1 Samuel 31 - Chayahuita (Shahui)

Saono huiꞌninpitërë chachin chiminpisoꞌ

¹ Huiristino sontaroꞌsari israiroꞌsa ahuëipi. Ahuërahuatona notohuaroꞌ tiquipi Quiripoa motopiquë inapotopi. Napotohuachinara, aꞌnapitaso taꞌapi.

² Saononta huiꞌninpitarë chachin taꞌapirinahuëꞌ, huiristinoꞌsari imapi. Icantatonaꞌ, cara chachin huiꞌninpita tëpapi: Conatan, Apinatapo, Maraquisoa, inapita.

³ Ina quëran Saonoráchin cancantopi huachi. Pëꞌchinan camayoroꞌsari shinërënëna quëran ohuanpi. Inapotohuachinara, inapita paꞌpi tëꞌhuatërin.

⁴ Napoaton catahuacaso marëꞌ sontaro acorinsoꞌ, itapon: —Pasopitasoꞌ co marcahuanoꞌsahuëꞌ. Inapitaso yatëpahuachinaco, aparisitatonaco tëpaponaco. Napoaton sahuëninën quëran papitatonco tëpaco, itërin. Napotopirinhuëꞌ, inariso paꞌpi tëꞌhuaton co nohuantërinhuëꞌ. Napohuachina inaora chachin sahuëninën yaꞌhuaratërin.

⁵ Catahuacaso marëꞌ sontaro acorinsoari Saono chimininso niꞌnin. Ina niꞌpachina niinapotaton inanta chiminin.

⁶ Ina pochin naporo tahuëri Saono huiꞌninpitarë chachin chiminin. Catahuacaso marëꞌ acorinso sontarontaꞌ, chiminin. Aꞌnapita sontaronënpitanta chiminpi.

⁷ Israiroꞌsa Cortaniiꞌ motopiana aquëtëran yaꞌhuëpisopita natantopi: “Saono, huiꞌninpitarë chachin nani chiminpi. Sontaronënpitanta napopinchin chiminpi. Napopinchin taꞌapi,” topi. Ina natantatonaꞌ, yaꞌhuëpiso ninanoroꞌsa pipinanpitona taꞌapi. Napohuachinara, huiristinoꞌsaso canconahuatona inaquë yaꞌhuëconpi huachi. Ina noꞌpasoꞌ, Cortaniiꞌ quëran piꞌi pipirinso parti quëparitërin.

⁸ Tahuëririnquë huiristinoꞌsasoꞌ, israiroꞌsa chiminpisopita maꞌshanëna matapona paꞌpi. Naporoꞌ Saono huiꞌninpitarë chachin chiminpiso quënanpi.

⁹ Quënanahuatonaꞌ, Saonosoꞌ nishitëconotopi. Ahuëtacaso marëꞌ ohuararinsopitanta matopi. Inapotahuatonaꞌ, yaꞌipi yaꞌhuëpiquë nanan shaꞌhuicaiso marëꞌ sontaroꞌsa aꞌpapi. Aꞌpahuachinara, inahuaso mamanshi pëiroꞌsaquë shaꞌhuiconpi.

¹⁰ Nonënsoꞌ, Piti-san ninano itopisoꞌ pairanënquë pëꞌtënpi. Ahuëtacaso marëꞌ ohuararinsopitasoꞌ, Asotariti moshapiso pëiquë acopi.

¹¹ Carata parti Capisi ninanoquë yaꞌhuëpisopitasoꞌ, Saono napotopiso natantopi.

¹² Natantatonaꞌ, chiníquën cancantopisopitari yonquipi catahuacaisoꞌ. Yaꞌipi tashi iratatonaꞌ, Saono nonën pëꞌtënpiso mapi. Huiꞌninpitanta nonëna pëꞌtënpi niꞌton, inanta mapi. Yaꞌipi masahuatona Capisiꞌpaꞌ quëpantapi. Cancontarahuatonaꞌ, ahuiquitopi.

¹³ Inapotahuatonaꞌ, nara tashinantërinsoanaquë nansëna paꞌpitopi. Inapotatona canchisë tahuëri co coshataponaraihuëꞌ, sëtopiso nanipi.