1 Samuel 2 - Chayahuita (Shahui)

Yosë cantanën Ana cantarinsoꞌ

¹ Naporoꞌ Anantaꞌ, Yosë nontaton itapon: “Sinioro yonquiato capa cancantërahuë. Yaꞌipi cancanëhuë quëran capa cancantërahuë. Achinirinco niꞌton, inimicoroꞌsa aꞌpaniaꞌhuaso nanitërahuë. Catahuarinco niꞌton, noya cancantërahuë.

² ¡Inasáchin noya noyasoꞌ! ¡Co insonta ina pochin paꞌpoyarinpoahuëꞌ! Co aꞌna yosë ina pochin yaꞌhuërinhuëꞌ.

³ Ama inso tëranta nocanchinsohuëꞌ. Ama aquëtëꞌ: ‘Ca tëhuënchinsoꞌ,’ chinasohuëꞌ. Siniorosoꞌ Yosë niꞌton, yaꞌipi naporëhuaso nitotërin. Pëꞌtënatë quiro nitotërëso pochin, naporëhuaso nitotaton, noꞌtëquën shaꞌhuitarinpoaꞌ.

⁴ Ahuëtonoꞌsa nipirinahuëꞌ, ina topachin sanpatapi. Sanpacharoꞌsanta nipirinahuëꞌ, ina topachin ahuëtapi.

⁵ Aꞌnaquënsoꞌ, huaꞌhuayátërahuë cosharohuanpi. Napoaton, pëꞌsotai huarëꞌ coshatopi. Inapopirinahuë iporasoꞌ pahuantopi niꞌton, piꞌpian tëranta capacaiso marëꞌ patrohuanpi. Aꞌnaquënso tanarápirinahuëꞌ, iporaso noyá coshatopi. Co huaꞌhuanaꞌpihuë sanapintaꞌ, canchisë huarëꞌ huaꞌhuanpitërarin. Naꞌa huaꞌhuanaꞌpiso nipirinhuëꞌ, co huachi huaꞌhuanatonhuëꞌ, copi tënin.

⁶ Sinioro nohuanton chiminarëhuaꞌ. Ina nohuanton chachin huaꞌhuatërëhuaꞌ. Ina topachina chimipiroꞌsa yaꞌhuërinquë paꞌmarihuaꞌ. Ina taantahuachinasoꞌ, inatohua quëran huënantarihuaꞌ.

⁷ Sinioro nohuanton aꞌnaquën maꞌhuanpi. Ina nohuanton chachin aꞌnaquënso popriyatopi. Inari aꞌnaquën atapanin. Inari chachin aꞌnaquënso noya acoantarin.

⁸ Saꞌahuaroꞌsa anotopiso pochin aꞌnaquënso maꞌsha onpopi. Ina quëran opatërëso pochin Siniorori noya acoantarin. Aꞌnaquëontaꞌ, nosorotatona capacaiso marëꞌ huëyoroquë icaratopitërapi. Inapopisopitantaꞌ, Siniorori noya acoantarahuaton huaꞌanoꞌsapitarë ahuënsëarin. Inapotohuachina aꞌnapitarintaꞌ, noya niꞌpi huachi. Sinioroáchin yaꞌipiroꞌpaꞌ ninin. Inari chachin ipora yaꞌhuëarinquë acorin. Ina nohuanton yaꞌipi isoroꞌpaquë yaꞌhuërinsopita noyatarin.

⁹ Sinioroáchin cancantopisopita intohuaso paꞌpachinara, inari noya aꞌpaiarin. Co noyahuëꞌ cancantopisopitaso nipirinhuëꞌ, chimipiroꞌsa nisapiquë paꞌsapi. Inaquësoꞌ, yaꞌipi tashinantárin. Co insonta inaora chininënquë noya noya niacoarinhuëꞌ.

