1 Samuel 19 - Chayahuita (Shahui)

Saonori Tapi yatëparinsoꞌ

^1-2 Aꞌna tahuëri Saonosoꞌ, Tapi tëpacaisoꞌ camaitërin. Conatan camairahuaton, aꞌnapita huaꞌanoꞌsanta camairin. Camaipirinhuëꞌ, Conatanisoꞌ paꞌpi nosoroaton Tapi shaꞌhuitërin. —Tata yatëparinquën. Napoaton tashiraya aꞌcayanchin co piyapi paꞌninquëhuëꞌ naꞌpiquëꞌ.

³ Caso tataroꞌco, pastoquë naꞌpiárantaquë paꞌsarahuë. Naporoꞌ quëma marëꞌ ina nontarahuë. Ina quëran maꞌsona topachin shaꞌhuichinquën, itërin.

⁴ Inaquë nipachina Conatani Tapi marëꞌ paꞌpin nontaton itapon: —Ama tata Tapi maꞌsha onpotëquësohuëꞌ. Inasoꞌ co manta onpotërinquënhuëꞌ. Naꞌcon catahuarinquën tëhuënchinsoꞌ.

⁵ Naporoꞌ Coriato tëpapon, chiminchináchin ninin. Siniorori catahuarin niꞌton, ina quëran israiroꞌsanpoa nichaꞌërinpoaꞌ. Quëmaora chachin naporinso nicaton capa cancantëran. ¡Napoaton co tëpamaso yaꞌhuërinhuëꞌ! ¡Co manta onporinhuëꞌ! itërin.

⁶ Huiꞌnini napotërinso natanahuaton, Saonoso chiníquën nonin: —Yoscoarëꞌ co tëpapohuëꞌ, tënin.

^7a Ina tosahuaton Saonosoꞌ, yaꞌhuërinꞌpaꞌ paantarin. Conatanso nipirinhuëꞌ, Tapi përasahuaton paꞌpinë ninontopisoꞌ shaꞌhuitërin.

^7b Ina quëran paꞌpin yaꞌhuërinquë quëpaantarin. Napohuachina naquëranchin Tapisoꞌ Saono marëꞌ sacataantarin.

⁸ Naquëranchin israiroꞌsa huiristinoꞌsarëꞌ niahuëantapi. Napoaton Tapisoꞌ sontaronënpitarë chachin huiristinoꞌsa ahuëcaiso marëꞌ paantapi. Ahuëtohuachinara, huiristinoꞌsa canatonaꞌ, notohuaroꞌ tiquipi. Chaꞌëpisopitasoꞌ, taꞌapi.

^9-10 Ina piquëran Tapisoꞌ Saono pëinënquë huënantarin. Aꞌna tahuëri Saonosoꞌ naquëranchin sopairi yaꞌcoancantaantarin. Nansanën sëꞌquërin quëran patoananënquë huënsëaso napoantarin. Tapisoꞌ arpa piꞌniarin. Napoápirinhuë aꞌnanaya Saonori nansaquë tëꞌyanantërin: “Pairaquë payon payontaꞌi,” taꞌton tëꞌyanantopirinhuëꞌ, pashi charinso pairaraꞌ ohuanin. Naporo tashi chachin Tapisoꞌ, pëinënquë taꞌarin.

¹¹ Naporo chachin Saonosoꞌ piyapinënpita camairin. Tapi pëinënquë paatona aꞌpaicaiso marëꞌ camairin: “Tashiraya pëinën quëran pipihuachin tëpacoꞌ,” taꞌton naporin. Saꞌiniso napoaponahuëꞌ, shaꞌhuitërin: —Coꞌsoꞌ ipora tashi taꞌahuatanhuëꞌ, tatari aꞌparinsopita tashiraya tëpaponquën, itërin.

¹² Napotahuaton huintana quëran noninquë soꞌin anohuaramarin. Inapotërin niꞌton, Tapi taꞌarin.

