1 Timoteo 5 - Chayahuita (Shahui)

Aꞌnaya aꞌnaya pënënacaso yaꞌhuërinsoꞌ

¹ Mashoroꞌsaꞌ co noyahuëꞌ nipachinaꞌ, ama noꞌhuiquësohuëꞌ. Tata pochin nicaton, sanoanan quëran pënënquëꞌ. Napopináchin piꞌipitëramasoꞌ, iyaparin pochin niꞌquëꞌ. Inapitantaꞌ nosoroaton, sanoanan quëran pënënquëꞌ.

² Sanapiꞌsantaꞌ pënënacasoꞌ yaꞌhuërin. Payaroꞌsaꞌ nipachin, mama pochin nicaton, sanoanan quëran pënënquëꞌ noya cancanchinaꞌ. Imoyaroꞌsantaꞌ napopináchin piꞌipitëramasoꞌ oshiparin miáchin pochin niꞌquëꞌ. Ama inapita piꞌpian tërantaꞌ narintëquësohuëꞌ. Noyasáchin yonquiaton, nontëquëꞌ.

Quëyoronoꞌsaꞌ napopisoꞌ

³ Isontaꞌ api, imapisopita shaꞌhuitëquëꞌ nitochinaꞌ. “Quëyoronoꞌsaꞌ noyá saꞌahuamia nipachinaꞌ, nosoroatomaꞌ catahuacoꞌ,” itëquëꞌ.

⁴ Nipirinhuëꞌ, huaꞌhuinpita yaꞌhuëtohuachin, inapita pënënquëꞌ aꞌshina catahuainaꞌ. Aminpitarintaꞌ catahuainaꞌ. Asoꞌsorin niꞌton, inahuarintaꞌ iꞌhuërëtantaꞌinaꞌ. Nosoroatonaꞌ, nocomantaꞌinaꞌ. Ina Yosë naꞌcon nohuantërin.

⁵ Aꞌnaquën quëyoronoꞌsaso nipirinhuëꞌ, co huaꞌhuinpita yaꞌhuëtërinhuëꞌ. Yosëíchin yonquiarin. “Ina catahuarinco,” taꞌton, nani tahuëri Yosë nontarin. Tashirë chachin nontarin. Inapitasoꞌ catahuahuaꞌ.

⁶ Aꞌnaquën quëyoronoꞌsaso nipirinhuëꞌ, nipaꞌyatacasoáchin yonquipi. Nanpiaponahuëꞌ, chimipi pochin cancantopi. Co huachi Yosë yonquipihuëꞌ niꞌton, co inapita catahuacasoꞌ yaꞌhuërinhuëꞌ.

⁷ Nani api shaꞌhuitëranquën. Yaꞌipi imapisopita pënënquëꞌ natëinaꞌ. Ama aꞌnapitari pinocaiso marëhuëꞌ noya niinaꞌ.

⁸ Quëmopinënaꞌ tëhuënchachin nosorocasoꞌ yaꞌhuërin. Pahuantohuachinaꞌ, catahuainaꞌ. Aꞌshinaꞌ, paꞌpinaꞌ, huiꞌninpita, inapita naꞌcon naꞌcon nosorocasoꞌ yaꞌhuërin. Catahuainaꞌ, nocomaꞌinaꞌ. Insoarisona co nocomahuachinahuëꞌ, co huachi Yosë natëapihuëꞌ. Co quëmopinënaꞌ nosorohuachinarahuëꞌ, naꞌcon naꞌcon oshahuanapi.

⁹ Aꞌnaya aꞌnaya niyontonpiquë quëyoronoꞌsaꞌ nininënpita ninshichinaꞌ catahuacaiso marëꞌ. Payaroꞌsaráchin acoinaꞌ, saota shonca piꞌipitërinsoꞌ. Aꞌnaíchin soꞌyatërinsoꞌ.

¹⁰ Noya nininsoráchin acoꞌinaꞌ. Iso pochin nipisopita: Huaꞌhuinpita noya asoꞌsorinsoꞌ. Niꞌtoroꞌsaꞌ huëꞌpachinara, oꞌshitërinsoꞌ. Co mantaꞌ apirarinsohuëꞌ. Piyapinën pochin cancantaton, imapisopita catahuarinsoꞌ. Parisitopisopita nosororinsoꞌ. Noyasáchin nininsoꞌ. Ina pochin nipisopita acoꞌinaꞌ.

^11-12 Nanon quëyoronoꞌsaso nipirinhuëꞌ, ama acoinasohuëꞌ. “Quisocristo marëáchin sacatarahuë, co soꞌyantapohuëꞌ,” taponahuëꞌ, oshaquëran ina naniantaton, naquëranchin soꞌyaantacasoꞌ yonquiantapon nimara. Soꞌyaantacasoꞌ noya nipirinhuëꞌ, maꞌsona Quisocristo shaꞌhuitërinsoꞌ co naniantacasoꞌ yaꞌhuërinhuëꞌ. Naniantohuachin, ina marëꞌ oshahuanarin niꞌton, ama inapitasoꞌ acoinasohuëꞌ.

