1 Samuel 10 - Chayahuita (Shahui)

Israiroꞌsa copirnonën nicacaso marëꞌ Saono acopisoꞌ

¹ Naporoꞌ Samoirosoꞌ, toma taparinsoꞌ manin. Masahuaton Saono opomototërin. Napotahuaton apinorin. Ina quëran itapon: —Sinioro chachin israiroꞌsa huaꞌanëntacaso marëꞌ ipora tahuëri acorinquën. Quëmari huaꞌanëntahuaton, yaꞌipi inimiconënpita quëran nichaꞌësaran. Piyapinënpita huaꞌanëntacaso marëꞌ Yosë acorinquën. Ina nitotamaso marëꞌ apira shaꞌhuitaranquënsopita yaꞌipi naniarin:

² Apira paꞌpatan cato quëmapiꞌsa Sirisa ninano itopiquë quënancoanan. Inaso ninanoꞌ, Mincamin huënton noꞌpaꞌ mapiquë yaꞌhuërin. Naquira paꞌpitopiso yaꞌcariꞌ, quënancoanan. Inapitasoꞌ, moraroꞌsa nani quënanpiso shaꞌhuitarinën. Tataparionta canpita marëꞌ co napion cancantërinsoꞌ, shaꞌhuitarinquëmaꞌ: “¿Intopata iporaso huiꞌnahuë piyapinënë chachin nisaca?” tënin, itaponën.

³ Amasha aquëcha paꞌsahuaton, Taporo itopiquë cansaran. Inaquë aꞌnara insina nara yaꞌhuërin. Inaquë cara yaꞌpi nacapiaran. Inahuasoꞌ, Pitiri ninanoquë Sinioro chinotacaiso marëꞌ pantarapi. Aꞌnasoꞌ, cara chipo quëpararin. Aꞌnantaꞌ, cara pan quëpararin. Aꞌnantaꞌ, aꞌnara shaꞌhuëtë morsaquë huino taꞌpanpinan quëpararin.

⁴ Inapitasoꞌ nontahuatënën, cato pan quëtarinën. Maꞌpaquëꞌ.

⁵ Ina quëran paꞌsahuaton Yosë Quipianën itopisoꞌ ninanoquë cansaran. Inaquë panca huënton huiristino sontaroꞌsa yaꞌhuërin. Ina ninanoquë yaꞌconpatamaꞌ, aꞌna huëntonaca pënëntonaꞌpiroꞌsa nacapiaramaꞌ. Yosë yonquirinso shaꞌhuirëꞌnachin huëꞌsapi, nacapiaran. Inahuasoꞌ, inahuara nohuanton artaro acopi quëran nohuaramarapi. Aꞌnaquën quëchitatona nisha nisha piꞌníriapi. Nisha quitara, pantirita, arpa, inapita piꞌníriapi. Pirinanoꞌsanta pihuiriapi nacapiaran.

⁶ Naporoꞌ Sinioro ispiritonën noyá yaꞌcoancantarinquën. Ina nohuanton quëmanta inapita pochin pënëntaran. Inapotahuatënquën Sinioro anishatarinquën.

⁷ Yaꞌipi inapita nanihuachin, maꞌsona noya nicacaso yonquiransoꞌ, niquëꞌ. Naporo Sinioro catahuararinquën huachi.

⁸ Naporahuaton Quiricaroquë quëchitaton paquëꞌ. Inaquë cantaꞌ, oshaquëranchin paꞌsarahuë. Inaquë Sinioro marëꞌ maꞌsharoꞌsa tëparahuato yaꞌipi ahuiquitarahuë. Aꞌnaquëontaꞌ, nanan anoyatërëhuaso marëꞌ maꞌsharoꞌsa tëparahuato, piꞌpian ahuiquitarahuë. Inaquë canchisë tahuëri ninaco. Cancona huarëꞌ ninaco. Naporoꞌ shaꞌhuitaranquën maꞌsona nicacaso yaꞌhuërinsoꞌ, itërin.

⁹ Nani nontohuachina, Saonosoꞌ paꞌnin huachi. Ipora pataso chachin Yosëri yonquirinsoꞌ, anishatërin. Naporahuaton naporo tahuëri chachin yaꞌipi Samoirori shaꞌhuitërinsopita nanirin.

¹⁰ Ina quëran Saono piyapinënë chachin Quipiaquë canconpi. Canconpachinara, aꞌna huëntonaca pënëntonaꞌpiroꞌsari nacapirin. Yosë yonquirinso shaꞌhuirëꞌnachin, huëꞌsapi nacapirin. Naporoꞌ Yosë ispiritonëni noyá yaꞌcoancantërin. Napoaton Saononta inapita pochachin Yosë yonquirinsoꞌ shaꞌhuirarin.

¹¹ Aꞌnapita pënëntonaꞌpiroꞌsarëꞌ, Saonoso Yosë yonquirinso shaꞌhuirarin niꞌpi. Ina niꞌsahuatonaꞌ, nohuitopisopitari inahua capini ninontopi: “¡Niꞌcochi Quisi huiꞌnionta naporarin! ¡Saononta pënëntonaꞌpichi paya!” nitopi.

¹² Aꞌnantaꞌ, inaquë nisarinso napoantarin: “Co tatanpo nohuanton pënëntërëhuahuëꞌ. Yosë nohuanton pënëntërëhuaꞌ. Napoaton Saononta Quisi huiꞌnin nipirinhuëꞌ pënëntërinso marëꞌ, co paꞌyanacaso yaꞌhuërinhuëꞌ,” tënin. Napoaton aꞌna piyapi aꞌnanaya maꞌsha nicaton aꞌpayantohuachina, paꞌyatopi napocaisoꞌ: “¡Coꞌta Saononta pënëntonaꞌpi antaꞌ!” topi.

