2 Corintios 10 - Chayahuita (Shahui)

Yosëri nanan quëtërinsoꞌ

¹ Ca Paonoco sanoanan quëran pënënanquëmaꞌ. Aꞌnaquën napopi: “Paono aquë quëran ninshitohuachinpoara, chiníquën nanan aꞌpatirinpoaꞌ. Isëquë chachin yaꞌhuapon, tëꞌhuatatonpoaꞌ, co chiníquën pënëninpoahuëꞌ,” topi natantërahuë. Quisocristosoꞌ chiníquën nanantaponahuëꞌ, co noꞌhuirinpoahuëꞌ. Sanoanan quëran pënëninpoaꞌ. Ina pochin cancantato, cantaꞌ sanoanan quëran pënënanquëmaꞌ.

² Aꞌnaquënsoꞌ pinorinaco. “Paonosoꞌ co Yosë pochin yonquirinhuëꞌ. Inaora nohuantërinsoáchin yonquirin,” topirinahuëꞌ. Paꞌpato, inapita chiníquën pënënarahuë. Canpitaso nipirinhuëꞌ, noya yonquihuatamaꞌ, co chiníquën pënënaꞌhuanquëmasoꞌ yaꞌhuaponhuëꞌ, tënahuë.

³ Piyapicoi quiyantaꞌ nipiraihuëꞌ, co aꞌnapita pochin yonquiraihuëꞌ. Co natëpisopitahuësoꞌ inimicotopirinacoihuëꞌ, co quiyaora yonquinëhuëi quëran yaminsëraihuëꞌ.

⁴ Aꞌnaquënsoꞌ inimiconënpita minsëcaiso marëꞌ nisha nisha quihuípi. Quiyaso nipirinhuëꞌ co quiyaora yonquinëhuëi quëran minsëtaraihuëꞌ. Sacaiꞌ nipirinhuëꞌ, Yosë ananitërincoi nonpin nananoꞌsaꞌ minsëcaꞌhuaisoꞌ.

⁵ Aꞌnaquën nisha nanan imasapi. “Quiyaora noya nitotërai,” toconpi niꞌton, co nanitopihuëꞌ Yosë nohuitacaisoꞌ. Nipirinhuëꞌ, Yosë catahuarincoi inapitantaꞌ minsëcaꞌhuaisoꞌ. Noꞌhuipirinacoihuëꞌ, noꞌtën nanan aꞌchintarai Quisocristoíchin natëcaiso marëꞌ. Yaꞌipinpoaꞌ co noyahuëꞌ yonquipirëhuahuëꞌ, Yosë nanitërin ananiantinpoasoꞌ Quisocristoíchin natëcaso marëꞌ.

⁶ Canpita noya natëhuatamaꞌ, noya cancantarai. Ina quëran canconpatoi, co natëpisopitahuëꞌ noꞌtëquën anaꞌintarai.

⁷ Canpitasoꞌ yaꞌpirama quëran quënanamasoráchin yonquiramaꞌ. Co cancanëma quëran huarëꞌ yonquiramahuëꞌ. Aꞌnaquën “Quisocristo chachin imarai,” topachinara, isontaꞌ yonquiꞌinaꞌ. Quiyantaꞌ Quisocristo imarai mini.

⁸ Yosë chachin chiníquën nanan quëtërincoi nanamën aꞌchintaꞌhuainquëmaso marëꞌ, itohuatënquëmara, co ina marëꞌ tapanahuëꞌ. Noya noya imacamaso marëꞌ aꞌchintërainquëmaꞌ. Co nisha cancantamaso marëꞌ aꞌchintërainquëmahuëꞌ.

⁹ Chiníquën nanantopirahuëꞌ, co apaꞌyanaꞌhuanquëmaso marëꞌ ninshitaranquëmahuëꞌ.

¹⁰ Aꞌnaquën itërinënquëmaꞌ: “Paono naꞌcon ninshitatonpoaꞌ, chiníquën pënënpirinpoahuëꞌ. Huëꞌpachinasoꞌ, co chiníquën nanantonaꞌpi pochin nontërinpoahuëꞌ. Sanoanayan quëran aꞌchintërinpoaꞌ niꞌton, co chiníquën nanantërinhuëꞌ,” toconpi.

¹¹ Napopirinahuëꞌ, co nisha nisha nontaraihuëꞌ. Inapitantaꞌ shaꞌhuitocoꞌ nitochinaꞌ. Ninshitohuatënquëmara, chiníquën pënënanquëma mini. Canpitataquë canconpatoi, inachachin nontarainquëmaꞌ. Insosona co yanatëhuachinhuëꞌ, chiníquën pënënatoi, anaꞌintarai huachi.

¹² Inapitasoꞌ co noꞌtëquën yonquipihuëꞌ. “Quiyasoꞌ noya noyacoi. Aꞌnapita quëran noya noya nitotërai,” toconpi. Co ina pochin nonacasohuëꞌ nipirinhuëꞌ, napopi. Inahua capini ninocanatonaꞌ, ninapotopi. Co quiyasoꞌ inapita pochin cancantëraihuëꞌ.

¹³ Co quiyaora nohuanton, chiníquën nanantëraihuëꞌ. Yosë chachin acorincoi naꞌa piyapiꞌsaꞌ aꞌchintaꞌhuaiso marëꞌ. Insëquësona aꞌchinaꞌhuaisontaꞌ shaꞌhuitërincoi. Ina nohuanton, Corintoquë yaꞌhuëramasopitantaꞌ aꞌchintërainquëmaꞌ.

¹⁴ Yosë shaꞌhuitërincoisoráchin natërai. Ina nohuanton, canpitataquë paꞌnai. Quiyarimaꞌton Quisocristo nanamën aꞌchintërainquëmaꞌ.

¹⁵ Co aꞌna piyapi aꞌchininquë paatoi, aꞌchinaihuëꞌ. Yosë aꞌparincoi noya aꞌchintaꞌhuainquëmaso marëꞌ. Naꞌcon nohuantërai noya noya imacamasoꞌ. Noya noya natëhuatamaꞌ, aquëtë huarëꞌ aꞌchintarainquëmaꞌ.

¹⁶ Ina quëran aꞌnapita yaꞌhuërinquëntaꞌ yaaꞌchinai. Inapitantaꞌ Yosë imacaiso marëꞌ aꞌchintarai. Aꞌna piyapi aꞌchininquë co nohuantëraihuëꞌ aꞌchinaꞌhuaisoꞌ.

¹⁷ Yosë quiricanënquë naporin: “ ‘Noya noya ninahuë,’ co taꞌcasoꞌ yaꞌhuërinhuëꞌ. ‘Ma noyacha Yosë catahuarinco paya,’ taꞌcasoꞌ yaꞌhuërin,” tënin.

¹⁸ “Casoꞌ noyaco,” topatëhuaꞌ, co ina marëꞌ Yosë noya niꞌsarinpoahuëꞌ. Noya cancantohuatëhuaꞌ, Yosë noya niꞌsarinpoaꞌ. Ina naꞌcon naꞌcon yonquiaꞌahuaꞌ.