2 Corintios 12 - Chayahuita (Shahui)

Paono inápaquë quënaninsoꞌ

¹ Co nohuantërahuëꞌ aꞌnapita nocanaꞌhuasoꞌ. “Casoꞌ noya noya piyapico,” co taporahuëꞌ, piꞌpian ina pochin shaꞌhuichinquëmaꞌ. Iráca Yosë nohuanton, huaꞌnarëso pochin maꞌsha niꞌnahuë. Quisocristo chachin anitotërincosoꞌ.

² Naporoꞌ inápaquë Yosë yaꞌhuërinquë chachin quëparinco. Nani shonca catapini piꞌipitarin quëparincosoꞌ. Huaꞌyanëhuëichin aꞌnaꞌ paꞌmara. Nonëhuëroꞌco chachin aꞌnaꞌ paꞌmaraco. Co casoꞌ nitotërahuëꞌ. Yosëíchin nitotërin.

³ Tëhuënchachin pantarahuë. Huaꞌyanëhuëichin aꞌnaꞌ paꞌmara. Nonëhuëroꞌco chachin aꞌnaꞌ paꞌmaraco. Co casoꞌ nitotërahuëꞌ. Yosëíchin nitotërin.

⁴ Yosëꞌpaꞌ yaꞌhuasoco, naꞌcon natanpirahuëꞌ, co nanitërahuëꞌ shaꞌhuicaꞌhuasoꞌ. Co Yosë nohuantërinhuëꞌ.

⁵ Noya noya nininsoꞌ anitotërinco niꞌton, nocantochináchin cancantopirahuëꞌ, tananpitërahuë. Co caora nohuanto, chiníquën nanantërahuëꞌ. Co caora nanitërahuëꞌ noya nicaꞌhuasoꞌ, tënahuë.

⁶ “Naꞌcon naꞌcon nitotërahuë,” itëranquëmaꞌ naporini, noꞌtëquën nonchitënquëmahuëꞌ, co nonpinchitënquëmahuëꞌ. Nipirinhuëꞌ, co ina pochin nontëranquëmahuëꞌ. Nani nohuitëramaco. Aꞌchintohuatënquëmara, natanamaco. Naporahuësopita niꞌnamaꞌ. Inaíchin yonquiatomaꞌ, noya niꞌco topirahuëꞌ. Napoaton co aquëtëꞌ shaꞌhuitaranquëmahuëꞌ.

⁷ Yosë naꞌcon naꞌcon anitotërinco. Ina quëran ama aꞌnapita nocanaꞌhuaso marëhuëꞌ ina nohuanton, maꞌsha onporahuë. Nahuan acoposha ohuanincoso pochin natanahuë. Co oshahuanaporahuëꞌ, Satanasë naꞌcon aparisitërinco.

⁸ Ina marëꞌ chiníquën Sinioro nontërahuë. “Catahuaco ama parisichisohuëꞌ,” itërahuë. Cararoꞌ ina pochin nontopirahuëꞌ.

⁹ Sinioro shaꞌhuitërinco: “Ca nohuanto, ipora huantaꞌ parisitapiranhuëꞌ, nosoroatënquën, naꞌcon catahuaranquën. Carinquën achinicancanaranquën noya ahuantamaso marëꞌ. Co quëmaora nanitohuatanhuëꞌ, naꞌcon naꞌcon catahuaranquën. Maꞌsona tërantaꞌ onpohuatan, co onporontaꞌ pataranquënhuëꞌ,” itërinco. Napoaton co huachi sëtërahuëꞌ. “Co caora nanitohuatërahuëꞌ, Quisocristo naꞌcon naꞌcon catahuarinco,” taꞌto, noya cancantërahuë.

¹⁰ Napoaton co chiníquën cancantopirahuëꞌ, co paꞌyanahuëꞌ. Pinopachinacora, co noꞌhuitërahuëꞌ. Maꞌsha pahuantopirincohuëꞌ, co ina yonquirahuëꞌ. Quisocristo imarahuëso marëꞌ aparisitohuachinacora, ahuantërahuë. Sacaiꞌ nipirinhuëꞌ, nóya cancantërahuë. “Co caora nanitohuatërahuëꞌ, naꞌcon naꞌcon catahuarinco,” taꞌto, chini chiníquën cancantërahuë.

Imapisopita yonquirinsoꞌ

¹¹ Nisha aꞌchinaꞌpiroꞌsaꞌ paꞌyatëramaꞌ niꞌton, huaꞌyantërinso pochin nontëranquëmaꞌ. “Paono nóya aꞌchintërincoi,” itëramaꞌ naporini, co ina pochin cantaꞌ nonacaꞌhuasoꞌ yaꞌhuëꞌitonhuëꞌ. “Quiyasoꞌ noya noyacoi,” itopirinënquëmahuëꞌ, co ca quëran noya noyahuëꞌ inahuasoꞌ. Co caora nanitaporahuëꞌ, Quisocristo catahuarinco niꞌton, noya ninahuë.

