1 Samuel 17 - Chayahuita (Shahui)

Tapi canataton israiroꞌsa catahuarinsoꞌ

¹ Huiristinoꞌsa naquëranchin sontaronënpita yontoantarahuatonaꞌ, israiroꞌsa yaahuëantapi. Cota huënton noꞌpaquë cato ninano yaꞌhuërin. Soco, Asica, inapita. Inapita huáncana Ipisi-tamin itopiquë huëcatonaꞌ, yaꞌhuëintarapi. Ina piquëran huiristino sontaroꞌsasoꞌ, Socoquë niyontonpi.

² Yaꞌhuërëꞌ Saononta sontaronënpitarë chachin Ira motopiana itopiquë yaꞌhuëquiipi. Nëꞌmëtë pëinëna ótënatona yaꞌhuëquiipi. Inaquë yaꞌhuëapona pochin huiristinoꞌsarëꞌ niahuëcaiso marëꞌ noya niacorapi.

³ Huiristinoꞌsasoꞌ, aꞌna motopiaꞌhuaquë panshinpi. Israiroꞌsanta aꞌnaquë panshinpi. Aꞌna motopianariáchin yaꞌshopirin.

⁴ Huiristino sontaroꞌsa quëran, ahuëtacaso caniaritacaso marëꞌ aꞌnara sontaro pipirin. Cara mitro pochin naporopitërinsoꞌ. Inaso Coriato itopi. Cato ninano itopiquë yaꞌhuërin.

⁵ Motën yaꞌcopicaso marëꞌ shaꞌpi huaꞌna quëran casco nipinan yancorin. Cancanën, pinën, inapita yaꞌcopicaso marëntaꞌ, inanpi huaꞌna quëran chachin nipinan aꞌmorin. Aꞌnatërápo shonca aꞌnatërápo quiro pochin quëquëninsoꞌ aꞌmorin.

⁶ Tonainpitanta yaꞌcopicaso marëꞌ inanpi huaꞌna quëran chachin nipinanquë yaꞌcopitërin. Nansaꞌhuantaꞌ, inanpi huaꞌna quëran chachin pasaranin.

⁷ Nansanën huëratëontaꞌ, aꞌnan conëra napapi ninin. Natëquënsoꞌ, huaꞌnamia quëran nipinan. Inasoꞌ, saota quiro naꞌcon quëꞌnin. Catahuacaso marëꞌ sontaro acorinsontaꞌ, aquëchitërin.

⁸ Chiniconahuaton, noꞌhuitarin. Noꞌhuitaton: —¡Canpitasoꞌ, ahuëamacoiso marëꞌ huëꞌnamaꞌ! Caso huiristinoco. Canpitaso nipirinhuëꞌ, Saono piyapinënquëmaꞌ. Aꞌnara huayonco oꞌmaton carë niahuëꞌin.

⁹ Inasoꞌ chini chiníquën niꞌton, ahuërahuatonco canahuachinco, canpita huaꞌanëntaramacoi. Napoaponahuëꞌ, cari minsëhuato, quiyarima huaꞌanëntarainquëmaꞌ.

¹⁰ Ipora tahuëri carinquëma napotaranquëmaꞌ. ¡Aꞌnara aꞌpaimaco oꞌmain! tënin chiníquën noꞌhuitaton.

¹¹ Saonoso sontaronënpitarë chachin naporinsoꞌ, natanpi. Ina natanahuatonaꞌ, paꞌpi paꞌyanpi.

¹² Shaꞌhuitëranquëmaso chachin Pirin ninanoquë aꞌnara Israiro quëmapi yaꞌhuërin. Inasoꞌ, Quisi itopi. Saono copirno nicasoꞌ, inasoꞌ nani másho ninin. Posa huiꞌninpita yaꞌhuëtërin. Aꞌnasoꞌ, Tapi itërin.

