1 Timoteo 1 - Chayahuita (Shahui)

Timotio yonquiaton, nanan aꞌpatërinsoꞌ

¹ Ca Paonoco ninshitaranquën, niꞌquëꞌ. ¿Noya, yaꞌhuaran? Noya cantaꞌ yaꞌhuarahuë. Yosë nohuanton, Quisocristo acorinco nanamën aꞌchinaꞌhuaso marëꞌ. Yosë chachin anoyacancantërinpoaꞌ. Oshanënpoaꞌ inquitatonpoaꞌ, nichaꞌërinpoaꞌ. Quisocristo imatëhuaꞌ, ina ninarëhuaꞌ. Aꞌna tahuëri inápaquë quëpantarinpoaꞌ.

² Timotionquën ninshitaranquën. Aꞌchintëranquën niꞌton, Quisocristo natëton, ina imaran. Napoaton huiꞌnahuë pochachin niꞌnanquën. Naꞌcon nosororanquën. Tata Yosë inaora nohuanton, catahuainquën. Noya nosoroinquën. Nani tahuëri asanocancainquën. Quisocristontaꞌ inapochachin catahuainquën. Inasáchin natërëhuaꞌ.

Nonpin nanan aꞌchinaꞌpiroꞌsaꞌ

³ Iꞌhua Masitoniaquë yapaꞌpatëra, shaꞌhuitëranquën. “Ipisoquë yaꞌhuëtaquëꞌ pënëntamaso marëꞌ,” itëranquën. Iporantaꞌ inachachin shaꞌhuitaranquën. Inaquëranchin yaꞌhuaton, pënëntáquëꞌ. Aꞌnaquën nisha nisha nanan aꞌchinapi. Inapita shaꞌhuitëquëꞌ ama ina pochin aꞌchiꞌinasohuëꞌ.

⁴ Shimashonënpita iráca napopisoꞌ yonquiápi. Inahuara yonquinëna quëraontaꞌ nishaꞌhuitopisoꞌ yonquirápi. Ama huachi inapita yonquicaiso marëhuëꞌ shaꞌhuitëquëꞌ. Ina pochin aꞌchinpachinaꞌ, topinan quëran aꞌchinapi. Piyapiꞌsaꞌ nisha nisha nonsapi. Co catahuapihuëꞌ Yosë nohuitacaisoꞌ. Yosëíchin natëhuatëhuaꞌ, catahuarinpoaꞌ noya noya imacaso marëꞌ.

⁵ Noꞌtën nanansáchin imapatëhuaꞌ, catahuarinpoaꞌ noya ninosorocasoꞌ. Noyápiachin cancantohuatëhuaꞌ, co nisha nisha yonquiarihuahuëꞌ. Ina quëran cancanënpoa quëran huarëꞌ natëarihuaꞌ. Ina pochin cancantohuatëhuaꞌ, noya nosoroarihuaꞌ. Ina Yosësoꞌ nohuantërin.

⁶ Nisha aꞌchinaꞌpiroꞌsaso nipirinhuëꞌ, co ina pochin yonquipihuëꞌ. Yosë nohuantërinsoꞌ naniantatonaꞌ, topinan quëran nonsapi.

⁷ “Quiyasoꞌ maistrocoi. Yaꞌipi pënëntërinsoꞌ nitotërai,” topirinahuëꞌ, co noꞌtëquën nitotopihuëꞌ. Chiníquën nonpirinahuëꞌ, co nitotopihuëꞌ.

⁸ Moisësë pënëntërinsoꞌ noya niponahuëꞌ, maꞌmarë chachinsona pënëntërinsoꞌ nitotatëhuaꞌ, noꞌtëquën shaꞌhuitacasoꞌ yaꞌhuërin.

⁹ Noya nipisopita co pënënacasoꞌ yaꞌhuërinhuëꞌ. Aꞌnapitaso nipirinhuëꞌ pënënacasoꞌ yaꞌhuërin. Co Yosë natëtonahuëꞌ, co insontaꞌ yanatëpihuëꞌ. Co natantonhuëꞌ niconpi. Paꞌpi co noyahuëꞌ nipi, oshahuanpi. Yosëntaꞌ tëhuapi. Co ina chinotopihuëꞌ. Aꞌnaquënsoꞌ paꞌpinaꞌ, aꞌshinaꞌ inapita co quëꞌyatonahuëꞌ, yatëpapi. Aꞌnaquëontaꞌ tëpatopi.

¹⁰ Nisha nisha nicacaisoꞌ yonquipi. Saꞌinaꞌ, soꞌinaꞌ inapita yaꞌhuëtaponaraihuëꞌ, monshihuanpi. Quëmapi capini, sanapi capini nisëꞌhuapi. Piyapiꞌsa chachin ihuatopi paꞌanacaiso marëꞌ. Nonpintopi. “Tëhuënchachin noꞌtëquën nonahuë,” taponaraihuëꞌ, nonpinpi. Yosësoꞌ noya nicacasoꞌ aꞌchintopirinpoahuëꞌ, co nohuantopihuëꞌ natëcaisoꞌ. Ina pochin nipisopita tëhuënchinsoꞌ pënënacasoꞌ yaꞌhuërin.

