1 Tesalonicenses 4 - Chayahuita (Shahui)

Yosëri noya niꞌninsopita

¹ Iporasoꞌ iyaroꞌsaꞌ Sinioro Quisoso nanan quëtërincoi niꞌton, pënëantarainquëmaꞌ. Iráca pënënainquëmaꞌ noya nicacamaso marëꞌ. “Noya nipatamaꞌ, Yosë noya niꞌsarinquëmaꞌ,” itërainquëmaꞌ, natëramacoi. Iporasoꞌ aquë aquëtëꞌ natëtatomaꞌ, noyasáchin nicoꞌ, tënahuë.

² Sinioro Quisoso aꞌchintërincoiso chachin shaꞌhuitërainquëmaꞌ, natanamaꞌ.

³ Yosë nohuantërin noyasáchin nicacasoꞌ. Ama piꞌpian tërantaꞌ monshihuancosohuëꞌ.

⁴ Sanapi nohuantohuatamaꞌ, ama monshitocosohuëꞌ. Nitatomaꞌ, noya saꞌacoꞌ. Yosë yonquiatomaꞌ, noya ichiyaꞌhuëcoꞌ. Nani saꞌapatamaꞌ, inasáchin yonquicasoꞌ yaꞌhuërin.

⁵ Aꞌnaquën co Yosë nohuitatonahuëꞌ, ichihuëꞌëcaisoachin yonquiatonaꞌ, aꞌnaroáchin mapi. Ama inapita pochin cancantocosohuëꞌ. Tëhuënchachin nosoroatomaꞌ, macoꞌ.

⁶ Aꞌna quëmapi saꞌin ama sëꞌhuacosohuëꞌ. Ama ina pochin niꞌtomaꞌ, soꞌin nonpintocosohuëꞌ. Sëꞌhuahuatamaꞌ, Yosë noꞌtëquën anaꞌintarinquëmaꞌ. Iráca inachachin chiníquën pënënainquëmaꞌ.

⁷ Co Yosë nohuantërinhuëꞌ oshahuanacasoꞌ. Acorinpoaꞌ noyasáchin nicacaso marëꞌ.

⁸ Co quiyaora yonquinëhuëi quëran pënënainquëmahuëꞌ. Co natëhuatamahuëꞌ, Yosë chachin co natëaramahuëꞌ. Ina nohuanton, Ispirito Santo yaꞌcoancantërinpoaꞌ noya nicacaso marëꞌ. Inasoꞌ noyasáchin ninin.

⁹ Imaramasopita capini noya ninosorocoꞌ. Nani nitotëramaꞌ niꞌton, co aquëtëꞌ shaꞌhuitaꞌhuanquëmasoꞌ yaꞌhuërinhuëꞌ. Yosë chachin cancanëmaquë anitotërinquëmaꞌ ninosorocamasoꞌ.

¹⁰ Nani huachi imapisopita nosoroaramaꞌ. Yaꞌipi Masitonia parti yaꞌhuëpisopita aquë yaꞌhuëpirinahuëꞌ, Quisocristo imapachinara, nosororamaꞌ. Iporasoꞌ, iyaroꞌsaꞌ, naꞌcon naꞌcon ninosorocoꞌ, tënai.

¹¹ Nani tahuëri yonquicoꞌ sano piyapi nicacamaso marëꞌ. Ama topinan yaꞌhuëcosohuëꞌ. Yaꞌipinquëmaꞌ noya sacatocoꞌ ama pahuanchinquëmasohuëꞌ. Iráca inachachin pënënainquëmaꞌ.

¹² Inapohuatamaꞌ, noya yaꞌhuaramaꞌ. Co imapisopitahuëntaꞌ noya niꞌsarinënquëmaꞌ. Napohuatamaꞌ, co mantaꞌ pahuantarinquëmahuëꞌ. Co topinan maꞌpatacasoꞌ yaꞌhuëaponhuëꞌ.

Chiminpisopita nanpiantarinsoꞌ

¹³ Chiminpisopita maꞌsona onpocaisoꞌ aꞌchinchinquëmaꞌ, nitotocoꞌ. Quisoso imarëhuasopita chiminpatëhuaꞌ, nanpiantarihuaꞌ. Co imapisopitasohuëꞌ nipirinhuëꞌ, quëmopinënpita chiminpachinara, sëtopi. “Co onporontaꞌ quënantarihuahuëꞌ,” taꞌtonaꞌ sëtápi. Ama inapita pochin sëtacaso marëhuëꞌ canpitasoꞌ aꞌchinchinquëmaꞌ.

¹⁴ Quisososoꞌ chiminaponahuëꞌ, nanpiantarinsoꞌ nitotërëhuaꞌ. Inapochachin imapisopita chiminpachinaꞌ, Yosëri ananpitaantarin. Quisoso isoroꞌpaquë oꞌmantahuachin, ananpitaantarin.

¹⁵ Oꞌmantahuachin, co nanpirëhuasopitaráchin pantarihuahuëꞌ. Chiminpisopitaꞌton nanpiantarapi. Sinioro Quisoso shaꞌhuitërinpoaso chachin shaꞌhuichinquëmaꞌ.

¹⁶ Chiníquën nanantaton, oꞌmantararin. Anquëni huaꞌaontaꞌ chiníquën shaꞌhuirarin. Yosë nohuanton, tronpita pihuirarin. Naporoꞌ Quisocristo imatonaꞌ chiminpisopitaꞌton nanpiantarapi.

¹⁷ Ina quëran aꞌnaroáchin nanpirëhuasopitarëꞌquënpoaꞌ chitoroꞌ yaꞌhuërinquë quëpantarinpoaꞌ. Inaquë Sinioro nacapiarihuaꞌ. Inarëꞌquënpoaꞌ yaꞌhuëmiatarihuaꞌ.

¹⁸ Inapita yonquiatomaꞌ, nishaꞌhuitocoꞌ noya cancantacaso marëꞌ. Ama sëtacaso marëhuëꞌ ina pochin niachinicancancoꞌ.