1 Samuel 16 - Chayahuita (Shahui)

Israiroꞌsa copirnonën nicacaso marëꞌ Tapi acorinsoꞌ

¹ Aꞌna tahuëri Siniorori Samoiro itapon: —¡Noya huachi! ¡Ama aquëtë Saono yonquiaton sëtáquësohuëꞌ! Co huachi nohuantërahuëꞌ inari israiroꞌsa huaꞌanëntápasoꞌ. Ohuaca pomonquë ca marëꞌ toma nininsoꞌ taꞌpanconquëꞌ. Inaporahuaton Quisi itopisoꞌ pëinënquë paquëꞌ. Inasoꞌ, Pirinquë yaꞌhuërin. Ina huiꞌninpita quëran, aꞌnara copirno nicacaso marëꞌ nani huayonahuë. Quëmari tomaquë opomototahuaton acoaran, itërin.

² —¿Onporahuatocha inapochi nicaya? ¡Ina marëꞌ paꞌsarahuësoꞌ Saono nitotohuachin tëpaponco! itërin. Napotohuachina, Siniorori itapon: —Aꞌnara ohuacaꞌhua macaton paquëꞌ. Inso tëranta maꞌmarësona paꞌsaransoꞌ natanpachinquën: “Iso ohuacaꞌhua tëpaato Yosë chinotaꞌhuaso marëꞌ huëꞌsarahuë,” itëquëꞌ.

³ Inatohua canconpatan, ohuacaꞌhua tëpaton chinotancoso marëꞌ Quisinta përaquëꞌ. Naporoꞌ carinquën anitotaranquën maꞌsona nicacasoꞌ. Insosona huayonahuësoꞌ, aꞌnotaranquën. Aꞌnotohuatënquën quëmari copirno nicacaso marëꞌ ina acoquëꞌ, itërin.

^4-5 Napotohuachina Samoirosoꞌ Siniorori camairinso chachin ninin. Pirinquë canconpachina, ninano ansianoꞌsari, tëꞌhuainpichin natanpi: —¿Maꞌsha onpotancoiso marëꞌ huëꞌsamaranquën ti? itopi. Napotohuachinara, Samoiroso tapon: —Co naporinhuëꞌ. Maꞌsha tëpato Sinioro chinotaꞌhuaso marëꞌ huëꞌnahuë. Iporasoꞌ, Sinioro camaitërinso nicatoma nitapacoꞌ. Inapoatomaꞌ, caꞌtanco Sinioro chinochi. Naporahuatëhua coshatahuaꞌ, itërin. Ina quëran Samoirosoꞌ, Quisi huiꞌninpitarë chachin taparin. Sinioro camaitërinso nicaton, taparin. Inapotaton shaꞌhuitërin Yosë chinotacaso marëꞌ ohuacaꞌhua tëparinquë pacacaisoꞌ.

⁶ Inaquë canconpachinara, Samoirosoꞌ Iriapo noya niꞌsárin. Inasoꞌ, Quisi huiꞌnin paninantërinsoꞌ. Ina niꞌsahuaton yonquirin: “Iso mini ipora israiroꞌsa huaꞌanëntacaso marëꞌ Siniorori huayonin,” tënin yonquinënquë.

⁷ Inariso napoaponahuëꞌ, itapon: “Noyapintërinsoꞌ, naporopitërinsoꞌ, ama inasáchin nicaton noya niꞌquësohuëꞌ. Carisoꞌ, co ina nohuantërahuëꞌ. Piyapinquëmasoꞌ, aipi yaꞌnorinsoráchin nicatoma noya niꞌnamaꞌ. Caso nipirinhuëꞌ, acopo cancanën quëran yonquirinso nitotërahuë. Insosona noya yonquihuachina, noya niꞌnahuë,” itërin. Napotërin niꞌton, Samoiroso co Iriapo huayoninsohuëꞌ, nitotërin.

⁸ Napohuachina Quisisoꞌ, huiꞌnin Apinatapo itërinso yaꞌhuërëꞌ, përarin. Huëꞌpachina Samoiro aꞌnotërin. Inaso napoaponahuëꞌ, tapon: —Isonta co Siniorori huayoninhuëꞌ, tënin.

⁹ Ina quëran Quisisoꞌ, aꞌna yaꞌhuërë huiꞌnin Samoiro aꞌnotacaso marëꞌ quëantarin. Inasoꞌ, Sama itërin. Samoiroso napoaponahuëꞌ, taantapon: —Co isonta Siniorori huayoninhuëꞌ, tënin.

¹⁰ Inapochinachin Quisisoꞌ, canchisë huiꞌninpita Samoiro aꞌnotërin. Inariso napoaponahuëꞌ, itapon: “Isopita huiꞌnanpitasoꞌ, co Siniorori huayoninhuëꞌ,” itërin.