^13-14 Cara huiꞌninpita masho masho nipisopitasoꞌ, isopita: Iriapo, Apinatapo, Sama, inapita. Inapitasoꞌ, cara chachin ahuëtacaiso marëꞌ Saono imapi. Tapisoꞌ, inapita quëran huaꞌhua huaꞌhua ninin.

¹⁵ Inaso Saono catahuaponahuëꞌ, co inarëꞌ yaꞌhuëmia yaꞌhuërinhuëꞌ. Onpohuachina Pirinquë pantaraahuaton, paꞌpin ohuicanënpita aꞌpaitaantarin.

¹⁶ Coriatosoꞌ, catapini shonca tahuëri Israiro sontaroꞌsa apisárin. Nani tashiramiachin nani iꞌhuaraya naporápirinhuëꞌ, co paapapihuëꞌ.

¹⁷ Aꞌna tahuëri Quisisoꞌ Tapi itapon: —Trico iyanapinan cato shonca quiro pochin maquëꞌ. Isopita shonca paonta masahuaton iya mashoroꞌsa nisapaiquë aꞌnaroáchin quëpatëquëꞌ.

¹⁸ Isonta shonca quiso ohuaca shoꞌshoiꞌ quëran nipinan, capitan huaꞌan quëpatëquëꞌ. Iya mashoroꞌsa onpoinsona nisapisoꞌ, niꞌcontaquëꞌ. Naporahuaton noya yaꞌhuapiso nitotaꞌhuaso marëꞌ, maꞌsha tëranta quëchinën quëshico, itërin.

¹⁹ Saonosoꞌ sontaronënpitarë chachin huiristino sontaroꞌsarë ninoꞌhuirápi. Ira motopianaquë naporápi. Tapi iin mashonënpitantaꞌ, inaquë nisapi.

²⁰ Tahuëririnquë tashíramiachin Tapisoꞌ, paꞌpini cosharo quëtërinsoꞌ pëꞌpërin. Quisi ohuicanënpitasoꞌ, aꞌna piyapiri aꞌpaitarin. Ina pëꞌpërin quëran Israiro sontaroꞌsa yaꞌhuëapiquë canconin. Naporo chachin sontaroꞌsasoꞌ niyaꞌcariatona ninoꞌhuirápi natanconin.

²¹ Israiro sontaroꞌsa huiristino sontaroꞌsarëꞌ ninotëcaiso marëꞌ panshinpi.

²² Tapisoꞌ quëparinsopita, aꞌna sontaro quëtërin aꞌpaitacaso marëꞌ. Cosharoꞌ, ahuëtacaiso marëꞌ ohuarapisopita, inapita aꞌpairinsoꞌ quëtërin. Sontaroꞌsa panshinpiquë taꞌaontarahuaton, iin mashonënpita nontoonin.

²³ Nontapirinhuëꞌ, huiristino sontaroꞌsa panshinpi quëran, Coriato chachin pipiantarin. Pipirahuaton naquëranchin Israiro sontaroꞌsa noꞌhuiantarin. Noꞌhuitërinsoꞌ Tapinta natanin.

^24-25 Ina nicatona Israiro sontaroꞌsasoꞌ paꞌpi tëꞌhuatopi. Tëꞌhuatatona pinëna quëran paꞌsa paꞌsapi. Napoatona ninapotapi: “¡Niꞌcoꞌ! ¡Ina sontaro chachin pipiantarin! ¡Anoꞌhuitiinpoaso marëꞌ napoárin! Napoápirinhuëꞌ, insoari tëranta ina canahuachin, copirnori notohuaroꞌ maꞌsha paꞌton nininsoꞌ quëtapon. Ina quëtahuaton aꞌnara huiꞌnin nanon yaꞌhuëtërinsoꞌ, acoantapon. Naporahuaton ina quëmopinënpitasoꞌ, co huachi copirno marëꞌ pahuërëtáponahuëꞌ,” tosapi.

