1 Samuel 3 - Chayahuita (Shahui)

Pënëntacaso marëꞌ Yosëri Samoiro acorinsoꞌ

¹ Samoiro nani huiꞌnapitarin huachi. Iriri camairinso nicaton Sinioro marëꞌ sacatarin. Iracaso pënëntonaꞌpiroꞌsaꞌ, Yosëri yonquirinso apira apira anitotërin. Huaꞌnarëso pochin anitotërin. Samoiro huaꞌhuataso tahuëriꞌsaso nipirinhuëꞌ, co huachi inapochininhuëꞌ.

^2-3 Aꞌna tashiso napoaponahuëꞌ, poꞌnin: Irisoꞌ patoananënquë huëꞌësárin. Inasoꞌ yasomarayaton, co huachi noya quënantërinhuëꞌ. Samoironta Yosë chinotacaso nëꞌmëtë pëiquë huëꞌësárin. Siniororë anoyatopiso caposonën yaꞌcariya huëꞌësárin. Sëꞌparahuan nanpariontaꞌ, co tacopiyátërarinhuëꞌ.

⁴ Naporoꞌ Siniorori përaton itapon: —¡Samoiro! itërin. Inasoꞌ capayatahuaton: —Maꞌta api yaꞌhuëarahuë, tënin.

⁵ Naporahuaton Iri huëꞌërinquë taꞌarëꞌnachin paapaton itapon: —Maꞌta api yaꞌhuëarahuë. ¿Maꞌmarëta përaranco? itoonin. —Co carinquën përaranquënhuëꞌ. Paantarahuaton huëꞌëantaquëꞌ, itërin Iriri. Napotohuachina paꞌsahuaton quëhuëantarin.

⁶ Quëhuënápirinhuëꞌ Siniorori naquëranchin përaantarin: —¡Samoiro! itaantarin. Naquëranchin huënsëantarahuaton Iri paapantarin. Paapaton itapon: —Maꞌta api yaꞌhuëarahuë. ¿Maꞌmarëta përaranco? itaantarin. —Co carinquën përaranquënhuëꞌ. Paantarahuaton huëꞌëantaquëꞌ, itaantarin Iriri.

⁷ Samoiroso Yosë yaꞌhuërinso nitotaponahuëꞌ, co nohuichátërarinhuëꞌ. Napoaton nontopirinhuëꞌ, “Iri nontarinco,” tënin.

⁸ Quëhuëantasoꞌ Siniorori naquëranchin përaantarin. Naquëranchin Samoirosoꞌ huënsëantarahuaton Iri paapantarin: —Maꞌta api yaꞌhuëarahuë. ¿Maꞌmarëta përaranco? itaantarin. Naporoꞌ Irisoꞌ, yonquirin huachi: “Siniorori mini përasarin ipora,” tënin yonquiaton.

⁹ Napoaton itapon: —Paaton quëhuëantaquëꞌ. Sinioro aꞌna përasamarinquën. Përaantahuachinquën napotëquëꞌ: “Nontoco Sinioro, caso piyapinënco niꞌto, natanaranquën,” itëquëꞌ, itërin. Napotohuachina Samoirosoꞌ paꞌsahuaton huëꞌërinquë quëhuëantarin.

¹⁰ Ina quëran Sinioroso huëantarahuaton, achin pochin përaantarin: —¡Samoiro! ¡Samoiro! itaantarin. —Nontoco Sinioro, caso piyapinënco niꞌto, natanaranquën, itërin

¹¹ Napotohuachina Siniorori itapon: —Israiroꞌsanquëma yaꞌhuëramaquë aꞌnara huëhuëpiro nininsoꞌ nisarahuë. Ina natanpatamaꞌ, paꞌpi paꞌyanaramaꞌ.

¹² Naporo tahuëri chachin Iri napotërahuësoꞌ, naniarin. Nani ina, huiꞌninpitarë chachin maꞌsona onpotaꞌhuasoꞌ shaꞌhuitërahuë.

¹³ Ina quëran pipipisopita anaꞌintomiataꞌhuaso yaꞌhuërinsontaꞌ, nani shaꞌhuitërahuë. Huiꞌninpita paꞌpi co noyahuëꞌ nipiso marëꞌ napotarahuë. Nani ina nitotërin. Huiꞌninpita nocaninaco nipirinhuëꞌ, co inari pënëninhuëꞌ.

¹⁴ Napoaton: “Caso Yosëco niꞌto, Iri huiꞌninpitarë chachin co noyahuëꞌ nicatona oshahuanpisoꞌ, co onporonta inquitarahuëꞌ. Onponta oshanëna marëꞌ maꞌsha tëpapirinahuëntaꞌ, co inquitarahuëꞌ. Maꞌpitaso quëshihuachinacontaꞌ, co inquitarahuëꞌ,” itërin.

¹⁵ Ina quëran Samoiroso tahuëriquë huarëꞌ huëꞌërin. Capayatahuaton Yosë chinotacaso nëꞌmëtë pëi yaꞌcoanaroꞌsa iꞌsohuatërin. Siniorori shaꞌhuitërinsoso nipirinhuëꞌ, Iri tëꞌhuataton, co yashaꞌhuitërinhuëꞌ.

¹⁶ Co yashaꞌhuitopirinhuëꞌ, Iriri përasahuaton itapon: —Shamoꞌ, huëquë conpaaꞌhua, itërin. —Maꞌta api yaꞌhuëarahuë, itërin Samoirori.

¹⁷ Naporoꞌ Iriri natanin: —¿Maꞌta Sinioro shaꞌhuitërinquën? Ama manta canitaponcorahuëꞌ, yaꞌipi shaꞌhuitoco. Maꞌsona tëranta shaꞌhuitërinquënso canitohuatanco, quëmasá Sinioro chini chiníquën anaꞌinchinquën, itërin.

¹⁸ Napotohuachina, Samoirori yaꞌipi Siniorori anitotërinso shaꞌhuitërin. Ina natanaton, Iriso panca paꞌyanin: —¡Sinioro nichinapon chachin maꞌsona nohuantërinsoꞌ niin! tënin.

¹⁹ Naporarin quëran Samoiro aꞌshinin. Siniorori noya catahuarin. Yaꞌipi shaꞌhuitërinso chachin catahuarin.

²⁰ Yaꞌipi israiroꞌsari Samoiro natëpi: “Tëhuënchachin inasoꞌ, Yosëri anitotërinso shaꞌhuitërinpoaꞌ,” topi. Tano ninano quëran, Piirsipa ninanoquë huarëꞌ israiroꞌsa napopi.

²¹ Inapoaton Siniorosoꞌ, naquëranchin Siroquë yaꞌnoantarin. Yaꞌnoantarahuaton, yonquirinsopita Samoiro anitotaantarin.