1 Samuel 20 - Chayahuita (Shahui)

Tapi taꞌacaso Conatani catahuarinsoꞌ

¹ Tapi Nayoto quëran taꞌarahuaton, Conatan yaꞌhuërinquë paꞌnin. Quënanconahuaton itapon: —¡Co caso manta tëhuërahuëꞌ! ¡Co maꞌmarë tëranta anaꞌintiinacoso yaꞌhuërinhuëꞌ! Tataparin co manta onpotërahuëꞌ niꞌton: ¡Co tëpaincoso yaꞌhuërinhuëꞌ, tënahuë! itërin.

² Napotohuachina, inariso itapon: —¡Co Yosë nohuantarinhuëꞌ tatahuë tëpainquënsoꞌ! ¡Co tëpaarinquënhuëꞌ! Tatahuë maꞌsona yanipachina onpopionta shaꞌhuitërincosoꞌ, nani nitotëran. Napoaton iporanta maꞌsona nicacasoꞌ yonquihuachina, co poꞌotarincohuëꞌ, itërin.

³ Napotopirinhuëꞌ, Tapiriso chiníquën shaꞌhuitaantarin: —Nipayarësoꞌ tata nani nitotërin: “Tapi tëpahuato, Conatan co noyahuëꞌ cancantarin. Napoaton ama shaꞌhuichisohuëꞌ,” tosarin. Napoaponahuëꞌ, Yoscoarëꞌ co huaꞌquiya quëranhuëꞌ caso tata tëpaponco, itërin.

⁴ —¿Onporahuatota catahuainquën? itërin Conatani.

⁵ —Niꞌquëꞌ. Tashiraya yoquiaꞌhuaraiꞌ pita nisarin. Napoaton copirnorëꞌco capahuaso yaꞌhuërin. Inaso nipirinhuëꞌ, tashiraya aquëtëran iꞌhuaquë huarëꞌ caso iminoꞌsaquë naꞌpii topirahuë.

⁶ Tata natantohuachinco, napotëquëꞌ: “Pirinquë yaꞌipi quëmopinëhuëpitarëꞌco chachin Yosë chinotarai. Nani piꞌiquë Sinioro chinotacaso marëꞌ maꞌsha tëpaꞌhuaiso nininsoꞌ, tëpaarai. Napoaton aꞌnaroáchin paꞌsarahuë,” itërinco niꞌton, aꞌparahuë, itëquëꞌ.

⁷ Napotohuatan: “Noyapaꞌ,” topachin, co manta tëꞌhuataꞌhuaso yaꞌhuërinhuëꞌ. Napoaponahuëꞌ noꞌhuitohuachinsoꞌ, tëhuënchachin tëpaincoso nitotaran.

⁸ Caso piyapinënco nipirahuëꞌ, Sinioro marëꞌ nipayacasoꞌ nishaꞌhuitërëꞌ. Napoaton ina pochin tata shaꞌhuitëquë topirahuë. Napoaponahuëꞌ, ca tëhuërahuë nipachinsoꞌ, quëma chachin nipachin tëpachinaco. Co tataquë huarëꞌ quëpaancoso yaꞌhuërinhuëꞌ, itërin.

⁹ Napotopirinhuëꞌ, inariso itapon: —¡Ama ina pochin yonquiquësohuëꞌ! Maꞌsona tatahuë yaonpotohuachinquën, tëhuënchachin shaꞌhuitaranquën, itërin.

¹⁰ —Tata co yainhuëꞌ aꞌpanihuachinquën, ¿inta ina shaꞌhuitaponco? itërin Tapiri.

¹¹ Napotohuachina Conatani itapon: —Huëquë iminquë paꞌa shaꞌhuichinquën, itahuaton quëparin.

¹² Inaquë nipachina itaantapon: —Sinioronta niꞌsárinco niꞌton, shaꞌhuitaranquën. Inasoꞌ, yaꞌipi israiroꞌsanpoa chinotërëhuaꞌ. Tashirayahuë nipon, tashiraya aquëtëranhuë nipon, maꞌsona tatahuë yonquirapirinquënsoꞌ, natanarahuë. Noyaso yonquirapihuachinquën, shaꞌhuitaranquën.

¹³ Co noyahuëꞌ yonquirapihuachinquëntaꞌ, Yoscoarëꞌ shaꞌhuitaranquën. Inapotatënquën catahuaranquën noya taꞌacaso marëꞌ. Coꞌsoꞌ inapotohuatënquënhuëꞌ, Sinioro chiníquën anaꞌinchinco. Naporahuaton ina chachin quëmanta catahuainquën. ¡Iráca tata catahuarinso pochachin nichinquën!