²⁶ Napopisoꞌ, co Tapi nataninhuëꞌ. Co natanatonhuëꞌ, aꞌnapita sontaroꞌsa natanin: —Canpoasoꞌ, Yosë nanpiárin nininso imarëhuaꞌ. Ina catahuarinpoa ahuëtarëhuaꞌ. Paso huiristinosoꞌ, co ina chinotërinhuëꞌ. ¡Napoaton co piꞌpian tëranta ina pochin noꞌhuiinpoaso yaꞌhuërinhuëꞌ! Insosona ina tëpaton taparo nitarinpoasoꞌ acopitohuachinaꞌ: ¿Maꞌta copirnori quëtapon? itërin.

²⁷ Napotohuachina, inapitaso nonatona napopisoꞌ shaꞌhuitopi. Insosona Coriato tëpahuachin copirnori quihuítërinsoꞌ shaꞌhuitopi.

²⁸ Iriaposo napoaponahuëꞌ, Tapi naporinso natanin. Ina natanaton, iyaꞌhuain chiníquën noꞌhuiton itapon: —¡Co quëmaso isoporinquë huëcamaso nipirinhuëꞌ! Quëmaso ohuicaroꞌsa nicacaso yaꞌhuërin. Inapitaso inotëroquë yaꞌhuërapi. Co aꞌna aꞌpainaꞌpi acoantaton huëshicasohuëꞌ nipirinhuëꞌ. ¡Co natantonquënhuë niꞌton, quira nisaraiso topinan costacaso marëꞌ huëꞌnan! itërin.

²⁹ —¡Co caso manta onporahuëꞌ! Yonquirëso shaꞌhuihuatëra, co maꞌshahuëꞌ. ¡Naporahuëso marëꞌ co noꞌhuitonco atapanancoso yaꞌhuërinhuëꞌ! itërin Tapiri.

³⁰ Napotahuaton iin mashonën yaꞌhuincananpirin. Ina quëran aꞌna sontaro yaꞌhuërëꞌ ina chachin natantarin. Natanpachina, inarinta ina chachin shaꞌhuitaantarin.

³¹ Tapi natantërinso natanahuatonaꞌ, aꞌnaquën sontaroꞌsari Saono shaꞌhuitoonpi. Inarinta natanahuaton, aꞌnaroáchin amatërin.

³² Cantontarahuaton Tapiri Saono itapon: —Ama inso tëranta pasoꞌ huiristino sontaro tëꞌhuachinasohuëꞌ. Quëmasoꞌ chiníquën nanantëran. Caso piyapinënco nipirahuëꞌ, ina ahuëaꞌhuaso marëꞌ paꞌsarahuë, itërin.

³³ Napotohuachina Saonori itapon: —Quëmaso huaꞌhuanquën. Pasoso nipirinhuëꞌ, huiꞌnapitërin quëran huarëꞌ ahuëchantërinsoꞌ. Co quëmaoraíchin ina ahuëcaso marëꞌ pacamaso yaꞌhuërinhuëꞌ, itërin.

^34-35 Ina natanaton, Tapirisoꞌ itapon: —Quëmasoꞌ chiníquën nanantëran. Caso piyapinënco. Tatahuë ohuicanënpita aꞌpairahuë. Ina aꞌpaiasoco aꞌna tahuëri paꞌpinihuë nipon, tocanihuë nipon huëꞌnin. Huëꞌsahuaton aꞌnara ohuica manin. Masahuaton taꞌarahuachina, imato matërahuë. Napotohuatora, ca yaꞌhuërëꞌ yatahuërëtaantarinco. Inapotohuachincora, nanamën matato ohuishananahuë. Napotahuato ahuëhuatora, tëparahuë.

