1 Samuel 9 - Chayahuita (Shahui)

Saono Samoirorëꞌ niquënanpisoꞌ

¹ Mincamin huëntonquë iráca, aꞌnara Israiro quëmapi yaꞌhuërin. Ahuia itopisoꞌ. Inasoꞌ huiꞌnahuanpachina, Picorato itopi. Inanta huiꞌnahuanpachina, Siroro itopi. Siroronta huiꞌnahuanpachina, Apiiri itopi. Inanta huiꞌnahuanpachina, Quisi itopi. Naní quëran Quisisoꞌ noya niꞌpi.

² Inasoꞌ, aꞌnara huiꞌnin yaꞌhuëtërin Saono itërinsoꞌ. Saonosoꞌ huiꞌnapi. Noyapin noyapin yaꞌnorin. Co aꞌnaya tëranta Israiro quëmapi ina pochin niꞌtërinhuëꞌ. Naporahuaton nápo naporopi huanirin. Yaꞌipi aꞌnapitasoꞌ, tëꞌtëtëntaquëáchin acoraꞌpiarin.

³ Aꞌna tahuëri Quisisoꞌ moranënpita sanapi nininsoꞌ ayarin. Napohuachina huiꞌnin Saono itërinsoꞌ itapon: —Paaton moraroꞌsa yoníconquëꞌ. Ina marëꞌ aꞌnara piyapinënpoa quëpaquëꞌ, itërin.

⁴ Napotohuachina, inapita yonípona paꞌpi. Paꞌsápatonaꞌ, Iprain huënton noꞌpanëna motopitontarinsopita pëntontopi. Sarisa parti itopisonta pëntontopi. Napoaponahuëꞌ, co quënanpihuëꞌ. Paantarahuatonaꞌ, Saarin itopiso partinta pëntoantapi. Mincamin huënton noꞌpanënantaꞌ, pëntontaantapi. Napoaponaraihuëꞌ, co quënanpihuëꞌ.

⁵ Sopi parti canconpachinara Saonori piyapinën itapon: —Huëquë paꞌmantaꞌa. Naꞌcon naꞌcon huaꞌquiarëꞌ. Tatasoꞌ moraroꞌsa naniantaton, canpo marëꞌ iporaso co napion ancantamara, itërin.

⁶ Napotohuachina inari itapon: —Niꞌquë patron. Iso ninanoquë aꞌnara pënëntonaꞌpi yaꞌhuërin. Inasoꞌ maꞌsona topachina ina inachachin ninin. Napoaton naní quëran natëpi. Huëquë inatohua paꞌa. Tapona maꞌsona nicacasoꞌ noꞌtëquën anitotápirinpohuëꞌ, itërin.

⁷ —Paꞌa nipachin. Napoaponahuëꞌ, co manta pahuërëcaso yaꞌhuëtërinpohuëꞌ. Co huachi pan tëranta tanpanantëroꞌsaquë yaꞌhuërinhuëꞌ, itërin Saonori.

⁸ —Caso prata quëran nipisoꞌ coriquiaꞌhuaya yaꞌhuëtërinco. Maꞌsona nicacasoꞌ anitotiinposo marëꞌ paꞌa ina quëchi, itërin piyapinëni.

⁹ (Ipora iso quirica ninshitasoco huarëꞌ Samoiro pochin nipisopitasoꞌ pënëntonaꞌpi itërëhuaꞌ. Iráca chachinsoꞌ, co ina pochin nohuitopihuëꞌ. Ninoton shaꞌhuinaꞌpi itopi. Israiroꞌsa maꞌsona Yosëri anitotacaso nohuantohuachinara, ninapotopi: “Huëquë paꞌa ninoton shaꞌhuinaꞌpi natahuan,” niitopi.)

¹⁰ Piyapinëni napotohuachina, Saonorisoꞌ itapon: —Noyapaꞌ. Paꞌa nipachin niꞌcontaꞌa, itërin. Ninapotatonaꞌ, cato chachin ninoton shaꞌhuinaꞌpi ninanonënquë paꞌsapi.

¹¹ Ina ninanoquë pacacaiso marësoꞌ, panca panën paꞌtopi. Ina paꞌtasoi nanoꞌsa iꞌsha macacaiso marëꞌ oꞌmarapi nacapipi. Nacapirahuatonaꞌ: —¿Ninoton quënanaꞌpi yaꞌhuëárin ipora ninanoquë to? itopi.

¹² —Yaꞌhuëárin mini. Napoaponahuëꞌ, nani yapaꞌsarin maꞌsha Sinioro marëꞌ tëpacaso nininsoꞌ, aꞌnopon. Inahuara nohuanton artaro acopiquë aꞌnopon paꞌsarin. Manon paꞌpatamaꞌ, quënancoanamaꞌ.