¹³ Nani Yosë yonquirinso shaꞌhuihuachina, Saonosoꞌ piyapinënë chachin paꞌsahuatonaꞌ, yaꞌhuëpiꞌpaꞌ canconpi.

^14-15 Nani inaquë nipachina apini natanin: —¿Intohuata paꞌsápiramahuëꞌ? itërin. Napotohuachina Saonori itapon: —Coꞌta moraroꞌsa yonípoi paꞌnai. Yonisápiraihuëꞌ co quënanatoirahuëꞌ, Samoiro nicapoi paꞌnai, itërin. —¿Maꞌta inaso shaꞌhuitërinquëmaꞌ? Shaꞌhuitoco canta nitochi, itaantarin apini.

¹⁶ —“Nani moraroꞌsa quënanpi huachi,” itërincoi topinan, itërin Saonori. “Copirno yaꞌconaran,” itërinsoso nipirinhuëꞌ, co shaꞌhuitërinhuëꞌ.

¹⁷ Ina piquëran Samoiro yaꞌipi israiroꞌsa amatërin: “Huëco Mispaquë Sinioro chinotahuaꞌ,” taꞌton amatërin.

¹⁸ Nani niyontonpachinara itapon: —Sinioro israiroꞌsanpoaꞌ chinotërëhuaso naporin: “Carinquëma Iquipito quëran ocoiranquëmaꞌ. Inapitasoꞌ chiníquën nanantatona aparisitápirinënquëmahuëꞌ, nichaꞌëranquëmaꞌ. Nisha nisha piyapiroꞌsanta canarahuatënënquëma aparisitërinëma quëran nichaꞌëranquëmaꞌ.

¹⁹ Iporaso napoaponahuëꞌ, nocanatomaco aꞌporamaco. Caso Yosënëmaco niꞌton, parisitërama quëran nichaꞌëranquëmaꞌ. Copirno huaꞌanëntiinquëmasoꞌ natanatomaco, naporamaꞌ. Iporaso nipirinhuëꞌ, nohuantëramaso chachin nitaranquëmaꞌ. Napoaton iporasoꞌ, niꞌtonëhuëquë aꞌna huënton aꞌna huënton yaꞌcaritocoꞌ. Huëntoaꞌhuaroꞌsantaꞌ, inapochachin nicatona yaꞌcarichinaꞌ,” tënin Yosë, itërin Samoirori.

²⁰ Napohuachina yaꞌipi huëntonoꞌsa aꞌna huënton aꞌna huënton yaꞌcaritopi. Naporoꞌ Samoirori nicanapiso pochin nitohuachina, Mincamin huënton canatërin.

²¹ Ina piquëran, canatoroꞌsa huënton yaꞌcaritacaiso camairin. Yaꞌcaritohuachinara, Matri itopiso huëntoaꞌhuanën canatërin. Ina huëntoaꞌhuanënta yaꞌcaritohuachinara, Quisi huiꞌnin Saono canatërin. Canatohuachina yonípirinahuëꞌ, co quënanpihuëꞌ.

²² Napoaton naquëranchin Sinioro nataantapi: “¿Isëquë Sinioro Saono nisarin?” topachinara: “Nani isëquë nisarin. Pëꞌpëtoroꞌsa huáncana naꞌpirarin,” itërin Yosëri.

²³ Napohuachina, taꞌarahuatona naꞌpirin quëran ocoipi. Napotatonaꞌ, aꞌnapita israiroꞌsa huáncana aꞌnopi. Aꞌnohuachinara yaꞌipiya quëran nohuitopi huachi. Niꞌpirinahuëꞌ, co aꞌnaya tëranta ina napapi huanirinhuëꞌ. Tëꞌtëtëntaquëáchin aꞌnapitaso acoraꞌpiarin.

²⁴ Naporoꞌ Samoirori yaꞌipi israiroꞌsa itapon: —¡Yaꞌipima niꞌcoꞌ! ¡Iso mini Siniorori copirnonëma marëꞌ huayonin! ¡Co aꞌna Israiro quëmapi tëranta ina pochin huanirinhuëꞌ! itërin. —¡Ma inacha inaso paya! ¡Huaꞌqui tahuëri camaiinpoaꞌ! topi aꞌnapita israiroꞌsantaꞌ.

²⁵ Ina piquëran Samoirosoꞌ, onpopinsona copirno camaitacaso israiroꞌsa shaꞌhuitërin. Naporahuaton aꞌna soꞌnanpi quiricaquë ina ninshitërin. Nani ninshitahuaton Sinioro chinotacaso nëꞌmëtë pëiquë acorin. Ina piquëran yaꞌipi israiroꞌsa camairin yaꞌhuëpiꞌpaꞌ pacacaisoꞌ.

²⁶ Saonosoꞌ Quipiaquë yaꞌhuërin. Inaquë yapaꞌpachina, Yosë nohuanton naꞌa chiníquën cancantopisopita sontaroꞌsari imarin. Catahuacaiso marëꞌ imapi.

²⁷ Aꞌnaquëniso napoaponahuëꞌ, nocanatona itaponaꞌ: “¡Co onporonta isoso inimiconënpoapita quëran nichaꞌësarinpoahuëꞌ!” topi. Napotatona nocanpi. Naporahuaton co maꞌsha tëranta noya nicatonaꞌ, nicarapihuëꞌ. Saonoso nipirinhuëꞌ, napopisoꞌ natanaponahuëꞌ, co nataninhuë pochin ninin.