¹¹ Ina quëran Quisi nataantarin: —¿Inaíchin yaꞌipiya quëran huiꞌnanpita? taantarin. —Huaꞌhua nininso pahuanin. Inaso ohuicaroꞌsa aꞌpairarin, itërin Quisiri. —Aꞌnara aꞌpaquë macontaꞌin. Ina canquia huarëꞌ, coshatarëhuaꞌ, itërin Samoirori.

¹² Napotohuachina Quisisoꞌ, aꞌnara aꞌparin ina macontacaso marëꞌ. Inasoꞌ canquihuachina niꞌpirinhuëꞌ, huiꞌnapi. Noyapin noyapin niꞌtahuaton, quëhuashin aintërin, naporin. Naporoꞌ Siniorori Samoiro itapon: —Iso mini huayonahuësoꞌ. Ina copirno nicacaso marëꞌ tomaquë opomototahuaton, acoquëꞌ, itërin.

¹³ Siniorori napotohuachina, inaso pomonquë toma quëninsoꞌ manin. Ina masahuaton iinpita niꞌtonënquë copirno nicacaso marëꞌ acorin. Inasoꞌ huiꞌnapi Tapi itopi. Naporo quëran huarëꞌ Sinioro ispiritonëni yaꞌcoancantërin. Ina piquëran coshatopi huachi. Nani coshatohuachinara Samoirosoꞌ, yaꞌhuërinꞌpaꞌ panantarin. Inasoꞌ, shaꞌhuitëranquëmaso chachin Namaquë yaꞌhuërin.

Saono marëꞌ Tapi sacatërinsoꞌ

¹⁴ Naporo tahuëriꞌsa Sinioro ispiritonënsoꞌ, Saono quëran pipirin. Ina pipihuachina Yosë nohuanton sopairi yaꞌcoancantërin. Inari yaꞌcoancantohuachina, ahuaꞌyantaton aparisitárin.

¹⁵ Napoaton piyapinënpitari itaponaꞌ: —Yosë nohuanton sopai aparisitárinquën. Inapotohuachinpora, mosica piꞌnipiso natanpatëra noya ninatanëꞌ.

¹⁶ Napoaton camaitëquë aꞌnara arpa nito piꞌnirinsoꞌ yoníchinën. Onporosona sopai aparisitohuachinquën, inari arpa piꞌniꞌin. Piꞌnihuachina quëmasoꞌ noya ninataanan, itopi.

¹⁷ —Noyapaꞌ. Aꞌnara nipachin arpa nito piꞌnirinsoꞌ yonitoma quëshico, itërin.

¹⁸ Napotohuachina aꞌnara piyapinëni itapon: —Quisi Pirinquë yaꞌhuërinsoꞌ, aꞌnara huiꞌnin arpa noya piꞌnirin. Inasoꞌ, chiníquën cancantaton míso ahuëtërin. Noya yonquiaton nonin. Noyapin noyapin niꞌtërin. Siniorori naꞌcon catahuarin. Naporin. Inasoꞌ nininën Tapi, itërin.

¹⁹ Naporoꞌ Saonosoꞌ aꞌnara piyapinën camairin: “Paaton Quisi shaꞌhuitontaquëꞌ: ‘Huiꞌnan Tapi itëransoꞌ, aꞌpatiico. Inasoꞌ, ohuicanënpita aꞌpairin,’ tënin Saono, itëquëꞌ,” itërin.

²⁰ Napotohuachina Quisisoꞌ huiꞌnin Tapi itërinsoꞌ, Saono aꞌpatiirin. Inaquë Quisisoꞌ, Saono isopita aꞌpatërin: Aꞌna moraquë pansáchin, aꞌpatërin. Aꞌna shaꞌhuëtë morsaquënta huino aꞌpatërin. Naporahuaton aꞌnara chipoaꞌhua, aꞌpatërin.

²¹ Inapita quëpaton Tapi Saonotaquë canconin. Canconpachina, ina marëꞌ sacatërin huachi. Saonori noya nohuitahuaton, Tapi paꞌyatërin. Napoaton inari naꞌcon naꞌcon catahuacaso marëꞌ acorin.

²² Ina piquëran Saonosoꞌ, aꞌnara piyapinën aꞌparin Quisi nontacaso marëꞌ: “Tapi nóya niꞌnahuë niꞌton, carë sacachin topirahuë, tënin Saono,” itërin.

²³ Inapoaton Tapisoꞌ Saono marëꞌ sacatërin. Aꞌna tahuëri Yosë nohuanton sopairi aparisitaantarin. Aparisitohuachina, Tapisoꞌ arpa masahuaton piꞌnirarin. Inapohuachina Saonosoꞌ, chiníquën cancantaton noya ninataantarin. Sopai ispiritonëontaꞌ, Saono piꞌpian tananpitërin.