¹³ Soꞌin inapotahuaton Micarosoꞌ, aꞌnara mamanshi manin. Masahuaton Tapi huëꞌërinso pëꞌsaraquë aquëhuënin. Motën parti quëran chipo anporo quëran nipisoꞌ, motoantonan acotërin. Inapotahuaton sahuanasaquë imotërin.

¹⁴ Tahuëririnquë Saono piyapinënpitasoꞌ, Tapi pipicasoꞌ ninarápirinahuëꞌ, co pipirinhuëꞌ. Napohuachina quëpacaiso marëꞌ yaꞌcoana piꞌniconpi. Piꞌnihuachinara, Micarori iꞌsoatahuaton itapon: “Tapi caniorin,” itërin.

¹⁵ Napotohuachina Saono shaꞌhuitoonpi. Shaꞌhuitopirinahuëꞌ, inaso camaitaantarin: —Quëhuëanpirinhuë tërantaꞌ, masahuatoma quëshico tëpaꞌi, itërin.

¹⁶ Napotohuachina pëinënquë yaꞌconpi. Yaꞌconatona pëꞌsaranënquë niꞌpirinahuëꞌ, mamanshiraꞌ quëhuëánin niꞌcontapi. Chipo sanapi anporo quëran motoantonan nipiquë motën parti quëran acotopi. Ina niꞌsahuatonaꞌ, Saono shaꞌhuitapona paantapi.

¹⁷ Ina natanaton, Saonosoꞌ Micaro itapon: —¡Co poꞌpin nonpintatonco inimiconëhuë aꞌpaꞌitonhuëꞌ pora! ¿Onpoatonta naporan? itërin. —Coꞌsoꞌ aꞌpahuatancohuëꞌ, Yoscoarëꞌ tëparanquën itërinco niꞌton, naporahuë, itërin huiꞌnini.

¹⁸ Inapoaton Tapi taꞌarin. Paꞌsahuaton Namaquë Samoiro nontoonin. Saonori napotërinsoꞌ yaꞌipi shaꞌhuitërin. Ina quëran Samoirorë chachin Nayoto ninano itopiquë paꞌpi yaꞌhuëaponaꞌ.

¹⁹ Saonosoꞌ piyapiꞌsa nonpisoꞌ natantërin: “Tapisoꞌ Nayotoquë yaꞌhuëarin,” topi.

²⁰ Ina natantaton, piyapinënpita inatohua aꞌpaantarin. Tapi macontacaiso marëꞌ aꞌparin. Canconahuatona niꞌpirinahuëꞌ, Samoiroso aꞌna huëntonaca pënëntonaꞌpiroꞌsa ichipënëntarin niꞌconpi. Aꞌnanaya Yosë ispiritonëni inahuanta yaꞌcoancantohuachina, caniaritopi pënëntacaisoꞌ.

²¹ Ina natanaton, Saonoso aꞌnapita yaꞌhuërëꞌ, Tapi macontacaiso marëꞌ aꞌpaantarin. Aꞌpapirinhuëꞌ, inahuanta aꞌnapita pochachin pënëntaantapi. Naquëranchin Saonosoꞌ aꞌnapita yaꞌhuërë aꞌpaantapirinhuëꞌ, inahuanta ina chachin niantapi.

²² Napohuachina inaora chachin Namaquë paꞌnin. Sico ninanoquë panca iꞌsha tapapiquë yaꞌhuërin. Inaquë canpachina, Samoiro, Tapi, inapita natantërin. Natantohuachina: “Nayotoquë yaꞌhuapi,” itopi.

²³ Ina natanaton inaquë paꞌsapirinhuëꞌ, Yosë ispiritonëni inanta yaꞌcoancantërin. Yaꞌcoancantohuachina, inanta pënëntërin. Pënëntochináchin Nayotoquë huarëꞌ canconin.

²⁴ Naporahuaton oꞌnanpiramantarin. Oꞌnanpirapi Samoiro notënanquë yaꞌipi tahuëri yaꞌipi tashi quëhuënárin. Napoaton piyapiꞌsa nonpachinara paꞌyatopi napocaisoꞌ: “¡Saononta pënëntonaꞌpi antaꞌ!” topi.