1 Samuel 7 - Chayahuita (Shahui)

¹ Napotohuachinara, inahuaso paꞌsahuatonaꞌ, Sinioro caposonën macontapi. Yaꞌhuëpiꞌpaꞌ quëparahuatonaꞌ, Apinatapo itopisoꞌ pëinënquë poꞌmontapi. Inaso pëinën, motopiaꞌhuayaquë yaꞌhuërin. Inapotahuatonaꞌ, huiꞌnin Iriasaro itopisoꞌ Sinioro caposonën aꞌpaicaso marëꞌ acopi.

Samoiro israiroꞌsa huaꞌan yaꞌconinsoꞌ

² Quiriato-quiarimoquë Sinioro caposonën acopi quëran huarëꞌ, cato shonca piꞌipi naꞌhuërin. Yaꞌipi israiroꞌsa Siniorori catahuacaso marëꞌ co napion cancantopi.

³ Napoaton Samoirori inapita itapon: “Yaꞌipi cancanëma quëran, Sinioroíchin yanatëhuatamaꞌ, nisha nisha mamanshiroꞌsa mosharamasoꞌ, aꞌpocoꞌ. Asotariti itopisoꞌ mamanshiroꞌsanta aꞌporahuatomaꞌ, Sinioroíchin cancantocoꞌ. Inasáchin chinotohuatamaꞌ, huiristinoꞌsa huaꞌanëntërinpoa quëran nichaꞌësarinpoaꞌ,” itërin.

⁴ Napotohuachina, israiroꞌsaso nisha nisha mamanshiroꞌsa Paaro nonanpisoꞌ tëꞌyatopi. Asotariti itopisonta nonanpisoꞌ tëꞌyatopi. Inapita tëꞌyatahuatona Sinioroíchin chinotopi huachi.

⁵ Ina piquëran Samoirosoꞌ comisionoꞌsa aꞌparin: “Yaꞌipi israiroꞌsanpoa Mispaquë pacatëhua niyontoanhuaꞌ. Inaquë Samoiro canpoa marëꞌ Yosë nontarin, itocoꞌ,” itërin.

⁶ Napotohuachinara, Mispaquë niyontonpi. Inaquë iꞌsha ocoipi. Sinioro aꞌnotacaiso marëꞌ ocoirahuatonaꞌ, noꞌpaquë opopi. Naporo tahuëri co manta coshatatonaraihuëꞌ Yosë chinotopi. Yaꞌipiya natantonënaquë co Sinioro natëtonaraihuëꞌ oshahuanpisoꞌ, shaꞌhuipi. Inaquë chachin Samoirosoꞌ, israiroꞌsa huaꞌan nicacasoꞌ caniaririn.

⁷ Huiristinoꞌsanta niyontonpiso natantopi. Ina natantatonaꞌ, huaꞌanënapitasoꞌ, sontaronënapitarë chachin israiroꞌsa ahuëcaiso marëꞌ huëcapaipi. Ina natanatonaꞌ, inahuaso tëꞌhuatopi.

⁸ Tëꞌhuatona Samoiro itaponaꞌ: “Yosë nontëransoꞌ, ama copi tëquësohuëꞌ. Huiristinoꞌsa chiníquën nanantatona huaꞌanëntërincoi nipirinhuëꞌ, inapita quëran nichaꞌëincoi huachi,” itopi.

^9-11 Samoirosoꞌ, aꞌnara carniroaꞌhuaya manin. Ina masahuaton, Sinioro marëꞌ tëparin. Inapotahuaton, yaꞌipimiachin ina marëꞌ ahuiquitërin. Ina quëran israiroꞌsa marëꞌ Sinioro nontërin. Nontohuachina inari aꞌpanirin. Carniroaꞌhuaya ahuiquitasoꞌ, huiristinoꞌsa canquirapi. Israiroꞌsa ahuëcaiso marëꞌ pashica taꞌsoi chachin, Sinioro nohuanton panca huira ahuëtërin. Ina natanatona paꞌpi paꞌyanpi. Israiroꞌsasoꞌ, aꞌnaroáchin Mispa quëran pipirahuatonaꞌ, huiristinoꞌsa taꞌarapiso ahuëconpi. Ahuërahuatona notohuaroꞌ inimicoroꞌsa tiquiipi. Piti-caro ninano itopiquë huarëꞌ inapotopi. Inapochin israiroꞌsari huiristinoꞌsa canapi huachi.

¹² Ina quëran Samoirosoꞌ, panca naꞌpi macacaiso camaitërin. Ina macatona Mispa quëran Sën itopiso motopiaꞌhuayaquë ira paꞌninsoꞌ huáncana acorin. Ina naꞌpi acorinsoꞌ, aninihuanin: “Ipini-sëri,” itërin. “Isëquë huarëꞌ Sinioro catahuarinpoaꞌ,” tapon ina pochin nohuitërin.

¹³ Ina pochin israiroꞌsari huiristinoꞌsa canapi. Napoatona inahuasoꞌ, israiroꞌsa noꞌpanënaquë co huachi aquëtë ahuëtacaiso nohuantopihuëꞌ. Samoiro nanpisoꞌ, Siniorori israiroꞌsa catahuarin.

¹⁴ Iráca huiristinoꞌsari israiroꞌsa canatonaꞌ, naꞌa ninanoaꞌhuaroꞌsa matopi. Icoron quëran Cato ninanoquë huarëꞌ napopi. Napopirinahuëꞌ, naquëranchin israiroꞌsari ina ninanoaꞌhuaroꞌsa huaꞌanëntaantapi. Inapoatona noꞌpanëna huiristinoꞌsari matërinsoꞌ, naquëranchin huaꞌanëntaantapi. Naporahuaton israiroꞌsaso amororoꞌsarëntaꞌ, co huachi niahuëpihuëꞌ.

¹⁵ Samoirosoꞌ chiminaquë huarëꞌ israiroꞌsa huaꞌanëntërin.

¹⁶ Nani piꞌiquë Pitiriquë, Quiricaroquë, Mispaquë, inaquëpita paꞌsárin. Israiroꞌsa catahuacaso marëꞌ inaquëpita paꞌsárin.

¹⁷ Nani niꞌtohuachina, Namaquë chachin paantarin. Inaquë pëinën yaꞌhuëtërin. Inatohua quëran israiroꞌsa huaꞌanëntërin. Naporahuaton inaquë chachin aꞌnara artaro Sinioro marëꞌ ninin.