1 Samuel 18 - Chayahuita (Shahui)

Conatan Tapirëꞌ anoyatërinsoꞌ

^1-4 Naporo tahuëri chachin Saonori Tapi shaꞌhuitërin: “Ipora quëran huarëꞌ ca marëꞌ sacatomiatëquëꞌ. Ama huachi pëinënquë paantaquësohuëꞌ,” itërin. Nani napotohuachina, Conatani Tapi apayamiatërin. Inaora ninosororinso pochachin nosororin. Napoaton Yoscoarëꞌ niitatona nipayamiatacaiso marëꞌ anoyatopi. Ninapotatona anoyatopiso nitotacaiso marëꞌ Conatansoꞌ, aipi aꞌmorinso paꞌcoirin. Aꞌmorinsonta paꞌcoirahuaton inapita Tapi quëtërin. Sahuëninën, pëꞌchinanën, sintoronën, inapitanta quëtërin.

⁵ Saono maꞌsona tëranta camaitohuachina, Tapisoꞌ aꞌnaroáchin natëtërin. Napoaton napopinchin sontaronënpita camaicaso marëꞌ acorin. Acohuachina yaꞌipi sontaronënpita noya cancantopi. Sontaro huaꞌanoꞌsantaꞌ, noya ancantopi.

Tapi naní quëran paꞌyatopiso marëꞌ Saono noꞌhuitërinsoꞌ

⁶ Tapi Coriato tëparinso piquëran, Israiro sontaroꞌsasoꞌ huënantapi. Inachintopiso niꞌton, yaꞌipi Israiro sanapiꞌsari Saono nacapipi. Yaꞌipi ninanoroꞌsa quëran huëꞌsahuatonaꞌ, nacapipi. Pantirita, arpa, inapita piꞌnirahuatonaꞌ, cantarëꞌnachin nansaariapi. Capa cancantatona naporiapi.

⁷ Cantatonaꞌ, nansatonaꞌ, naporápi: “Saonosoꞌ, huaranca inimicoroꞌsa tëparin. Tapiso nipirinhuëꞌ, shonca huaranca tëparin,” tosápi.

⁸ Ina natanaton, Saonosoꞌ co noyahuëꞌ cancantërin. Napoaton paꞌpi noꞌhuitaton tapon: —Tapisoꞌ shonca huaranca inimicoroꞌsa tëparin, itopi. Caso nipirinhuëꞌ, “huarancaíchin tëparin,” itërinaco. ¡Yaꞌhuërënamëhuë copirno acocaisoáchin pahuanarin! tënin.

⁹ Naporo quëran huarëꞌ Saonosoꞌ, Tapi saitërin huachi.

¹⁰ Tahuëririnquë naquëranchin aparisitërinso sopairi, Saono aparisitaantarin. Napohuachina pëinënquë huaꞌyantaantarin. Nansanën sëꞌquërin quëran huaꞌyantasoꞌ, Tapisoꞌ arpanën piꞌnirarin. Huaꞌyantohuachina yápiꞌnirin niꞌton, napoantarin.

¹¹ Aꞌnanaya Saonosoꞌ nansanën ihuësahuaton Tapi ohuanpirinhuëꞌ, pashicharinsoꞌ pacoitërin. Naquëranchin napotaantapirinhuëꞌ, pacoitaantarin: “Pairaquë Tapi payon payontaꞌi,” taꞌton napopirinhuëꞌ, co nanitërinhuëꞌ.

¹² Napohuachina Saonosoꞌ, Tapi tëꞌhuatërin huachi: “Siniorori inasoꞌ naꞌcon catahuarin. Caso nipirinhuëꞌ, co huachi catahuarincohuëꞌ,” taꞌton tëꞌhuatërin.

¹³ Napoaton naꞌa sontaroꞌsa camaicaso marëꞌ acorin. Yaꞌhuincananpicaso marëꞌ napotërin. Napohuachina Tapisoꞌ sontaronënpitarë chachin ahuëtapon paꞌsárin. Co huachi yaꞌhuëmia yaꞌhuërinhuëꞌ.

¹⁴ Siniorori catahuarin niꞌton, Tapi maꞌsona nipachina noya pipitërin.

¹⁵ Noya noya nisarinso nicaton, Saonosoꞌ ina tëꞌhuatërin.

¹⁶ Napoaponahuëꞌ, aꞌnapita israiroꞌsaso Tapi paꞌyatopi. Cota huëntonoꞌsarinta napotopi. Ahuëtapona paꞌpachinara, inari noya camairin niꞌton, noya ahuëtopi. Napoatona noya huënantapi.

¹⁷ Aꞌna tahuëri Saonori Tapi itapon: —Natanquë api shaꞌhuichinquën: Chiníquën cancantaton Sinioro marëꞌ ahuëtëquëꞌ. Ina pochin nicacaso marëꞌ huiꞌnahuë paninan nininsoꞌ quëtaranquën. Inasoꞌ, Mirapo itërahuë, itërin. “Huiristinoꞌsari tëpahuachinaꞌ, co caora chachin tëpaꞌhuaso yaꞌhuëaponhuëꞌ,” taꞌton napotërin.

