2 Corintios 11 - Chayahuita (Shahui)

Nisha aꞌchinaꞌpiroꞌsaꞌ yanonpinpisoꞌ

¹ Noya nipatëhuaꞌ, co ina marëꞌ aꞌnapita nocanacasoꞌ yaꞌhuërinhuëꞌ. Nipirinhuëꞌ, piꞌpian huaꞌyantërinso pochin nonchinquëmaꞌ natanco. Noꞌtëquën yonquicamaso marëꞌ shaꞌhuitaranquëmaꞌ.

² Yosë nohuanton, naꞌcon nosororanquëmaꞌ. Nosoroatënquëmaꞌ, aꞌpitëranquëmaꞌ. Co nohuantërahuëꞌ nisha cancantacamasoꞌ. Nanon soꞌyarinso pochin ninin. Niꞌcoꞌ. Quëmapiri mapachina, soꞌináchin yonquicasoꞌ yaꞌhuërin. Inapochachin carinquëmantaꞌ aꞌchintëranquëmaꞌ Quisocristoíchin yonquicamaso marëꞌ.

³ Aꞌnaquënso nipirinhuëꞌ yaanishacancantërinënquëmaꞌ. Iráca yaꞌhuani Ipa nonpintërinso pochin yanonpintërinënquëmaꞌ ama Quisocristoíchin yonquicamaso marëhuëꞌ.

⁴ Quisocristo imacasoꞌ aꞌchintëranquëmaꞌ. Natëhuatamaꞌ, Ispirito Santo yaꞌcoancantërinquëmaꞌ. Inapitaso nipirinhuëꞌ nisha aꞌchintërinënquëmaꞌ. “Quisocristo nanamën chachin aꞌchintarainquëmaꞌ,” itopirinënquëmahuëꞌ, nisha nanan aꞌchintërinënquëmaꞌ. Nisha ispiritontaꞌ yaꞌhuërin, itërinënquëmaꞌ. Nisha nisha natëcasoꞌ aꞌchintohuachinquëmara, aꞌnaroáchin yaimaramaꞌ.

⁵ “Quiyasoꞌ noya noyacoi,” itopirinënquëmahuëꞌ, inapitasoꞌ co ca quëran noya noyahuëꞌ, tënahuë.

⁶ Co míso nonaꞌpicohuëꞌ niporahuëꞌ, noya noya nitotërahuë. Yaꞌipi noꞌtëquën aꞌchintëranquëmasoꞌ nani nitotëramaꞌ. Nani maꞌsha ninahuësontaꞌ nani niꞌnamaꞌ.

⁷ Yosë nanamën aꞌchintohuatënquëmara, co piꞌpisha tërantaꞌ coriqui maꞌparanquëmahuëꞌ. Sacatato, maꞌsha pahuantërincosoꞌ paꞌanahuë. Topinan aꞌchintëranquëmaꞌ canpita noya noya imacamaso marëꞌ. ¿Ina marëꞌ co noyahuëꞌ niꞌnamaco ti?

⁸ Aꞌchintëranquëmaso marëꞌ co mantaꞌ maꞌparanquëmahuëꞌ. Aꞌnapita imapisopita coriqui aꞌpatërinaco catahuaꞌhuanquëmaso marëꞌ. Naporoꞌ co inapita aꞌchintopirahuëꞌ, aꞌpatërinaco.

⁹ Canpitataquë yaꞌhuasoco, maꞌsha pahuantopirincohuëꞌ, co piꞌpisha tërantaꞌ maꞌparanquëmahuëꞌ. Masitonia parti quëran huëcatonaꞌ, quëtirinaco. Quisocristo imapi niꞌton, topinan maꞌsha quëtirinaco nanpicaꞌhuaso marëꞌ. Canpita maꞌshanëmaꞌ co maꞌparanquëmahuëꞌ. Co onporontaꞌ nohuantaparanquëmahuëꞌ.

¹⁰ Quisocristo catahuarinco niꞌton, noꞌtëquën nontaranquëmaꞌ. Co aꞌchinato canarahuëꞌ. Yaꞌipi Acaya parti topinan aꞌchinarahuë. Napoaton noya cancantërahuë. Co insontaꞌ nanitarinhuëꞌ nisha ayonquiincosoꞌ.

¹¹ “Co nosororinquëmahuëꞌ niꞌton, maꞌshanëmaꞌ co maꞌparinquëmahuëꞌ,” itopirinënquëmahuëꞌ, co noꞌtëquën nonpihuëꞌ. Yosë niꞌsárinco, naꞌcon nosororanquëmaꞌ, tënahuë.