^14-15 Yoscoarëꞌ inapotaranquën. Quëmanta Yoscoarëꞌ taꞌton, noyasáchin nicancosoꞌ shaꞌhuitoco. Sinioro noya niꞌninquënso pochin canta niꞌco. Chiminpatoso nipirinhuëꞌ, iso pochin niquëꞌ: Siniorori yaꞌipi inimiconënpita ataꞌhuantarin. Inapotopirinhuë tëranta ama quëmopinëhuëpitasoꞌ naniantëquësohuëꞌ. Inapitasoꞌ noyasáchin niꞌquëꞌ.

¹⁶ Coꞌsoꞌ ina pochin nipatanhuëꞌ, quëmopinënpitarëꞌquën chachin Sinioro anaꞌintarinquëmaꞌ. Yoscoarëꞌ tënansoꞌ co natëranhuë niꞌton, anaꞌintarinquëmaꞌ, itërin. Ina pochin Conatan Tapirëꞌ Yoscoarëꞌ taꞌtonaꞌ, anoyatopi.

¹⁷ Inaora ninosororinso pochachin Conatani Tapi nosororin. Ina pochin nosoroaton naquëranchin Yoscoarëꞌ taꞌton, catahuacaso shaꞌhuitërin.

¹⁸ Ina quëran Tapi itaantapon: —Tashiraya yoquiaꞌhuaraiꞌ pita nisarin. Huënsëyantëranquë capa nipatan, tata nohuanarinquën.

¹⁹ Cara tahuëri quëranso nipirinhuëꞌ, naꞌcon naꞌcon nohuanarinquën. Napoaton iꞌhua naꞌpiranquë paquëꞌ. Paantarahuaton, naꞌpiroꞌsa inaquë imopiso aquëtëꞌ, naꞌpiquëꞌ.

²⁰ Ina parti pëꞌchinanëhuëquë cara shinërë aꞌpararahuë. Noꞌquicaso marëꞌ aꞌparëso pochin nisarahuë.

²¹ Nani aꞌpahuato piyapinëhuë camaiarahuë: “Paaton shinërëroꞌsa yoníquëꞌ,” itohuato paꞌsarin. Paasoꞌ: “Naroꞌparan nisapi. Maquimaquëꞌ,” itohuatosoꞌ, noya nanan yaꞌhuërin niꞌton, noya huëꞌsaran. Sinioronta nitotërin co manta onpoaranhuëꞌ.

²² Napoaponahuëꞌ: “Shinërëroꞌsa quëma aquëtëꞌ nisapi,” itohuatosoꞌ, paquëꞌ. Sinioro pacamaso nohuantërin niꞌton, pacamaso yaꞌhuërin.

²³ Yoscoarëꞌ niitatë anoyatërëso nipirinhuëꞌ, Sinioronta nani nitotërin. Co inaso naniantarinhuëꞌ, itërin.

²⁴ Napotohuachina Tapisoꞌ, Conatani shaꞌhuitërinquë naꞌpirin. Tahuëririnquë pita nanihuachina, copirnoso coshatapon huënsërin.

²⁵ Paira pirayan huënsëyantërinquë huënsërin. Conatansoꞌ, paꞌpin notënanquë huënsërin. Apinirontaꞌ, Saono pirayan huënsërin. Napoaponahuëꞌ, Tapiso huënsëyantërinquë capa.

²⁶ Naporoꞌ Saonosoꞌ Tapi nohuanaponahuëꞌ, co manta tëninhuëꞌ: “Maꞌshaquë tëranta tëhuëaton oshahuamara. Napoaton Sinioro marëꞌ maꞌsha tëpapisoꞌ noshinën co capacasoꞌ nohuantërinhuëꞌ,” tënin yonquinënquë.

²⁷ Tahuëririnquënta pita chachin niponahuëꞌ co Tapi yaꞌnoantarinhuëꞌ. Napohuachina Saonosoꞌ Conatan natanin: —¿Onpoatonta Quisi huiꞌnin co iꞌhuaranta capacaso marëꞌ yaꞌnorinhuëꞌ? itërin.

^28-29 Napotohuachina, inariso itapon: —Pirinquë aꞌnaroáchin yapaaton nataninco: “Pirinquë yaꞌipi quëmopinëhuëpita Yosë chinotapi. Sinioro chinotacaiso marëꞌ maꞌsha tëpacaiso nininsoꞌ, tëparapi. Naporahuaton inaquë nicaꞌhuaso marëꞌ iya masho camairinco. Napoaton inaquë pita naꞌhuëcaꞌhuaso marëꞌ quëtoco paꞌi,” itërinco. Napotohuachincora aꞌparahuë. Aꞌparahuë niꞌton, co inasoꞌ isëquë nininhuëꞌ, itërin.

