1 Samuel 11 - Chayahuita (Shahui)

Saonori amonoꞌsa minsërinsoꞌ

¹ Naporo tahuëriꞌsa amonoꞌsa copirnonënasoꞌ, Naasë itopi. Inasoꞌ, sontaronënpitarë chachin Capisë ninano itopiquë paꞌnin. Inaso ninanoꞌ, Carata parti yaꞌhuërin. Inaquë paꞌsahuaton sontaronënpita ahuëtacaiso marëꞌ noyá acoraꞌpiarin. Ina ninano ahuëcaiso marëꞌ naporin. Napoaponahuëꞌ, yaꞌhuëhuanoꞌsari nanan aꞌpatopi: —Ama ahuëcoisohuëꞌ, anoyatahuaꞌ. Napohuatan quëma huaꞌanëntarancoi huachi, itopi.

² Napotohuachinara, inariso itapon: —Noyapaꞌ. Anoyatahua nipachin. Napoaponahuëꞌ, yaꞌipinquëma inchinan yaꞌpira ocoichinquëmaꞌ. Naporo huarëꞌ canpitarëꞌco anoyatarahuë. Inapotatënquëma atapanaꞌhuanquëmaso marëꞌ napotaranquëmaꞌ, itërin.

³ Napotohuachina Capisë ansianoꞌsari itapon: —Canchisë tahuëri quëtocoi. Yaꞌipi israiroꞌsa yaꞌhuëpiquë catahuainacoiso marëꞌ nanan aꞌparai. Coꞌsoꞌ inso tëranta catahuahuachinacoihuëꞌ, inapotocoi nipachin, itopi. Napotohuachinara, Naasësoꞌ nohuantërin.

⁴ Ansianoꞌsasoꞌ, comisionoꞌsa aꞌpapi. Inapitasoꞌ, Saono yaꞌhuërinso ninanoquë huëꞌsahuatonaꞌ, Naasë naporinso shaꞌhuiquiipi. Ina natanatonaꞌ, yaꞌhuëhuanoꞌsaso caniaritopi naꞌnëmiatacaisoꞌ.

⁵ Naporoꞌ Saononta imin quëran huënantárin. Tororoꞌsa asacatërin quëran quënantárin. Piyapiꞌsa naꞌnërapisoꞌ natanaton, natantërin: —¿Maꞌta onpoatona naꞌnërantapisoꞌ? tënin. Napohuachina Capisë quëran huëcatona nanan quëpisoꞌ aꞌnari shaꞌhuitërin.

⁶ Ina natanpachina, Saonoso Yosë ispiritonëni yaꞌcoancantërin. Naporoꞌ Naasë naporinso marëꞌ paꞌpi noꞌhuitërin.

⁷ Noꞌhuitaton cato toronënpita tëparin. Teparahuaton piꞌpian piꞌpian yaquiraꞌpiarin. Inapotahuaton, aꞌnapita comisionoꞌsa yaꞌhuërëꞌ, yaquirinso quëtëraꞌpiarin. Naporahuaton yaꞌipi israiroꞌsa iso pochin shaꞌhuitacaiso marëꞌ camairin: “Saono Samoirorë chachin Pisiqui ninano itopiquë niyontonacasoꞌ camaitopi. Ina piquëran Capisiquë yaꞌhuëpisopita paꞌpoyacaso marëꞌ Saono imarihuaꞌ. Insosona co yapaꞌpachinhuëꞌ, toronënpita tëpatona iso pochin yaquiraꞌpiaponaꞌ,” itëraꞌpiapi. Napotohuachinara, yaꞌipi israiroꞌsa yaꞌhuëpiquë Yosë nohuanton paꞌpi tëꞌhuatopi. Napoatona yaꞌipiya quëran catahuatacaiso marëꞌ paꞌpi.

⁸ Pisiqui ninanoquë niyontonpachinara, Saonosoꞌ sontaronënpita pichirin. Cara pasa huaranca israiroꞌsa niyontonpi. Cota huënton quërantaꞌ, cara shonca huaranca niyontonpi.

⁹ Ina quëran Capisë comisionoꞌsa itapon: —Yaꞌhuëramaquë paantatoma shaꞌhuiconcoꞌ: “Tashiraya camotëchin nisahuasoꞌ paꞌpoyaranquëmaꞌ,” tënin Saono, itoncoꞌ, itërin. Napotohuachina, inahuaso Capisiquë yaꞌhuëpisopita inachachin shaꞌhuitonpi. Ina natanahuatonaꞌ, capa cancantopi.

¹⁰ Naporoꞌ inahuasoꞌ, Naasë copirno nanan aꞌpatopi: —Tashiraya maꞌsona nohuantëransoꞌ nitancoiso marëꞌ yaꞌipicoi paꞌsarai, itopi.

¹¹ Tahuëririnquë Saonosoꞌ, sontaronënpita cara huënton acorin. Naporahuaton coꞌhuara tahuëriyátërasohuëꞌ, inimicoroꞌsa yaꞌhuëapiquë yaꞌcontonpi. Napotatona paꞌpi notohuaroꞌ Amon sontaroꞌsa tiquipi. Camotëchin huarëꞌ ahuëatona napotopi. Caraíchin co tëpapisopitahuëꞌ ayanquëëtopi. Napoaton aꞌnaya aꞌnaya taꞌapi.

¹² Ina quëran aꞌnaquën israiroꞌsari Samoiro itaponaꞌ: —Saono nóya huaꞌanëntiinpoaso nipirinhuëꞌ, aꞌnaquënso iꞌhua nocanpi. ¡Napopisopita tëpacaso yaꞌhuërin! Quëina inapita tëpaꞌi, topi.

¹³ Napopirinahuë Saonori itapon: —Sinioro ipora tahuëri israiroꞌsanpoa nichaꞌërinpoaꞌ. Napoaton ipora tahuëri co insonta aquëtë tëpacaiso yaꞌhuërinhuëꞌ.

¹⁴ Samoironta yaꞌipi israiroꞌsa itapon: —Huëco paꞌahua Quiricaroquë. Inaquë Saono caniaritarin huaꞌanëntiinpoasoꞌ, itërin.

¹⁵ Napotohuachina, yaꞌipi israiroꞌsa inatohua paꞌpi. Inaquë nipachina, Sinioro chinotacaso marëꞌ nëꞌmëtë pëi nipiso notënanquë niyontonpi. Niyontonatonaꞌ: “¡Saono huaꞌanëntërinpoa huachi!” topi chiníquën nonatonaꞌ. Ina quëran Sinioro chinotacaiso marëꞌ maꞌsharoꞌsa tëpapi. Nanan anoyatërëso marëꞌ itopisoꞌ. Inapoaton Saono capa cancantërin. Aꞌnapita israiroꞌsanta capa cancantopi.