2 Corintios 13 - Chayahuita (Shahui)

Piquëran pënëntërinsoꞌ

¹ Nani catoroꞌ niꞌconanquëmaꞌ. Iporasoꞌ naquëranchin nicaponquëmaꞌ paꞌsarahuë. Yosë quiricanën quëran shaꞌhuitërinpoaꞌ. “Ama topinan quëran anaꞌintocosohuëꞌ. Natantacasoꞌ yaꞌhuërin. Catoꞌ piyapihuë nipon, cara piyapihuë nipon, inachachin shaꞌhuitohuachinpoaꞌ, naporo huarëꞌ anaꞌintacasoꞌ yaꞌhuërin,” topi. Napoaton paꞌpato, ina pochin natantarahuë noꞌtëquën nitotaꞌhuaso marëꞌ.

² Iꞌhua niꞌconpatënquëmara, pënënanquëmaꞌ. “Co oshanëmaꞌ naniantohuatamahuëꞌ, aꞌna huëꞌpato, noꞌtëquën anaꞌintaranquëma huachi,” itëranquëmaꞌ. Iporasoꞌ co inatohuaꞌ yaꞌhuëpirahuëꞌ, inachachin pënëantaranquëmaꞌ. Co iꞌhua oshahuaninsoachin yonquirahuëꞌ. Yaꞌipinquëmaꞌ pënënaranquëmaꞌ.

³ “Chiníquën nanantëransoꞌ aꞌnotocoi nitochii,” itopiramacohuëꞌ. Paꞌpato, noꞌtëquën anaꞌintohuatënquëmaꞌ, nitotaramaꞌ. “Quisocristori aꞌparin niꞌton, chiníquën nanantërin,” tosaramaꞌ. Quisocristo co topinan quëran nontërinpoahuëꞌ. Chiníquën nanantaton, yaꞌipi nanitaparin.

⁴ Isoroꞌpaquë nipon, co aquëtëꞌ chinirinhuëꞌ. Corosëquë patanantopi. Chiminaponahuëꞌ, Tata Yosëri chiníquën nanantaton, ananpitaantarin. Quiyantaꞌ Quisocristo pochin cancantatoi, co quiyaora chiniraihuëꞌ. Ina acorincoi niꞌton, Yosë achinicancanincoi noꞌtëquën pënënaꞌhuainquëmaso marëꞌ.

⁵ Canpitaso nipirinhuëꞌ nitantiacoꞌ. Canpitaora yonquinëma quëran yonquicoꞌ. Aꞌnaquëmaꞌ co cancanëma quëran huarëꞌ imashatëraramahuëꞌ nimara. Yaꞌipi cancanëma quëran imapatamaꞌ, Quisocristo yaꞌcoancantërinquëmaꞌ. ¿Co ina nitotëramahuëꞌ ti? Aꞌnaquëmaso nipirinhuëꞌ co tëhuënchachin imamaranquëmahuëꞌ.

⁶ Tëhuënchachin imapatamaꞌ, co topinan quëran aꞌchintërainquëmahuëꞌ, tënahuë. Ina quëran canpitantaꞌ inachachin yonquiaramaꞌ. “Tëhuënchachin Quisocristori acorin pënënainpoaso marëꞌ,” tosaramaꞌ.

⁷ Canpita marëꞌ Yosë nontarai. “Catahuaquëꞌ noyasáchin niinaꞌ,” itërai. Co aꞌnapita noya nicainacoiso marë naporaihuëꞌ. Canpita noya noya imacamaso marëꞌ naporai. Aꞌnapita co noyahuëꞌ yonquiarapipirinacoihuëꞌ, co ina yonquiraihuëꞌ.

⁸ Noꞌtën nanan natëcamaso marëꞌ catahuarainquëmaꞌ. Co nohuantëraihuëꞌ nisha aꞌchintaꞌhuainquëmasoꞌ.

⁹ Co chiníquën nanantonaꞌpi pochin nipiraihuëꞌ, co ina marëꞌ sëtëraihuëꞌ. Noya imapatamaꞌ, nóya cancantarai. Ipora huantaꞌ Yosë nontarai. “Catahuaquëꞌ, Sinioro, noya noya cancanchinaꞌ,” itërai.

¹⁰ Napoaton co inaquë yaꞌhuaporahuëꞌ, ninshitaranquëmaꞌ pënënaꞌhuanquëmaso marëꞌ. Yaꞌipi co noyahuëꞌ yonquiramasopita naniantohuatamaꞌ, canconpato, co anaꞌintaꞌhuanquëmasoꞌ yaꞌhuaponhuëꞌ. Sinioro chachin chiníquën nanan quëtërinco catahuaꞌhuanquëmaso marëꞌ. Co anishacancantaꞌhuanquëmaso marëꞌ napotaranquëmahuëꞌ. Noya noya imacamaso marëꞌ napotaranquëmaꞌ.

¹¹ Nani iyaroꞌsaꞌ ninshitëranquëmaꞌ. Noya cancantocoꞌ, tënahuë. Yaꞌipi cancanëma quëran Yosë imacoꞌ. Pënënanquëmasoꞌ noya natëtomaꞌ, niachinicancancoꞌ. Napopináchin yonquicoꞌ. Noya niniꞌtomaꞌ, yaꞌhuëcoꞌ. Inapohuatamaꞌ, Yosë catahuarinquëmaꞌ. Inasáchin nosoroatonpoaꞌ, catahuarinpoaꞌ sano cancantacaso marëꞌ.

¹² Noya ninosoroatomaꞌ, imaramasopita capini nisëꞌquëcoꞌ.

¹³ Yaꞌipi imapisopita isëquë yaꞌhuëpisoꞌ, saludos aꞌpatarinënquëmaꞌ.

¹⁴ Inaora nohuanton, Sinioro Quisocristo catahuainquëmaꞌ. Tata Yosë nosoroꞌinquëmaꞌ. Ispirito Santo chachin nani tahuëri noya ayonquiinquëmaꞌ. Nani huachi. Paono