1 Timoteo 2 - Chayahuita (Shahui)

Yosë nontacasoꞌ yaꞌhuërinsoꞌ

¹ Yaꞌipi piyapi marëꞌ Yosë nontacasoꞌ yaꞌhuërin. Niyontonpatamaꞌ, naꞌcon nontocoꞌ Yosëri catahuain. “Aꞌpaniarinpoaꞌ mini,” taꞌtomaꞌ: “Yosparinquën Sinioro,” itocoꞌ. Inaꞌton pënënaranquëmaꞌ.

² Copirnoroꞌsa marëꞌ Yosë nontocoꞌ noya huaꞌanëntacaiso marëꞌ. Yaꞌipi huaꞌanoꞌsa marëꞌ Yosë nontocoꞌ noya nicacaiso marëꞌ. Noya huaꞌan nipachin, co aquëtëꞌ piyapiꞌsaꞌ ninoꞌhuiapihuëꞌ. Sano yonquiatëhuaꞌ, noya yaꞌhuarihuaꞌ. Ina quëran Yosë yonquiatëhuaꞌ, noya nisarihuaꞌ.

³ Ina pochin Yosë nontacasoꞌ nóya. Inasoꞌ nichaꞌërinpoaꞌ. Nontohuatëhuaꞌ, noya nataninpoaꞌ.

⁴ Yaꞌipi piyapiꞌsaꞌ nichaꞌëcasoꞌ nohuantërin. Nanamën noꞌtëquën nitochinaꞌ.

⁵ Yosëíchin chinotacasoꞌ yaꞌhuërin. Oshahuanëhuaꞌ niꞌton, inimicotopirëhuahuëꞌ, Quisocristo nanan anoyatërinpoaꞌ. Inasáchin Yosë anohuitërinpoaꞌ. Inasoꞌ Yosë niponahuëꞌ, piyapi chachin nasitimarin.

⁶ Quisocristo inaora nohuanton, nichaꞌëinpoaso marëꞌ chiminin. Chiminaton, oshanënpoaꞌ inquitërinpoaꞌ. Tahuëri nanihuachinaꞌ, Yosë yanichaꞌërinpoasoꞌ anitotërinpoaꞌ.

⁷ Ina nanan shaꞌhuicaꞌhuaso marëꞌ Yosë acorinco. Aꞌparinco nisha piyapiꞌsaꞌ aꞌchintaꞌhuaso marëꞌ. “Yosë noꞌtëquën nontërinpoaꞌ. Ina natëcoꞌ,” itërahuë. Tëhuënchachin noꞌtëquën nonahuë, co nonpinahuëꞌ.

⁸ Napoaton nani parti niyontonpachinaꞌ, quëmapiꞌsaꞌ Yosë nonchinaꞌ, tënahuë. Ama noꞌhuichinasohuëꞌ. Ama nisha nisha ninonchinasohuëꞌ. Noyápiachin cancantatonaꞌ, Yosë nonchinaꞌ.

⁹ Sanapiꞌsantaꞌ noya niinaꞌ. Aꞌnaquën sanapiꞌsaꞌ nitapacaisoráchin yonquipi. Naꞌcon naꞌcon yanco nitonpomototopi, notohuaroꞌ miyo pëꞌpëpi, nisha nisha aꞌsontanpapi. Paꞌton nininsopita aꞌmocaisoꞌ paꞌyatopi. Ainën tapacaisoráchin yonquipi. Yosë imarinsopitaso nipirinhuëꞌ, ama inasáchin yonquiatonahuëꞌ, sano yonquiꞌinaꞌ. Ama piyapiꞌsari paꞌyatacaiso marëáchin nitapainasohuëꞌ.

¹⁰ Aꞌmopisoꞌ ama naꞌcon naꞌcon yonquiꞌinasohuëꞌ. Noya nicacaisoꞌ naꞌcon naꞌcon yonquiꞌinaꞌ. Yosë imapi niꞌton, inaíchin chinochinaꞌ.

¹¹ Yosë nanamën aꞌchinpachinaꞌ, sanapiꞌsaꞌ taꞌtatonaꞌ, noya natainaꞌ. Natanahuatonaꞌ, noya natëinaꞌ.

¹² Niyontonpatamaꞌ, quëmapiꞌsaꞌ pënënchinaꞌ. Sanapiꞌsaso nipirinhuëꞌ, co pënëntacasoꞌ yaꞌhuërinhuëꞌ. Ama quëmapiꞌsaꞌ camaiinasohuëꞌ, tënahuë casoꞌ. Taꞌtatonaꞌ natainaꞌ.

¹³ Atanꞌton Yosëri ninin. Ina quëran Ipa ninin Atan catahuacaso marëꞌ.

¹⁴ Naporahuaton, sanapiꞌton co noyahuëꞌ ninin. Sopairi nonpintohuachina, ina natëton oshahuanin. Co Atan nonpintërinhuëꞌ.

¹⁵ Sanapiꞌsaso nipirinhuëꞌ huaꞌhuinpita noya asoꞌsohuachinaꞌ, Yosëri noya niꞌsarin. “Yosë catahuarinco,” taꞌtonaꞌ, imamiachinaꞌ. Piyapiꞌsaꞌ noya nosoroꞌinaꞌ. Noyasáchin niꞌinaꞌ. Sano yonquiꞌinaꞌ. Inapohuachinaꞌ, nichaꞌësarin.