¹² Nisha aꞌchinaꞌpiroꞌsaꞌ aꞌchintohuachinënquëmara, coriqui maꞌparinënquëmaꞌ. Caso nipirinhuëꞌ aꞌchinahuëso marëꞌ co coriqui maꞌpatërahuëꞌ. Ipora huantaꞌ topinan aꞌchinárahuë ama pinoinacoso marëhuëꞌ. Inapita pochin cantaꞌ maꞌparanquëmaꞌ naporini, “Paono pochachin aꞌchintërainquëmaꞌ. Yosë aꞌparincoi quiyantaꞌ,” ichitënënquëmahuëꞌ.

¹³ Inapitaso nipirinhuëꞌ naꞌcon nonpintërinënquëmaꞌ. “Quisocristo aꞌparincoi,” itopirinënquëmahuëꞌ, co tëhuënchachin aꞌparinhuëꞌ. Nonpintatënënquëmaꞌ, aꞌchintarinënquëmaꞌ.

¹⁴ Co ina marëꞌ paꞌyanacasoꞌ yaꞌhuërinhuëꞌ. Niꞌcoꞌ. Satanasëntaꞌ nohuantohuachin, Yosë anquëninën pochin yaꞌnorarin piyapiꞌsaꞌ nonpintacaso marëꞌ.

¹⁵ Napoaton Satanasë natëpisopitantaꞌ ina pochachin nisapi. “Yosë aꞌparincoi. Noꞌtëquën natëcamaso marëꞌ aꞌchintarainquëmaꞌ,” topirinahuëꞌ. Nonpinapi niꞌton, aꞌna tahuëri Yosëri noꞌtëquën anaꞌintarin.

Paono parisitërinsoꞌ

¹⁶ Naquëranchin shaꞌhuitantaꞌinquëmaꞌ. “Paonosoꞌ huaꞌyantërin,” toconpi aꞌnaquën. Ama inapita natëcosohuëꞌ. Nipirinhuëꞌ, piꞌpian ina pochin nontohuatënquëmaꞌ, ahuantatomaꞌ, natanco, topirahuëꞌ. Casoꞌ noya noya ninahuësoꞌ shaꞌhuitaranquëmaꞌ yonquicamaso marëꞌ.

¹⁷ Co Sinioro nohuantërinhuëꞌ aꞌnapita nocanacasoꞌ. Nocantohuatëra, huaꞌyantërinso pochin nonëhuaꞌ.

¹⁸ Nipirinhuëꞌ, nisha aꞌchinaꞌpiroꞌsaꞌ ina pochin nonpi niꞌton, cantaꞌ piꞌpian ina pochin shaꞌhuichinquëmaꞌ.

¹⁹ Inapitasoꞌ nocanpirinënquëmahuëꞌ, noya natanamaꞌ niꞌquëhuarëꞌ, cantaꞌ piꞌpian tërantaꞌ natanco, topirahuëꞌ.

²⁰ Inapitasoꞌ chiníquën camairinënquëmaꞌ. Maꞌshanëmaꞌ topinan mapi. Nocaninënquëmaꞌ, yaahuërinënquëmaꞌ. Inapotopirinënquëmahuëꞌ, ¿maꞌmarëcha noya natanama nicaya? tënahuë, yonquiato.

²¹ Quiyaso nipirinhuëꞌ co ina pochin ninaihuëꞌ. Co chiníquën nontërainquëmahuëꞌ. Ina marëꞌ tapanai. Nipirinhuëꞌ, inapitasoꞌ nocaninacoi niꞌquëhuarëꞌ, cantaꞌ huaꞌyantërinso pochin nonato, piꞌpian nonantapatarahuë.

²² “Quiyasoꞌ Iprio piyapicoi,” topachinara, cantaꞌ mini Iprioco. “Israiro piyapicoi,” topachinara, cantaꞌ inachachin ninahuë. “Apraansoꞌ shimashonëhuëi chachin,” topachinara, inasoꞌ shimashonëhuë cantaꞌ.

²³ “Quisocristo shaꞌhuitërincoi niꞌtoi, natërai,” itopirinënquëmahuëꞌ. ¡Casoꞌ naꞌcon naꞌcon natërahuë! Inapitasoꞌ nocaninaco niꞌton, huaꞌyantërinso pochin nonato, piꞌpian inapita pochin nonchinquëmaꞌ noꞌtëquën yonquicamaso marëꞌ. Yosë marëꞌ casoꞌ chini chiníquën sacatërahuë. Paꞌsápato, Yosë nanamën aꞌchinahuë. Ina marëꞌ naꞌcon naꞌcon parisitaporahuëꞌ, ahuantërahuë. Inantaꞌ shaꞌhuichinquëmaꞌ. Aꞌchinahuëso marëꞌ naꞌaroꞌ tashinan pëiquë poꞌmorinaco. Naꞌaroꞌ ahuërinaco. Shitëparinaco.

