1 Samuel 28 - Chayahuita (Shahui)

Huiristino sontaroꞌsa Tapiri catahuarinsoꞌ

¹ Aꞌna tahuëri huiristinoꞌsasoꞌ, sontaronënapita yontoantapi. Israiroꞌsa ahuëcaiso marëꞌ napoantapi. Cato ninano copirnonënsoꞌ, Aquisi itopi. Inari Tapi itapon: —Quëmanta sontaronënpitarëꞌquën chachin catahuancoso marëꞌ pacamaso yaꞌhuërin, itërin.

² Napotohuachina: —Paꞌsarai mini quiyantaꞌ. Caso piyapinënco. Míso ahuëtërahuëso niꞌsaranco huachi, itërin. —Míso ahuëtëran niꞌquëhuarëꞌ, ipora quëran huarëꞌ aꞌpairinacosopita sontaroꞌsa camaiaran, itërin Aquisiri.

Saono ninotonaꞌpiquë paꞌninsoꞌ

³ Samoiro chimininsoꞌ ayonquiantaꞌinquëmaꞌ: Ina chiminpachina yaꞌipi israiroꞌsari naꞌnëtopi. Ina quëran Namaquë paꞌpitopi. Huaꞌhuatërinso ninanoquë chachin napotopi. Saonosoꞌ iráca chachin ninotonaꞌpiroꞌsa Israiro noꞌpa quëran ocoirin. Chimipiroꞌsa huaꞌyanën nito përatona nontopisopitantaꞌ, napotërin.

⁴ Huiristinoꞌsa niyontoantapi. Naporahuatona Sonin ninano itopisoꞌ notënanquë paꞌsahuatona yaꞌhuëconpi. Nëꞌmëtë pëinëna ótënatona yaꞌhuëconpi. Saononta israiroꞌsa ayontonin. Ayontonahuaton, Quiripoa motopi itopiquë nëꞌmëtë pëinëna ótënatona yaꞌhuëconpi antaꞌ.

⁵ Huiristinoꞌsa yaꞌhuëintapisoꞌ, Saono niꞌnin. Ina niꞌsahuaton, paꞌpi paꞌyamiatërin.

⁶ Napoaton Yosëri anitotacaso marëꞌ natanin. Natanpirinhuëꞌ, co inariso aꞌpanirinhuëꞌ. Huaꞌnarin quëran, Orin quëran, pënëntonaꞌpiroꞌsa quëran, inapita quëran anitotacaso nohuantopirinhuëꞌ, co anitotërinhuëꞌ.

⁷ Napohuachina, sontaro huaꞌanoꞌsa camairin: —Inso sanapi tërantaꞌ, chimipiroꞌsa huaꞌyanën nito përaton nontërinsoꞌ, yonítoco. Paato nontaꞌhuaso marëꞌ nohuantërahuë, itërin. Napotohuachina inahuari: —Intoro ninano itopiquë, aꞌnara sanapi ina nitotërinso yaꞌhuërin, itopi.

⁸ Ina natanaton, Saonosoꞌ ama nohuitacaiso marëhuëꞌ nisha aꞌmorin. Naporahuaton cato huaꞌanoꞌsarë ina sanapi nicapon tashi paꞌnin. Cantonahuaton itapon: —Aꞌna piyapi chimininso përatoco. Maꞌsona yanitotërahuësoꞌ, anitochinco topirahuë. Insosona shaꞌhuitaranquënsoꞌ, ispiritonën përatoco, itërin.

⁹ Napotohuachina, inariso itapon: —Niꞌquëꞌ. Saono naporinso nani nitotëran. Ninotonaꞌpiroꞌsaꞌ, chimipiroꞌsa huaꞌyanën nito përatona nontopisopita, inapita iso noꞌpa quëran ocoirin. Napotarancoso natëhuatënquën, inaso nitotohuachin atëpataponco. ¡Napoaton co napotaancoso yaꞌhuërinhuëꞌ! itërin sanapiri.

¹⁰ —Yoscoarëꞌ co ina marëꞌ manta onpoaranhuëꞌ, itaantarin Saonori.

¹¹ —¿Insoꞌ chimipita përachinquën? taantarin sanapi. —Samoiro përatoco, itërin Saonori. Napotohuachina përarin.

¹² Sanapisoꞌ aꞌnanaya niꞌpirinhuëꞌ, Samoiro huëꞌsarin niꞌnin. Ina niꞌsahuaton huiyo tënin. Naporahuaton Saono itapon: —¡Nonpintëranco! ¡Quëma mini Saononquën! itërin sanapiri.

