1 Samuel 21 - Chayahuita (Shahui)

Pan Yosë marëꞌ acopisoꞌ Tapi caꞌninsoꞌ

¹ Tapisoꞌ paꞌsahuaton Nopo ninano itopiquë canconin. Canconahuaton Aimirico corto huaꞌan nicapon paꞌnin. Inasoꞌ, Tapi inaoraíchin huëꞌsarin niꞌnin. Ina niꞌsahuaton paꞌyanin. Paꞌyanaton itapon: —¿Ma iporata quëmaoraíchinsoꞌ huëꞌsaran? itërin.

² Napotohuachina: —Copirno maꞌsha nicaꞌhuaso camayatonco itërinco: “Maꞌmarësona aꞌparanquënsoꞌ, ama insonta nitochinsohuëꞌ,” itërinco. Sontaronëhuëpitaso nipirinhuëꞌ, nani camairahuë insëquësona niquënanaꞌhuaisoꞌ.

³ ¿Maꞌta ipora yaꞌhuëtërinquën capacasoꞌ? Aꞌnatërápo pan quëtoco topirahuë. Coꞌsoꞌ yaꞌhuëtohuachinquënhuëꞌ, maꞌsha tëranta quëtoco quëpaꞌi, itërin.

⁴ —Pan mini yaꞌhuëpirinhuëꞌ, co pan miahuëꞌ. Sinioro marëꞌ acorahuësoráchin yaꞌhuërin. Co canpitaso ina capamaso yaꞌhuërinhuëꞌ. Napoaponahuëꞌ, sontaronënpita co osha nipihuëꞌ nipachinsoꞌ, quëchinquën, itërin.

⁵ Napotohuachina, Tapiriso aquinorahuaton itapon: —Sontaronëhuëpitaroꞌco chachin ahuëtapoi yápaꞌnai. Napohuatoira, co osha ninaihuëꞌ. Aquëtë huarëꞌ iporasoꞌ, chini chiníquën copirno camairincoi niꞌton, co inapoatoi oshahuanaihuëꞌ, itërin.

⁶ Napotohuachina, corto huaꞌansoꞌ Sinioro marëꞌ pan acopiso chiꞌhuincarinsopita Tapi quëtërin. Inanpi pansáchin inaquë yaꞌhuërin niꞌton, quëtërin. Inaso panoꞌsaꞌ, noya patoana itopiquë acopisoꞌ. Nasha panoꞌsa huënocachararinsoꞌ acoaton, naporo tahuëri chachin chiꞌhuincarinsoꞌ.

^7-15 (-)