1 Timoteo 6 - Chayahuita (Shahui)

¹ Patron marëꞌ sacatopisopita, pënënquëꞌ patronënaꞌ noya nicatonaꞌ natëinaꞌ. Co natëhuachinahuëꞌ, noꞌhuitatonaꞌ, Yosë pinoponaꞌ nimara. “Yosë nanamënsoꞌ napoonin niꞌton, ina imatonaꞌ co yanatërinacohuëꞌ,” taponaꞌ nimara. Co ina Yosë nohuantërinhuëꞌ.

² “Patronënantaꞌ Quisocristo imapachin, ama ina marëꞌ chiroinasohuëꞌ. Iyaparin pochin nicatonaꞌ, noya noya sacachinaꞌ. Imarinsoꞌ catahuarapi niꞌton, nóya sacachinaꞌ. Inantaꞌ Yosëri nosororin niꞌton, noya catahuainaꞌ,” itëquëꞌ. Yaꞌipi carinquën pënënanquënsoꞌ, aꞌchinquëꞌ. Onpopiontaꞌ pënënquëꞌ natëinaꞌ.

Nonpin nanan aꞌchinaꞌpiroꞌsaꞌ

³ Quisocristo noꞌtëquën aꞌchintërinpoaꞌ. Natëhuatëhuaꞌ, noya noya cancantarihuaꞌ. Aꞌnaquënso nipirinhuëꞌ Sinioro nanamën co natëtonahuëꞌ, nisha aꞌchinpi. Nonpin nananoꞌsaꞌ aꞌchinapi.

⁴ “Yaꞌipiya nitotërai,” topirinahuëꞌ, co yonquipihuëꞌ. Topinan quëran nonsápi. Nisha nisha nananoꞌsaꞌ yonquiatonaꞌ, nonconpi. Paꞌyatopi piyapiꞌsaꞌ anoꞌhuitacaisoꞌ. Inapita natanpachinara, niapiratopi, ninoꞌhuipi, nipinopi. “Nonpintërinco nimara,” taꞌtonaꞌ, co huachi natërapihuëꞌ.

⁵ Nitapicancantatonaꞌ, co niquëꞌyapihuëꞌ. Iráca Yosë nanamën nitotopirinahuëꞌ, ina naniantatonaꞌ, co huachi noꞌtëquën yonquipihuëꞌ. Maꞌsha canacaiso marëꞌ Yosë yaimaconpi. Co ina marëꞌ imacasohuëꞌ nipirinhuëꞌ, napopi. Ama inapitasoꞌ natanquësohuëꞌ.

Canamiatërëhuasoꞌ

⁶ Noꞌtëquën Yosë imapatëhuaꞌ, tëhuënchachin canamiatarihuaꞌ. Co naꞌa maꞌsha yaꞌhuëtopirinpoahuëꞌ, sano cancantohuatëhuaꞌ, nóya yaꞌhuarihua huachi.

⁷ Nasitohuatëhuaꞌ, co mantaꞌ yaꞌhuëtërinpoahuëꞌ. Naporahuaton, chiminpatëhuantaꞌ, yaꞌipi maꞌshanënpoaꞌ patarihuaꞌ.

⁸ Napoaton capacasoꞌ, aꞌmocasoꞌ inapita yaꞌhuëtohuachinpoaꞌ, sano cancantahuaꞌ.

⁹ Aꞌnaquënso nipirinhuëꞌ coriqui canacasoáchin yonquipi. Inasáchin cancantatonaꞌ, sopai natëpi. Nani maꞌsha nohuantatonaꞌ huënsonquë maꞌsha manëso pochin nisapi. Inasáchin yonquiatonaꞌ, aquë aquëtëꞌ nohuantaponaꞌ. Ina marëꞌ Yosëri chiníquën anaꞌintarin.

¹⁰ Coriquiráchin paꞌyatohuatëra, nisha nisha yonquirëꞌ. Co noyahuëꞌ ninëꞌ. Nonpinëꞌ, ihuatërëꞌ, noꞌhuitërëꞌ, ina pochin yonquirëꞌ. Aꞌnaquën coriquiráchin yonquiatonaꞌ, Yosë aꞌpopi. Ina quëran cancanëna quëran co huachi noya cancantopihuëꞌ. Sëtatonaꞌ, chiníquën parisitapi.