³⁶ Paꞌpiniꞌ nisapirinhuëꞌ, tocaniꞌ nisapirinhuëꞌ, inapotato tëparaꞌpiarahuë. Paso huiristinonta co Yosë chinotaponahuëꞌ, naporinso marëꞌ inapotarahuë. Canpoasoꞌ, Yosë nanpiárin nininso imarëhuaꞌ. Ina sontaronënpoapita nipirëhuahuëꞌ noꞌhuirinpoa niꞌton, tëpaarahuë.

³⁷ Paꞌpiniꞌ, tocaniꞌ, inapita quëran Sinioro nichaꞌërinco. Ina chachin pasoꞌ huiristino sontaro quërantaꞌ, nichaꞌësarinco, itërin. Napohuachina Saonori itapon: —Inta nipachin. Naporan niꞌquëhuarëꞌ, paquëꞌ. Sinioro catahuainquën, itërin.

³⁸ Napotahuaton sontaronënpita camairin Tapi aꞌmotacaiso marëꞌ. Inaora aꞌmorinso chachin aꞌmotopi. Casco shaꞌpi huaꞌna quëran nipisoꞌ, ayancotopi. Huaꞌna coton aꞌmotopi.

³⁹ Ina aꞌmotohuachinara, aꞌmorinso aipi sintoronquë nitonporin. Inaquë sahuëninën pëꞌtënahuaton, iratacaso tënirin. Iratopirinhuëꞌ yacantërin. Napoaton aꞌnaroáchin Saono itapon: —Isanpi co noꞌquiatorahuëꞌ yacantërahuë, itërin. Napotahuaton aꞌmotopisoꞌ, yaꞌipi paꞌcoirin.

⁴⁰ Huaranën masahuaton, aꞌnatërápo naꞌpira iꞌshaquë manin. Tomarain tomarain nininso masahuaton, tanpanantënquë poꞌmorin. Ina quëran naꞌpira aꞌparinquë manin. Inapita masahuaton, huiristino sontaro ahuëapon paꞌnin.

⁴¹ Coriatosoꞌ, oshaquëran oshaquëran Tapi yaꞌcarirarin. Catahuacaso marëꞌ sontaro acorinsontaꞌ, quëchitëriarin.

⁴² Coriatori Tapi niꞌpirinhuëꞌ, quëhuashin aintahuaton, noyapin noyapin niꞌtërin niꞌnin. Ina pochin nicaton nocanin.

⁴³ Huaranën sëꞌquërin quëran huëꞌsarinso nicaton, itapon: —Ashaꞌ. ¿Niꞌnitë masho ti? ¡Niꞌnirachasoꞌ naraquë ahuërëꞌ! itërin. Itahuaton, Tapi ama huachi noya yaꞌhuëcaso marëhuëꞌ, mamanshinën nontërin.

⁴⁴ Napotahuaton itaantapon: —Noyapaꞌ. ¡Huëquë nipachin tëpatënquën soporoꞌsaꞌ, niꞌniroꞌsaꞌ, inapita aꞌcaꞌinquën! itërin.

⁴⁵ —Quëmasoꞌ, sahuëni, nansa, nansaꞌhua, inapita tëpaancoso marëꞌ quëshiantaranco. Caso nipirinhuëꞌ, Sinioro nanan quëtërinco niꞌton, huëcapayaranquën. Inasoꞌ Yosë, yaꞌipi nanitaparinsoꞌ. Israiro sontaroꞌsacoi huaꞌanëntërincoi. Ina huaꞌanëntopirincoihuëꞌ, quëmasoꞌ noꞌhuirancoi.

⁴⁶ Iporasoꞌ ina chachin minsëaꞌhuanquënsoꞌ catahuararinco. Ipora tahuëri chachin tëparahuatënquën nishitëconotaranquën. Aꞌnapita huiristino sontaroꞌsanta chiminpisoꞌ, soporoꞌsaꞌ, niꞌniroꞌsaꞌ, inapita aꞌcaarahuë. Inapotohuato, yaꞌipi isoroꞌpaquë yaꞌhuëpisopita nitotapi: “Israiroꞌsasoꞌ, Yosë chachin chinotopi. Inasoꞌ, chini chiníquën nanantërin,” tosapi.