¹² Iráca isoroꞌpaquë nipon, aꞌnaya aꞌnaya huayonaton, acorin nanamën aꞌchinacaiso marëꞌ. Inapitasoꞌ naꞌcon catahuarin. Ina nohuanton, caniaꞌpiroꞌsaꞌ aꞌnaroáchin anoyatopi. Nani maꞌsha nanitapapi. Inapopi quëran acorinsopita nohuitërëhuaꞌ. Cantaꞌ acorinco niꞌton, inapochachin catahuarinco. Canpitataquë yaꞌhuapo, caniaꞌpiroꞌsaꞌ aꞌnaroáchin anoyatërahuë. Aparisitopirinacohuëꞌ, ahuantato, aꞌchintëranquëmaꞌ. “Ma noyacha Yosëri catahuarin paya,” taꞌtomaꞌ, imaramaꞌ.

¹³ Aꞌnaquënso nipirinhuëꞌ shaꞌhuitërinënquëmaꞌ. “Aꞌnapita imapisopita noya noya niꞌnin,” itopirinënquëmahuëꞌ, yaꞌipinquëmaꞌ napopináchin niꞌnanquëmaꞌ. Aꞌna parti aꞌchinpato, cosharoꞌ, coriqui, inapita maꞌpatërahuë capato, nanpicaꞌhuaso marëꞌ. Canpitaíchin co maꞌpachinanquëmahuëꞌ. ¿Ina marëꞌ noꞌhuiramaco ti? Noꞌhuihuatamaco, ¡naniantocoꞌ!

¹⁴ Nani catoroꞌ niꞌconanquëmaꞌ. Iporasoꞌ naquëranchin nicaponquëmaꞌ yapaꞌsarahuë. Cantonpatënquëmaꞌ, co mantaꞌ maꞌpaaranquëmahuëꞌ. Co maꞌshanëmaꞌ nohuantërahuëꞌ. Canpita noya noya imacamasoꞌ nohuantërahuë. Huiꞌnahuëpita pochin niꞌnanquëmaꞌ. Huiꞌnanpoaꞌ co nocomarinpoahuëꞌ. Canpoari catahuacasoꞌ yaꞌhuërin.

¹⁵ Napoaton co mantaꞌ maꞌparanquëmahuëꞌ. Noya cancantato, sacatarahuë cosharoꞌ paꞌanaꞌhuaso marëꞌ. Ina quëran parisitaporahuëꞌ, aꞌchintaranquëmaꞌ noya imacamaso marëꞌ. Carimasoꞌ naꞌcon naꞌcon nosoropiranquëmahuëꞌ, canpitasoꞌ co onpopinchin nosororamacohuëꞌ topirahuëꞌ.

¹⁶ Aꞌnaquëontaꞌ nonpinapirinaco. “Paono co maꞌsha maꞌpapirinquëmahuëꞌ, nonpintatënquëmaꞌ, canarin,” itërinënquëmaꞌ. Co napopirahuëꞌ, napotërinënquëmaꞌ.

¹⁷ Iꞌhua mini aꞌnaquën aꞌpapirahuëꞌ, co mantaꞌ ina quëran canarahuëꞌ.

¹⁸ “Inta, quëmari niꞌconiquëꞌ iyaroꞌsaꞌ,” itahuato, Tito aꞌparahuë. Inarëꞌ aꞌna iyayantaꞌ aꞌparahuë. Cantonpachinquëmaꞌ, co Tito nonpintërinquëmahuëꞌ. Cantaꞌ ina pochachin cancantërahuë. Co piꞌpisha tërantaꞌ canaraihuëꞌ.

¹⁹ Co noya nicamacoiso marëꞌ ninshitarainquëmahuëꞌ. Aꞌnaquëmaꞌ nimara ina pochin yonquipiramahuëꞌ, co quiyaso naporaihuëꞌ. Nosororainquëmaꞌ iyaroꞌsaꞌ. Noya noya imacamaso marëꞌ ninshitarainquëmaꞌ. Quisocristo imarai niꞌton, Yosëíchin yonquirai. Ina niꞌsárincoi niꞌton, noꞌtëquën ninshitarainquëmaꞌ.

²⁰ Canconpato, co noya niꞌsaranquëmahuëꞌ nimara. Canpitantaꞌ co noya niꞌsaramacohuëꞌ nimara. Napoaton sëtato, yonquiáranquëmaꞌ. Ipora huantaꞌ aꞌnaquëmaꞌ nimara ninoꞌhuiaramaꞌ, niaꞌpitaramaꞌ, iquianan quëran ninontaramaꞌ, nipinosaramaꞌ, ninocanaramaꞌ, nisha nisha yonquiaramaꞌ nimara, tënahuë yonquiato.

²¹ Iráca aꞌnaquëmaꞌ co noyahuëꞌ yonquiramaꞌ. Monshihuanamaꞌ, sanapirachin yonquiramaꞌ. Ipora huantaꞌ aꞌnaquëmaꞌ inapoaramaꞌ nimara. Co ina naniantohuatamahuëꞌ, canconpato, paꞌpi sëtarahuë. Carinquëmaꞌ aꞌchintëranquëmasoꞌ niꞌton, Yosë atapanarinco. Co oshanëmaꞌ aꞌpohuatamahuëꞌ, chiníquën asëtaramaco.