1 Samuel 4 - Chayahuita (Shahui)

¹ Anitotohuachina, yaꞌipi israiroꞌsa shaꞌhuitacaiso marëꞌ comisionoꞌsa aꞌparin. Naporo tahuëriꞌsa huiristino sontaroꞌsasoꞌ, niyontonpi. Israiroꞌsa ahuëcaiso marëꞌ niyontonpi. Napoaton israiroꞌsantaꞌ, inapita chinitacaiso marëꞌ niyontonahuatonaꞌ, paapapi. Israiroꞌsasoꞌ, Ipini-sëri motopiaꞌhua itopiquë chinotopiso acopi. Ina notënanquë huiristinoꞌsantaꞌ, Apico motopiaꞌhua itopiquë chinotopiso acopi.

Huiristino sontaroꞌsari Yosë caposonën mapisoꞌ

² Huiristinoꞌsa ahuëtacaiso caniaritopi. Niahuëhuachinara inapitari israiroꞌsa canapi. Catapini huaranca Israiro sontaroꞌsa tëpapi.

³ Israiro sontaroꞌsa chinotopiquë paantahuachinara: “Iporaso co Sinioro catahuarinpoahuë niꞌton, huiristinoꞌsa canarinënpoaꞌ. ¿Onpoatoncha napotërinpoa nicaya?” topi ansianoroꞌsaꞌ. Napoatona yonquiantapi: “Huëco Siroꞌpaꞌ sontaroꞌsa aꞌpaꞌahuaꞌ. Inatohua quëran Siniororëꞌquënpoa anoyatërëhuaso caposonën macontaꞌinaꞌ. Sinioro chachin canpoarë paꞌpachin tëhuënchinsoꞌ, inimicoroꞌsa quëran nichaꞌësarinpoaꞌ,” niitopi.

⁴ Ninapotatonaꞌ, sontaroꞌsa aꞌpapi. Inapitasoꞌ paꞌsahuatonaꞌ, Siniororë anoyatopiso caposonën macontapi. Siniorosoꞌ yaꞌipi nanitapaton, quiropinoꞌsa huáncana shiranënquë huënsaton huaꞌanëntërin. Iri huiꞌninpita: Opini, Pinisë, inapitanta paꞌpi. Inapitari Siniororë anoyatopisoꞌ caposonën aꞌpaipi niꞌton, inahuanta caꞌtantopi.

⁵ Quëꞌcanquihuachinara israiroꞌsa capa cancantopi. Capa cancantatona noncaromiatopi. Noꞌpaꞌ nacontaquë huarëꞌ noncaropi.

⁶ Huiristinoꞌsanta israiroꞌsa noncaropisoꞌ natanpi. Napoatonaꞌ: “¿Onpoatonta iprioroꞌsa napoin noncarorapi?” nitopi. Ina quëran aꞌnari shaꞌhuitërin: “Sinioro caposonën macontapi. Quëꞌcaimatona naporapi,” itërin.

⁷ Ina natanatonaꞌ, huiristinoꞌsaso paꞌpi paꞌyanpi: “Iporasoꞌ Yosë chachin israiroꞌsa yaꞌhuëapiquë canquirin. ¡Maꞌhuantacha canpoasoꞌ nisarëhua paya! Iꞌhuasoꞌ, co Yosë caposonën yaꞌhuërinhuë niꞌton, canatërëhuaꞌ.

⁸ Inasoꞌ Yosë, chini chiníquën nanantërin. Inari iquipitoroꞌsa inotëro parti ataꞌhuantërin. Nisha nisha maꞌsha onpotaton tiquirin. ¿Inta iporasoꞌ ina quëran nichaꞌëinpoa? ¡Maꞌhuantacha canpoasoꞌ nisarëhua paya!

⁹ Ina nipirinhuëꞌ, chiníquën cancantocoꞌ. Canpoari inapita huaꞌanëntërëhuaꞌ. Ama inahua yaꞌhuërëꞌ, huaꞌanëntiinpoaso marëhuëꞌ ahuëtomia ahuëtahuaꞌ,” niitopi.

