1 Samuel 13 - Chayahuita (Shahui)

Saono yaꞌnan tëhuërinsoꞌ

^1-2 Saono nani ishipinahuasoꞌ, copirno yaꞌconarin. Cara piꞌipi pochin israiroꞌsa huaꞌanëntasoꞌ, aꞌna tahuëri cara huarancaraꞌ, Israiro sontaroꞌsa huayonin. Inapita quëran cato huaranca Miquimasë ninano itopiquë, inarë quëparitopi. Inapita quëran, Pitiri yaꞌcari motopiaꞌhuaroꞌsaquëntaꞌ, napopinchin acorin. Huarancaso nipirinhuëꞌ, Quipia ninanoquë huiꞌninë acorin. Inasoꞌ, Conatan itopi. Quipia ninanosoꞌ, Mincamin huënton noꞌpanënquë quëparitërin. Aꞌnapita sontaroꞌsaso nipirinhuëꞌ, yaꞌhuëpiꞌpaꞌ paantacaiso camairin.

³ Aꞌna tahuëri Conatansoꞌ, sontaronënpitarë chachin Quipia ninanoquë paꞌnin. Inaquë huiristino sontaroꞌsa sirihuitopiquë yaꞌhuërin. Inaquë inaso sontaronënpitarë chachin ahuëtahuatonaꞌ, huiristino sontaroꞌsa tiquipi. Aꞌnapita huiristinoꞌsanta napoaponahuëꞌ, israiroꞌsa napopisoꞌ natantopi. Saononta ina natanahuaton, yaꞌipi israiroꞌsa yaꞌhuëpiquë tronpita pihuicaisoꞌ camaitërin. Yaꞌipi Israiro sontaroꞌsa niyontonatona ahuëtacaiso marëꞌ naporin.

⁴ Conatan sontaronënpitarë chachin napopisoꞌ yaꞌipi israiroꞌsa natantopi. Ina marëꞌ huiristinoꞌsari noꞌhuipisonta natantopi. Ina nitotatonaꞌ, Saonorëꞌ Quiricaroquë yaꞌipiya niyontonpi.

⁵ Huiristino sontaroꞌsanta israiroꞌsa ahuëcaiso marëꞌ niyontonpi. Cara huaranca quira toronanoꞌsa yaꞌhuëtopi. Saota huaranca sontaroꞌsanta cahuarioquë paꞌpisopita yaꞌhuëtopi. Noꞌpaꞌ paꞌtopisopita sontaroꞌsanta huaꞌhuayátërahuë. Inotë marë yonsanquë yaꞌhuërinso pochin yaꞌhuëpi. Ina nápo niyontonahuatonaꞌ, Miquimasë parti notëtopi. Huëꞌsahuatonaꞌ, Piti-apin ninano quëran piꞌi pipirinso parti nëꞌmëtë pëinëna ótënaꞌpiapi.

⁶ Huiristinoꞌsa notohuaroꞌ huëꞌsapi nicatonaꞌ, israiroꞌsaso panca paꞌyanpi. Napoatona motopi naninoꞌsaquë naꞌpicaiso marëꞌ taꞌapi. Noꞌpaꞌ naninoꞌsaquë, natëtë casonantëroꞌsaquë, iꞌsha paꞌtacaso marëꞌ cashapisopitaquë, posoroꞌsaquë, inaquëpita naꞌpicaiso marëꞌ taꞌapi.

⁷ Naꞌcon chachin Israiro sontaroꞌsa Cortaniiꞌ pëntontopi. Caro huënton noꞌpanën parti, naꞌpicaiso marëꞌ napopi. Carata partintaꞌ, paꞌpi. Saonoso napoaponahuëꞌ, Quiricaroquëranchin quëparitërin. Yaꞌipi sontaronënpitanta paꞌpi tëꞌhuaponaraihuëꞌ, inarë quëparitopi.

⁸ Inaquë Saonosoꞌ canchisë tahuëri ninarin. Samoirori shaꞌhuitërinso chachin ninarin. Inaso napoaponahuëꞌ, co Quiricaroquë yacanquirinhuëꞌ. Naporahuaton sontaronënpitanta caniaritopi taꞌananpicaisoꞌ.

⁹ “Coꞌhuara ahuëchátërasocoihuëꞌ, maꞌsha tëparahuato Sinioro chinochi,” tënin. Ina yonquiaton Saonosoꞌ piyapinënpita camairin: —Maꞌsharoꞌsa yaꞌipi ahuiquitatë Sinioro chinotacaso nipisopita quëcoꞌ. Nanan anoyatërëhuaso marënta nipisopita quëcoꞌ, tënin. Napohuachina quëshipi. Nani quëshihuachinara inaora chachin tëparahuaton yaꞌipi ahuiquitërin.