¹⁰ Siniorosoꞌ yaꞌipi inimiconënpita ataꞌhuantarin. Noꞌhuiton inápa quëran huira aꞌpatiimapon. Yaꞌipi isoroꞌpaquë yaꞌhuëpisopita, Siniorori noꞌtëquën shaꞌhuitapon. Noꞌtëquën shaꞌhuitaton, yonsha paꞌpaarëso pochin nitapon. Copirno marëꞌ huayoninsoso nipirinhuëꞌ, chini chiníquën nanan quëtapon,” tënin Ana Yosë chinotaton.

¹¹ Ina quëran Iricanasoꞌ, saꞌinpita, huiꞌninpita, inapitarë chachin Nama ninanoquë paantarin. Huaꞌhuashaso nipirinhuëꞌ, inaranchin quëparitërin. Iri corto huaꞌani maꞌsona camairinso nicaton, Sinioro marëꞌ sacatarin.

Iri huiꞌninpita co noyahuëꞌ nipisoꞌ

¹² Iri huiꞌninpitasoꞌ, co noyahuëꞌ cancantopi. Napoatonaꞌ, co Sinioro tëranta tëꞌhuatatonaraihuëꞌ, co noyahuëꞌ nisápi.

^13-14 Corto huaꞌanoꞌsa inachintopiso imatona isopopi: Israiroꞌsa Sinioro chinotacaiso marëꞌ maꞌsha tëpapi. Inapotahuatona co yaꞌipi Yosë marëꞌ ahuiquitohuachinarahuëꞌ, napopinchin capacaiso marëꞌ anpipi. Anpiasoiꞌ, corto huaꞌan piyapinëni huëcapairin. Panca insën pochin nininquë patoroitahuaton, corto huaꞌan marëꞌ nosha ocoirin. Inari Sinioro marëꞌ maꞌsha quëpisoꞌ tëpaton aꞌnotarin. Yaꞌipi Siroquë huëcatonaꞌ, maꞌsha Sinioro marëꞌ aꞌnopisopita inapotëraꞌpiapi.

¹⁵ Napoaponahuëꞌ, aꞌna tahuëriso co napopihuëꞌ. Maꞌsha Sinioro marëꞌ tëpapisoꞌ tomaquën artaroquë ahuiquitacaso nipirinhuëꞌ, coꞌhuara ahuiquichátërasoihuëꞌ, corto huaꞌan piyapinënꞌton huëꞌnin. Huëꞌsahuaton nosha huaꞌanën itapon: “Nosha quëtoco, cancatato corto huaꞌan aꞌcaꞌi. Co inaso anpipinan maꞌpaponquënhuëꞌ,” itërin.

¹⁶ Napotohuachina aꞌnaquëni itapon: “Coꞌ. Tomaquënꞌton Sinioro marëꞌ corto huaꞌani ahuiquitacaso yaꞌhuërin. Ina piquëran quëmasoꞌ nohuantëransoꞌ maquëꞌ,” itërin. Napotohuachina, inariso itaantapon: “Co naporinhuëꞌ, apiramiachin quëtancoso yaꞌhuërin. Co noya quëran quëtohuatancohuëꞌ, osërëtaranquën,” itërin.

¹⁷ Inapoatona ina huiꞌnapiꞌsasoꞌ, co Sinioro tëꞌhuatatonaraihuëꞌ panca oshahuanapi. Ina chinotacaiso marëꞌ maꞌsha tëpapisopita nocanatë pochin nitopi.

¹⁸ Inapoasoiꞌ, Samoirosoꞌ huiꞌnapiraꞌhuatarin. Rino piꞌshi quëran nipinan ipoto aꞌmosahuaton, Sinioro marëꞌ sacatarin. Corto huaꞌanoꞌsa inanpi aꞌmopi niꞌton, inanta inanpi aꞌmorin.

¹⁹ Nani piꞌiquë paꞌpin, aꞌshin, inapitaso Yosë chinotacaso nëꞌmëtë pëiquë paꞌpi. Sinioro marëꞌ maꞌsha tëpacasoꞌ nininsoꞌ quëparahuatonaꞌ, ina marëꞌ tëpapi. Naporahuaton, nani paꞌpiquë aꞌshini aꞌmocaso nitërinsoꞌ quëpatërin.