¹³ Itopirinhuëꞌ: —Ama tëꞌhuatëquësohuëꞌ. ¿Maꞌta niꞌnan? itaantarin Saonori. —Aꞌnara yosë noꞌpa quëran pipirarin niꞌnahuë, taantarin sanapi.

¹⁴ Napohuachina Saonori itapon: —¿Onpopinta yaꞌnorin niꞌnan? itërin. —Máshoya yaꞌnorin niꞌnahuë. Aipi aꞌmorinso niimopitopinan yaꞌnorin, itërin sanapiri. Ina natanaton, Saonosoꞌ: “Samoiro mini,” tënin. Naporahuaton isonin. Isonin quëran noꞌpaquë huarëꞌ moshomarin. Noya nicaton napotërin.

¹⁵ Naporoꞌ Samoirori itapon: —¿Maꞌmarëta përatonco apiranco? itërin. —Co napion cancantato përaranquën. Huiristinoꞌsa ahuëinacoso marëꞌ huëcapairinaco. Yosëntaꞌ, aꞌporahuatonco co huachi aꞌpanirincohuëꞌ. Pënëntonaꞌpiroꞌsa quëranta co aꞌpanirincohuëꞌ. Co huaꞌnarahuë quëran tërantaꞌ, aꞌpanirincohuëꞌ. Napoaton maꞌsona nicaꞌhuasoꞌ anitotaancoso marëꞌ, apëratëranquën itërin.

¹⁶ Napotohuachina, Samoirori itapon: —Sinioro aꞌporahuatënquën inimicotërinquën niꞌquëhuarëꞌ, ¡ama caso natancosohuëꞌ!

¹⁷ Ina nohuanton iráca shaꞌhuitëranquën: “Co huachi nohuantërinhuëꞌ israiroꞌsa quëmari huaꞌanëntacasoꞌ,” itëranquën. Ina nohuanton chachin Tapi yaꞌhuërëtarinquën huachi.

¹⁸ Naporoꞌ amaricoroꞌsa yaꞌipi ataꞌhuantacaso camairinquën. Camaipirinquënhuëꞌ, co noꞌtëquën natëranhuë niꞌton, naporin.

¹⁹ Naporahuaton yaꞌipi ahuëtamarë huëꞌnamasopita, ina nohuanton huiristinoꞌsa minsëarinquëmaꞌ. Tashiraya quëmaso huiꞌnanpitarëꞌquën chachin carëꞌquën nisarama huachi. Ina nohuanton yaꞌhuëintaramaquë maꞌsha yaꞌhuëtërinquëmasontaꞌ, huiristinoꞌsa matarinënquëmaꞌ, itërin.

²⁰ Naporoꞌ aꞌnanaya Saonosoꞌ, chimipi pochin anotërin. Naporopi niꞌton notëntochinarin. Samoirori napotërinsoꞌ natanaton, naporin. Naporo tahuëri, naporo tashi co manta caꞌmantatonhuëꞌ, naporin.

²¹ Saono paꞌpi paꞌyaninsoꞌ, sanapiso niꞌnin. Napohuachina yaꞌcarirahuaton, itapon: —Niꞌquë sinioro. Caso quëma piyapinën pochinco ninahuë. Tëpainacoso yaꞌhuërinso nitotaporahuëꞌ, natëranquën.

²² Ina pochin quëmantaꞌ, shaꞌhuitohuatënquën natëco topirahuë. Chiníquën cancantaton paantamaso marëꞌ cosharo nitatënquën aꞌcaꞌinquën, itërin.

²³ Saonosoꞌ co nohuantërinhuëꞌ coshatacasoꞌ. Co nohuantopirinhuëꞌ, huaꞌanoꞌsa quëparinsoꞌ, sanapi, inapitari apisápachina nohuantërin huachi. Huaniintarahuaton pëꞌsaraquë huënsëconin.

²⁴ Naporoꞌ sanapisoꞌ, toroaꞌhua amoshin pëꞌtahuarinsoꞌ manin. Pëinën aquëtëran acorinso masahuaton tëparin. Ina piꞌisoꞌ tricoroꞌmonta manin. Ina quëran pan co ahuëpocatopinanhuë anpirin.

²⁵ Nani inapita anpihuachina, capacaiso marëꞌ acotërin. Nani coshatohuachinara, sanapi nontahuatona yaꞌhuëapiquë paantapi. Naporo tashi chachin paꞌpi.