²⁴ Cotio huaꞌanoꞌsaꞌ anaꞌintatonaco, chiníquën huihuirinaco. Cara shonca isconoꞌ huihuirinaco. Nisha nisha ninanoquë aꞌnatëraporoꞌ inapotëraꞌpiarinaco.

²⁵ Copirno sontaroꞌsanënpita naraquë chiníquën ahuërinaco. Cararoꞌ inapotatonaco, anaꞌintërinaco. Aꞌna tahuëri naꞌpiquë tëꞌyararinaco tëpainacoso marëꞌ. Naporahuaton, cararoꞌ piꞌpíshachin shichimiitërahuë. Nanchaquë marë paꞌtaporahuëꞌ, nancha yancominahuaton, acopoiꞌ paꞌnin. Cararoꞌ inaporahuë. Aꞌna tashiꞌ nara yanponinquë matato, marëquë chachin tahuërianpitërahuë. Iꞌhuaraya huarëꞌ chaꞌërahuë.

²⁶ Aꞌchinacaꞌhuaso marëꞌ paꞌsárahuë. Iiroꞌsaꞌ panca pamatohuachina, shichimiitërahuë. Ihuatëroꞌsantaꞌ yatëparinaco. Cantaꞌ cotio piyapico nipirahuëꞌ, cotioroꞌsaꞌ noꞌhuitonaco, yaahuërinaco. Nisharoꞌsantaꞌ noꞌhuirinaco. Panca ninanoroꞌsaquë aꞌnaquën yaahuërinaco. Co piyapi yaꞌhuërinquëontaꞌ maꞌsha onporahuë. Marë paꞌtohuatëra, parisitërahuë. Aꞌnaquën: “Quiyantaꞌ imarai,” taponaraihuëꞌ, chiníquën noꞌhuirinaco.

²⁷ Chiníquën sacatápato, parisitërahuë. Tashintaꞌ co huëꞌëtorahuëꞌ, niꞌtárahuë. Naꞌa tahuëri capa cosharoꞌ niꞌton, tanarahuë, yamororahuë. Co coshataporahuëꞌ, aꞌchinárahuë. Aꞌmocaꞌhuasoꞌ pahuantërinco niꞌton, sëhuën natanahuë.

²⁸ Yosë nohuanton, ina pochin parisitárahuë. Naporahuaton, yaꞌipi imaramasopita nosoroatënquëmaꞌ, yonquiáranquëmaꞌ. Noya noya imacamasoꞌ naꞌcon nohuantërahuë. Nani tahuëri yonquiatënquëmaꞌ napion cancantërahuë.

²⁹ Aꞌnaquën co chiníquën cancantohuachinahuëꞌ, cantaꞌ ina pochin ninatanahuë. Aꞌna piyapi anishacancantohuachinquëmara, nosororanquëmaꞌ niꞌton, ina noꞌhuirë pochin cancantërahuë.

³⁰ Aꞌnaquënsoꞌ naꞌcon nonsapi. “Quiyasoꞌ noya noyacoi,” topi. Caso nipirinhuëꞌ co ina pochin nonahuëꞌ. Co caora nanitërahuësoꞌ shaꞌhuichinquëmaꞌ. Naꞌcon maꞌsha onpotopirinacohuëꞌ, Yosëíchin achinicancaninco ahuantaꞌhuaso marëꞌ.

³¹ Yosë niꞌsárinco, co nonpintaranquëmahuëꞌ. Inasoꞌ Quisocristo paꞌpin chachin, yaꞌipiyari chinochinaꞌ. Ina niꞌsárinco niꞌton, noꞌtëquën nontaranquëmaꞌ.

³² Iráca Tamascoquë yaꞌhuasoco, ninano huaꞌan yamaninco, copirno Aritasëri acorinsoꞌ. Tashinan pëiquë yapoꞌmorinco niꞌton, sontaroꞌsaꞌ aꞌparin. Nani tahuëri ninano yaꞌcoana niꞌsapi macainacoso marëꞌ.

³³ Yamapirinacohuëꞌ, imapisopita catahuarinaco chaꞌëcaꞌhuaso marëꞌ. Inapa pairatopiquë huintana yaꞌhuërin. Ina quëran nantipiquë anohuaraimarinaco. Napotohuachinacora, chaꞌërahuë. Co caora nanitopirahuëꞌ, Yosë catahuarinco, chaꞌërahuë.