¹¹ Yosë nanamënsoꞌ noya nóya. Ina quëran nichaꞌërinpoaꞌ. “Ma noyacha Yosëso paya,” itërëhuaꞌ. Ina chachin acorinco nanamën shaꞌhuicaꞌhuaso marëꞌ.

Quisocristori catahuarinsoꞌ

¹² Ina marëꞌ Sinioro Quisocristo achinicancaninco. “Noꞌtëquën natëarinco,” taꞌton, acorinco aꞌchinaꞌhuaso marëꞌ. Napoaton: “Yosparinquën Sinioro,” itërahuë.

¹³ Iráca casoꞌ nisha cancantërahuë. Quisocristo pinorahuë. Imarinsopita noꞌhuito, aparisitërahuë. Quisocristoso nipirinhuëꞌ nosororinco. Co nohuitatohuëꞌ, co natëyatërarahuëꞌ niꞌton, nosororinco.

¹⁴ Sinioro chachin inaora nohuanton, nosoroatonco, naꞌcon catahuarinco. Catahuahuachincora, “Quisocristoíchin anoyacancantarinco,” taꞌto, ina natërahuë. Ina imato, nosororahuë cantaꞌ.

¹⁵ Noꞌtëquën shaꞌhuitaranquëmaꞌ. Yaꞌipi piyapiꞌsaꞌ natëinaꞌ. Quisocristo isoroꞌpaquë oꞌmarin oshahuanoꞌsaꞌ anoyacancantacaso marëꞌ. Casoꞌ naꞌcon naꞌcon oshahuanpirahuëꞌ, anoyacancantërinco.

¹⁶ Yosë nosororinco. Huaꞌqui co noyahuëꞌ nipirahuëꞌ, nosororinco. Aꞌnapitantaꞌ natëcaiso marëꞌ napotërinco. “Paono paꞌpi co noyahuëꞌ nipirinhuëꞌ, huaꞌqui ahuantaton, Quisocristori nosororin. Nosoroarinco cantaꞌ,” taꞌtonaꞌ, natëtapi. Natëtohuachinaꞌ, Yosë nohuitatonaꞌ, noya nanpiapi. Aꞌna tahuërintaꞌ inápaquë nanpimiatapi.

¹⁷ Napoaton Yosëíchin natëahuaꞌ. Nani tahuëriya: “¡Ma noyacha Yosëso paya!” itahuaꞌ. Inasoꞌ co onporontaꞌ taꞌhuantaponhuëꞌ. Co quënanpirëhuahuëꞌ, huaꞌanëntomiatërinpoaꞌ. Inaíchin chinotacasoꞌ yaꞌhuërin. Ama onporontaꞌ ina naniantahuasohuëꞌ. Amen.

¹⁸ Huiꞌnahuë pochin api, niꞌnanquën. Iꞌhua chachin ansianoꞌsaꞌ Yosë nontatonaꞌ, acorinënquën Yosë nanamën aꞌchinamaso marëꞌ. Naporoꞌ Yosëri anitotërinsoꞌ shaꞌhuitatënën, pënëninënquën. “Yosë nohuanton, api, nanamën noya aꞌchinaran. Ina marëꞌ acorinquën. Parisitaponahuëꞌ, catahuarinquën. Napoaton Quisoso aꞌchininso chachin aꞌchinquëꞌ,” itërinënquën. Iporantaꞌ inachachin pënënaranquën. Quisoso nanamën chachin aꞌchinquëꞌ sopai minsëcaso marëꞌ. Tëhuënchachin sopai yacanapirinpoahuëꞌ, Quisocristo catahuarinpoaꞌ minsëcaso marëꞌ.

¹⁹ Inasáchin natëton, pënëntëquëꞌ. Quisocristo nohuantërinsoráchin yonquiaton, noya niquëꞌ. Noyápiachin cancantaton, piyapiꞌsaꞌ aꞌchintëquëꞌ. Aꞌnaquënso nipirinhuëꞌ cancanëna quëran noya nicacaisoꞌ nitotopirinahuëꞌ, co yanatëpihuëꞌ. Nani Yosë naniantatonaꞌ, co huachi yonquipihuëꞌ. Quisocristo aꞌpoatonaꞌ, co huachi imapihuëꞌ.

²⁰ Aꞌnasoꞌ Iminio itopi. Aꞌnantaꞌ Aricantëro itopi. Iꞌhua niyontonpatëira, inapita chiníquën pënënahuë. “Quisocristo nanan quëtërinco niꞌton, ama huachi Tata Yosë aꞌpaiinquëmasohuëꞌ. Satanasë natëramaꞌ niꞌton, parisitamasoꞌ yaꞌhuërin,” itërahuë. Ama huachi Yosë pinocaisoꞌ marëhuëꞌ chiníquën pënënahuë. “Oshaquëran co noyahuëꞌ yonquipisopita naniantatonaꞌ, Yosë pochin cancantantaponaꞌ nimara,” taꞌto napotërahuë.