1 Tesalonicenses 2 - Chayahuita (Shahui)

Paonori noya aꞌchintërinsoꞌ

¹ Canpitataquë yaꞌhuapoi iyaroꞌsaꞌ, co topinan quëran aꞌchintërainquëmahuëꞌ, nitotëramaꞌ.

² Piriposëquë aꞌchinapiraihuëꞌ, noꞌhuitonacoi, chiníquën aparisitërinacoi. Inapotopirinacoihuëꞌ, canpitataquë canconpatëira, co tëꞌhuaraihuëꞌ. “Yosë catahuarincoi,” taꞌtoi, Quisocristo nanamën aꞌchintërainquëmaꞌ. Aꞌnapita noꞌhuipirinacoihuëꞌ, chiníquën cancantatoi, pënënainquëmaꞌ.

³ Co nonpin nanan aꞌchintërainquëmahuëꞌ. Co nisha nisha nicacaso marëꞌ aꞌchintërainquëmahuëꞌ. Co piꞌpian tërantaꞌ nonpintërainquëmahuëꞌ.

⁴ Yosë chachin acorincoi nanamën aꞌchinaꞌhuaiso marëꞌ. “Noꞌtëquën aꞌchinaponaꞌ,” taꞌton, aꞌparincoi. Napoaton co piyapiꞌsaꞌ noya nicainacoiso marëꞌ aꞌchinaihuëꞌ. Yosë noya nicaincoiso marëꞌ aꞌchinárai. Yaꞌipi yonquirëhuasopita nitotërin. Maꞌmarësona sacatërëhuasontaꞌ nitotërin.

⁵ Co noyasha nonatoi, yanonpintërainquëmahuëꞌ. Co canacaꞌhuaiso marëꞌ napotërainquëmahuëꞌ. Yosë niꞌsárincoi, noꞌtëquën nontërainquëmaꞌ.

⁶ Co piyapiꞌsaꞌ noya nicainacoisoꞌ yonquiatoi aꞌchinaihuëꞌ.

⁷ Quisocristo aꞌparincoi niꞌton, chiníquën nanan quëtërincoi. Napoaponahuëꞌ, co chiníquën nontërainquëmahuëꞌ. Co inso tërantaꞌ huaꞌan pochin camairaihuëꞌ natëinacoiso marëꞌ. Sanoanan quëran nontërainquëmaꞌ. Sanapi huaꞌhuinpita nosoroaton, noya nocomarinso pochin quiyarimantaꞌ niꞌnainquëmaꞌ.

⁸ Naꞌcon nosoroatëinquëmaꞌ, Yosë nanamën aꞌchintërainquëmaꞌ. Ina marëꞌ parisitopiraihuëꞌ, co ina yonquiraihuëꞌ. Yaꞌipi cancanëhuëi quëran nosororainquëmaꞌ niꞌton, naꞌcon catahuarainquëmaꞌ.

⁹ Canpitataquë yaꞌhuasocoi, chiníquën sacatatoi, aꞌchintërainquëmaꞌ. Tahuërirë chachin tashirë chachin sacatërai ama topinan maꞌsha maꞌpacaꞌhuainquëmaso marëhuëꞌ. Quiyaora sacatonëhuëi quëran coshatërai. Naporahuatoi, Yosë nanamën aꞌchintërainquëmaꞌ. Co ina naniantëramahuëꞌ, tënahuë.

¹⁰ Noꞌtëquën Yosë natëtoi, noyasáchin ninai. Co mantaꞌ onpotërainquëmahuëꞌ. Yaꞌipi imaramasopita niꞌnamacoi. Yosëntaꞌ niꞌnincoi.

¹¹ Yaꞌipinquëmaꞌ pënënainquëmaꞌ, nitotëramaꞌ. Aꞌnaya aꞌnayanquëmaꞌ nontërainquëmaꞌ noya imacamaso marëꞌ. Quëmapi huiꞌninpita aꞌchintërinso pochin aꞌchintërainquëmaꞌ.