¹³ Aꞌnaquëontaꞌ topinan niꞌtaponaꞌ paꞌsápatonaꞌ, chiropi. Naporahuaton, maꞌtona maꞌtona nonsapi, pinotapi, co napocasohuëꞌ nipirinhuëꞌ.

¹⁴ Napoaton nanoꞌsaꞌ soꞌinari ayananpihuachinaꞌ, soꞌyantaꞌinaꞌ, tënahuë. Soꞌyantatonaꞌ, huaꞌhuaantaꞌinaꞌ. Soꞌinaꞌ, huaꞌhuinpita, inapita nocomahuachinaꞌ, noya nisapi. Napohuachinaꞌ, co aꞌnapitari pinosapihuëꞌ.

¹⁵ Niꞌquëꞌ api. Aꞌnaquën quëyoronoꞌsaꞌ nani nisha cancantopi. Quisocristo aꞌporahuatonaꞌ, sopai natëpi.

¹⁶ Quisocristo imapatëhuaꞌ, noya niahuaꞌ. Quëyoron quëmopinënpoaꞌ yaꞌhuëhuachin, canpoari chachin catahuahuaꞌ noya nanpicaso marëꞌ. Ina quëran aꞌnapita imapisopitarintaꞌ saꞌahuamiaroꞌsarachin catahuainaꞌ.

Ansianoꞌsaꞌ nininsoꞌ

¹⁷ Aꞌnaquën ansianoꞌsaꞌ noya noya Yosë marëꞌ sacatopi. Paatonaꞌ, nani tahuëri aꞌchinápi, pënëntápi. Inapita noya noya niꞌcoꞌ.

¹⁸ Yosë quiricanën quëran shaꞌhuitërinpoaꞌ. “Toro asacatohuatamaꞌ, aꞌcacoꞌ. Trico iꞌnataton toꞌnorayahuachin, ama tonpoanantocosohuëꞌ. Tananpitocoꞌ piꞌpian piꞌpian coshachin,” tënin. “Piyapi asacatohuatamaꞌ, pahuërëcoꞌ,” tënin antaꞌ. Napoaton ansianoꞌsaꞌ Yosë marëꞌ sacatopi niꞌton, catahuacoꞌ. Maꞌsha quëtocoꞌ ama pahuanchinasohuëꞌ.

¹⁹ Nanan natantohuatan, ama aꞌnaroáchin natëquësohuëꞌ. Aꞌna piyapiriachin ansiano shaꞌhuirapihuachin, co natëcasoꞌ yaꞌhuërinhuëꞌ. Catoyaꞌpihuë nipon, carayaꞌpihuë nipon, inachachin shaꞌhuirapihuachinaꞌ, naporo huarëꞌ natëtëquëꞌ.

Nisha nisha pënëntërinsoꞌ

²⁰ Ansiano tëhuënchachin co noyahuëꞌ nipachina, pënënacasoꞌ yaꞌhuërin. Yaꞌipi imapisopita ayontonahuaton, chiníquën pënënquëꞌ. Aꞌnapitantaꞌ tëꞌhuatatonaꞌ, noya nicacaiso marëꞌ pënënquëꞌ.

²¹ Tata Yosë Quisocristorë chachin niꞌsarinpoaꞌ. Anquëniroꞌsaꞌ acorinsopitantaꞌ niꞌsarinënpoaꞌ. Napoaton api, yaꞌipiya noꞌtëquën pënënquëꞌ. Ama aꞌnaroáchin anaꞌintëquësohuëꞌ. Noya natantëquëꞌ noꞌtëquën nitotacaso marëꞌ. Ina quëran noꞌtëquën yonquiaton, pënënquëꞌ. Inso tërantaꞌ co noyahuëꞌ nipachina, pënënacasoꞌ yaꞌhuërin.

²² Ansiano yaacohuatan, noya yonquiaton, oshaquëran acoquëꞌ. Aꞌnaroáchin acohuatan, co noyahuëꞌ nipachina, quëmantaꞌ naꞌianan. Noyasáchin niquëꞌ.

²³ Apira apira yacanioran niꞌton, ama api iꞌsharáchin oꞌoquësohuëꞌ. Piꞌpian huinontaꞌ oꞌoquëꞌ, aquëtëꞌ caniotan.

²⁴ Aꞌnaquën co noyahuëꞌ nipachina, yaꞌipi piyapiꞌsari nitotopi. “Inasoꞌ oshahuanin. Ina marëꞌ Yosëri anaꞌintarin,” topi. Aꞌnaquënso nipirinhuëꞌ oshahuanaponahuëꞌ, co aꞌnaroáchin nitotërëhuahuëꞌ. Nipirinhuëꞌ, co cancanën quëran imarinhuëꞌ niꞌton, oshaquëran nitotarihuaꞌ.

²⁵ Inapochachin aꞌnaquën noya nipachina, yaꞌipi piyapꞌsaꞌ nitotopi. Aꞌnaquënsoꞌ nóya niponahuëꞌ, co aꞌnaroáchin nitotërëhuahuëꞌ. Oshaquëranchi inantaꞌ nitotarihuaꞌ.