¹⁸ Napotohuachina Tapiri itapon: —Co caso máquëncohuëꞌ. Quëmopinëhuëpitantaꞌ, co máquënoꞌsahuëꞌ. Napoaton co nanitërahuëꞌ miꞌsëtaꞌhuanquënsoꞌ, itërin.

¹⁹ Napotaponahuë acoantacaso tahuëri nanihuachina, co shaꞌhuitërinso chachin nininhuëꞌ. Mirapo Tapi acoantacaso nipirinhuëꞌ, aꞌna quëmapi Atiriri itopisoꞌ acoantërin. Inasoꞌ, Miyora ninanoquë yaꞌhuërin.

^20-21 Napoaponahuëꞌ, Saonoso aꞌnanta huiꞌnin nanon yaꞌhuëtërin. Micaro itërin. Inasoꞌ, Tapi cancantërin. Ina shaꞌhuitohuachinara, Saono noya cancantërin: “Ina nipachin Tapi acoanchi. Ina marëꞌ inasoꞌ, huiristinoꞌsa ahuëꞌin. Napoin quëran huiristinoꞌsari tëpahuachin noya nisarin,” taꞌton, naquëranchin Tapi itapon: —Ipora tëhuënchinsoꞌ miꞌsëhuënquën nisaran, itërin.

²² Napotahuaton Saonosoꞌ, caraya piyapinënpita camairin Tapi nontacaiso marëꞌ: —Paatoma inaoraíchin Tapi nontooncoꞌ: “Nohuantëquë copirno miꞌsëtamasoꞌ. Inasoꞌ, tëhuënchachin nosoromiatërinquën. Piyapinënpitacointa nóya niꞌnainquën,” itocoꞌ, itërin.

²³ Napotohuachina piyapinënpitasoꞌ Tapi paapapi. Paaparahuatonaꞌ, yaꞌipi Saonori napotërinso shaꞌhuitopi. Shaꞌhuitohuachinara inari itapon: —¡Naporinchi paya! Caso topinan piyapico. Naporahuaton co maꞌhuancohuëꞌ: “Copirno miꞌsëtëquëꞌ,” topatamara noya nicatomaco naporamaꞌ. Sacai nipirinhuëꞌ, inta nipachin, itërin.

^24-25 Napotohuachina piyapinënpitasoꞌ ina ina chachin Saono shaꞌhuitoonpi. Ina natanaton, Saonosoꞌ co noyahuëꞌ yonquirin: “Huiristinoꞌsari tëpaꞌin,” tënin. Ina yonquiaton piyapinënpita naquëranchin Tapi nontaantacaiso marëꞌ aꞌpaantarin: —Quëmapinposoꞌ inachintërëhua niꞌton, sanapi marëꞌ pahuërëtërëꞌ. Caso co ina pochin pahuërëincosoꞌ nohuantërahuëꞌ. Inimiconëhuëpita iꞌhuërëtaꞌhuaso marëꞌ pasa huiristino sontaroꞌsa tëpaꞌin. Tëparahuaton taparonëna shaꞌhuëtën machin. Matahuaton quëshiinco, tënin Saono itocoꞌ, itërin.

^26a Napotohuachina, naquëranchin Tapi paaparahuatona ina chachin shaꞌhuitoonpi. Ina natanaton: “Inanapo huiristinoꞌsa tëparahuato copirno miꞌsëchi nipachin,” tënin.

^26b-27a Coꞌhuara copirnori tahuëri shaꞌhuitërinsoꞌ naniyátërasohuëꞌ, Tapisoꞌ paꞌnin. Sontaronënpitarë chachin paꞌsahuaton, cato pasa huiristinoꞌsa tëpaconin.

^27b Inapotaton taparonëna shaꞌhuëtën matëraꞌpiarin. Matëraꞌpiaton copirno miꞌsëtacaso marëꞌ quëpatërin. Napohuachina, inariso huiꞌnin Micaro itërinso acoantërin.

^28-29 Napoaponahuëꞌ, Saonoso Siniorori Tapi catahuarinsoꞌ, niꞌnin. Huiꞌnininta soꞌin nosororinsoꞌ niꞌnin. Inapita nicaton, aquë aquëtë tëꞌhuatërin. Napoaton inimicotomiatërin.

³⁰ Naporahuaton huiristino huaꞌanoꞌsa sontaronënpitarë chachin ahuëtapona yáhuëꞌpi. Nani huëꞌpiquë niahuëhuachinara, aꞌnapita Israiro huaꞌanoꞌsa quëran Tapisoꞌ noya noya ahuëtërin. Napoaton naní quëran nóya niꞌpi.