2 Corintios 1 - Chayahuita (Shahui)

Imapisopita yonquiaton, nanan aꞌpatërinsoꞌ

¹ Ca Paonoco ninshitantaranquëmaꞌ. ¿Noya canpitantaꞌ yaꞌhuaramaꞌ? Noya cantaꞌ yaꞌhuarahuë. Yosë nohuanton, Quisocristo acorinco nanamën aꞌchinaꞌhuaso marëꞌ. Iya Timotioroꞌco nanan aꞌpataranquëmaꞌ. Corintoquë yaꞌhuëramasopita ninshitaranquëmaꞌ. Yosë nohuanton, canpitantaꞌ huëntonënquë yaꞌconamaꞌ. Acaya parti nisha nisha ninanoroꞌsaquë imaramasopita yonquiatënquëmaꞌ, ninshitaranquëmaꞌ.

² Inaora nohuanton, Tata Yosë catahuainquëmaꞌ. Asanocancainquëmaꞌ. Sinioro Quisocristontaꞌ inachachin catahuainquëmaꞌ.

Paono parisitaponahuëꞌ, Yosëri achinicancaninsoꞌ

³ —Ma noyacha Tata Yosëso paya. Sinioro Quisocristo paꞌpin inasoꞌ. Naꞌcon nosororinpoaꞌ niꞌton, catahuarinpoaꞌ chiníquën cancantahuasoꞌ. Nani tahuëri inasáchin achinicancaninpoaꞌ.

⁴ Maꞌsona tërantaꞌ onpohuatëhuaꞌ, ina catahuarinpoaꞌ noya cancantacaso marëꞌ. Achinicancaninpoaꞌ niꞌton, canpoantaꞌ nanitarihuaꞌ aꞌnapita catahuacasoꞌ. Inapitantaꞌ maꞌsha onpohuachinaꞌ, achinicancanarihuaꞌ. Yosë catahuarinpoaso pochachin inapitantaꞌ catahuarihuaꞌ.

⁵ Quisocristo imarëhuaso marëꞌ aꞌnapita aparisitërinënpoaꞌ. Aparisitohuachinënpoara, Quisocristo chachin achinicancaninpoaꞌ. Naꞌcon naꞌcon aparisitohuachinënpoaꞌ, naꞌcon naꞌcon catahuarinpoaꞌ noya cancantacaso marëꞌ.

⁶ Canpitantaꞌ Yosë nohuitacamaso marëꞌ aꞌchintërainquëmaꞌ. Ina marëꞌ aparisitërinacoi. Parisitapiraihuëꞌ, Yosë achinicancanincoi ahuantaꞌhuaiso marëꞌ. Yosë catahuarinquëmaꞌ canpitantaꞌ, tënai. Parisitopiramahuëꞌ achinicancanarinquëmaꞌ quiya pochachin ahuantamaso marëꞌ.

⁷ Canpitantaꞌ aparisitohuachinënquëmaꞌ, Yosë catahuarinquëmaꞌ chiníquën cancantacamaso marëꞌ. Napoaton co Yosë aꞌpoaramahuëꞌ. Chiníquën cancantatomaꞌ, imamiataramaꞌ, tënai. Ina marëꞌ noya cancantërai.

⁸ Parisitëraisoꞌ shaꞌhuichinquëmaꞌ, canpitantaꞌ nitotocoꞌ. Asiaquë yaꞌhuasocoi, naꞌcon maꞌsha onpotërinacoi. Co ahuantochináchinhuëꞌ cancantërai:

⁹ “Chiminapoi nimara,” topiraihuëꞌ, co chiminaihuëꞌ. Yosë nohuanton, maꞌsha onporai ina naꞌcon naꞌcon yonquicaꞌhuaiso marëꞌ. Napoaton “Quiyaora nanitërai,” co tënaihuëꞌ. “Catahuacoi Sinioro, co quiyasoꞌ nanitëraihuëꞌ,” itërai. Yosëíchin yaꞌipi nanitaparin. Chiminpisopitantaꞌ ananpitaantarin, tënai.

¹⁰ Piꞌpishachin shichiminpiraihuëꞌ, Yosë naꞌcon catahuarincoi niꞌton, chaꞌërai. Nani tahuëri niꞌsárincoi. “Co onporontaꞌ naniantarincoihuëꞌ. Aꞌna tahuëri parisitaantapiraihuëꞌ, nichaꞌësarincoi,” taꞌtoi noya cancantërai.

¹¹ Canpitantaꞌ quiya marëꞌ chiníquën Yosë nontocoꞌ catahuaincoi. Naꞌanquëmaꞌ quiya marëꞌ Yosë nontohuatamaꞌ, Yosë catahuarincoi. Ina quëran canpitantaꞌ noya cancantaramaꞌ. “Ma noyacha Yosëri catahuarin paya,” taꞌtomaꞌ, “Yosparinquën Sinioro,” tosaramaꞌ.

