1 Samuel 24 - Chayahuita (Shahui)

Tapi Saono tëpacaso co nohuantërinsohuëꞌ

¹ Aꞌna tahuëri Saonosoꞌ huiristinoꞌsa ahuëapon paꞌnin quëran, huënantarin. Naporoꞌ aꞌnari itapon: “Tapisoꞌ In-cati inotëroquë yaꞌhuëarin,” itërin.

² Natanahuaton Saonosoꞌ, cara huaranca sontaroꞌsa huayonin. Yaꞌipi Israiro huëntonoꞌsa quëran ina nápo huayonin. Inapitarë paꞌsahuaton Tapi sontaronënpitarë chachin yonípi. Natëtëroꞌsa paꞌpi huëhuëpiro nininquëpita yonípi.

³ Paꞌsápaton Saonosoꞌ ohuicaroꞌsa ahuëꞌëtopiquë canconin. Ina yacaria motopi nanin yaꞌhuërin. Inaquë Tapi piyapinënpitarë chachin naꞌpirapirinahuëꞌ, Saonosoꞌ chiꞌchicaso marëꞌ yaꞌconin.

⁴ Naporoꞌ aꞌnara piyapinëni sacaroënquë Tapi itapon: —Niꞌquëꞌ. Ipora tahuëri chachin Sinioro shaꞌhuitërinquënsoꞌ nanirin: “Aꞌna tahuëri inimiconën maꞌsona nohuantëransoꞌ nitamaso marëꞌ quëtaranquën,” itërinquën, itërin. Napotohuachina Tapisoꞌ, oshaquëran paaparin. Paaparahuaton Saono aꞌmorinso huirotën yashitëtërin.

⁵ Napoaponahuëꞌ, yashitëtërinso marëꞌ co noyahuëꞌ cancantërin.

⁶ Ina quëran piyapinënpita sacaronquë itapon: —¡Siniorori Saono huayonin copirno nicacaso marëꞌ! Napoaton carisoꞌ, co ina tëpaꞌhuaso nanitërahuëꞌ, itërin.

⁷ Napotahuaton Tapisoꞌ, ama Saono tëpacaiso marëhuëꞌ piyapinënpita yaꞌcopirin. Inaso co manta yonquiaponahuëꞌ, ina quëran pipirin.

⁸ Pipihuachina, Tapinta aꞌnaroáchin pipiintarin. Pipirahuaton chiníquën itapon: —¡Api, api! itërin. Napotarinso natanaton, Saonoso tahuërëtërin. Naporoꞌ Tapiri noya nicaton, isonin quëran noꞌpaquë huarëꞌ monshomarin.

⁹ Ina quëran itapon: —Aꞌnaquën nonpinapitonaco: “Tapi yatëparinquën,” itërinën. Napotopirinënquënhuëꞌ, co inapita natëcamaso yaꞌhuërinhuëꞌ.

¹⁰ Ipora tahuëri chachin nitotaran co carinquën yatëparanquënsohuëꞌ. Sinioro nani quëtërinco naninquë tëpaꞌhuanquënsoꞌ. Inaso nipirinhuëꞌ, co nohuantërahuëꞌ inapotaꞌhuanquënsoꞌ: “Siniorori huayonin niꞌton, apiso copirno yaꞌconin,” taꞌto naporahuë.

¹¹ Niꞌquë api. Aꞌmoranso yashitërahuësoꞌ, sëꞌquëárahuë. Yashitasoco nohuantërahuë naporini, tëpaꞌitënquënhuëꞌ. Napoaponahuëꞌ, co inapotëranquënhuëꞌ. Ina quëran nitotëquëꞌ, co manta yaonpotëranquënsohuëꞌ. Co aꞌnapita tëranta maꞌsha onpotiinënsoꞌ camairahuëꞌ. Co maquë tëranta tëhuëpirahuëꞌ quëmasoꞌ tëpaancoso marëꞌ, yonisáranco.

¹² Sinioro chachin noꞌtëquën shaꞌhuichinpoꞌ, inquënposona tëhuërësoꞌ. Inari chachin maꞌsha onpotërancoso marëꞌ iꞌhuërëchinquën. Caso napoaponahuëꞌ, co onporo tëranta tëpaponquënhuëꞌ.

¹³ Iráca quëran huarëꞌ paꞌyatopi napocaisoꞌ: “Co noyahuëꞌ cancantopisopitaráchin co noyahuëꞌ nipi,” topi. Caso co ina pochin cancantërahuë niꞌton, co tëꞌhuataancoso yaꞌhuërinhuëꞌ. Co onporonta tëpaponquënhuëꞌ.

¹⁴ Naporahuaton co caso máquëncohuëꞌ. Quëmasoꞌ copirnonquën nichinapon chachin pëinënquë huënsëyarápamaso yaꞌhuërin. Napopirinhuëꞌ, poꞌpin inotëroquë huëcaton tahuëri chiniaran. ¡Niꞌnira chimipitëꞌ, imincara, inapita co onporonta yonirëhuëꞌ! Inapita pochin nipirahuëꞌ, quëmaso yonitonco ainashitáranco.

¹⁵ Napoaton Sinioro chachin noꞌtëquën shaꞌhuichinpoꞌ, inquënposona tëhuërësoꞌ. Inari chachin naporahuësoꞌ noꞌtëquën tantiainco. Inapotatonco quëmá quëran paꞌpoyainco, itërin.

¹⁶ Tapiri tonitohuachina, Saonosoꞌ paꞌyanaton chiníquën itapon: —¡Tapi chachin mini nontarinco! tosahuaton naꞌnëmiatërin.

¹⁷ Ina quëran itapon: —Quëma noꞌtë noꞌtëquënsoꞌ yonquiran. Carinquënso naꞌcon aparisitopiranquënhuëꞌ, quëmaso nosororanco.

¹⁸ Ipora tahuëri anitotëranco noya yonquirapirancosoꞌ. Sinioro chachin nani quëtërinquën tëpaancosoꞌ. Napoaponahuëꞌ, co tëparancohuëꞌ.

¹⁹ Inso tëranta inimiconën tëpachináchin quënanpachina, co onporonta nichaꞌërinhuëꞌ. Napoaton noya niꞌnancoso marëꞌ, quëmanta Sinioro noya niꞌinquën.

²⁰ Tëhuënchachin quëmasoꞌ, copirno yaꞌcoanan tënahuë. Ina yaꞌconpatan chiníquën nanantaran. Naporahuaton israiroꞌsantaꞌ, noya noya yaꞌhuëapona huachi.

²¹ Iporaso shaꞌhuitoco: “Sinioro niꞌsárinco huiꞌnanpita, shiparinpita, inapita co tëpapohuëꞌ. Nininënapita ninshitopisoꞌ tapiatona naniantohuachinaꞌ, itoco,” itërin.

²² Napotohuachina: “Sinioro niꞌsárinco co napoarahuëꞌ,” itërin Tapiri. Nani ninontohuachinara, Saonoso pëinënquë panantarin. Tapinta sontaronënpitarë chachin naꞌpipiꞌpaꞌ yaꞌcoantapi.