²⁰ Napohuachina, Iriri Iricana saꞌinë chachin noya yonquirapiton itapon: “Saꞌan nani aꞌnara huaꞌhuin Sinioro marëꞌ acorin. Ina yaꞌhuërënamën Sinioro chachin iso sanapiquë huiꞌnahuaantacaso catahuainquën,” itërin. Napotohuachina, Iricanaso saꞌinpita, huiꞌninpita, inapitarë chachin yaꞌhuërinꞌpaꞌ paantapi.

²¹ Siniorori Ana catahuarin niꞌton, huaꞌhuaantarin. Huaꞌhuanápaton aꞌnatërápoaꞌhua ananirin. Cara quëmapi, cato sanapi yaꞌhuëtërin. Samoiroso nipirinhuëꞌ, Sinioro chinotacaso nëꞌmëtë pëiquëranchin ina marëꞌ sacatarin. Inapoapon pochin soꞌsorarin.

²² Iri corto huaꞌanso nipirinhuëꞌ, nani noyá mashotërin. Napoaponahuëꞌ, cato huiꞌninpita napopisoꞌ natantárin. Israiroꞌsa Sinioro marëꞌ maꞌsha tëpahuachinara, napotopiso natantërin. Sanapiꞌsanta Yosë marëꞌ sacatopisopita, ichihuëꞌëpiso natantërin. Ina sanapiꞌsasoꞌ, Yosë chinotacaso nëꞌmëtë pëi yaꞌcoanaquë sacatopirinahuëꞌ, inapotopi.

²³ Ina natantaton huiꞌninpita itapon: “Canpita paꞌpi co noyahuëꞌ nisaramasoꞌ, naní quëran shaꞌhuitërinaco. ¡Ama huachi ina pochin nicosohuëꞌ!

²⁴ Aꞌnapita israiroꞌsa canpita naporamasoꞌ shaꞌhuitërinaco niꞌton: ‘Tëhuënchachin paꞌpi co noyahuëꞌ nisaramaꞌ,’ tënahuë. Ama conparoꞌsa ninonpintocosohuëꞌ.

²⁵ Aꞌna piyapi maꞌsha onpotohuachinpoaꞌ, Sinioro nanitërin paꞌpoyainpoasoꞌ. Napoaponahuë Sinioro maꞌsha onpotohuatëhuaꞌ: ¡Co insonta yaꞌhuërinhuëꞌ paꞌpoyainpoasoꞌ!” itërin. Napotopirinhuëꞌ, inahuariso co paꞌpina yanatëpihuëꞌ. Siniorori nani chinotërin tëpacaso niꞌton, co natëtopihuëꞌ.

²⁶ Samoiroso nipirinhuëꞌ, noya soꞌsorarin. Naporahuaton noyasáchin nisarin niꞌton, piyapiꞌsari noya niꞌpi. Siniororinta noya niꞌnin.

²⁷ Naporo tahuëriꞌsa aꞌnara pënëntonaꞌpi Iri huëcapairahuaton itapon: “Iráca shimashonënpita Iquipito noꞌpaquë yacapatopi. Iquipito copirnori piyapitaton asacatërin. Naporoꞌ, aꞌninquëchin inapita nohuitërinaco.

²⁸ Aꞌnapita Israiro huëntonoꞌsa yaꞌhuëpirinhuëꞌ, canpita huëntonëma huayonahuë. Corto huaꞌanoꞌsanquëma nicatoma maꞌsha chinotiinacoso marëꞌ quëpachinara, tëpamaso marëꞌ huayonanquëmaꞌ. Tëparahuatomaꞌ, artaronëhuëquë ahuiquitamaso marëꞌ huayonanquëmaꞌ. Yonarin pochin pimóchin nininsonta aꞌpëamaso marëꞌ acoranquëmaꞌ. Ipoto aꞌmosahuatomaꞌ, chinotëramacoso nëꞌmëtë pëiquë sacatamaso marëꞌ nohuantëranquëmaꞌ. Caso Sinioroco niꞌto, israiroꞌsa maꞌsha ahuiquitatona chinotërinaco. Yaꞌipi inapita quëran shimashonënpita nanan quëtërahuë napopinchin capacaisoꞌ. Napoaton canpitanta noya caꞌnamaꞌ.

