anoyatërahuë pochin cancantarahuë. Canpita yonquiatënquëmaꞌ, nanan anoyatërahuë. “Quisocristo nani tahuëri niꞌsarinpoaꞌ,” taꞌto, cancanëhuë quëran huarëꞌ nanan anoyatërahuë.

¹¹ Co nanan anoyatohuatëhuahuëꞌ, Satanasë minsëarinpoaꞌ. Inasoꞌ nisha nisha yanonpintërinpoasoꞌ nitotërëhuaꞌ.

Troasëquë Paono naꞌcon yonquirinsoꞌ

¹² Iꞌhua Troasëquë paꞌnahuë Quisocristo nanamën aꞌchinaꞌhuaso marëꞌ. Yosë nohuanton, naꞌa piyapiꞌsaꞌ nohuantopi niꞌton, aꞌchintërahuë.

¹³ Napoaponahuëꞌ, iꞌhua chachin iya Tito canpitataquë aꞌpapirahuëꞌ. Co huënantarinhuë niꞌton, co sano cancantërahuëꞌ. “¿Onpoatoncha co iyasha huëntarinhuë nicaya?” taꞌto, piyapiꞌsaꞌ noyasha nontahuato, Masitoniaquë paꞌnahuë.

Quisocristo catahuarinpoaꞌ minsëtacasoꞌ

¹⁴ Ma noyacha Tata Yosëso paya, tënëhuaꞌ. Quisocristo imarëhuaꞌ niꞌton, nani tahuëri ina catahuarinpoaꞌ inimiconënpoapita minsëcasoꞌ. Inapitasoꞌ co nohuantopihuëꞌ Quisocristo nanamën aꞌchinaꞌhuaisoꞌ. Co nohuantopirinahuëꞌ, nisha nisha parti paatoi, nanamën aꞌchinárai. Pimóton huaꞌsaiꞌ pimoanahuaninso pochin Quisocristo nanamën nahuinarin. Aꞌchintatoi, naꞌa piyapiꞌsaꞌ anitotërai.

¹⁵ Quisocristosoꞌ pimóchin nininsoꞌ aꞌpërahuaton, Yosë chinotërin. Ina pimoanahuaninso pochin yaꞌipi parti nanamën aꞌchinai. Aꞌchinpatëira, Yosëri nohuantërinsopita noya natanpi niꞌton, nichaꞌësarin. Co nohuantërinsopitahuëntaꞌ natanpirinahuëꞌ, topinan quëran natanpi niꞌton, parisitopiquë paꞌsapi.

¹⁶ Inapitasoꞌ chimipi anarinso pochin nicatonacoi, co natëtopihuëꞌ niꞌton, chiminpachinaꞌ, parisitomiatapi. Natëpisopitaso nipirinhuëꞌ pimóchin imërëso pochin nicatonacoi, chaꞌësahuatonaꞌ, nanpimiatapi. ¿Incaritaꞌ nanitërin ina pochin noya aꞌchinacasoꞌ? Co insontaꞌ nanitërinhuëꞌ inaora aꞌchinacasoꞌ, tënahuë.

¹⁷ Aꞌnaquën nonpinatonaꞌ, inahuara canacaiso marëꞌ aꞌchinapi. “Yosë nanamën aꞌchintërainquëmaꞌ,” topirinahuëꞌ, co noꞌtëquën aꞌchinpihuëꞌ. Quiyaso nipirinhuëꞌ noꞌtëquën shaꞌhuitërainquëmaꞌ. Yosë aꞌparincoi niꞌton, ina nanansáchin aꞌchinarai. Yosë niꞌsárincoi niꞌton, Quisocristoíchin natëarai.