Imamiatacasoꞌ yaꞌhuërin

¹¹ Quëmaso nipirinhuëꞌ api Yosë imaran niꞌton, ama coriquiráchin yonquiquësohuëꞌ. Noya nicacasoáchin yonquiquëꞌ. Cancanën quëran huarëꞌ Yosë chinotëquëꞌ. “Inasoꞌ nosoroatonco, catahuarinco,” taꞌton, noya natëquëꞌ. Naporahuaton, yaꞌipi piyapi nosoroquëꞌ. Maꞌsha onpoaponahuëꞌ, chiníquën cancantëquëꞌ. Sano piyapi niquëꞌ.

¹² Iráca imapisopita niyontonpachinara, chiníquën cancantaton, “Casoꞌ Quisocristo imarahuë,” itëran. Napoaton “Yosë catahuarinco,” taꞌton, sopai minsëquëꞌ. Yosë nani huëntonënquë ayaꞌconinquën niꞌton, imamiatëquëꞌ. Ina quëran aꞌna tahuëri inápaquë nanpimiataran.

¹³ Yosë chachin ananpirinpoaꞌ. Inasoꞌ niꞌsarinpoaꞌ. Quisocristontaꞌ niꞌsarinpoaꞌ. Iráca inantaꞌ chiníquën cancantaton, Ponsio Pirato noꞌtën nanan shaꞌhuitërin.

¹⁴ Ina yonquiaton, Quisocristo noninso chachin natëquëꞌ. Ama aꞌnapita pinocaiso marëhuëꞌ noꞌtëquën aꞌchinquëꞌ. Sinioro Quisocristo oꞌmantaquë huarëꞌ noya natëquëꞌ.

¹⁵ Tahuëri nanihuachin, Yosë nohuanton, oꞌmantararin. Yosëíchin huaꞌanëntërinpoaꞌ. Yaꞌipi huaꞌanoꞌsaꞌ ina natëinaꞌ. Copirnoroꞌsarintaꞌ natëinaꞌ. “Ma noyacha Yosëso paya,” ichinaꞌ.

¹⁶ Inasáchin co taꞌhuantarinhuëꞌ. Nanpirápon inasoꞌ. Noya noya niꞌton, huënaráchin pochin yaꞌnorin. Co yaꞌcarichinachinhuëꞌ. Iráca quëran huarëꞌ co insontaꞌ Yosë quënaninhuëꞌ. Ipora huantaꞌ co quënanarihuarahuëꞌ, yaꞌipi piyapiꞌsari chinochinaꞌ. Yaꞌipiya nanitaparin. Amen.

¹⁷ Aꞌnaquën naꞌcon coriqui yaꞌhuëtërin. Inapitantaꞌ api pënënquëꞌ: “Ama aꞌnapita nocancosohuëꞌ. Ama coriquinëmáchin paꞌyatocosohuëꞌ. Inasoꞌ co yaꞌhuëmiataponhuëꞌ. Yosë naꞌcon naꞌcon paꞌyatocoꞌ. Inasoꞌ co apiratërinpoahuëꞌ. Nani maꞌsha quëtërinpoaꞌ nóya cancantatëhua, yaꞌhuëcaso marëꞌ.

¹⁸ Naꞌa coriqui yaꞌhuëtohuachinquëmaꞌ, aꞌnapita nosoroatomaꞌ, catahuacoꞌ. Maꞌsha pahuantohuachina, quëtocoꞌ. Ama mantaꞌ apiracosohuëꞌ. Noya nicoꞌ.

¹⁹ Inapohuatamaꞌ, Yosëꞌpaꞌ canamiataramaꞌ. Inaquë noya noya nanpimiatarama,” itëquëꞌ.

Tiquinamën pochin pënëninsoꞌ

²⁰ Noꞌtëquën api Quisocristo nanamën aꞌchintëranquën. Ama naniantatonhuëꞌ, noya imaquëꞌ. Nonpin nananoꞌsaso nipirinhuëꞌ ama natanquësohuëꞌ. Nisha nisha nonpi. “Yaꞌipiya noꞌtëquën nitotërai,” topirinahuëꞌ, co noꞌtëquën nitotopihuëꞌ.

²¹ Aꞌnaquën nisha nanan imatonaꞌ, Yosë aꞌpopi. Ama inapita natëquësohuëꞌ. Inaora nohuanton, Yosë noya catahuainquën. Nani ninshitëranquën huachi. Paono