⁴⁷ Yaꞌipi isëquë nisapisopita nitotapona huachi: “Siniorori chachin catahuarin ahuëtacaiso niꞌton, canatopi. Napoaton nansa, sahuëni, co inapitaquëáchin canatërëhuëꞌ,” tosapi. Ina nohuanton ipora tahuëri quiyarima minsëarainquëmaꞌ, itërin.

⁴⁸ Coriato yaꞌcaritërarin. Tapiso nipirinhuëꞌ, taꞌarëꞌnachin paꞌsarin ahuëapon.

⁴⁹ Tanpanantën quëran naꞌpira ocoirahuaton, naꞌpi aꞌparinquë acorin. Huënintahuaton tëꞌyarahuachina Coriato tëꞌintaquëchin naꞌpira paꞌta paꞌtaratarin. Napoaton inasoꞌ, nocotërinquëranchin anotërin.

^50-51 Inapotaton Tapiri Coriato canarin. Naꞌpira aꞌparinquëáchin nipirinhuëꞌ, acohuachina, nitëpatëpatarin. Tapisoꞌ co sahuënihuanhuë niꞌton, yaꞌcariconin. Yacariconahuaton inaora sahuëninën chachin ocoitahuaton, tëpachanin. Ina piquëran nishitëconotërin. Aꞌnapita huiristino sontaroꞌsasoꞌ chini chiníquën sontaronëna chimininso niꞌpi. Ina nicatona taꞌapi huachi.

⁵² Naporoꞌ Israiro sontaroꞌsaꞌ, Cota sontaroꞌsaꞌ, inapitaso chiníquën noꞌhuitopi. Chiníquën noꞌhuitëratona huiristinoꞌsa imapi. Cato, Icoron, inapita ninanoroꞌsa yaꞌcoanaroꞌsaquë huarëꞌ imapi. Saarain itopi quëran ira paꞌninquë notohuaroꞌ huiristino sontaroꞌsa tëpapisoꞌ quëhuënantapi. Inapita cato huiristino ninanoroꞌsaquë huarëꞌ naporin.

⁵³ Inapita ahuëcaiso marëꞌ imapi quëran, israiroꞌsaso huënantapi. Huënantarahuatona huiristinoꞌsa yaꞌhuëquipiquë maꞌsha mamiatopi.

⁵⁴ Tapisoꞌ Coriato motën, ahuëtacaso marëꞌ ohuararinsopita, inapita pëinënquë quëparin. Inaquë tapacaso marëꞌ quëparin. Ina piquëran mototënsoꞌ, Quirosarinquë quëparin.

⁵⁵ Coꞌhuara inapoyatëraponhuëꞌ, Saonoso sontaronënpita huaꞌan natanin. Inaso Apiniro itopi. Tapi Coriato ahuëapon paaso natanin: —Apiniro. ¿Maꞌninta pasoꞌ huiꞌnapi paꞌpin? itërin.

⁵⁶ Napotohuachina, inariso itapon: —Quëmasoꞌ chiníquën nanantëran. Yoscoarëꞌ co nitotërahuëꞌ, itërin. —Natantëquë nipachin, itaantarin Saonori.

⁵⁷ Coriato tëparahuaton, nishitëmototërinsoꞌ otërin quëran Tapi huënantarin. Huënantasoꞌ, Apinirori nacapirahuaton Saonoquë quëparin.

⁵⁸ Quëꞌcanconpachina, inari natanin: —Shaꞌhuitoco huiꞌnapi ¿Inta quëmaso tata? itërin. —Quëmasoꞌ sinioro copirno, chiníquën nanantëran. Caso tatahuë, Quisi itopi. Inasoꞌ, quëma piyapinën pochin ninin. Pirinquë yaꞌhuërin, itërin Tapiri.