1 Samuel 8 - Chayahuita (Shahui)

Israiroꞌsa copirno nohuantopisoꞌ

¹ Samoirosoꞌ mashotërin huachi. Mashotohuachina, israiroꞌsa huaꞌanëntacaiso marëꞌ huiꞌninpita acorin.

² Paninansoꞌ, Coiro itërin. Ina quëran niantarinsosoꞌ, Apiasë itopi. Inapitaso Piirsipaquë yaꞌhuëatonaꞌ, huaꞌanëntopi.

³ Inahuaso napoaponahuëꞌ, co paꞌpina pochin noya nipihuëꞌ. Maꞌsha naꞌcon naꞌcon cancantopi. Napoatona pahuërëhuachinara co huachi noꞌtëquën anaꞌintopihuëꞌ. Inapoatona paꞌpi co noyahuëꞌ nipi.

^4-5 Napoaton Israiro ansianoꞌsa niyontonpi. Naporahuatonaꞌ, Samoiro nontacaiso marëꞌ Namaquë paꞌpi. Quënanconahuatona itaponaꞌ: “Nani quëmasoꞌ mashotëran. Napoaton co huachi nanitaranhuëꞌ huaꞌqui huaꞌanëntancoisoꞌ. Huiꞌnanpita mini acopiranhuëꞌ, inahuaso co quëma pochin nipihuëꞌ. Napoaton aꞌnara copirno acotocoi camaiincoiso marëꞌ. Aꞌnapita nacionoꞌsa napopiso pochachin quiyanta yaninai,” itopi.

⁶ Napotohuachinara, Samoiroso co noyahuëꞌ cancantërin. Copirno nohuantopiso marëꞌ naporin. Napoaton Sinioro nontërin: “Israiroꞌsaꞌ, copirno acotaꞌhuaso nataninaco,” itërin.

⁷ Samoirosoꞌ co noyahuëꞌ cancantopirinhuëꞌ, Siniorori itapon: “Ina nohuantopi niꞌquëhuarëꞌ, acotëquë nipachin. Co quëma nocaninënhuëꞌ. Ama cari huaꞌanëntaꞌhuaso marëhuëꞌ ca nocaninaco.

⁸ Iquipito quëran ocoirahuë quëran huarëꞌ israiroꞌsa nocaninaco. Quëma ipora nocaninënquënso pochachin canta nocanárinaco. Nisha nisha mamanshiroꞌsa moshacaiso marëꞌ aꞌporinaco.

⁹ Inapoaton nipachin nohuantopiso chachin nitëquëꞌ. Napoaponahuëꞌ coꞌhuara acochátëraponhuëꞌ, shaꞌhuitëquë maꞌpitasona copirnori nitacasoꞌ,” itërin.

¹⁰ Napotohuachina, Samoirosoꞌ Yosëri shaꞌhuitërinsoꞌ israiroꞌsa shaꞌhuitërin:

¹¹ —Copirno acotohuatënquëmaꞌ, isopotarinquëmaꞌ: Huiꞌnamapita masarin sontaronënpita nicacaiso marëꞌ. Aꞌnaquën ahuëtacaso toronanoꞌsaquë pacacaiso acoapon. Aꞌnaquëntaꞌ, cahuarioroꞌsaquë pacacaiso acoapon. Aꞌnaquëontaꞌ, inaora chachin aꞌpaicaiso marëꞌ acoapon.

¹² Aꞌnaquëntaꞌ, huaranca sontaroꞌsa camaiapon. Aꞌnaquënsoꞌ, aꞌnatërápo shonca camaiapon. Aꞌnaquëontaꞌ, iminënpitaquë noꞌpaꞌ ohuërëaton shaꞌtapon. Nitërinsopitanta macapon, napoapon. Aꞌnaquënsoꞌ, ahuëtacaiso marëꞌ ohuarapisopita nitaponaꞌ. Naporahuaton ahuëtacaiso toronanënpita maquënpitasona nininsoꞌ, nitaponaꞌ.

¹³ Sanapi huiꞌnamapitantaꞌ, pimo huaꞌsaiꞌ nitacaiso marëꞌ masarin. Cosharoꞌ, pan, inapitanta nitacaiso marëꞌ masarin.

¹⁴ Noꞌpanëma noya noya nininsopitanta matarinquëmaꞌ. Oparonëmaꞌ, oripororonëmaꞌ, inapita noya noyatërinsopita matarinquëmaꞌ. Matatënquëma catahuapisopita huaꞌanoꞌsa quëtapon.

¹⁵ Shaꞌtëramasopita nitërinsonta shonca costaro quëran aꞌna costarora mataponquëmaꞌ. Inapita huaꞌanoꞌsa quëtacaso marëꞌ mataponquëmaꞌ.

^16-17 Naporahuaton piyapinëmaꞌ, quëmapiꞌsaꞌ, sanapiꞌsaꞌ, inapitanta mataponquëmaꞌ. Toronëmapita, moranëmapita, inapitanta matahuatënquëmaꞌ, inaora iminënpitaquë asacatapon. Pëꞌtahuanëmapitanta shonca quëran aꞌnara mataponquëmaꞌ. Canpitaora chachionta macatënquëmaꞌ, asacatáponquëmaꞌ.

¹⁸ Inapotohuachinënquëma aꞌna tahuëri co napion cancantaramaꞌ. Ina pochin ancantatomaꞌ, napotërinquëmaso marëꞌ Sinioro nontaramaꞌ. Naporo inasoꞌ, co tahuërëtarinquëmahuëꞌ, itërin.

^19-20 Samoirori napotopirinhuëꞌ, inapitaso co ina natëpihuëꞌ. Napoatona itaantaponaꞌ: —Ina nipirinhuë tëranta copirno nohuantërai. Aꞌnapita nacionoꞌsa pochin quiyanta huaꞌanënchincoi. Inapotatoncoi ahuëtaꞌhuaiso nipachina, quëpaꞌincoi, itopi.

^21-22 Napopisoꞌ natanahuaton, Samoirosoꞌ ina chachin Sinioro shaꞌhuitaantarin. Shaꞌhuitohuachina: —Noyapaꞌ. Napopiso chachin nipachin copirno acotëquëꞌ, itërin. Ina natanaton, Samoirosoꞌ israiroꞌsa itapon: —Noyapaꞌ. Naporama niꞌquëhuarëꞌ, copirno nipachin acochinquëmaꞌ. Napoaponahuëꞌ, co apira acotaranquëmahuëꞌ. Iporaso yaꞌhuëramaquë paantacoꞌ, itërin.