Paono Corintoquë yapaꞌninsoꞌ

¹² Yosë niꞌsárincoi niꞌton, noꞌtëquën shaꞌhuitarainquëmaꞌ. Co piꞌpian tërantaꞌ nonpintërainquëmahuëꞌ. Noyápiachin cancantatoi, yaꞌipi parti aꞌchinai. Co quiyaora yonquinëhuëi quëran aꞌchintërainquëmahuëꞌ. Yosë inaora nohuanton, catahuarincoi niꞌton, noya ninai. Ina marëꞌ noya cancantërai.

¹³ Noꞌtëquënáchin ninshitërainquëmaꞌ. Co nisha nisha yonquiraihuëꞌ. Co yanonpintërainquëmahuëꞌ. Iso quirica nontohuatamaꞌ, yonquiraiso chachin nitotaramaꞌ. Oshaquëran yaꞌipi nitotarama huachi, tënahuë.

¹⁴ Ipora noyamiachin nitotëramaꞌ. Sinioro Quisoso oꞌmantacasoꞌ tahuëri nanihuachin, noya cancantatoi, noya niꞌsarainquëmaꞌ. Naporo tahuëri canpitantaꞌ noya niꞌsaramacoi, tënai. “Paono noya aꞌchintërincoi niꞌton, imarai,” tosaramaꞌ. Ina yonquicamasoꞌ nohuantërai.

^15-16 “Noya niꞌsarinaco,” taꞌto, iꞌhua nicaponquëmaꞌ yapaꞌpirahuëꞌ. Masitonia parti paꞌpato, niraꞌinquëmaꞌ. Ina quëran oꞌmantahuato, nirimantaꞌinquëmaꞌ, topirahuëꞌ. Inaporahuë naporini, canpita catahuaitomacohuëꞌ Cotia parti pacaꞌhuasoꞌ. Catoroꞌ niꞌnanquëmaꞌ naporini, noya noya cancanchitomahuëꞌ, tënahuë yonquiato. Napopirahuëꞌ, co paꞌnahuëꞌ.

¹⁷ Napoaton: “Paono nisha nisha yonquirin,” ¿topiramahuëꞌ ti? Co nisha nisha yonquirahuëꞌ. Aꞌnaquënsoꞌ maꞌsona tërantaꞌ shaꞌhuipirinhuëꞌ, co tëhuënchachin naporinhuëꞌ. Co casoꞌ ina pochin cancantërahuëꞌ.

¹⁸ Yosë niꞌsárinco noꞌtëquën nontëranquëmaꞌ. Yosë noꞌtëquënáchin nonin niꞌton, cantaꞌ co nonpintëranquëmahuëꞌ. Co nisha nisha nonahuëꞌ.

¹⁹ Iráca Siripano, Timotio, ca, caracoi aꞌchintërainquëmaꞌ. Quisocristo nanamën aꞌchintërainquëmaꞌ. Inasoꞌ Yosë huiꞌnin chachin. Co onporontaꞌ nonpintërinpoahuëꞌ. Noꞌtëquën nontërinpoaꞌ.

²⁰ Yaꞌipi Yosë shaꞌhuitërinpoasoꞌ Quisocristo acotarinpoaꞌ. Napoaton “Quisocristosoꞌ noꞌtëquën nonaton, catahuarinpoaꞌ. Ma noyacha Yosëso paya,” tënëhuaꞌ.

²¹ Yosë chachin huëntonënquë ayaꞌconinpoaꞌ Quisocristo imacaso marëꞌ. Huayonatonpoaꞌ, acorinpoaꞌ piyapinënpita nicacaso marëꞌ.

²² Huiꞌnin pochin nicatonpoaꞌ, sichoquë marca acorëso pochin Ispirito Santo ayaꞌcoancantërinpoaꞌ. Huaꞌyanën chachin ayaꞌcoancantërinpoaꞌ niꞌton, anitotërinpoaꞌ. “Yaꞌipi shaꞌhuitërinpoasoꞌ chachin quëtarinpoaꞌ,” tënëhuaꞌ.

²³ Yaꞌipi yonquirahuësoꞌ Yosë nitotërin. Ina niꞌsárinco niꞌton, noꞌtëquën nontaranquëmaꞌ. Co nohuantërahuëꞌ canpitataquë chiníquën pënënaꞌhuanquëmasoꞌ. Napoaton co iꞌhua niꞌconanquëmahuëꞌ. Naporoꞌ paꞌnahuë naporini, co noyahuëꞌ ninamaso marëꞌ chiníquën pënënaꞌhuanquëmasoꞌ yaꞌhuëꞌitonhuëꞌ.

²⁴ Co quiyasoꞌ huaꞌan pochin chiníquën pënëntëraihuëꞌ. Sanoanan quëran pënënainquëmaꞌ. Yosë nanamën noya natëramaꞌ. Yacatahuarainquëmaꞌ noya cancantacamaso marëꞌ.