²⁹ Nani camairanquëma maꞌsha chinotiinacoso marëꞌ quëpiso tëpatomaꞌ, ca marëꞌ ahuiquitamasoꞌ. Maꞌpitasona quëshirinacosontaꞌ, aꞌnotamacoso marëꞌ nani camairanquëmaꞌ. ¡Canpitaso co ina nocanamaso yaꞌhuërinhuëꞌ! ¡Ca naꞌcon naꞌcon paꞌyataancoso nipirinhuëꞌ, quëmasoꞌ huiꞌnanpita naꞌcon naꞌcon paꞌyatëran! Israiroꞌsa maꞌpitaso quëshihuachinacora, noya noya nininsoꞌ quëshirinaco. ¡Co ina naꞌcon naꞌcon maꞌpatatomaꞌ, canpitaso amomiatamaso yaꞌhuërinhuëꞌ!

³⁰ Napoaton Sinioro israiroꞌsanpoa chinotërëhuaso naporin: ‘Nani yonquipirahuë piyapinëhuënquën nisápamasoꞌ. Quëmá quëran pipipisopitantaꞌ, inapoꞌina topirahuë. Iporaso nipirinhuëꞌ shaꞌhuitaranquën: Co onporo napocamaso yaꞌhuërinhuëꞌ. Noya niꞌninacosopita tëhuënchinsoꞌ, carinta noya niꞌsarahuë. Nocaninacopitaso nipirinhuëꞌ, atapamiatarahuëꞌ. Ca Sinioroco napotaranquëmaꞌ.

³¹ Co huaꞌquia quëranhuë huiꞌnanpita tëpaarahuë. Co mashochátërasoihuëꞌ inapotarahuë.

³² Aꞌnapita israiroꞌsa catahuamiatohuato, quëmaso co napion ancantaton, noyapataran. Naporahuaton quëmá quëran pipipisopita co mashochátërasoihuëꞌ chiminaponaꞌ.

³³ Aꞌna tëranta quëmá quëran pipirinsoꞌ artaronëhuëquë corto huaꞌan pochin sacatohuachin, noyapataton sëtápon. Sëtaton naꞌnërápaton, somaraya pochin quëparitarin. Naporahuaton napotëranquënso chachin nisarin. Co aꞌnaya tëranta quëmá quëran pipirinsoꞌ mashotaquë huarëꞌ nanpiponhuëꞌ.

^34-35 Huiꞌnanpita Opini, Pinisë, inapita naporo tahuërirachin chiminaponaꞌ. Napotëranquënsoꞌ nanicaso marëꞌ napoaponaꞌ. Ina quëran aꞌna corto huaꞌan co quëmá quëran pipirinsohuëꞌ acoarahuë. Ina tëhuënchinsoꞌ natëarinco. Yaꞌipi camairahuësoꞌ, inaso nicapon. Ina acohuato, carinta noya aꞌpaiarahuë. Ina quëran pipipisopitanta inapotarahuë. Insosona copirno huayonpato, ina marëꞌ sacataponaꞌ.

³⁶ Naporoꞌ quëmá quëran pipipisopita, aꞌnaquën co chiminyátëraponahuëꞌ. Inapitasoꞌ aꞌnaya aꞌnaya ina corto huaꞌanquë isonahuatonaꞌ: “Maꞌshaquë tëranta corto huaꞌanoꞌsa catahuai. Inapohuato piꞌpian tëranta coshatapo topirahuë,” itapon,’ tënin Sinioro,” itërin.