¹² Achinicancanainquëmaꞌ. “Yosë imaramaꞌ niꞌton, noyasáchin nicoꞌ Yosë noya niꞌinquëmaꞌ,” itërainquëmaꞌ. Ina acorinquëmaꞌ huaꞌanëntërinquë yaꞌconacamasoꞌ. Aꞌna tahuëri yaꞌhuërinꞌpaꞌ quëpantahuachinquëmaꞌ, noya noya yaꞌhuëcontaramaꞌ.

¹³ Yosë nanamën aꞌchintohuatëinquëmara, noya natanamaꞌ. “Co piyapi yonquirinsoꞌ aꞌchintërinpoahuëꞌ. Yosë nanamën chachin aꞌchintërinpoaꞌ,” tënamaꞌ. Tëhuënchachin Yosë nanamën niꞌton, ina natëhuatamaꞌ, nanamën quëran anoyacancantarinquëmaꞌ. Ina marëꞌ nani tahuëri “Yosparinquën,” itërai Yosë.

¹⁴ Iráca Cotia parti naꞌa piyapiꞌsaꞌ Quisocristo imatonaꞌ, natëpi. Aꞌnapita cotioroꞌsariso nipirinhuëꞌ, noꞌhuitonaꞌ chiníquën aparisitopi. Iporasoꞌ iyaroꞌsaꞌ canpitantaꞌ parisitëramaꞌ. Yaꞌhuëhuanoꞌsaꞌ inapochachin aparisitarinënquëmaꞌ.

¹⁵ Iráca cotioroꞌsari pënëntonaꞌpiroꞌsaꞌ noꞌhuitonaꞌ, tëpapi. Ina quëran Sinioro Quisocristo chachin oꞌmahuachina, inantaꞌ tëpaantapi. Quiyantaꞌ aparisitatonacoi, aꞌparinacoi. Napopiso marëꞌ Yosëri co noyahuëꞌ niꞌnin. Tëhuënchachin co yaꞌipi piyapiꞌsaꞌ nosoropihuëꞌ.

¹⁶ Nisha piyapiꞌsaꞌ chaꞌëcaiso marëꞌ yaaꞌchintopiraihuëꞌ, cotioroꞌsasoꞌ co nohuantopihuëꞌ. “Ama aꞌchintocosohuëꞌ,” taꞌtonaꞌ, noꞌhuirinacoi. Ina marëꞌ aquë aquëtëꞌ oshahuanpi. Napoaton Yosëri chiníquën noꞌhuirin. Noꞌtëquën anaꞌintarin huachi.

Paonori nicapon yapaantarinsoꞌ

¹⁷ Huaꞌquimiáchin iyaroꞌsaꞌ co niꞌpirainquëmahuëꞌ, co naniantërainquëmahuëꞌ. Yonquiatëinquëmaꞌ, naꞌcon nohuantërai nicaꞌhuainquëmasoꞌ.

¹⁸ Canpitataquë yapaꞌpiraihuëꞌ, ipora huantaꞌ co nanitëraihuëꞌ. Ca Paonoco cararoꞌ yapaꞌpirahuëꞌ, Satanasë yaꞌcopirinco niꞌton, co nanitërahuëꞌ pacaꞌhuasoꞌ.

¹⁹ Naꞌcon yonquiatëinquëmaꞌ, nóya cancantërai. ¿Maꞌmarë chachintaꞌ ina pochin cancantërai? Imaramaꞌ niꞌton, Yosë yaꞌhuërinꞌpaꞌ canpitantaꞌ paꞌsaramaꞌ, tënai. Aꞌna tahuëri Sinioro Quisocristo oꞌmantararin. Naporoꞌ: “Quiyari aꞌchintërai niꞌton, imapi,” taꞌtoi, noya cancantarai.

²⁰ Tëhuënchachin noya imaramaꞌ: “¡Ma noyacha Yosë catahuarinquëma paya!” taꞌtoi, capa cancantërai.