¹³ Canconpatamaꞌ, aꞌnaroáchin yonícoꞌ. Coꞌhuara inaquë paꞌshátërasohuëꞌ, yaꞌcopiontacoꞌ. Inasoꞌ, inaquë capon paꞌsarin. Coꞌhuara ina canshátërasohuëꞌ, co aꞌnapitaso caponahuëꞌ. Ina cancona huarëꞌ caponaꞌ. Inari maꞌsha Sinioro marëꞌ tëpapisoꞌ, “Yosparinquën,” itacaso niꞌton, ninapi. Inapotohuachina naporo huarëꞌ përarinsopita caponaꞌ. Napoaton apira paꞌpatamaꞌ quënancoanamaꞌ, itopi nanoꞌsari.

¹⁴ Napotohuachinara, ninanoquë pantapi. Canconasoi chachin Samoironta niquë yapaꞌsarin. Inahuara nohuanton artaro acopiquë yapaꞌsarin.

¹⁵ Iꞌhuara pochin Samoirosoꞌ nani Siniorori iso pochin anitotërin:

¹⁶ “Tashiraya ipora pochin aꞌnara Mincamin huënton quëmapi aꞌpatiaranquën. Ina masahuaton israiroꞌsa huaꞌanën nicacaso marëꞌ acoaran. Huiristinoꞌsari piyapinëhuëpita huaꞌanëntápirinahuëꞌ, inari nichaꞌësarin. Inapitari aparisitopiso marëꞌ chiníquën nontërinaco niꞌton, nosoroantarahuë,” itërin.

¹⁷ Saono quënanaso chachin Siniorori Samoiro itapon: “Iso mini quëmapi iꞌhuara napotaranquënsoꞌ. Inari piyapinëhuëpita huaꞌanëntarin,” itërin.

¹⁸ Ninano yaꞌcoanaquë nipachina Saonori Samoiro yaꞌcarirahuaton itapon: —Yosë marëꞌ api cantaꞌ, ninoton shaꞌhuinaꞌpi pëinën aꞌnotoco topirahuë, itërin.

¹⁹ —Ca mini inaco. Inahuara nohuanton artaro acopiquë, huëco caꞌtancoi paꞌahuaꞌ. Inaquë ipora tahuëri coshatarihuaꞌ. Tashiraya tashíramiachin anitotaranquën maꞌsona yonquiransopita. Ina quëran yaꞌhuëramaquë paꞌsarama huachi.

²⁰ Moraroꞌsa ayatëramasopita marësoꞌ, ama huachi sëtëquësohuëꞌ. Nani quënanpi. Naporahuaton israiroꞌsanpoa yaꞌhuërëhuaquë, maꞌsha noya noyapiro nininsopitasoꞌ, quëmari huaꞌanëntaran. Quëmopinënpitarinta huaꞌanëntaponaꞌ, itërin.

²¹ Napotohuachina Saonori itapon: —Coꞌta api caso, Mincamin huënton quëmapico. Inaso huënton, aꞌnapita quëran huaꞌhui huaꞌhuishin huënton. Naporahuaton quëmopinëhuëpitanta aꞌnapita Mincamin huënton israiroꞌsa quëran naꞌcon naꞌcon popriyatopi niꞌton: ¿Onpoatonta ina pochin nontëranco? itërin.

²² Ina pochin Samoirosoꞌ, Saono, piyapinën, inapita quëparin. Inahuara nohuanton artaro acopiquë quëparahuaton, coshatacaiso patoanaquë poꞌmoontarin. Huaꞌanoꞌsa huënsëpiquë chachin ahuënsërin. Cara shonca yaꞌpi pochin, huënsëapiso huáncana ahuënsërin.

²³ Ina quëran Samoirosoꞌ, cosharo ninaꞌpi itapon: —Nosha nisha quëtatënquën: “Isosoꞌ, ama papinanquë yoꞌquësohuëꞌ,” itëranquën. Napotëranquënsoꞌ, quëquë huachi, itërin.

²⁴ Napotohuachina cosharo ninaꞌpisoꞌ, aꞌna tonara nanirinso chachin Saono acotërin. Acotohuachina, Samoirori itapon: —Niꞌquëꞌ. Nani tapatëranquënso acotërinën. Isopita ichicoshataꞌhuaso yonquiato, ipora tahuëri quëmanta tapatëranquën. Caꞌquë huachi, itërin. Inapoaton naporo tahuëri Samoirosoꞌ, Saono, piyapinën, inapita ichicoshatërin.

²⁵ Inahuara nohuanton artaro acopi quëran ninanoquë nohuaramapi. Naporoꞌ Samoiro pëinën aipi, Saono huëꞌëcaso acotopi.

²⁶ Inaquë Saono huëꞌërin. Tahuëririnquë Samoirori nanpëontarahuaton itapon: —Huënsëaton yaꞌhuëranquë paantaquë huachi, itërin. Napotohuachina Saonosoꞌ huënsëintarin. Ina quëran Samoiro, Saono, ina piyapinën, inapitaso cachi paꞌtapi.

²⁷ Ninano aipiran yanohuaramahuachinara Samoirori Saono itapon: —Piyapinën camaiquë quëchitotaꞌin. Quëmaso nipirinhuëꞌ, piꞌpian ninaco. Maꞌsona Yosë tëninso shaꞌhuichinquën, itërin.