¹⁰ Naporoꞌ huiristinoꞌsasoꞌ, ahuëtaantapi. Ahuëtahuatonaꞌ, canataantapi. Co huachi nanitohuachinarahuëꞌ, aꞌnaquën israiroꞌsaso, yaꞌhuëpiꞌpaꞌ taꞌapi. Naporoꞌ huaꞌhuayátërahuë Israiro sontaroꞌsa tëpapi. Cara shonca huaranca tëpaantapi.

¹¹ Yosë caposonëonta osërëtopi. Iri huiꞌninpita Opini, Pinisë, inapitanta tëpapi.

¹² Aꞌnara Mincamin huënton sontarosoꞌ, ahuëtaponahuë aꞌpotahuaton Siroquë taꞌarin. Taꞌarëꞌnachin paꞌsahuaton naporo tahuëri chachin canconin. Aꞌmorinso osharahuaton, amocanquë nipashimototërin.

¹³ Canconpachina, Iriso ninano yaꞌcoana pirayan huënsaton ninatárin quënamarin. Ira parti notëtaton ninatárin. Sinioro caposonën yonquirárin. Ina sontaroso ninanoquë yaꞌcoontarahuaton, napopiso shaꞌhuiintarin. Ina natanahuatonaꞌ, yaꞌhuëhuanoꞌsaso co napion cancantatopi. Inapoatonaꞌ: “Yai,” topi.

^14-16 Naporoꞌ Irisoꞌ, nani noyá mashoya. Nani iscon shonca piꞌipitahuaton noyá somarayarin. Noncaropisoꞌ natanaton tapon: —¿Onpoatonta piyapiꞌsa napoin noncaroapi? tënin. Napohuachina ina sontarori huëcapairahuaton shaꞌhuitërin: —Ahuëtapi quëran taꞌaito apiramiachin canquirahuë, itërin. —¿Maꞌta api onporamaꞌ? taantarin Iri.

¹⁷ —Huiristinoꞌsa canatonacoi paꞌpi notohuaroꞌ tiquirinacoi. Huiꞌnanpitantaꞌ, cato chachin tëpapi. Napotohuachinacoira napopinchin taꞌarai. Yosë caposonëontaꞌ, osërëtërinënpoaꞌ, itërin.

¹⁸ Yosë caposonën osërëpisoꞌ natanahuaton, Iriso paꞌyanin. Paꞌyanënquë shiranën quëran ninantërarahuaton anotërin. Yaꞌcoana pirayan anotahuaton, yaꞌpoamotorin. Mashoya niponahuë amonën niꞌton, inapo chimintërin. Inaso huaꞌan yaꞌconin quëran huarëꞌ, catapini shonca piꞌipi israiroꞌsa catahuarin.

¹⁹ Naporo chachin Pinisë saꞌionta cayoron paya, nani yahuaiarin. Yosë caposonën osërëpisoꞌ natantërin. Soꞌionta tëpapi. Shionta chiminin. Inapita natantahuaton, aꞌnanaya huaꞌhua iquitarin. Iquitaton nisiꞌhuitërarin quëran huairin huachi.

²⁰ Noya huaiponahuëꞌ, chiminarinso niꞌsahuatonaꞌ, ahuaitoroꞌsari itaponaꞌ: “Ama paꞌyanquësohuëꞌ. Quëmapiaꞌhua huairan,” itopi. Itopirinahuëꞌ, inaso co manta pacaritërinhuë huachi.

^21-22 Napoaponahuëꞌ, coꞌhuara chiminyátëraponhuë huaꞌhuin nohuitaton: Icapoti, itërin. “Siniororëꞌquënpoa anoyatërëhuaso caposonën iporasoꞌ inimiconënpoapita osërëtërinënpoaꞌ. Napoaton co huachi inso tëranta tëꞌhuatiinpoaso yaꞌhuërinhuëꞌ, taꞌto, ina pochin huaꞌhuahuë nohuitarahuë,” tënin. Siniororëꞌ anoyatopiso caposonën osërëtopi. Soꞌin, shiin, inapitanta chiminpi niꞌton, naporin.