¹⁰ Inapotaso chachin Samoiro canquiarin huachi. Naporoꞌ Saonosoꞌ paꞌsahuaton nontoonin:

^11-12 Nontopirinhuëꞌ, Samoirorisoꞌ itapon: —¡Co quëma nicacasohuëꞌ nininsoꞌ nicaton, paꞌpi co noyahuëꞌ ninan! itërin. Napotohuachina Saonori itapon: —Huiristino sontaroꞌsa Miquimasëquë ahuëinacoiso marëꞌ huëꞌpi. Sontaronëhuëpita taꞌananpirinaco. Quëmanta co shaꞌhuiranso oraquë chachin canquiranhuëꞌ. Inapita nicato yonquirahuë: “Sinioro catahuainpoaso marëꞌ maꞌsha tëpatëhua ahuiquitërëhuaꞌ. Caso co inapochátërasocohuëꞌ, huiristino sontaroꞌsa Miquimasëquë oꞌmarahuatona ahuëhuachinaco, canaponaco,” tënahuë. Ina yonquiato Sinioro marëꞌ maꞌsha tëparahuato, yaꞌipi ahuiquitërahuë, itërin.

¹³ Napotohuachina Samoirori itapon: —¡Co noꞌtëquën yonquiatonhuëꞌ naporan! Yosë nani camairinquën maꞌsona noya nicacasoꞌ. Ina noꞌtëquënáchin natëran naporini, ina nohuanton quëmasáchin israiroꞌsa huaꞌanënchitonhuëꞌ. Quëmá quëran pipipisopitanta inapita huaꞌanënchitonahuëꞌ. Co aꞌnapitari huaꞌanënchitonahuëꞌ.

¹⁴ Iporaso nipirinhuëꞌ, co quëmari huaꞌanëntomiataponhuëꞌ. Sinioro yonisarin aꞌnara quëmapi noya niꞌninsoꞌ. Quëmasoꞌ camairinquënsoꞌ, co natëranhuëꞌ. Ina niꞌton, quëma yaꞌhuërënamën piyapinënpita huaꞌanëntacaso marëꞌ ina acoarin, itërin.

^15-16 Napotahuaton, Samoirosoꞌ Quiricaro ninano quëran paꞌnin. Israiro sontaroꞌsasoꞌ Saono imapi huiristinoꞌsa ahuëcaiso marëꞌ. Quiricaro quëran pipirahuatona Quipiaquë canconpi. Shaꞌhuitëranquëmaso chachin Quipiasoꞌ, Mincamin huënton noꞌpanënquë yaꞌhuërin. Inaquë nipachina Saonosoꞌ sontaronënpita pichirin. Saota pasaraꞌ icanin. Saono, Conatan, sontaronënapita, inapitaso Quipiaquë quëparitopi. Yaꞌhuërëꞌ huiristino sontaroꞌsasoꞌ, Miquimasëquë nëꞌmëtë pëinëna otënaꞌpiatona yaꞌhuëipi.

¹⁷ Huiristino sontaroꞌsa yaꞌhuëapi quëran cara huënton sontaroꞌsa pipirin. Inapitasoꞌ, ahuëtacaiso marëꞌ itohua itohua paꞌpi. Aꞌna huëntonsoꞌ, Opara ninanoquë paꞌnin. Inaso ninanoꞌ, Soaro parti yaꞌhuërin.

¹⁸ Aꞌna huëntontaꞌ, Piti-oron ninanoquë paꞌnin. Yaꞌhuërëꞌ aꞌna huëntonsoꞌ, Sipoin motopiana quëran motopiaꞌhua pantarinquë paꞌnin. Inotëro parti ira paꞌninꞌpaꞌ inasoꞌ.

¹⁹ Yaꞌipi israiroꞌsa noꞌpanënaquë co aꞌnaya tëranta huaꞌna camayo yaꞌhuërinhuëꞌ. Huiristinoꞌsaso ina nitotoroꞌsa niponaraihuëꞌ, co israiroꞌsa yaaꞌchintopihuëꞌ: “Aꞌchintohuatëhuaꞌ, inahuanta ahuëtacaiso marëꞌ sahuëniroꞌsaꞌ, nansaroꞌsaꞌ, inapita nisapi,” taꞌtonaꞌ, apiratopi aꞌchintacaisoꞌ.

²⁰ Israiroꞌsa noꞌpaꞌ ohuërëpiso huaꞌnatë achiꞌmohuachinara, huiristinoꞌsa paapapi. Atoꞌnatacaiso marëꞌ paapapi. Nanpanënaꞌ, imotonënaꞌ, osonënaꞌ, inapitanta achiꞌmohuachinara napopi.

²¹ Noꞌpaꞌ ohuërëpiso huaꞌnatë, nanpa, inapita toꞌnahuachinara, catotë coriqui maꞌpatopi. Yaꞌhuërëꞌ imoto toꞌnacasoꞌ, ohuantiinan anoyatacasoꞌ, inapita marësoꞌ, aꞌnatëra coriqui maꞌpatopi.

²² Napoaton Saono, Conatan, inapitaráchin sahuëni, nansa, inapita yaꞌhuëtopi. Sontaronënapitaso ahuëtohuachinara, co aꞌnaya tëranta inapita yaꞌhuëtopihuëꞌ.

²³ Napoasoi aꞌna huëntonaca huiristino sontaroꞌsa Miquimasi motopitaëchin paꞌsapi.