³⁰ Ina natanaton, Saonoso huiꞌnin paꞌpi noꞌhuirin. Noꞌhuiton itapon: —¡Maꞌninquën chachinta niꞌton, naporan! ¡Quisi huiꞌninëꞌquën noyá nipayaransoꞌ, nani nitotërahuë! Ina marëꞌ quëmasoꞌ taparo nisaran. Mamaparinta naꞌintaran niꞌton, inanta taparo nisarin.

³¹ Inaso nanpirápachin, co quëmaso nanpicaso tëranta yaꞌhuërinhuëꞌ. Aquëtë huarëꞌ yaꞌhuërëtaancososoꞌ, co nanitaranhuëꞌ. Napoaton aꞌpaquë piyapinënpita macoinaꞌ. Inasoꞌ, chiminacaso yaꞌhuërin, itërin.

³² Napotopirinhuëꞌ, inariso paꞌpin itapon: —¿Onpoatonta chiminacaso yaꞌhuërin? ¿Maꞌta onporinso marëꞌ tëpacaso yaꞌhuërin? itërin.

³³ Huiꞌnini napotopirinhuëꞌ, Saonoso co manta taponahuëꞌ nansanën ihuërin. Huiꞌnin ohuanacaso marëꞌ ihuërin. Inaporinso marëꞌ: “Tëhuënchachin tatari Tapi yatëparin,” tënin yonquiaton.

³⁴ Napohuachina Conatansoꞌ, paꞌpi noꞌhuitaton, paꞌpin huaninanpirin. Co huachi naporo coshatocoantarinhuëꞌ. Paꞌpini Tapi pinorinso marëꞌ, paꞌpi sëtaton naporin.

³⁵ Tahuëririnquë inasoꞌ, Tapiri ninarinquëꞌpaꞌ paꞌnin shaꞌhuitapon. Nishaꞌhuitopisoꞌ oraquë paꞌnin. Aꞌnara piyapinën huiꞌnapishin quëparin.

³⁶ Inaquë canconahuaton, piyapinën itapon: —Paaton shinërëroꞌsa aꞌpaarahuëso yonícontaquëꞌ, itërin. Napotohuachina piyapinënsoꞌ taꞌararin. Taꞌasoꞌ Conataontaꞌ, pëꞌchinanënquë, shinërënën aꞌpararin. Chiníquën tëꞌyatërin niꞌton, huiꞌnapi aquëtë anotërin.

³⁷ Piyapinëni cantonpachina Conatanisoꞌ chiníquën shaꞌhuitërin: —¡Shinërësoꞌ quëma aquëtë nisarin! itërin.

³⁸ Naquëranchin piyapinën shaꞌhuitaantarin: —¡Manóton taꞌaquëꞌ! itaantarin. Napotohuachina huiꞌnapisoꞌ, shinërë maconahuaton huaꞌanën quëpataantarin.

³⁹ Huaꞌanën naporinso natanaponahuëꞌ, co manta yonquirinhuëꞌ: “Nanan nishaꞌhuitapi,” co tëninhuëꞌ. Conatan, Tapi, inapitasáchin maꞌsona tapona napopiso nitotopi.

⁴⁰ Ina quëran Conatansoꞌ, pëꞌchinanën, shinërënënpita, inapita piyapinën quëtërin. Quëtahuaton naporo chachin yaꞌhuërinquë quëpanantacasoꞌ camairin.

⁴¹ Nani paꞌpachina, naꞌpiroꞌsa imopisoꞌ aquëtëran quëran Tapi pipirin. Pipirahuaton Conatan notënanquë isonahuaton, noꞌpaquë huarëꞌ monshomarin. Noya nicaton cararo napotërin. Ina quëran nisëꞌquërahuatonaꞌ, ninaꞌnëtopi. Tapisoꞌ naꞌcon naꞌcon naꞌnëton sëto inquiahuarëꞌ naꞌnërin.

⁴² Napoin quëran Conatani itapon: —Noya paquë huachi. Catonpo chachin Yoscoarëꞌ taꞌtë nishaꞌhuitërë niꞌton, ama tëꞌhuatëquësohuëꞌ. Noya nipayatë yaꞌhuëcaso marëꞌ nani Yosë nontërëꞌ. Shinpopitanta noya ninicatona yaꞌhuëcaiso marëꞌ nani anoyatërëꞌ, itërin. Nani ninontohuachinara, Tapisoꞌ paꞌnin huachi. Yaꞌhuërëꞌ Conataontaꞌ, yaꞌhuërinquë paantarin.