1 Timoteo 3 - Chayahuita (Shahui)

Ansianoꞌsaꞌ acocasoꞌ yaꞌhuërinsoꞌ

¹ Noꞌtëquën shaꞌhuitaranquën. Ansiano yayaꞌconpachinaꞌ, noya yonquiapi. Ansianoꞌsaꞌ tëhuënchachin catahuarinënpoaꞌ.

² Napoaton yayaꞌconpachinaꞌ, nóya nipisopitaráchin yaꞌcoinaꞌ. Ama piyapiꞌsari pinocaiso marëhuëꞌ noyasáchin niinaꞌ. Aꞌna saꞌináchin yaꞌhuëchinaꞌ. Co monshihuanacaisoꞌ yaꞌhuërinhuëꞌ. Sano yonquiꞌinaꞌ. Ama nisha nisha yonquiꞌinasohuëꞌ. Yaꞌipi cancanëna quëran imainaꞌ. Niꞌtoroꞌsaꞌ huëꞌpachinaꞌ, noya nonchinaꞌ, oꞌshichinaꞌ. Aꞌchinacaisoꞌ noya nitochinaꞌ.

³ Ama noꞌpiinasohuëꞌ. Ama yaahuëchinasohuëꞌ. Sano yonquiꞌinaꞌ. Ama yanoꞌhuichinasohuëꞌ. Ama coriquiráchin cancanchinasohuëꞌ.

⁴ Yaꞌipi pëinënquë yaꞌhuëpisopita noya aꞌpaiatonaꞌ, aꞌchinchinaꞌ. Huiꞌninpita noya pënëinaꞌ noꞌtëquën natëcaiso marëꞌ. Sanoanan quëran pënënpachinaꞌ, noya natërapi. Paꞌpinaꞌ noya niꞌsapi.

⁵ Co huiꞌninpita tërantaꞌ pënënpachinhuëꞌ, aꞌnapitarinta co yanatëponhuëꞌ. Napoaton co nanitërinhuë Yosë imapisopita noya catahuacasoꞌ.

⁶ Huaꞌqui imapisopitaráchin ansiano yaꞌcoinaꞌ. Nasha imarinsoꞌ yaꞌconpachin, co noyahuëꞌ yonquiamara: “Casoꞌ ansianoco niꞌton, noya noyaco,” tapon nimara yonquinënquë. Iráca sopai huaꞌan ina pochin yonquihuachina, Yosëri anaꞌintërin. Niꞌcona inapochachin anaꞌintochinquëmaꞌ.

⁷ Noya nininsoráchin yaꞌcoinaꞌ. Noya nipachinaꞌ, co imapisopitarihuëntaꞌ noya niꞌsapi: “Inasoꞌ noya quëmapi,” tosapi. Co noyahuëꞌ nicaponahuëꞌ, yaꞌconpachin, sopai huaꞌani nonpintaton, minsëarin. Piyapiꞌsarintaꞌ tëhuapi.

Tiaconoꞌsaꞌ acocasoꞌ yaꞌhuërinsoꞌ

⁸ Ansianoꞌsaꞌ catahuarinsopitasoꞌ tiaconoꞌsaꞌ topi. Inapitantaꞌ natëtonoꞌsaꞌ niinaꞌ. Noꞌtëquënáchin noinaꞌ. Ama nisha nisha noinasohuëꞌ. Ama noꞌpiinasohuëꞌ. Ama nonpinatonaꞌ, coriqui canainasohuëꞌ.

⁹ Yosë anitotërinpoasoꞌ nóya nitochinaꞌ. Nitotatonaꞌ, cancanëna quëran huarëꞌ natëinaꞌ. Inapohuachinaꞌ, noyápiachin cancantapi.

¹⁰ Ama aꞌnaroáchin ayaꞌconcosohuëꞌ. Piꞌpian tënitomaꞌ, niꞌcoꞌ. Noya nipachinaꞌ, yaꞌcoinaꞌ.

¹¹ Tiaconaroꞌsantaꞌ natëtonoꞌsaꞌ niinaꞌ. Ama maꞌtona maꞌtona noinasohuëꞌ. Ama pinochinasohuëꞌ. Ama noꞌpiinasohuëꞌ. Noyasáchin niinaꞌ.

¹² Tiaconoꞌsasoꞌ, aꞌnaíchin saꞌinaꞌ yaꞌhuëchinaꞌ. Huiꞌninpita noya pënëinaꞌ noꞌtëquën natëcaiso marëꞌ. Yaꞌipi pëinënquë yaꞌhuëpisopita noya aꞌpaitonaꞌ, aꞌchinchinaꞌ. Ina pochin cancantërinsopitarachin yaꞌcoinaꞌ.

¹³ Tiaconoꞌsaꞌ noya nipachinaꞌ, imapisopitari noya niꞌsapi. Noya Yosë marëꞌ sacatohuachinaꞌ, chini chiníquën cancantapi. Quisocristo noya natëtonaꞌ, nanamën aꞌchinapi.

Yosë huëntonënquë yaꞌconpisopita

^14-15 Naꞌcon yonquiatënquën api, nicaponquën yapaꞌsarahuë. “Co huaꞌquiya quëranhuëꞌ paꞌsarahuë topirahuëꞌ. Huaꞌqui quëran aꞌnaꞌ paꞌsamarahuë,” taꞌto, iso quirica ninshitaranquën pënënaꞌhuanquënso marëꞌ. Yosë huëntonënquë yaꞌconpatëhuaꞌ, onpopinsona nicacasoꞌ shaꞌhuitaranquën. Yosësoꞌ nanpiárin. Canpoarë chachin yaꞌhuërarin. Nanamën noꞌtëquën anitotërinpoaꞌ. Imarëhuasopita niyontonpatëhuaꞌ, noꞌtëquën aꞌchinarihuaꞌ.

¹⁶ Iráca co Yosë nohuitopirëhuahuëꞌ, iporasoꞌ Quisocristo anohuitërinpoaꞌ: “Ma noyacha inaso paya,” tënëhuaꞌ. Yosë huiꞌnin isoroꞌpaquë oꞌmaton, piyapi chachin nasitimarin. Ispirito Santo chachin anitotërinpoaꞌ Yosë huiꞌnin nininsoꞌ. Nanpiantahuachina, anquëniroꞌsarintaꞌ quënanpi. Imapisopitari yaꞌipi parti paatonaꞌ, nanamën shaꞌhuiraꞌpiapi. Naꞌa piyapiꞌsaꞌ natëpi. Iporasoꞌ Yosëꞌpaꞌ noya yaꞌhuërin. Inatohuaꞌ Yosëri quëpantarin.